Nyaga ga awyekwoyi
1 "Fye zhni pəceye to fya wú əfye ɓəfyecezhnizhni ń aza abye nabai ɓa gyewye m. N fya zhni lonu, fye to ɓə ɓwa gyiba ń əfye Dada aba n wo dna n əshemi nyi m.
2 "Ntulonu she fye ga awyekwoyi ənya, fye to dna kwo əwyi n knaknacii m, ngye shi akwocednayi zhni fyi n Ayahudiyibwokwnu jesnu kpe ń adnadna, nabai aza ga ɓa mwamwa m. Ɓəhnihni mi gna fye, ɓa la əɓa gyiba gwo n nunui. 3 Ama she fye ga awyekwoyi ənya, fye to ye ɓwaipmi kwa kpe ənya n əfye ɓwaizhe gnyi kwoi zhni m, 4 nabai əfye nyaga kwaa zè fyaa. Nlonu əfye Dada ń wo gye əɓo əwye ń a zhni fyaa nyi, wo ɓa ga fye gyiba.
Aduwazhni
5 "Əsa ń fya zhniaduwa, fye to kwu wu ngye akwocednayi m, ntuge ɓa ye ɓa zhniaduwa fyi ń Ayahudiyibwokwnu jesnu kpe n azokwo bma aba, nabai aza ɓa gye ɓa. Ɓəhnihni mi gna fye, ɓa la əɓa gyiba gwo ń nunui. 6 Ama əsa ń ha zhniaduwa, lodna n əho nyakwnumi, haa kpakwo gwu, jesnu ha zhniaduwa ga əho Dada, ń a ta gye wo nyi m. Nlonu əho Dada, n wo gye əɓo ń a zhni dna n ɓwuɓwu nyi, wo ɓa ga ho gyiba.
Əgbewna
16 "She ho dna n gbewna, to wnuwyedna ngye akwocednayi m, ntuge ɓa zhni ɓa wnuwyedna nabai ɓa wu aza nge ɓa wnagbe lo. Ɓəhnihni ɓa la əɓa gyiba pmagwo n nunui. 17 Ama əsa ń ha wnagbe ncei, ha kwu omi pmya ń ho tukwo jesnu ha əho awyewnu, 18 nabai n kwo taa wu aza pəipəi nge ho dna lo n əgbewna m, akpəge əho Dada; n a ta gye wo nyi m, jesnu əho Dada n wo gye ɓo n a zhni kwo dna n ɓwuɓwu nyi, wo ɓa ga ho gyiba.