Atos 10

Kaniliyu ne aduŋ azho Biturus

1 Nǝ ntun yi Kaseriya azho ner nuŋ waŋa te Kaniliyu, ayi ngɔŋ neshir ne te ikum ndi ne jiu ne gar kɛ Italiya. 2 Iwa ben aner abɛ kɔmaa bɔbɔk ne nǝk tu tena klu sǝsǝk Arik; abu ŋɔk ne nek abaŋ ndi ayaŋ ki tena ben Arik iyaŋ mkpaŋ. 3 Iber nuŋ yiŋɛ ayi ndi mkpaŋa ane yi Kǝrfe tar kɛ aririk, ayik ndi ai rimla. Akɔ yik ine shar ayou Arik, anyɛ bene bɔu tedi, <<Ikaniliyu!>>

4 Kaniliyu alǝk ayi atɔu ma ne sǝsǝk. <<Aye nii, Ŋgɔŋ?>> arib. Ine shar ayou Arik adiu, <<Iben mi ben ki ndi unǝk abɛ yaŋǝ ma ba yi ŋursuk ba, ne yir ben Arik. 5 Fe azizaŋa shar aner te duŋ ba gar Jopa te bɛ te Gli ner nuŋ waŋa ndi azhɔu te Simɔn tena zhɔ sak maa te Biturus. 6 A sɔŋ ne kɔb kǝ nǝ Simɔn ne na bur, waŋ ndi kɔmaa yaŋ kɔn nek ngɔŋ.

7 Ndi ne shar Arik waŋa ne lɛ bene bɔu ne kɔmɔ, Kaniliyu azho agɛn amaa me ayaa ben zhiin ne min kɛ abɛ kpaakpa maa waŋ ndi anǝk tu. 8 Kaniliyu abla ba kɔte nii ndi nena te shar ba ne Jopa.

Irimla kɛ Biturus

9 Ayi aririk ne bɛr iyah ma ne min kɛ tsǝn ndi ne te gbahir ne ntuno, Biturus ne lɔ kɔmɔ ne ki kɛ shu agar ben Arik. 10 Ikasa lu vuŋ Biturus te wɔb ki li, ndi neka na ki lime, ayik tu maa ne amkpanuŋ. 11 Ayik ishu ibu fe ikinuŋ mwe ndi abubu ane shur ki azhɔge are shu te zii aŋyak mimi ne ŋguŋgu mei nas. 12 Abubu mɔ ahru ane narum tetɛk abɛ yi ne aza nas, ben narum abɛ gbur ne mimi ben aŋliŋlɔ abɛ bwak ne shu. 13 Fena ikɔr blau, <<Lu sɔŋ, Ibiturus. Ŋun te ta.>>

14 <<Bai te ba, Ŋgɔŋ!>> Biturus adiu. <<Bam ne lii kinuŋ amɛ ndi ne ŋlim iyi yaŋ yi tsetser ba.>>

15 Ikɔrɔ na lɛ bene bɔu mkpaŋ kɛ yaa, <<Kǝr ubǝ di uzhɔ ikinuŋ te iyaŋ yi tsetser ba te Arik neka duŋǝ yi tsetser.>>

16 Iyiŋɛ nena amkpaŋ amɛ tar, fe andanda iki hru anena ma abaŋǝ te kɔmɔ ne shu.

17 Ndi Biturus a zen vuŋɔ ne ne ki ndi wa ne yik, aner abɛ shar Kaniliyu awɔb kɔb Simɔn ayik te klɛ ne anɔkɔŋ akɛ kɔbɔ. 18 Akɔ zhɔ, te rib ka Simɔn waŋ ndi ne jiu ne sak kɛ Biturus a sɔŋ ayaŋa.

19 Biturus anaga ri yi ne min kɛ lɛne ne ki ndi wa ne yik, Izhu ye Arik adiu, <<Simɔn, aner amɛ tar awɔbu. 20 Ndi amɛ zi kɔmɔ ne shin. Duŋ gbaŋ kpa te kyak zǝ ba andanda ba, te ayi Nga mne shar ba.>>

21 Biturus akɔ zi te di anere, <<Ai nga wa izhin wɔb me. Izhin nyɛ na nii?>>

22 Aneshir adiu Biturus, <<Ta rɛ ben Kaniliyu ner ngɔŋ. Ayi ner didik tena klu sǝsǝk Arik, aneshir abɛ Yahudawa atɔu ashak ayi. Izhu ne shar tsetser ne blau te abɛ zhɔu te ubǝ gar kɔmaa tǝ bɛ wɔ ikiyiŋ ndi utei blau neyi.>> 23 Fe Biturus adi anere abɛ yir kɔmaa te yi acɛn amaa.

