1 Chimwecho, Mnungu kwa lisungu lake, watipacha njhito iyi ni chimwecho sitikufa mtima. 2 Tavisiya vindhu va njhoni ni vachisisi. Sitikhala kwa kunyenga, kapina kwa kulipundula mawu la Mnungu, nambho kwa kuujhiwicha uzene padanga ni kujhiika panjhi mmalamulo ya mitima ya wandhu pamaso pa Mnungu. 3 Ata ngati Uthenga Wabwino uwo tilalikila wabisika, wabisikape kwa wandhu anyiyao samkhulupilila Mnungu. 4 Anyiiwo sakhulupilila ndande mdani wa Mnungu uyo walamula jhiko lino wazithila mdima njelu zao sadakhoza kuona dangalila la Uthenga Wabwino wa ulemelelo wa Kilisito uyo wali chifani chokwanila cha Mnungu. 5 Ife sitijhilalikila tachinawefe nambho timlalikila Kilisito uyo wali Ambuye, ni tachinawefe uku tili atumiki wanu ndande ya Yesu. 6 Mnungu uyo wadakamba, "Dangalila lilangalile pamdima," nde uyo waiwalicha mitima yathu, nikutipacha dangalila la kujhiwa ulemelelo wa Mnungu uwo uwala pamaso pa Kilisito.

7 Ndiipo ife tili ni kuikila uku tilingana ni miphika dala ijhiwike kuti mbhavu imeneyo yaikulu ichoka kwa Mnungu asati kwatu tachinawefe. 8 Tilaga kila mtundu, nambho sitiyomwechedwa, tikhala ni mandha nambho sitikufa mtima, 9 tivutika, nambho Mnungu siwatileka, tigwechedwa panjhi nambho sitidimbika. 10 Siku zonjhe afuna kutipa ngati umo adamphela Yesu, dala umoyo wa Yesu uonekele mmatupi yathu. 11 Ife tili amoyo sikuzonjhe tachochedwa timwalile ndande ya Yesu, dala umoyo wa Yesu uonekele mmatupi yathu yayo yamwalila. 12 Chimwecho, nyifa ichita njhito mkati mwathu, nambho umoyo uchita njhito mkati mwanu.

13 Yalembedwa mmalembo ya Mnungu, "Nidamkhulupilila Mnungu, ndendande nidakamba." Nafenjho tikakhala ni mtima umweujha wachikhulupi, nafe tikamba, 14 uku nitijhiwa kuti Mnungu yujha wadamuhyucha Ambuye Yesu, siwatihyuche ife pamojhi ni Yesu nikutipeleka ife pamojhi ni anyiimwe kwaiye. 15 Yonjheya ni kwa ndande yanu, dala ubwino wa Mnungu yapo wafikila wandhu ambili kupunda, mayamiko yachuluke kupunda, kwa ulemelelo wa Mnungu.

16 Chimwecho, sitikufa mtima ata ngati matupi yathu yalema ni kuzeeka, nambho mkati tichitidwa kukhala achipano kila siku. 17 Kulaga kwathu nikochepa, ni kwa ndhawi yochepape, nambho kutikonjekela ulemelelo wa muyaya uwo upitilila vindhu vonjhe ivo tivilindilila. 18 Chimwecho, tipenyelela kupunda vindhu ivo sivioneka. Mate yake vindhu ivo vioneka ni vandhawi yochepape, nambho ivo sivioneka ni vamuyaya.