मूल़ 26

इसहाक अर राज़अ अबीमोलक

1 थोल़ै धैल़ै बाद पल़अ तेऊ देशै खास्सअ नकाल़, सह नकाल़ थिअ तेऊ नकाल़ा का होरी साबो ज़ुंण अब्रामे ज़मानैं पल़अ त। तैही डेऊअ इसहाक पलिश्ती देशे राज़ै अबीमोलका सेटा गरार नगरी लै।

2 परमेशर बिधाता हुअ तिधी प्रगट संघा बोलअ इसहाका लै इहअ, "मिसर देशा लै निं डेऊई, हुंह रहैऊं ताखा कि ताह किधा लै डेऊणअ।

3 "तूह रहणअ तिधी परदेसी ज़िहअ, पर हुंह हणअ आप्पू ताह संघै अर मुंह दैणीं ताल्है बर्गत अर अह देश दैणअ मुंह ताल्है अर आजू तेरी आद-लुआदा लै, ज़ेही मंऐं तेरै बाब आबरामा संघै करार आसा किई दी, सह करनी मुंह पूरी।✝26:3 मूल. 22:16-18

4 "तेरी आद-लुआद करनै मुंह सरगे तारै ज़िहै खास्सै अर तिन्‍नां लै दैणअ मुंह अह सारअ देश। तिन्‍नां करै भेटणीं संसारे सोभी देशे लोगा बर्गत।✝26:4 मूल. 15:5

5 "किल्हैकि ज़िहअ-ज़िहअ मंऐं आबरामा लै बोलअ त, तेऊ किअ मेरअ हुकम अर बधान तिहअ ई पूरअ।"

6 तेखअ लागअ इसहाक गरार नाओंए ज़ैगा रहंदअ।

इसहाके च़लाकी

7 इसहाके लाल़ी ती हेरनी शुणनी बधिया। तेऊ पल़ी आप्पू एही डअर कि ऐहा पिछ़ू सका मुंह कुंण मारी पाई अर तेऊ बोलअ सोभी का इहअ कि रिबका आसा तेऊए बैहण।✝26:7 मूल. 12:13; 20:2

8 ज़ांऊं तेऊ तिधी रहंदी खास्सै धैल़ै हुऐ, पलिश्ती देशे राज़ै अबीमोलकै भाल़अ आपणैं मैहले ताक्‍की का बागै कि इसहाक आसा रिबका लै मल़्हैची दैंदअ लागअ द।