1 Fe ineshir nuŋ ndi azhɔu te Ananiya, ben iwama Safaratu, ne baŋ ahwaŋ amen alɛb. 2 Nǝ zhi iyi iwa ma, ne su nki azɔbɔ ayir te gli nkime anyɛ nyak ne ti kɛ abɛ zǝ Yesɔ tsin.

3 Fe Biturus adi Ananiya, <<Uwa Ananiya aye nii te uduŋ shetan ne yir susun mi, te duŋ une timu ne ayi Izhu Tsetser, tena su nki azɔb ayiŋ ndi une lɛb ahwaŋa iyir i? 4 Ndi une baŋ ahwaŋa lɛb, ba yi ami kai? une lɛb ahwaŋa, azɔbɔ ba ayi ami kai? Ayi anii ne duŋu gli ir susun kǝŋe. Ai, bau nǝ tii ineshir wa imu yiŋɛ ba, ayi Arik wa.>>

5 Ndi ne wɔ ilɛmɛ Ananiya akɔ zhaku te ku, abaŋ ndi ne yime, sisik ngɔŋ ku vuŋ ba. 6 Amɛ anzak alu te baŋu, te nye ne nǝ nŋa nklu, te baŋu akɔte ruu

7 Nǝ baŋ mwɔ mkpaŋ iwa maa ne yir, bane zhi te ikinuŋ nena ba. 8 Fe Biturus a rib bu, <<Blam zub waŋa ayi azɔb ayiŋ ndi izhin ne lɛb ahwaŋa yi?>>

Fe adi, <<Iye amɛ waŋa ayi azɔbɔ.>>

9 Fe Biturus adi, <<Izhin ne kpa anu bǝn ilu mi te zhin bǝ tsar Izhu Tsetser yi Arik? Wɔ akum tsin ne anɔkɔŋ aye abaŋ ndi are amkpa ane ru ilu mi anyɛ, a tei na baŋu ate ru.>>

10 Ne amkpama, azhaku ne ti kɛ Biturus, te ku, ndi amunanzak nga ne yir, ayugu akɔ kur ikum, a baŋu te ru te kɔte ruu ben lu maa. 11 Fe sisik ngɔŋ ku vuŋ abǝ zǝ Arik, ben abaŋ ndi wɔ lɛ kɛ kiyiŋ ndi nena.

12 Ne na ikiki yi vuŋ anu tetɛk nemin aneshir ne aŋɔk abɛ zǝ Yesɔ tsin, bɔbɔk mǝnɛ nǝ susun zhiin ne biŋ ne akpla akǝ Solɔmɔn. 13 Fena ne miŋ aneshire inuŋ bane vuŋ susun te yir min mǝne ba, neme aneshir azǝn gbar ba. 14 Abɛ tanyɛmɛ azǝn tǝ du ne ta Arik naŋ yi kukub, aneshir tetɛk amba bǝn alulum. 15 Nǝ vuŋ ndi avu aner abǝ lɔ anyɛ shur ne ankɔŋ, anuŋ ne atakpa ben agurhwa, atei ndi Biturus agayir, izhu maa be zǝ atu anuŋ. 16 Aneshir ne zen rɛ ntuntun iyiŋ ndi ne kam Urshelima zǝk azǝn biŋ, te zen gli abǝ lɔ bǝn abaŋ ndi shetan ne yir ba te zǝn sak ba iya, bɔbɔk mǝne nɛrɛ.

17 Ngɔŋ ine na ndum kǝ Arik bǝn abɛ zeu, aner abɛ Sadukiyawa akam azǝn te zɔr. 18 Ne vu abɛ zǝ Yesɔ tsin ashur ne jaru. 19 Ankyak ne bu ine shar ayou Arik ne nyɛ te bu nkunkɔŋ yi jaru m ɔ te duŋ ba ru tedi. 20 <<kɔmɔ zhin ne akabakɔŋ, te kɔte du aneshir ilɛ kǝ vli.>>

21 Ndi ne wɔ me, akɔ yir min akabakɔŋ amblimblɛ te zen tsar aneshir.

Ndi ngɔŋ ine na ndum kǝ Arik, ben abaŋ ndi ayi ben abɔu ne zhɔ abɛ te ambuk, ben angɔŋgɔŋ abɛ Isrela, te shar nǝ jaru abɛ kɔte Gli ba te nyɛ. 22 Ama abɛ blɛ jaru m ɔ ne kɔmɔ, bane yik ba nemiŋ jaru ba, ne kama nyak te nyɛ bla ba te di, 23 <<Tani yik ijaru aklekli ku mgbamgbaŋ, abɛ blɛ azǝn blɛ anɔkɔŋɔ, fena tane bu jaru mɔ, ba tane yik inuŋ ne miŋǝ ba.>> 24 Ndi ngɔŋ ine na ndum kǝ Arik bǝn ngɔŋ ine blɛ Akabakɔŋ awɔ me, kpa men ne sik, bane zhi ka nii te na ba.

