Mateus 26

Vahe vetadaa kwalhi ya kumdara nakumgaa Yesu

1 Yesu areafiriti kuhinya ka mburi khabuna, ekavaba vahina kuu, 2 "Mureila ite yekunetakho maaze manu henekhwa na elha ya Pasaka, naho Muinyi wa Mhe eneotijwa he vahe vemsanuia aremawa misumari he msaraba." 3 Niho vagiru va muaresi hawe na vaagiru vazime vekasahe he minda ya mgiru wa vearesija ilhe kuu ni Kayafa. 4 Vekadaa kwalhi ya kumdara nakumgaa Yesu. 5 Mira vekaiseko ite, " Ka mburi tusiiboi to he muaze wa elha ya Pasaka, kwaite venegera aku he vahe."

Mlage muwe etamsuiya Yesu malhoma are Betania

6 Yesu eeaha Betania he minda yakwe Simoni hu eeloo lukoma, 7 Heka madamo Yesu eezokodie ekua viaghu vya chamagheri, mlage muwe ekalita na nyhupa iboiiwe kwa isaheru lisewe Alabasta ihue malhoma ya mihaku mikumure yesumu kikulho ekailha ka nyhupa ekamsuiya Yesu he mua. 8 Mira vahina kuu vareakho to vekasanuiwa, vekalhasu, "Kwaakhoni eoni ka malhoma ya mihaku mikumure to? 9 Ya malhoma yeseedidiwe kwa mihaku mikumure naho ka mihaku vekaowe vahuye." 10 Yesu ekakhwa eilie cho veekuyo, ekavaba, "Niakhoni mumnyamarisha ya mlage? U aaniboia mburi kulhosha. 11 Kwaite vahuye munekhwa navo maaze makhabuna, mira temkakhwa naani maaze makhabuna. 12 Areanisuiya malhoma he msa gho eekutaboiya kikulho kwa mburi ya muaze gho wa kurakewe he mbira. 13 Kweri nimubaya, kira hodi henebirikirwa Mburi Kulho he idi ikhabuna, ya mburi eboie ya mlage, nayo ineyowe kwa kuhulhawe kuu."

Yuda aadumu kumkherii Yesu

14 Kwato muwe wa vahina ikado na vanu esewe Yuda Isikariote, ekaso he vagiru va vearesija, 15 naho ekavalhasu, "Munenio kiakhoni nikunemkherii Yesu he kune?" Vekamtaria vikhao salasini vya madini mihaku. 16 Kulholhoshi ata Yuda Iskarioti ekakhwa edaa madamo makulho yeneye kumkherii Yesu.

Yesu etaa viaghu vya elha ya Pasaka hawe na vahina kuu

17 He muaze wa bosi wa elha ya mikate isibutuwe hamira, vahina vakwe Yesu vekamliaha Yesu, vekamlhasu, "Udumu turekuboia le ho uneaiya viaghu vya elha ya Pasaka?" 18 Ekavaba, "Soni he mhe muwe are he muang’a muremba," "Mhinya etetusugha ekuba ite, madamo gho yaahe sina nineaiya viaghu vya elha ya Pasaka hawe na vahina gho he minda kechi." 19 Kwato vahina vekaboi sahucho Yesu evabae, navo vekarake kikulho mburi ja elha ya Pasaka. 20 Hareahe chamagheri, Yesu ekazokhodi hawe na vahina kuu ikado na vanu veekua viaghu. 21 Vareakhwa vea viaghu, Yesu ekavaba, "Namubao, mhe muwe he kune enenikherii." 22 Vahina kuu vekadarwa ni vuhuye vugirusha, vekalholhoshi kumlhasu, muwe muwe, "Dilao hile niani?" 23 Yesu ekavaba, "Hu eginhie he ibakuri mkate hawe naani, niu enenikherii. 24 Muinyi wakwe Adamu eneso he Kiumbi sakigi egondiiwe. Mira henekhwa na manyamarisho hehu muhe enemkherii Muinyi wa Muhe, cheseekhwa ni keba ka muhe teseeakhoike." 25 Niho Yuda, huye eedumue kumkherii Yesu ekamlhasu Yesu ekaba, "Mhinya hile niani?" Yesu ekamba, "Ari waayo."

Viaghu vyakwe Dilao vitalholhoshijwa

26 Ata veekua, Yesu ekadori mkate, ekamba Kiumbi hongera, ekaubendula, ekavao vahina kuu ekuba, "Dorini mua, yawo niu msa gho." 27 Naho ekadori kikonho chilo divai, ekamba Kiumbi hongera, ekavao ekuba, "Wahani vakhabuna heya kikonho cha divai. 28 Ya niu sako gho iaija Iaghano la Kiumbi na vahe vakumure, huyo isuika kwa mburi ya vahe vakumure kwa kuvakaia makusa."