6 Ubọk Abọọñ amaakpon ke atu mbon Asdọd ye ñkanñkʌk amọ; anye amaaben nsobo asʌk amọ anyʌñ atọ ammọ inia. 7 Ke ini mbon awo ke Asdọd ekekịtte se ikitịppe, ammọ emaebo, "Inaaha akebe edioomo Abasi Isrel aba ye ñnyịn mi, sia ubọk amọ asọọñ ye ñnyịn ye abasi ñnyịn Dakọn." 8 Ke ntoro ammọ emaekoot afịd mme andikara ke Filistia enyʌñ ebịp ammọ ebo, "Nsoo ke ñnyịn ikpinam ye akebe edioomo Abasi Isrel?"

Ammọ emaebọọrọ ebo, "Yak isio akebe edioomo Abasi Isrel inyọñ Kad." Ke ntoro ammọ emaedịppe akebe edioomo Abasi Isrel esio.

9 Ado ke ammọ emaekedịppe anye isio, ubọk Abọọñ amaadoro abio ado ke idem, anam ammọ ediba ke ataa ñnyeñidem. Anye amaanọ mbon abio ado inia, ikpọ ye ntək. 10 Ammọ ndin emaeben akebe edioomo Abasi ekaa Ekrọn.

Idaha esʌkkọ eben akebe edioomo Abasi esaña edʌk Ekrọn, mbon awo ke Ekrọn emaesio ñkpo ebo "Ammọ eben akebe edioomo Abasi Isrel esaña ikpere ñnyịn nọ adiwot ñnyịn ye mbon ñnyịn." 11 Ke ntoro ammọ emaekoot afịd mme andikara ke Filistia atọ keed enyʌñ ebo, "Isio akebe edioomo Abasi Isrel ifep ke atu ñnyịn; yak anye atịmme anyọñ aka itie amọ, imiidooho anye ayaiwoot ñnyịn ye afịd ufọk ñnyịn." Sia adooho ñkpa amaasịn ñnyeñidem ke abio; ubọk Abasi amaanekke akpon ke abio.