1 Neme Shaulu ayi ne min kɛ te sak abɛ na ndum kɛ Arik iyah, tedi iwa atei ŋlɔk ba. Fe ne gar ben ngɔŋ ne na ndum Arik 2 te benu abɛ cɛr mplɛ a nek wa te wa abɛ gli kɛ te gar akabaŋkɔŋ ayi Damaskɔ, te wa ate yik abɛ zǝ ankɔŋ awaŋa, amba ben alulum, iwa abɛ vu ba ate kpa ne Urshelima. 3 Ayi nemin kɛ tsin, nɛ dǝk watsɔb te abɛ yir Damaskɔ, ne amkpama ilu laŋ ire shu te hrieu te kamu zǝk. 4 Fe azhaku, te wɔ kɔr nuŋ idiu tedi, <<Ishaulu, Ishaulu, aye anii duŋu sak me iya i?>>

5 Shaulu adi, <<Uyi ŋɔwa Arik>> Fe adi.

<<Ai Nga Yesɔ ndi uzǝn sak me iyah. 6 <<Azizaŋa ubǝ lu te yir min tuŋ amɔ M tei blau iki yiŋ ndi utei na>>

7 Ne amkpamkpama abɛ tsin amaa ba nena yi nenu akɛ lɛ ba, ne wɔ kɔr, bane yik ine ilɛmɛ ba. 8 Fe Shaulu ne lu, te bu ayi ba na yik ba, fe ne vuŋu a Gli te kɔmɔ ne Damaskɔ. 9 Iber me tar Shaulu ba yik ba, iyaŋ li kɔka abɛ so.

10 Iner ne zǝ Arik nuŋ ne Damaskɔ, azhɔu te Ananiya. Arik ne lɛ bene bɔu, ne rimla tedi, <<Ananiya!>> atanyeme, <<Nga waŋ, Ngɔŋ.>>

11 Fe Arik adiu, <<Lu te kɔmɔ ne ankɔŋ awaŋ ndi zhɔu te are te nab te rib ikɔb kɛ Yahuda, ka awɔnǝ tarsus ayi amɔ, azhɔu te Shaulu, ite yigu a zen ben Arik. 12 Ne min kɛ rimla ne yik neshir nuŋ, a zhɔu te Hananiya, ne yir te sagu ŋɔk, te abɛ yik abɛm.>>

13 Ama Hananiya ne tanyɛmɛ tedi <<Arik, me ne zen wɔ lɛ ner waŋa ben aneshir tetɛk, ne zumimin yiŋ ndi a sak aner abɛ yi tsetser abɛyi ne Urushelima. 14 Ankyak ina na ndum Arik ngɔŋ ne nǝgu mgbyamgbyaŋ kɛ kpa aneshir abaŋ ndi aben Arik.>>

15 Ama Arik ne diu, <<Tsin, uyi ne na ndum amuŋ me ne hriau ne sak muŋ, bene atu tum ben Isrelawa. 16 M tei bla iya yiŋ ndi tei yikɛ ne sak muŋ.>>

17 Fe Hananiya ne kɔmɔ, te yir kɔbɔ. Te sagu ŋɔk te di. <<Iwa zumɔr Shaulu Arik ne shar me, ayi Yesɔ waŋ ndi ne tsa ru ma ne ankɔŋ waŋ ndi une zeu, te bǝ na kam yik, te izhu yi tsetser bɛ shak kpami.>>

18 Ne amkpama iki nuŋ iru ne min yi ma ndi fumfuk nfi, fe ne na kama yik. Fe alu te suu ne sak kɛ Arik, 19 fe ali kili, mgbyamgbyaŋ ma ŋur kam

Shaulu ne te muɔ bɛr ben aner bɛ zǝ Arik ne Damaskɔ. 20 Ne amkpama akɔ vuŋ du lɛ kɛ Yesɔ ne akabaŋkɔŋ mǝne, tedi ai wa ayi Izu Arik. 21 Abaŋ ndi ne wɔu, ne vuŋ anu, te di, <<Ashe ba waŋa ayi iner waŋ ndi ne se anere abɛ Arik var ne Urushelima kai? Ne nyɛ yaŋa ne susun kɛ vu ba te kɔmɔ ben abɛ na ndum Arik angɔŋgɔŋ te abɛ kpaba?>> 22 Fe Shaulu ne na lɛ, te lɛk susun kɛ Yahudawa abaŋ ndi ayi ne Damaskɔ, te di, Yesɔ ayi wa ayi Kristi.

