1 Lipindi lila, nkosi Helodi ahyoghanilile habali zya Yesu. 2 Hinu, akawalongela wavulwa ghaki, "Mundu hayu ni Yohana Mbatisa, kahinduka kuhuma kwa wahovili, ndiwa kwaikiva kana makakala gha kughola mighalu gha kukangasa."

3 Helodi ndiwa awelili kamkamula Yohana, akamuwopa minyololu na kumvika mulighuta lya wawopwa, kwaikiva gha Helodia mdala wa Filipo, mwenikuwela mlongo ghaki. 4 Kwaikiva Yohanaawelili kamlongela Helodi, "Maha ng'ogha kwa wenga kulikala na hayu mdala!" 5 Helodi apalili kumkoma Yohana, ila awatilili wandu kwaikiva kwa weni Yohanaawelili mlota ghao.

6 Lichuwa limonga kumhambu wa kukumbwiki kuwelekwa kwaki Helodi, biti wa Helodia ahinili kuulongolo gha wandu. Mbaka Helodi akahekelela, 7 hata akalaghila kwa kulapa kumpegha hayu msikana chochosi atekipala.

8 Kunu biti akiwela kasoselwa na nyongo ghaki, akalonga, "Nipatili mutu wa Yohanamuluselu."

9 Nkosi akakolwa na lusungu nesu, ila kwa kila kilapo kyaki na kwaikiva gha wala wahenja pala kumuhambu, akalaghila apeghwi. 10 Hinu, Helodi akamlaghila mundu kulighuta lya wawopwa ahyengi mutu Yohana. 11 Mutu kya Yohanaukayeghwa muluselu, wakampegha yula msikana, na mweni akamyeghela nyongo ghaki. 12 Wavulwa wa Yohanawakahika wakatola higha ghaki, wakasika. Hinu wakayenda kumlongela Yesu.

13 Yesu paahyoghanilili ghala yamkolile Yohana mbatisa, akahuka mahala pala kwa kutumila whatu, akayenda mahala penikuwela ng'ogha na wandu ili aweli weka yaki. Ila wandu wapatili habali, wakamkovikela kwa maghulu kuhuma kumimbwani. 14 Hinu Yesu paahulukili mmbali gha bahali akalola lipinga likulunga lya wandu, akawawonela luhungu na akawalamisa mavina ghao.

15 Paihikili lumihi, wavulwa ghaki wakamuhikila na kumlongela, "Haku kwahela wandu wenikulikala haku, na masaa yahonga kala, uwatauli wandu hagha wayendi kuvimbwani ili wakajihemileli mulyo."

16 Yesu akawalongela, "Maha ng'ogha wayendi, muwapeghi mwenga mulyo."

17 Ila weni wakamlongela, "Tuwela na mibumunda itanu na homba waivili hela."

18 Yesu akawalongela, "Mniyegheli haku." 19 Akawalaghila wandu watami pahi mmanyahi. Hinu Yesu akaitola hila mibumunda miitanu na wala homba waivili, akayinula mihu ghaki kunani kundumba, akahighila, akametula hila mibumunda, na wavulwa ghaki wakawapegha wala wandu. 20 Wandu wogha wakalyegha, wakayukuta. Hinu wavulwa wakakungula vihighalili, wakamemesa vibeja ikumi na ivili. 21 Wandu wogha walyeghili wawelili walumi ielfu itano, wakileka kuwavalanga wadala na wana.

22 Lipindi lilalila Yesu akawalongela wavulwa ghaki wakweli muwhatu, wamlongoleli kumwambu gha lihiwa Galilaya kunu mweni anguyataula mapinga gha wandu. 23 Badili gha kuwatawula wandu, akakwela mkitumbi weka ghaki kuyupa, na paihika lumihi, mweni awelili kula weka ghaki, 24 lipindi lila hila whatu sehelela pabehi na paghati gha lihiwa, ila itolilwi na mawimbi kwaikiva liyegha liwelili lunguighasa ghasa.

25 Uhiku pabehi na kuchiya, Yesu akawayendela wavulwa kwa kutyanga kunani gha masi. 26 Wavulwa ghaki pawamlola akityanga kunani gha masi wakatila nesu, wakalonga, "Ni lihoka!" wakakuwa lilowi kwa holu.

27 Lipindi lilalila, Yesu akalonga na weni, "Mtulili ni nenga. Mkotoho kutila!"

28 Petelo akamyanga, "Bambu, handa ni wenga chakaka, nilongeli nityangi kunani gha masi nihiki kwa wenga."

29 Yesu akalonga, "Ena, uhiki." Hinu, Petelo akahuluka mula muwhatu akatyanga kunani gha masi, akamyendela Yesu. 30 Ila paaliwonili lila liyegha, akatila, na akatumbula kudidimila mmasi, akalila kwa lilowi, "Bambu,unilokoli!"

31 Lipindi lilalila Yesu akalangiha liwoku lyaki, akamkola na kumlongela, "Wenga mundu mweni kukwinila mayaghani! Kwa kyani ulolile holu?"

32 Hinu wogha wakakwela muwhatu, na liyegha likaponga. 33 Wogha wenikuwela mghati mwa hila whatu, wakamtundamilila, wakilonga, "Chakaka wenga ni Mwana wa Sapanga."

34 Pawahubhuka, wakahika kumlima wa Genesaleti. 35 Wandu wa kula pawammanyili, yiwa mweni ni Yesu wakalandala habali zyaki kogha na kogha mbandi hila. 36 Wakamluwa akotoho kuwakanisa kuyavisa luviniku lya nguu ghaki. Na wogha weni kumyavisa wakalama.