1 Tijhiwa kuti misasa yathu iyo tikhala chipano, pajhiko la panjhi mate yake thupi lathu, likawanangidwa, Mnungu siwatipache nyumba ina kumwamba, iyo siidamangidwe ni wandhu. 2 Chipano, tibuula kupunda yapo tikhala pajhiko nitipenyelela kwa khumbilo lalikulu kuvekedwa thupi la kumwamba. 3 Zenedi, yapo sitivekedwe thupi la kumwamba, sitionekana kuti tilibe thupi. 4 Tili tikali kukhala pa nyumba ino ya jhiko la panjhi, tibuula kwa vindhu vambili ivo vitilemelela, sitifuna tivule thupi lino lakufa nambho tili ni khumbilo lakuvekedwa thupi lijha silikufa, dala chijha chikufa ching'anamulidwe ni umoyo. 5 Mnungu nde uyo watichitila ndande ya chindhu chimenecho, nayo watipacha Mzimu wake wa Mnungu utichimikizile yonjhe yayo watiikila.

6 Tili nganganga siku zonjhe. Tijhiwa kuti kukhala moyo pathupi ili ni kukhala patali ni Ambuye. 7 Pakuti tikhala kwa chikhulupi, asati kwa yajha tiyaona. 8 Nambho tili nganganga ni tikhumbila kulisiya thupi ili kuti tikhale pamojhi ni Ambuye. 9 Chimwecho chindhu chachikulu kupunda ni kumkwadilicha, ikhale tikhala pano pajhiko kapina kumeneko kumwamba. 10 Taonjhe sitiime pachogolo pampando wa Kilisito dala tilamulidwe nayo, dala kila mmojhi walandile icho wafunika kulandila kwa vichito ivo wadavichita yapo wamakhala pajhiko, vikhale va bwino kapina voipa.

11 Ife tijhiwa ubwino wa kumulambila Ambuye, chimwecho tijhitahidi kwakoka wandhu wina. Mnungu watijhiwa mokwanila, nane nikhulupilila kuti mtijhiwanjho bwinobwino. 12 Sitifuna kujhikweza kwanu, nambho tifuna kukupachani ndande zathu zoona ufulu kwanu, dala mkhoze kwa yangha yao ajhidamila vichito vawo va kubwalo kupunda kusiyana ni umo ali mmitima yao. 13 Ata ngati tioneka ozelezeka, imeneyo ndande ya Mnungu, ngati tili olungwamika, imeneyo ndande yanu. 14 Chikondi cha Kilisito chitichogoza, ndande tikhulupilila kuti mundhu mmojhi wadafa ndande ya onjhe, chimwecho onjhe agwilizana ni nyifa yake. 15 Wadafa ndande yaonjhe, dala kuti anyiyao akhala moyo asadakhala moyo kwa ndande yao achinawene, nambho akhale moyo ndande ya uyo wadafa, ni kuhyukichidwa ndande yao.

16 Chimwecho, kuyambila chipano sitimlamula mundhu waliyonjhe kwa kumpenya, ngati umo amjhiwila wandhu. Ingakhale ndhawi ina tidampenya Kilisito ngati mundhu, chipano sitichitanjho chimwecho. 17 Chimwecho mundhu waliyonjhe wakalunjana ni Kilisito, wakhala mundhu wa chipano, yakale yatha, yakhala yachipano. 18 Yaya yonjhe yachitika ni Mnungu, kutivanicha ife ni iye kwa kupitila Kilisito, nikutipacha njhito ya kwavanichana wandhu ni iye. 19 Ndekuti Mnungu wadali mkati mwa Kilisito niwalivanicha jhiko la panjhi ni iye, popande kuwelenga machimo yao. Iye watipacha ife nghani ya Uthenga wa kwapatanicha wandhu alunjane ni iye. 20 Ife ni athenga a Kilisito, Mnungu nayo watitumila ife kukupepezani anyiimwe. Ichi ndeicho Kilisito watifuna ife kukupembhani anyiimwe mchichite, mvanichidwe ni Mnungu. 21 Kilisito wadalibe chimo, nambho Mnungu wadamchita wakhale ngati wamachimo ndande yathu, dala ife kwa kulunjana naye tikhale wovomelezeka kwa Mnungu.