23 Ndi iber watsɔb ne gayir, Yahudawa alɛ bin te aba abɛ ŋunu, 24 Ama Shaulu ne wɔ zumimin mǝne, ibu ben aririk a zen blɛ ne nkuŋkɔŋ yi min tun te abɛ ŋunu. 25 Ama ne min kɛ bu amumun abɛ na ndum kɛ Arik ne baŋu ne sisa a Gli rumɔ ne adampem.

26 Ndi Shaulu ne yir Urshelima ne wɔb te wa abɛ yir min kɛ a bɛ zǝ Arik, ama ne klu sisik maa, bane tanyɛme ben a bɔu te di ayi ne zǝ Arik ba. 27 Ama Barnaba ne vuŋ ŋɔk ma te gliu te gar ben abɛ du lɛ kɛ Arik, te bla ba ir keŋ ndi Shaulu ne yik Arik ne ankɔŋ, ben ir keŋ ndi Arik ne lɛ bene bɔu ben ir keŋ ndi ne du lɛ kɛ Arik susun zhiin ne sak kɛ Yesɔ ne Damaskɔ. 28 Nak baŋ rɛ mkpaŋa ne zhɔk kpa ben abɛba ne Urushelima. 29 Azǝn du lɛ kɛ Arik susun ma zhiin ne sak kɛ Arik. Ne bene lɛ ben Yahudawa a baŋ ndi awɔ aŋa Helɛnawa te bene gbur kpa ben bɛba. Amaa ne wɔb te aba bɛ ŋunu. 30 Ndi abɛ zǝ Arik ne zhi me, ne gliu te kɔmɔ ne Kaseriya, te sharu ne Tarsus.

31 Akyak abɛ zǝ Arik bɔbɔk ne ntun yi Yahudiya, ben yi Galili ben yi Samariya ne sɔŋ keke. Isɔŋɔ ne rɛ goŋ ana kiki men anenen; yaŋ te sisik Izhu yi tsetser yi Arik ilɔk bama, te aneshir ne te tetɛk.

32 Ndi Biturus ne zǝ ntuntun bɔbɔk, ne gar bǝn abɛ zǝ Arik ndi ayi ne Lida. 33 Ne yik neshir nuŋ amɔ azhɔu te Iniyas, waŋ ndi a kɔ kur ne iki ase tender ne zen ta kǝka. 34 Fe Biturus a diu tedi, <<Iniyas, Yesɔ Kristi a tei duŋu rɛ. Lu te baŋ iki kur mi:>> Ne kama lu. 35 Aneshir abɛ Lida, ben a bǝ ntun yi Sarona ne yigu te zǝ Arik.

36 Ne Yafa iwa nuŋ ne zǝ Arik, azhɔu te, Tabita (Dokas), Iwama a yi iwa didik ana kiki yi rɛ, ana lɔ susun kɛ aneshir te na aneshir kiki didik. 37 Ne kpaŋa ilɔ ne vuŋu, ne ku. Ndi ne suu, ne baŋu zizhɔk ne ki kɛ shu. 38 Lida yi gbahir ben Yafa; a shar aneshir amɛ yaa ben abɔu, abɛ benu, <<A bɛ nyɛ ben abɛba kǝr abɛ baŋ kpaŋ ba!>>

39 Fe Biturus alu te zǝ ba. Ndi ne yir ne gliu te kɔmɔ ne iki kɛ shumɔ. Bɔbɔk amba baŋ ndi alulum amen ne ku ne nyɛ kli anyaŋu, te zhin te tsa ru kluŋklu ben kiki yiŋ ndi Dokas ne nǝk ba ndi ne yi ndɔndɔ.

40 Ama Biturus ne di a bɛ ru abɛm bɔbɔk mǝne, ne tar agbarum ne mimi te ben Arik te kama tɔ ikumɔ te di <<Tabita lu.>> Ankyak abu ayi maa, ndi ne yik Biturus alu sɔŋ. 41 Ne vuŋu ne ŋɔk te lɛgu fe azho amba abɛ yi tsetser abaŋ ndi alulum men ne ku te nek ba ne wu ne vli. 42 Ne bla ilɛ kǝŋe kɔte me ne Yafa, aneshir tetɛk ne tanyɛme ben Arik. 43 Biturus ne sɔŋ iber tetɛk ne Yafa ne kɔb kɛ ner nuŋ ndi a zhɔu te Saminu.