1 Ndhawi imeneyo Helode, mfumu wa Galilaya wadavela nghani za Yesu. 2 Ndiipo wadaakambila, mbowa wake, "Mundhu uyu ni Yohana Mbatizi, wahyuka. Ndendande wali ni mbhavu zochita vozizwicha."

3 Helode ndeuyo wadamgwila Yohana ni kumuika mndende ndande ya Helodia, mkazi wa Filipo mpwake. 4 Ndande Yohana wadamkambila Helode tetete, "Osati bwino iwe kumkwata wamkazi mmeneyo!" 5 Helode wamafuna kumpha Yohana, nambho wadaopa wandhu ndande wandhu adakhulupilila kuti Yohana ni mlosi.

6 Siku la pwando la kubadwa kwa Helode, mwali wa Helodia wadavina pachogolo pa alendo, Helode wadakondwela kupunda, 7 mbaka wadamkambila kuti, "Sinikupache chalichonjhe icho siunipembhe."

8 Ndiipo, amake adamuyaluza chopita kupembha, mwaliyo wadakamba, "Nipache mutu wa Yohana Mbatizi mliselo."

9 Mfumu wadavela chisoni, nambho ndande ya kulumbila kwake pachogolo pa alendo wake, wadalamula mwaliyo wapachidwe icho wadapembha. 10 Chimwecho, Helode wadamtuma asikali wamdule mutu Yohana kujha kundende. 11 Mutu wa Yohana udaikidwa mliselo ni kupachidwa mwali yujha, nayo wadaapelekela maye wake. 12 Oyaluzidwa a Yohana adajha, adatenga chitanda cha Yohana, adachizika. Ndiipo adapita kumkambila Yesu nghani zimenezo.

13 Yesu yapo wadavela nghani za Yohana, wadachoka malo yajha kwa boti, wadapita pamalo popande wandhu kuti wakhale yokha. Nambho wandhu yapo adavela adamchata poyenda pa mwendo kuchokela mmijhi yao. 14 Yesu yapo wadachika mboti, wadaliona gulu lalikulu la wandhu, wadaonela lisungu ni wadaalamicha odwala wao.

15 Ujhulo yapo udafika, oyaluzidwa wake adamchata ni kumkambila, "Malo yano ni paphululu, jhuwa litobila. Walole wandhu apite kumijhi akajhigulile chakudya."

16 Yesu wadaakambila, "Siifunika achoke, anyiimwe mwachinawene wake mwaapache chakudya."

17 Anyiiwo adamuyangha, "Tulinayo mabumunda isanope ni njhomba ziwili."

18 Yesu wadaakambila, "Nipelekeleni pano." 19 Wadaakambila wandhu akhale mmaujhu. Yesu wadatenga mabumunda yasano ni njhombha ziwili zijha, wadakweza maso yake kumwamba, wadamyamika Mnungu. Halafu wadabandhula mabumunda ni kwaapacha oyaluzidwa wake, naonjho oyaluzidwa wake wadaagawila wandhu. 20 Wandhu wonjhe adadya ni kukhuta. Oyaluzidwa adakokola vidufya ivo vidakhalila ni kujhaza miseche khumi ni iwili. 21 Wachimuna yawo adadya adali ngati elufu zisano, nambho waachikazi ni wana siadawelengedwe.

22 Yesu yapo wamalaila wandhu, wadaakambila oyaluzidwa wake akwele mbwato wa ukulu kuti achogolele kupita kuchijya kwa nyanja ya Galilaya. 23 Yapo wadamaliza kwalaila wandhu, wadakwela kuphili kukapembhela. Wadakhala kumeneko yokha mbaka usiku yapo udajha. 24 Ndhawi imeneyo bwato lalikulu lidafika pakatikati pa nyanja, uku nilindengandenga kwa mafunde ndande mbhepo imalibula.

25 Mmalenga kucha, Yesu wadaachata oyaluzidwa uku niwayenda pa mwamba pa majhi. 26 Oyaluzidwa wake yapo adamwona niwayenda pa mwamba pa majhi, adaopa ni kukamba, "Chimzilimu!" Adabula phokoso ndande ya mandha.

27 Nambho pampajha Yesu wadaakambila, "Jhithileni mtima, ni ine. Msadaopa!"

28 Petulo wadamkambila, "Ambuye, ngati nde imwe, nikambileni nikuchateni pakuyenda pa mwamba pa majhi."

29 Yesu wadamkambila, "Chabwino, majha." Ndiipo Petulo wadachika mbwato waukulu, wadayenda pamwamba pa majhi ni kumpitila Yesu. 30 Petulo yapo wadawona mbhepo yaikulu, wadaopa ni kuyamba kubila uku niwabula phokoso, "Ambuye, nipulumucheni!"

31 Pampajha, Yesu wadatambasula jhanja lake, wadamgwila ni kumkambila, "Iwe wa chikulupi chochepa, ndande yanji uopa?"

32 Ndiipo adakwela mbwato waukulu, ni mbhepo nayonjho idasiya. 33 Wonjhe adali mbwato waukulu, adagwada ni kumkwatamila, niakamba, "Zenedi iwe ni Mwana wa Mnungu."

34 Adayomboka nyanja ni kufika kumujhi wa Genesaleti. 35 Wandhu akumeneko yapo adajhiwa kuti ni Yesu, adaziwandicha nghani kumadela yao yonjhe. Wandhu adampelekela Yesu wodwala wao wonjhe, 36 adampembha waaloleze wodwala agafye njhonga ya njhalu, ni wonjhe yawo adagafya adalama.