बृथा दाखो बाग
1 मंऐं लाई मेरै एकी पैरै साथी अर तेऊए दाखे बागे बारै एक गिह बोली:
मेरै एकी साथीओ थिअ रज़दी-पज़दी
धारा एक दाखो बाग।5:1 गिहा बोल़णैं आल़अ आसा ईशायाह, पैरअ साथी आसा बिधाता, दाखो बाग आसा इज़राईल
2 मेरै साथी दैनअ बागा दी कूप संघा काढै गट्टै-पात्थर टाल़ी करै पोर्ही।
बागे पहरै लै बणाईं तेऊ उछ़टै एक छ़ान,
दाखे रसा काढणा लै डाही कोफर बणाईं।
तेऊ न्हैल़ी दाख पाक्कदी,
पर फसल काढणें सिज़नै निखल़ै
दाखे बागा दी सोभ फल़ कल़ुऐ।
3 ऐबै बोला मेरअ साथी बिधाता इहअ, "तम्हैं ज़ुंण यहूदा मुल्खै अर एरुशलेम नगरी आसा बस्सै दै, तम्हैं करा मुंह अर मेरै दाखे बागो फैंसलअ। 4 मेरै एही किज़ै काम्मी हुई ज़ुंण हुंह तेऊ दाखे बागा लै करी निं सकअ? तै किल्है लागै तेथ कल़ुऐ फल़? तेथ किल्है निं मिठै फल़ लागै ज़ेही मंऐं आशा ती डाही दी?
5 "ऐबै खोज़ूं हुंह तम्हां का, मंऐं तेऊ दाखे बागा लै ऐबै किज़ै लाअ करी: मुंह काढणअ तेथ फेर-फिरदअ कांडैओ बाल़ पोर्ही, तेथ फेरे दुआल पाणीं मुंह ढोल़ी कि बणें ज़ीब एछी तेता खाई मांडण पाए। 6 तेऊ बागा दी दैणअ मुंह बाण-भेखल़ लागणै। तेथ नां मुंह धरनीं खण्हनअ अर नां मुंह तेथ छांग करनी। तेऊ बागा दैणअ मुंह कांडै-रिंडै करै भर्हनै। मुंह निं तेऊ बागा दी सरग हणैं दैणअ।"
7 स्वर्गे सारी सैने मालक बिधाता लै आसा
इज़राईल दाखे बागा ज़िहअ,
यहूदा मुल्खे परज़ा आसा दाखे बेला ज़िहै ज़ुंण तेऊ आसा रोहै दै।
सह च़ाहा त इहअ कि तिंयां मानदारी दी नसाफ करे,
पर तिंयां हुऐ एता का उंबल़ै हत्या करनै आल़ै।
सह च़ाहा त इहअ कि तिंयां भलअ करे,
पर फेर आसा लोग लेर-पकार पाई मज़त मांगदै लागै दै।5:7 भज. 80:8; मोत्त. 3:8-10