Biturus ne kɔb kɛ Kaniliyu

Ndi bɛr ne ŋan Biturus alɔ zǝ ba, anuŋ nɛrɛ Jopa te zǝ ba menyi. 24 Iber yi yaa maa ayir Kaseriya. Kaniliyu azǝn tɔ nyɛ mǝne te zhɔ nga kɛ kɔmen ben amkpama abɛ sɔŋ yaŋ akpa. 25 Ndi Biturus ne yir kɔbɔ, Kaniliyu alɔ klɛ te zǝ kuu anugu ngɔŋ maa. 26 Fena Biturus aduŋu lu <<Lu klɛ,>> Adiu, <<Myi neshir muŋ yi.>>

27 Nǝ min kɛ zen lɛ bene bɔu, Biturus ate yir min kɔbɔ akɔte yik aneshir tetɛk. 28 A diba, <<Izhin ne zhi te bla iyi Yahudawa ne yar binetu bǝn iwaŋ ndi ba yi awɔnǝ Yahudawa ba, ka abɛ nyɛ bene bɔu. Fena Arik ne tsar me tedi kǝr me zhɔ neshir nuŋ te ayi tsetser ka bayi tsetser ba. 29 Fena ne shar me, kǝr me lu ndim lɛk kinuŋ iyi rib ba. M rib zhin aye nii te izhin ne zhɔm?>>

30 Kaniliyu adi, <<Iber nas yi gayir Mni yi ne kɔmuŋ te zen ben Arik ne mkpaŋa, ne Kǝrfe tar kɛ aririk. Ankyak iner nuŋ ne su ki klikla aklɛ bene bɛm 31 tedi, <Kaniliyu, Arik ne wɔ ben mi tena shu azhi iki ndi unǝk abɛ yaŋǝ. 32 Shar te bɛ gar Jopa atei yik Simɔn ndi azhɔu te Biturus. Ayi cen ne kɔb kɛ Biturus ine te abur, ndi asɔŋ ne ŋkɔn nek ngɔŋ.> 33 Fe mku shar andanda, ne rɛ te izhin ne nyɛ. Azizaŋa bɔbɔk amɔrɔ tayi ne ti kɛ Arik te wɔ kɔte nii ndi ngoŋ ne di ubǝ blaa ta.

34 Ankyak Biturus akɔ lɛ: <<Azizaŋa mtashi nzhi te ilɛ didik te Arik ba so tu ba 35 Ata ner kɔte aŋaa atayi abaŋ ndi aklu sǝsǝk maa tena na ki didik. 36 Izhin ne zhi nkenlɛ ndi Arik ne shar aner abɛ Isrela, abla lɛ didik ikɛ sik susun ize ben Yesɔ Kristi, waŋ ndi ayi Ngoŋ bɔbɔk. 37 Izhin ne zhi ki ndi nena ne garke Yahuda, ibaŋ rɛ ntun yi Galili ndi neka su ne amashir ndi Yɔɔna ne bla 38 ndi yiŋɛ Arik ne shur Yesɔ awɔnǝ Nazara Izhu Tsetser bǝn mgbyamgbyaŋ. Nɛ komo kote me, te na didik te na abaŋ ndi kituk ne yir ba te nɛ rɛ, te Arik atsǝn bene bɔu.

39 <<Taniyik kiki iyi na maa ne ntun yi Yahudawa ben Urshelima. Ne ŋun Yesɔ te kpaŋu ne kuŋkun kɛ gen sak, 40 Fe Arik ne lɛgu ne ku ne bɛr yi ntar te duŋɔ yigu, iku bane gliu yir ba. 41 Aneshir bane yigu bɔbɔk ba, fe abɛ yigu ma Arik neka di atei yigu ma ne mǝne hria ba abaŋ ndi tane lii tena so bene bɔu ndi neka lu ne kumɔ. 42 Arik Ne dita te bla aneshir tena ta nyɛmɛ te ai wa waŋ ndi Arik ne hriau ne te atsitsir ŋas ben abɛ ku. 43 Aneshir abɛ bla lɛ kɛ Arik bɔbɔk ne zhi ki ne atu amaa te waŋ ndi ate ta nyɛmɛ bene bɔu atei zugo azhɔk netu lalɛ ne sak maa.>>

44 Ndi Biturus anaga ri yi ne min kɛ ilɛmɛ, Izhu ye Arik akɔ nyɛ ku aner abaŋ ndi ne wɔ ilɛmɛ. 45 Abɛ zǝ Arik abaŋ ndi ne kɔk ba zǝk ne zǝ Biturus atsǝn te duŋ ba akama yik ki ndi bane taba yigǝ ba, te vuŋ abaŋ ndi ba ne hria ba ba. Izhu ye Arik ne sɔŋ ne atu mǝne. 46 Tǝ ne wɔ ba alɛ ne aŋa te nyɛr Arik ngɔŋ.

Fe Biturus adi, 47 <<Ka neshir nuŋ ai yara te abɛ su ba ne amashirǝ? Ne ta Izhu Arik ndi ta nena tau ma.>> 48 Fe Biturus akɔ duŋ asu ba ne sak kɛ Yesɔ kristi. Fe akɔ ben Biturus abɛ te mwɔ bɛr bene beba.