1 ज़ांऊं इसहाक खास्सअ प्रोढअ हुअ अर तेऊए आछी का बी निस्सअ शुझुई, तेऊ शादअ आपणअ ज़ेठअ शोहरू एसाब संघा बोलअ इहअ, "मेरै शोहरूआ।" एसाबै बोलअ, "बोल, बाबा, तूह किज़ै हुकम दैआ?"

2 इसहाकै बोलअ एसाबा लै, "हुंह हुअ भाल़ ऐबै प्रोढअ अर मुखा निं थोघै कि केभै तैणीं रहणअ हुंह ज़िऊंदअ, 3 ऐबै कर तूह इहअ, आपणैं कतीर-कबाण लई डेऊ तूह संघा आण मुल्है शकार मारी।

4 "तेखअ बणाआं तूह मुल्है तिहअ खाणअ-पिणअ ज़ेता लै हुंह खास्सअ झ़ूरा। हुंह च़ाहा इहअ कि तेता खाई करै दैणी मुंह ताल्है मरनै का आजी दिल खोल्ही बर्गत।"

5 रिबका हेरी इसहाके ईंयां सारी गल्‍ला शूणीं ज़ेतरी एसाब शकारी डेऊअ, 6 रिबका बोलअ याकबा लै, "मंऐं शूणअ तेरअ बाब एसाबा लै बोल्दअ, 7 ‘तूह आण मुल्है शकार मारी संघा बणा मुल्है मेरै मरनै का आजी इहअ खाणअ-पिणअ ज़ुंण मुंह बधिया लागा।’ सह बोलअ तेरै बाबै तै कि सह च़ाहा तेरै भाई लै बर्गत दैणअ अर ईंयां गल्‍ला हणीं परमेशर बिधाता सम्हनै।

8 "ऐबै मेरै शोहरूआ, मेरी गल्‍ला शुण धैन दैई कि मंऐं भाल़ ऐबै किज़ै लाअ करी। 9 तूह कर इहअ, बाकरीए हेल़्ही का आण दूई छ़ेल्हू संघा आण काटी तिन्‍नां मुंह सेटा लै। हुंह बणाऊं इहअ खाणअ-पिणअ ज़ेता लै तेरअ बाब खास्सअ झ़ूरा। 10 तूह निंयैं तेखअ आपणैं बाबा सेटा ताकि सह तेता खाई करै मरनै का आजी ताल्है बर्गत दैए।"

11 याकबै बोलअ आपणीं ईजा रिबका लै एही आद फरेऊई, "एसाब आसा झुशलअ मर्ध अर हुंह निं आथी! 12 ज़ै बाब मुंह छ़ुंए, अर तेऊ का इहअ थोघ लागे कि मंऐं आसा सह ठगी लाअ द, मुंह भेटणअ बर्गते बदल़ै फिटक।"

13 रिबका बोलअ तेऊ लै, "फिटक लागे मुल्है! तूह कर तिहअ, ज़िहअ मंऐं बोलअ, तिन्‍नां छ़ेल्हू आणा काटी मुंह सेटा लै।"

14 याकब आणी छ़ेल्हूए शिखा आपणीं ईजा सेटा लै अर तैहा बणाअं इहअ खाणअ-पिणअ ज़ेता खाणां लै इसहाक खास्सअ झ़ूरा त।

15 संघा बन्हैऊंऐं रिबका आपणैं ज़ेठै शोहरू एसाबे सोभी का बधिया झिकल़ै आपणैं कान्हैं शोहरू याकबा लै, 16 संघा बन्हैऊंईं तेऊए हाथै अर गल़ा दी तैहा छ़ेल्हूए खाल ताकि सह झुशलअ ज़ाण्हिंए।

17 तेखअ दैनी तिंयां आप्पै बणाईं दी सुआदली शिखा अर रोटी याकबा का।

18 याकब डेऊअ आपणैं बाबा इसहाका सेटा संघा बोलअ तेऊ, "बाबा।" इसहाकै पुछ़अ, "तूह मेरअ कुंण ज़ण्हअ शोहरू आसा?"

