3 अब्रामै टेक्‍कअ धरनीं उटअ पल़ी माथअ संघा किई स्तोती अर बिधाता बोलअ तेऊ लै इहअ, 4,5 "भाल़ मेरी आसा ताल्है करार कि तूह हणअ खास्सै देशे लोगो मूल़ बाब, तैही लाअ मंऐं तेरअ नाअं अब्रामा* का आबराम* डाही।✝

6 "मुंह दैणीं ताल्है खास्सी आद-लुआद, अर आजू बणनैं तिंयां बडै-बडै देश, इधी तैणीं कि कई बणनैं तिन्‍नां मांझ़ा का राज़ै बी।

7 "ज़ुंण मंऐं ताह संघै करार किई, सह आसा ताह संघै अर आजू तेरी आद-लुआदा संघै बी, किल्हैकि हुंह आसा तेरअ अर तिन्‍नों दुहीओ बिधाता।✝

8 "अह ज़ैगा दैणीं मुंह ताल्है अर आजू तिन्‍नां लै, ज़हा ज़ैगा तूह एभै परदेसी आसा। कनान देशे सारी ज़ैगा दैणीं मुंह सदा लै तेरै खिंबा लै अर हुंह हणअ तिन्‍नों बी बिधाता।

9 "आबराम, ज़ुंण मंऐं ताह संघै करार किई, तेऊ बधाना मनै तूह अर आजू तेरी आद-लुआद पोस्ती दर पोस्ती तिहअ ई।

10,11 "मेरअ सह बधान ज़ुंण तम्हां पोस्ती दर पोस्ती करनअ सह आसा इहअ कि तम्हैं करै थारै गुप्त आंगे मुंडकीए खाल काटी लान्हैं का प्रोढै तैणीं सोभी मणछो खतैर। अह हणअ ऐहा गल्‍लो नछ़ैण कि तम्हैं आसा मेरी करार आद डाही दी।✝