1 Mafalisayo na Masadukayu wamyendilili Yesu, na kwa kumyesa, wakamlongela awagoleli kilangihi kuhuma kundumba. 2 Ila Yesu akawayanga, "Paihika lumihi mwenga mngulonga, kunani kutewela kuponga kwaikiva kunani kunguwoneka kukeli!" 3 Na malawila pee mngulonga, "Lelu kutewela na liyegha, kwaikiva kunani ni kukele na kangi mahindu yatangala!" Hinu, mwenga mngumanya nesu kuvula lipindi kwa kulola muwoneku wa kunani, ila mwenga mngusindwa kumanya vilangihi vya mighalu yeni kuhumila machuwa gha lelo. 4 "Kiwelekwa haki kya maha ng'ogha na kiwela ng'ogha na utundamilu! kingupala kilangihi, ila kitepokela ng'ogha kilangihi kyokyosi ila kilangihi kila kya Yona." Hinu, akawaleka, akayenda zyaki.

5 Wavulwa ghaki pawahubhuka kala mbandi ghangi gha ipili gha lihiwa, wakamanya yiwa waliwasuwa kupapa mibumunda. 6 Yesu akawalongela, "Mlihungi na simika gha Mafalisayo na Masadukayu!"

7 Wakalongelana weni kwa weni, wakilonga, "Angulonga nagha kwaikiva tuyegha ng'ogha mibumunda."

8 Yesu akamanya kila wawelili wakilongelana, hinu akawalongela, "Mkotoho kusindana mwenga kwa mwenga kulongelela libumunda. Mngupalwa mnikwinili nenga." 9 Ghuli, mmbila mmanya ng'ogha? Ghuli, mkumbwike ng'ogha pametulili hila mibumunda mhano kwa wala wandu ielufu itano walyeghili? Ghuli, mmemesili vibeja vininga vya vila vihighalili? 10 Au, hila mibumunda isaba wapeghilwi wala wandu ielufu njechi, ghuli, mkungulili vibeja vininga vya vila vihighalili? 11 Hinu mmanya ng'ogha yiwa niwelili ng'ogha nikilongelela habali gha mibumunda? Mjihungi na simika lya Mafalisayo na Masadukayu!

12 Ndiwa wavulwa wakamanya yiwa awelili kalonga ng'ogha mghalu wa mibumunda au simika ila mavulo gha Mafalisayo pamonga na Masadukayu.

13 Yesu paahikili mbandu gha Kaisali kula wangupakema Filipi, awakonyili wavulwa ghaki, "Ghuli wandu wangulonga yiwa Mwana wa Mundu ni ghani?"

14 Wakamyanga, "Waghangi wangulonga yiwa ni Yohana Mbatisa, na waghangi Eliya, ghangi Yelemia au mmonga wa walota wa Sapanga."

15 Yesu akawakonya, "Ghuli, mwenga mngulonga nenga na ghani."

16 Simoni Petelo akayanga, "Wenga ndiwa Kilisito, Mwana wa Sapanga mwenikuwela mkomu."

17 Yesu akalonga, "Uhighilwa wenga Simoni mwana wa Yona, kwaikiva kwahela mundu yeyosi kakugubutulila hali, ila Tati ghangu mwenikuwela kundumba ndiwa kakugubutulila. 18 Na nenga ningukulongela: Wenga ni Petelo, na kunani gha mghomba hau nitechenga lipinga lya wandu weni kumkwinila Kilisito, hata makakala gha kihu yatewesa ng'ogha kulisinda. 19 Nitekupegha funguu zya Unkosi wa Kundumba, na kila utekiwopa mumlimawogha, kitewopwa na kundumba, hilahila kila utekiwoposola kumlimawogha kitewoposolwa na kundumba."

20 Hinu akawakanisa wavulwa ghaki wakotoho kumlongela mundu yeyosi yiwa mweni ndiwa Kilisito.

21 Kuhuma lipindi lila Yesu atumbulili kuwamanyisa lipala lipala wavulwa ghaki yiwa ingumpala ayendi Yelusalemu na kukolwa na mahakilo matangala kuhuma kwa wagogolu, watambika wakulu na wavula wa laghililo mbaka ahovi, ila lichuwa lya itatu atehinduka.

22 Petelo akamtola mahala paweka akatumbula kumkalipila, akilonga, "Sapanga akotoho kughola hali! mghalu hau utekukola ng'ogha!"

23 Ila Yesu akaghalambuka, na kumlongela Petelo, "Uhuki kuulongolo gha nenga, Lihyukana! Wenga ni mhakata kwa nenga. Mawachilo ghako gha kisapanga ng'ogha, ila unguwachila kimundu"

24 Hinu Yesu akawalongela wavulwa ghaki, Mundu yeyosi mwenikupala kunikovikela nenga, ingumpala ajikanili mweni, atoli lipingika lyaki, anikovikeli. 25 Kwaikiva mundu mwenikupala kulokola ukomu ghaki mweni, hayu ateuyalamisa, 26 ila yeyosi mwenikuyalamisa ukomu ghaki kwaikiva gha nenga atepokela ukomu wa uchakaka. Kwaikiva atepata fwaida ghani mundu kupokela mlima wogha, ila akayalamisa ukomu ghaki? Kwaikiva kwahela kindu mundu anguwesa kuhipa ili apati ukomu ghaki. 27 Kwaikiva, Mwana wa Adamu atehika kuukulu wa Tati ghaki pamonga na watumikila wa kundumba wa Sapanga, na haku ndiwa atempegha kila mundu kukovekelana na matendu ghaki. 28 Chakaka ninguwalongela, "Kuwela na waghangi bahala wenikuwela watehova ng'ogha pambila gha kumlola Mwana wa Mundu akihika ku Unkosi ghaki."