19 याकबै बोलअ आपणैं बाबा लै, "हुंह आसा तेरअ ज़ेठअ शोहरू एसाब, ज़िहअ तंऐं मुल्है बोलअ त, मंऐं किअ तिहअ ई, खल़अ उझ़ू भाल़, इधी आणी मंऐं ताल्है शिखा बणाईं तिन्‍नां खा बेशी करै तेखअ दै मुल्है बर्गत।"

20 इसहाकै पुछ़अ तेऊ का, "आरा बेटैआ एतरअ छ़ेक्‍कै केस्सी भेटअ ताह शकार?"

याकबै दैनअ ज़बाब, "तेरै बिधाता आणअ सह मेरी आछी सम्हनै।"

21 तेखअ बोलअ इसहाकै याकबा लै, "मुंह सेटा ज़िहअ एछ मुंह दै तोपणैं हैनूं, हुंह भाल़ूं कि तूह मेरअ शोहरू एसाब सच्च़ी आसा कि नांईं।"

22 याकब डेऊअ आपणैं बाब इसहाका सेटा ज़िहअ। इसहाक लागअ तेऊए सारी घेरी तोपदअ, संघा बोलअ इहअ "गल्‍ला ता ज़ाण्हिंआं तेरी याकबा ज़ेही पर तेरै हाथ ज़ाण्हिंआं मुखा एसाबा ज़िहै।"

23 इसहाकै दैनी याकबा लै इहअ सोठी करै बर्गत कि अह आसा एसाब। 24 तज़ी बी लअ तेऊ एकी बारी भिई पुछ़ी, "तूह सच्च़ी आसा मेरअ शोहरू एसाब?"

तेऊ बोलअ, "हाँ हुंह आसा एसाब।"

25 खिरी बोलअ इसहाकै, "ओर्ही दै मुल्है तिन्‍नां शिखा खाणां लै ज़ुंण तंऐं शकार मारी करै बणाईं, अर हुंह दैंऊं ताल्है बर्गत।"

याकबै दैनी तेऊ लै शिखा अर दाखो रस, इसहाकै खाई तिंयां शिखा अर दाखो रस बी झुटअ।

26 तेखअ बोलअ इसहाकै, "मेरै शोहरूआ मुंह नेल़ एछ संघा दै मुल्है मल़्हैची।"

27 ज़ांऊं याकबै तेऊ लै मल़्हैची दैनी, इसहाका ज़ांऊं एसाबे झिकल़े बास्स आई, तेऊ दैनी याकबा लै इहअ बोली बर्गत,

"मेरै शोहरूए झिकल़े बास्स आसा

एही ज़िम्मीं ज़ेही

ज़ेथ परमेशर बिधाते बर्गत आसा।✝

28 मेरै शोहरूआ,

बिधाता लोल़ी ताल्है बर्गत दैनी,

सरगा का लोल़ी ओश पल़ी,

ज़िम्मीं लोल़ी तेरी रज़दी-पज़दी हुई

नाज़ अर दाखा करै भर्हुई दी,

29 देशा-देशे लोगा प्रैंदै

लोल़ी तेरअ राज़ हुअ

अर तिन्‍नैं सोभी लोल़ी

ताह सेटा माथअ टेक्‍कअ,

आपणैं होरी भाईओ बी लोल़ी

तूह मालक हुअ अर

तिन्‍नां बी टेक्‍कणअ ताह सेटा माथअ।

ज़ुंण ताल्है फिटक दैए,

तिन्‍नां लै बी भेटणअ फिटक,

ज़ुंण ताल्है बर्गत दैए,

तिन्‍नां लै बी भेटणीं बर्गत।"✝

30 ज़ेतरी इसहाक याकबा लै बर्गत दैई मुक्‍कअ संघा याकब निखल़अ तिधा का बागै, तेतरी गअ एसाब शकार मारी करै तिधी पुजी।

31 तेऊ बणाअं बधिया सुआदा आल़अ खाणअ-पिणअ, संघा बोलअ आपणैं बाबा सेटा आणी इहअ, "बाबा, खल़अ उझ़ू संघा खा बेशी करै इना शिखा ज़ुंण मंऐं ताल्है आणी शकार करी ताकि तूह मुल्है बर्गत दैए।"

32 तेऊए बाब इसहाकै पुछ़अ, "तूह कुंण आसा?" तेऊ बोलअ, "हुंह आसा तेरअ ज़ेठअ शोहरू एसाब।"

