1 Ndiipo Yesu wadalikambila gulu la wandhu ni oyaluzidwa wake, 2 "Oyaluza a thauko ni afalisayo ali ni ulamuli wo yaluza thauko la Musa. 3 Chimwecho muyavele, muyagwile ni kuyachita yayo akukambilani, nambho msachita, yajha achita anyiiwo ndande sachita yajha alalikila wandhu. 4 Amanga katundu olemela ni kwasenjha wina, ni achinawene sakuthangailani makatundu yayo mwatenga. 5 Vonjhe ivo avichita anyio avichita dala aonekane ni wandhu. Pakuti avala vindhu ivo valembedwa thauko pambhumi pao ni mmanja mwao, avala njhalu izo zili ni vindhu vavitali aoneke kuti ajhichocha kwa Mnungu. 6 Akhala malo ya ulemu mmaphwando ni malo ya ulemu ni mmipando ya pachogolo mnyumba yo komanilana Ayahudi, 7 Ni kulonjheledwa mamalo yopezanilana wandhu ambili ni kufuna wandhu wajhatana ‘Oyaluza.’ 8 Nambho anyimwe simudatanidwa ‘Oyaluza,’ pakuti muli ni oyaluza mmojhipe, ni anyiimwe mwaonjhe ni ochatila wanga. 9 Msadatana Mundhu waliyonjhe, ‘Tate’ Pajhiko la panjhi ndande muli ni Tate wanu ammojhipe a kumwamba. 10 Chimchijha simdatanidwa achogoleli, pakuti muli ni mchogoleli mmojhipe Kilisito. 11 Wali wamkulu pakati panu wafunika wakhale mbowa wanu. 12 Mundhu waliyonjhe uyo wajhichita wamkulu wachitidwe wamng'ono ni mundhu waliyonjhe uyo wajhichita wamng'ono siwachitidwe wamkulu."

13 "Simvutike anyiimwe oyaluza thauko ni Afalisayo, anyiimwe ni agunghuli! Ndande mwachekela wandhu chicheko cha kulowela ufumu wa kumwamba ni mwachinawene simulowamo ni simwaloleza wandhu yao afuna kulowa. 14 Simvutike anyimwe oyaluza thauko ni afalisayo, anyiimwe ni agunghuli! Anyiimwe mkudya mnyumba za wachikazi yao afedwa ni achamunao, ni kupembhela mapembhelo yayatali, ndande imeneyo simulangidwe kupunda."

15 "Simvute anyimwe oyaluza thauko ni Afalisayo anyiimwe ni agunghuli! Muyenda ulendo wa mnyanja ni mumtunda kumchita mmojhi wakhulupilile ngati umo mkhulupilila anyiimwe, ni mkampata mumchita wakhale woipa kupitilia anyiimwe kwa kulowa mjehanamu."

16 "Simvutike anyiimwe achogoleli osapenya yao mkamba, ‘Mundhu wakalumbila pa nyumba ya Mnungu mkamba opande kulumbila, nambho wakalumbila kwa zaabu ya nyumba ya Mnungu wajhimanga mwene.’ 17 Anyiimwe asababwa ni osapenya, chiti chachikulu, zaabu kapina nyumba ya Mnungu iyo ichita zaabu ikhale ya Amnungu? 18 Chimchijha muyaluza mundhu wakalumbila pa chiphaka cho chochela njhembe osati kandhu nambho wakalumbila kwa njhembe wamagwidwa kwa kulumbila kwakwe. 19 Anyiimwe ni osapenya! Bwanji, ni chiti chachikulu njhembe kapina guwa ilo lichita njhembe ikhale yoyela? 20 Chimwecho mundhu uyo walumbila kwa chiphaka cho chochela njhembe, walumbila kwa vonjhe vaikidwa pamwamba pa chiphaka. 21 Ni uyo walumbila kwa nyumba ya Mnungu, mmeneyo walumbila kwa nyumba imeyo ni kwa Mnungu uyo wakhala mkati mwake. 22 Mundhu waliyonjhe uyo walumbila kwa kumwamba walumbila kwa Mnungu, ni Mnungu uyo wakhala mmenemo.

23 "Simvutike anyiimwe oyaluza athauko ni Afalisayo! Anyiimwe ni agunghuli pakuti mwalipicha wandhu zaka ya matelele yayo yanunghila bwino, manjano ni chitowe nambho musiya kuyagwila mayaluzo yayakulu ya thauko, ngati kuvomelezeka ni lisungu ni chikulupi. Nambho mfunika mvichite ivi ni msidavisiya vijha vina. 24 Anyiimwe achogoleli osapenya! Mchocha njhenjhe mmajhi, nambho mmeza ngamila!"

25 "Simvutike anyimwe oyaluza athauko ni Afalisayo! Anyiimwe ni agunghuli! Mchuka vikho ni mbale kubwalo nambho mkati mwajhala vindhu ivo mwavipata kwa kulanda ni chipili. 26 Anyiimwe afalisayo osapenya poyamba chukani mkati mwa chikho ni mbale ndeyapo kubwalo sikuyele!"

27 "Simvutike anyiimwe oyaluza thauko ni Afalisayo, anyiimwe ni magunghuli! Mulingana viliza ivo vanyekedwa chokaa, kwa kubwalo yaonekena ya bwino nambho mkati mwajhala vifupa va wandhu amwalila ni kila choipa. 28 Chimchijha anyimwe kwakubwalo muoneka wandhu mchata thauko, nambho mkati mwanu muli ni ugunghuli ni osachate thauko."

29 "Simvutike anyiimwe oyaluza thauko ni Afalisayo, anyiimwe ni agunghuli! Mvimangilila viliza va alosi ni kukwadilicha viliza va wandhu abwino. 30 Anyiimwe mkamba, ‘Ngati ife Tidakakhalapo nyengo za achatate wathu sitidakatangatilana nawo, kuapha alosi!’ 31 Chimwecho, mujichimikizila mwachina wene kuti anyiimwe ni mbadwa wa anyiyao adapha alosi! 32 Chipano mukwaniliche voipa vijha adaviyamba achatate wanu! 33 Anyiimwe muli ngati njoka ni anyiimwe muli ngati wana a njoka! Simulithawe bwanji chilango cha jehanamu? 34 Chimwecho, sinikupelekeni alosi, wandhu yawo ali ni njelu ni oyaluza thauko. Simuwaphe ni kwaapachika anjake wao, ni wina simwakwapule vikwapu mmanyumba yanu ya mapembhelo, ni kwaingwicha mujhi mbaka mujhi. 35 Chimwecho, Mnungu siwakulangeni ndande ya kupha wandhu wosalakwa, kuyambila kuphedwa kwa mundhu wosalakwa Abeli mbaka Zakaliya mwana wammuna wa Belekiya, uyo mdampha pakati pa nyumba ya Mnungu ni chiphaka cha njhembe. 36 Zenedi nikukambilani, mbadwa uwu siulangidwe ndande ya kuapha wandhu achameneo."

37 "Yelusalemu! Iwe Yelusalemu! Ukupha alosi ni kwaabula miyala anyiwajha atumidwa kwako. Nimafuna kwasunga wana wako ngati umo nghuku ikhumbatila wanapiye wake kwa mmapapiko yake, nambho siudafune! 38 Chimwecho, nyumba yako sisiidwe umbhawi. 39 Nikukambilani, kuyambila chipano, simunionanjho mbaka pajha simukambe, ‘Wali ni mwawi uyo wakujha kwa jhina la Ambuye.’"