1 Malawila pee, watambika wakulu wogha na vilongosi wa Wayahudi wakakonganika kangi kuhakula njila gha kumkoma Yesu. 2 Wakamuwopa mawoku na maghulu, wakamtola, wakamyegha kwa Pilatu, mkulu wa mmbwani.

3 Hinu, Yudasi, yula mweni kumhyuka, palolili yiwa Yesu wa mlamula kala, akaijutila akawahuyisila watambika wakulu vila vipandi vya lidini vya feza vigwala iselasini. 4 Yudasi Akawalongela, "Nenga ngosa kwa kuwayeghela mundu mwenikuwela ng'ogha na mahakata akomwi." Ila weni wakalonga,

"Hai ingututanga kyani twenga? Hau ni mghalu ghako."

5 Hinu Yudasi akatagha vila vipandi vya lidini lya feza magwala iselasini Mlighuta lya Sapanga , akahuma panji, akayenda akajipopotola mweni.

6 Watambika wakulu wakatola vila vipandi vya magwala, wakalonga, "Maha ng'ogha kuhanganya magwala hagha kuluhanja lwa Lighuta lya Sapanga kwaikiva hagha yahipwa ili mundu akomwi." 7 Hinu, wakalongelana, wakayatumila kwa kuhemilela litawa lya mimambi, ili liweli lya kusikila wahenja. 8 Ndiwa kwaikiva hata lelu wandu wangulikema litawa hali litawa lya Mwahi.

9 Hinu milando gha mlota Yelemia ikatimila nagha, "Watolile ghala magwala iselasini handa bei apeghilwi na wandu wa Izilaili kuhemelelela. 10 Wakatumila kuhemelelela litawa lya mimambi handa Bambu alaghilili."

11 Lipindi Yesu kagholoka kuulongolo gha Pilatu mwenikuwela kilongosi wa mbwani wa Waloma, mlongosa hayu akamkonya, "Wenga ndiwa nkosi wa Wayahudi?

Yesu akalonga, Wenga walonga nagha." 12 Ila watambika wakulu na vilongosi wa Wayahudi pawawelili wakimsitaki, mweni kayanga ng'ogha lilando.

13 Hinu Pilatu akamkonya, "Ghuli, unguyughanila ng'ogha masitaka hagha hyogha wangukusitakila wenga?"

14 Ila Yesu kayanga ng'ogha hata lilando limonga, hata hayu mlongosa akalikangasa nesu.

15 Wawelili wasyowilela lipindi lya mhambu gha Pasaka kilongosi wa Waloma kuwafughulila Wayahudi muwopwa mmonga wampalili. 16 Lipindi hali kuwelili na muwopwa mmonga mhakata, na lihina lyaki wamkema Yesu Balaba. 17 Hinu, wandu pawalikungulili pamonga, Pilatu akawakonya, "Mngupala nimuwoposoli ghani paghati gha hagha waivili, Yesu Balaba na Yesu wamkema Kilisito?" 18 Mweni ailongile nagha kwaikiva amanyili yiwa Yesu awelili kayeghwa kwa mweni kwaikiva gha wifu weka hela.

19 Pilato paawelili kalikala kukikalilo kya utoso, mdala ghaki akamyeghela ujumbi, "Ukotoho kughola kindu chochosi kwa mundu hayu mlungwana, kwaikiva uhiku wa lelo nihakilwa nesu panilota kwaikiva gha mweni."

20 Ila watambika wakulu na vilongosi wa Wayahudi wakawatumisila wandu wamluwe awoposolwe Balaba na Yesu akomwe. 21 Kilongosi akawakonya kangi, "Ni ghani paghati gha hagha waivili mngupala nimuwoposoli?"

Wakamuyanga, "Balaba!"

22 Pilato akawakonya, "Hinaa, nigholi kyani na Yesu wamkema Kilisito?"

Wogha wakayanga, "Awambwi kulipingika!"

23 Pilato akakonya, "Kwa kyani? Kaghola uhakata liki?"

Weni wakayendelela kutova lilowi. "Awambwi kulipingika!"

24 Hinu Pilato paamanya kawesa ng'ogha kughola lolosi, ila mkologhanyiko unguyendelela akatola masi, akakuwa mawoko kuulongolo gha weni, akalonga, "Nenga napamonga ng'ogha na mwenga kukumkoma mundu hayu, hinu hau ni mghalu wa mwenga!"

25 Wandu wogha wakalonga, "Mwahi ghaki uweli kunani gha twenga na kunani gha wana wa twenga!"

26 Hinu akamuwoposola Balaba, na pawayomola kumtova Yesu hilatu igholwa kwa ngosi, akamyegha ili awambwi.

27 Kuulongolo watovangondo wa Pilato wakamyegha Yesu mghati gha likuta lya lighuta lya wakulu, na wakakungula lipinga likulu lya watovangondo. 28 Wakamuwoposola nguu zyaki zyogha, wakamvika lihabiti lya sambalau. 29 Wakapotanga likokoma lya mihomi, wakamvikila kumutu ghaki, wakamvikila mkongocho kuliwoku lyaki lya kuliyila, wakatundamila manung'una kulongolu ghaki, wakamkinila wakilonga, "Kayimuka nkosi wa Wayahudi!" 30 Hinu wakamhunyila mata, wakautola hula mkongocho, wakamtovela mmutu. 31 Pawayomolili kala kumgholela ghala, wakamwoposola lila lihabiti, wakamvwalisa nguu zyaki, na wakamyegha ili akavambwi kulipingika.