33 इसहाका छ़ुटी काम्मणीं संघा बोलअ तेऊ इहअ, "तै सह कुंण थिअ ज़ुंण शकार करी मुंह सेटा लै आअ, तेरै एछणैं का थोल़ी घल़ी आजी हेरी मंऐं तिंयां शिखा खाई अर बर्गत बी हेरी मंऐं तेऊ लै दैई अर सह निं ऐबै बापस फिरी सकदी।"

34 आपणैं बाबे इना गल्‍ला शूणीं छ़ुटी एसाबा का बडी-बडी लेरा पकारा, लैल़ा लांदी बोलअ तेऊ आपणैं बाबा लै, "हे मेरै बाबा, मुल्है बी दै बर्गत।" 35 इसहाकै बोलअ तेऊ लै, "तेरै भाऊ ठगअ हुंह आरा मेरै बेटैआ, ऐबै सह बर्गत बी पाई च़ोरी।"

36 एसाबै बोलअ, "तै निं तेऊ नाअं एही आथी याकब* पल़अ द, तेऊ हेरअ हुंह दूई बारी ठगी। पैहली बारी गिम्मअ तेऊ मेरै ज़ेठै हणैंओ हक आप्पू लै अर ऐबै ठगअ हुंह तेऊ इहअ कि तेऊ पाई मेरी बर्गत बी!"✝

37 इसहाकै दैनअ एसाबा लै ज़बाब, "शुण मंऐं दैनअ याकबा लै ताह अर तेरै होरी भाई प्रैंदै राज़ करनैओ पठाथअ अर तम्हैं सोभै हणैं तेऊए दास। ज़िम्मीं दी नाज़ा-पाणींए बर्गत बी दैनी मंऐं तेऊ लै। मुखा निं ऐबै ताल्है दैणा लै किछ़ै आथी।"

38 एसाबै बोलअ आपणैं बाबा लै, "हे मेरै बाबा, मुल्है दैणा लै कै ताखा एक बर्गत बी निं आथी?"

इहअ बोली लागअ एसाब हिक्‍की-सल़िक्‍की लेरा लांदअ।✝ 39 तेखअ बोलअ तेऊए बाब इसहाकै तेऊ लै इहअ,

"तेरअ घअर हणअ

रज़दी-पज़दी ज़िम्मीं का दूर,

ज़िधी सरगा का ओश निं पल़दी।

40 तंऐं हणीं आप्पू ज़िऊंणां लै

कबल्‍ली आपणैं हाथै तलबार च़की दी,

अर तूह हणअ आपणैं भाऊओ गलाम,

पर ज़ेभै तूह आज़ाद हणअ च़ाहे,

तेभै पाणअ ताह सह गलामीओ जूँ चोल़ी।"✝

41 एसाबै डाही आपणैं भाऊ याकबा लै ज़ीद किल्हैकि ज़हा बर्गतो हकदार सह थिअ, सह बर्गत पाई ती तेऊ धोखअ करी आप्पू लै।

एसाब लागअ आप्पू लै इहअ बोल्दअ, "ज़ेही ई मेरै बाबे मौत होए, तेभै पाणअ मुंह याकब मारी।"

42 ज़ांऊं रिबका का थोघ लागअ कि एसाब च़ाहा ऐबै याकबा ज़ानीं का मारी पाणअ, तैहा शादअ आपणअ कान्हअ शोहरू याकब संघा बोलअ, "तेरअ ज़ेठअ भाई आसा तैहा घल़ी न्हैल़अ लागअ द ज़ेभै सह ताह मारी पाए।

43 "ऐबै ज़िहअ हुंह बोला मेरी तिन्‍नां गल्‍ला शुण ऐबै धैन दैई करै। तूह डेऊ हारान देशा लै आपणैं मामा लाबाना सेटा।

44 "ज़ेभै तैणीं तेरै भाईए रोश्श फांभै निं होए तेभै तैणीं रहै तिधी। 45 ज़ेभै सह इना गल्‍ला बिस्सरुई जाए तेभै शादूं हुंह ताह बापस? हुंह निं च़ाहंदी कि हुंह एकी धैल़ी दुही शोहरू बाझ़ी होए।"

46 तेखअ बोलअ रिबका इसहाका लै, "एसाबै ज़ुंण ईंयां हित्ती बेटल़ी आसा बैही दी, तिन्‍नां करै आसा हुंह पैहलै ई दुखी! ज़ै याकब बी ऐबै हित्ती बेटल़ी संघै बैह करे, तेता का हणअ भलअ कि हुंह मरी जाए।"