1 Kuulongolo gha machuwa isita, Yesu akawatola Petelo na Yakobu na Yohanamlongo ghaki, akayenda na weni kunani gha litumbi litali na haku wakawela weka yau. 2 Kula Yesu akaghalambuka wusu kuulongolo gha weni, wusu ghaki ukang'anyima handa lijuwa na nguu zyaki zikawela mbulete handa mhana. 3 Wala wavulwa waitatu wakawalola Musa na Eliya wakilongela na Yesu. 4 Bahala Petelo akamlongela Yesu, "Bambu, nenga ningulola ni maha tulikali baha! Paikawela ungupala wenga nenga nitechenga vibimilo viitatu. kimonga kya wenga, na kimonga kya Musa na kimonga kya Eliya."

5 Petulo pawelili akali akilongela bwitu, lihindu lyeni kung'anyima likawagubika, na lilowi likahyoghanilwa pala, "Hayu ni Mwana ghangu nimpalili nipalilwa na mweni, mumyughanile mweni."

6 Wavulwa pawayughanila nagha wakaguwa kifulifuli, wakatila nesu. 7 Yesu akawayendela, akawayavisa, akalonga, "Mugholoki, Mkotoho kutila!" 8 Pawalolesa kunani wakalola ng'ogha mundu mghangi, ila Yesu weka ghaki.

9 Pawawelili wakihuluka kuhuma kulitumbi, Yesu akawalongela kwa mkasu, "Mkotoho kumlongela mundu yeyosi mighalu hai mbaka Mwana wa Mundu atehinduka."

10 Hinu wavulwa wakamkonya, "Kwa kyani wavula wa laghililo lya Sapanga ampeghili Musa wangulonga ingupalwa Eliya ahiki huti?"

11 Yesu akawayanga, "Chakaka, Eliya angupalwa ahiki huti ayandali mighalu hyogha. 12 Ila ninguwalongela, Eliya kahika kala na weni wammanyili ng'ogha, bali wakamgholela mighalu mihakata handa waipalile weni. Mwana wa Adamu ategholelwa mahakata handa wamgholilile Elilya."

13 Pala wala wavulwa wakamanya yiwa awelili akiwalongela habali gha Yohana Mbatisa.

14 Hinu pawahikile kulipinga lya wandu, mundu mmonga akamyendela Yesu, akamtundamila manung'una, 15 akalonga, "Bambu, umuwoneli luhungu mwana ghangu kwaikiva kana kimbulengi, kangi angughaswa nesu, hagha ghangu muhumila kwa lipindi weka weka lipindi ghangi lingumguwisa kulyoto na lipindi ghangi kumasi. 16 Nimyeghili kwa wavulwa ghako, ila wawesili ng'ogha kumlamisa."

17 Yesu akawayanga, "Ghuli mwenga kiwelekwa kyenikuwela ng'ogha na kukwinila, kilekili kumkwinila Bambu! Nitelikala na mwenga mbaka ligha? Ghuli nitewafumilila mbaka ligha? Mniyegheli hayu mwana!" 18 Hinu, Yesu akamkalipila yula lihoka, na lihoka likamuhuka, na yula mwana akalama lipindi lila lila.

19 Hinu wavulwa wakamkovekela Yesu kumahala pawela ng'ogha na wandu, wakamkonya, "Kwakyani twenga tuwesa ng'ogha kumhumisa yula lihoka?"

20 Yesu akawayanga, "Kwaikiva muwela na ukwinila mayaghani. Ninguwalongela chakaka, paikawela muwela na ukwinila mayaghani handa mbeyu gha libiki lyeni kukemwa haladali, mtewesa kulongela litumbi hali, ‘Utupuki na uyendi kula mahala ghangi,’ na lyeni litetupuka. Na kwahela kindu kitesindwa kugholeka kwa mwenga!" 21 Yesu akalipinga, "Lihoka lya ndambu hai linguwesa ng'ogha kuhumiswa mbaka kwa kuyupa na kuwopa mulyo."

22 Kuulongolo, wavulwa pawalikungulile pamonga ku Galilaya, Yesu awalongilile, "Mwana wa Mundu atelekwa akamulwi na wandu wahakata." 23 "Watemkoma, ila lichuwa lya itatu atehindulwa." Wavulwa ghaki wakamng'ung'ulikila nesu.

24 Hinu Yesu na wavulwa ghaki pawahikili kummbwani wa Kapelinaumu, wakungula usulu wa lighuta lya Sapanga wakamyendela Petelo, wakamkonya, "Ghuli, mvula wa mwenga anguhipa usulu wa lighuta lya Sapanga?"

25 Petelo akayanga, "Ena, mweni anguhipa."

Hinu, Petelo paayingila mghati mwa lighuta, pambila hata kalongela lilando, Yesu akamkonya, "Simoni wenga unguliwachila niki kuhabali gha kuhipa usulu? Wankosi wa mlima wogha wangukungula usulu au kodi kuhuma kwa kina ghani? Kuhuma kwa wakola mlima au kwa wahenja?"

26 Petelo akayanga, "Kuhuma kwa wahenja."

Yesu akawalongela, "Hinu, wenikaya wangupalwa ng'ogha kuhipa. 27 Ila ili tukotoho kuwaghola wahyomi, uyendi mlihiwa ukalopoli homba, utoli homba wa mtumbulo kumlopola umgubutuli lilomo lyaki na hamu kumlomo utelola mapesa, utoli ukahipi usulu ghako na wa nenga."