32 Pawawelili wakiyenda mnjila, wamuwonili mundu mmonga lihina lyaki Simoni, mkola mlima wa Kilene. Na watovangondo wakampapusa kutola lipingika lya Yesu. 33 Pawahikili mahala pakemilwi Goligota, pangumaanisa mahala palifufu lya Mutu, 34 wakampegha Yesu divai ihanganyilwi na nyongu, ili anyweghi, ila Yesu paayesili akakanila kunywegha.

35 Wakamvamba mlipingika, na wakapeghana nguu zyaki kwa kukinisa mihu gha mlungu. 36 Wakatama, wakawela wangumugholokela. 37 Kunani gha mutu ghaki kulipingika, wavikile kibau kyeni kuyandikwa sitaka lyaki, "Hayu ndiwa Yesu, Nkosi wa Wayahudi." 38 Hinu wapokola waivili wavambilwi bahala, mmonga mbandi gha shotu na ghangi mbandi gha kuliyila.

39 Wandu wawelili wakityanga mahala pala wakamlighu malighu wakitika mutu ghao na kulonga, 40 "Wenga upalili kubomola lighuta na kuchenga ghangi kwa machuwa maitatu, ujilokoli hinaa umweni! Na uhuluki kuhuma kulipingika, ikiwela wenga ni Mwana wa Sapanga, ujihulusi kunani gha lipingika!"

41 Hilahila, vilongosi na watambika pamonga na wavula wa laghililo na vilongosi wa Wayahudi wakamkinila,wakilonga, 42 "Awalokolili ghangi, ila kujilokola mweni kawesa ng'ogha! Ghuli mweni ni nkosi wa Wayahudi! Hinu hinaa uhuluki mlipingika, na twenga tutemkwinila. 43 Amkwinilili Sapanga na akulonga yiwa mweni ni Mwana wa Sapanga hinu hinaa na Sapanga amlokoli handa angumpala!"

44 Hilahila na wala wavambilwi pamonga na mweni wakamlighu.

45 Kuhumila isaa isita pamuhi mbaka isaa itisa, lwisa totolo likagubika kunani gha mlima hula wogha. 46 Paihikili isaa itisa Yesu akalila kwa lilowi likulunga, "Eloi, Eloi, lama sabakatani?" Ingumaanisa, "Sapanga ghangu, Sapanga ghangu, kwa kyani ungunileka?"

47 Ila wala wagholokili pala pawayughanilili nagha, wakalonga "Angumkema Eliya." 48 Bwitu mmonga wa wala akayenda kwa kutula mbilo na kuyegha siponji akainjwika msiki. Akaivika mlidengi akampegha Yesu ili afyembi.

49 Waghangi wakalonga, "Uleki tuloli handa Eliya kanguhika kumlokola."

50 Hinu, Yesu akalila kangi kwa lilowi likulunga akahova.

51 Lipindi halihali lipasia lya nguu lya lighuta likabaluka vipandi viivili, kutumbulila kunani mbaka pahi. Mlima wogha ukahihimila na mighomba gha maganga ikabaluka. 52 Mamambi yakagubutuka lipala na wandu watangala wa Sapanga wahovili wakahindulwa. 53 Na weni, badili gha kuhinduka kwa Yesu, wakahuma mmimambi, wakayenda kummbwani wa Yelusalemu, na wakawoneka na wandu watangala.

54 Hinu, mkulu wa watovangondo na wala wawelili wakimgholokela Yesu pawawonili mhihimilu wa mlima na hila mighalu ihumilili, wakatila nesu,na wakalonga, "Chakaka mundu hayu awelili Mwana wa Sapanga."

55 Mahala pala pawelili na wadala watangala wakilola kwa utali. Na ndiwa wala wamkovekelili Yesu kuhuma ku Galilaya wakimtanga. 56 Wamonga gha weni wawelili Maliya, mundu wa kuhuma mbwani wa magidala, Maliya nyongo ghao Yakobu na Yusufu, pamonga na nyongo ghao wana wa Sebedayu.

57 Paihikili lumihi, akahika mundu mmonga mnaisa kuhuma Alimataya, akemilwi Yusufu na mweni awelili mvulwa wa Yesu, 58 akamyendela Pilato, akamluwa apeghwi higha gha Yesu. Pilatu akawalongela wampeghi. 59 Yusufu akatola hula higha, akabindilila sanda mbuleti gha maha, 60 akauvika mghati mwa limambi lyaki lya hyonu awelili kalihimba kwa kulihongola kumghomba. Hinu akalibilibisa linganga likulunga kuulongolu gha mlyango wa limambi, akayenda zyaki. 61 Maliya ahumili mbwani wa magidala na yula Maliya ghangi wawelili mahala pala, watama wangulola kulimambi.

62 Kilau ghaki, ingumanisa lichuwa lya kuulongolu lila lya mayandalilo, watambika wakulu na Mafalisayo wamyendelili Pilatu, 63 Wakalonga, "Mtundamilwa, tukumbwike yiwa yula mhwangi yambila gha kuhwegha ailongile, ‘Badili gha lichuwa lya itatu nitehinduka.’ 64 Kwaikiva gha nagha limambi ligholikelwi mbaka lichuwa lya itatu ili wavulwa ghaki wakotoho wakamhija na kuwalongela wandu uhwangi yiwa kahinduka. Uhwangi hau wa mwihu utewela wauhakata nesu, kupiti hula wa kuhyetu."

65 Pilatu akawalongela, "Ena, muwela na wagholokela. Hinu myendi mkagholokeli handa muwesa mwenga."

66 Hinu, wakayenda, wakaligholokela limambi, wakamatika lami kumalanga na kuvika ugholokela mkalipa.