25 Akyak inuŋ anyɛ diba tedi, <<Tɔ zhin aneshir abaŋ ndi zhin ne shur ba ne jaru yuŋ a klikli ne min Akabakɔŋ, te zin tsar aneshir.>> 26 Fe angɔŋgɔŋ abɛ blɛ akabaŋkɔŋ ŋɔ akɔ te Gli abɛ na ndum kɛ Arik te ŋyɛ, amaa bane mgbyamgbyaŋ ba, ne te sisik te aneshir atei lu tyak ba ne mkpaŋ ba.

27 Ndi ne gli ba te ŋyɛ, ne ŋyak ba nǝ ti kɛ abɛ te ambuk, fe ngɔŋ ine na ndum kǝ Arik arib ba. 28 Te di, <<Tani tsaŋ zhin tedi izhin bɛ duŋ na tsar ne sak kǝŋe ba, amaa zhin ne zi Urshelima bɔbɔk te tsar lɛ me te na wɔb te zhin bǝ yik te di ai taba ne ŋun iner waŋa.>>

29 Ama anǝ Biturus bǝn nki abǝ na ndum maa ne tanyɛmɛ te di: <<Nǝ rɛ tǝ ta bǝ zǝ lɛ kǝ Arik naŋ kɛ neshir! 30 Arik ayu atsǝntsǝm amɔr ne lɛk Yesɔ, waŋ ndi zhin ne kpaŋu ne nkpuk tu nkunkun kǝ gen. 31 Ayi wa Arik ne ŋya gu ne ŋɔk li maa, ngɔŋ bǝn ne ita zhɔk, te bɛ bu Isrela ankɔŋ ne su ŋɔk ne rɛ, te bɛ zuk ba zhɔk ne lalɛ men. 32 Taba ta ne yik kiki yiŋɛ ne ayi mɔr, izhu yi Arik yi tsetser ndi Arik ne nek abɛ na zi lɛ ma.>>

33 Ndi ne wɔme angɔŋgɔŋ anuŋ abɛ te ambuk, ne te mfu ngɔŋ, te wɔb te aba bɛ ŋlɔk ba. 34 Ama awɔnǝ Ferisawa nuŋ, azhɔu te Gamaliya, ne zhi icɛr yi Musa, waŋ ndi aneshir a gbaru, a lu kli ne min abɛ te ambuk, tedi abɛ gli aneshir baŋa agli ru abɛm baliŋ. 35 Ankyak adi angɔŋgɔŋ abɛ te ambuk gɔ tedi, <<Izhineba amunzumɔr abɛ Isrelawa, kiyiŋ ndi izhin wɔb te zhin bɛ na aneshir abaŋa. 36 Ase yi gayir ineshir nuŋ ne ru, ne zhɔu te Judas, ne baŋ tu maa ndi ayi kinuŋ, aneshir azhin nas ne tanyɛmɛ bǝn abou, ne ŋunu, abɛ zu maa ne se ba var, ne na cɔkla. 37 Ne gɔŋ ma, ne mkpaŋ kɛ bla aneshir, ne zhɔ nuŋ te Yahuza awɔ ne Galili ne ru, te gbur ntsan aneshir ayaŋ tu maa, ama iwa maayi ne ŋunu. Abɛ zeu ma ne se ba avar. 38 Neme, azizaŋ, me bla zhin, izhin bɛ te shen ben aner abaŋa, te duŋ ba, a teyi ndi ki na men yiŋɛ ben ndum mǝne iyi kɛ aneshir itei zir. 39 Ama atei ndi yi kɛ Arik, ba zhin te ya zir kɛ ba, atei duŋ ayik zhin yi abɛ te zɔr bǝn Arik ba. Angɔngɔn aneshir a tanyɛmɛ ne ilɛ kǝ Gamaliya.>>

40 Ankyak akɔ zǝ lɛ kɛ Gamaliya, te kɔ zhɔ abɛ zǝ Yesɔ tsin, te tsaŋ ba, te di, abɛ duŋ na lɛ te zhɔ isak kɛ Yesɔ, fe te zhɔk ba.

41 Ankyak, ndi ne lu ne akpa ne te ambuk go, a nyer te yik aba ne mla abɛ sak ba ya ne tu ye sak kɛ Yesɔ. 42 kɔte bɛr tayi, ne min akabakɔŋ te vuŋ kɔb, ba ne duŋ tsar lɛ kɛ men ba, tedi Yesɔ wa ayi Almasihu ba.