1 ओ बिधाता! हुंह च़ाहा त इहअ कि तूह सरग दुहाशी करै उंधै एछदअ! तै भाल़ बडै-बडै पर्बता दी तेरी डरै केही ज़ाज़री हणीं ती। 2 तिंयां उबल़णैं तै इहै ज़िहै आगी प्रैंदै पाणीं उबल़ा। तिहअ ई एछ तूह संघा रहैऊ तेरै दुशमणा का तेरअ बल, ताकि देशा-देशे लोग तेरै प्रतप्पा भाल़ी दर्छ़णअ छ़ुटे! 3 पैहलै बी किऐ तै तंऐं इहै नुआहरै काम ज़ुंण हाम्हैं सोठै ई नांईं तै कि इहअ बी सका हई! तूह होथअ त उंधै अर बडै-बडै पर्बता दी हुई ती ज़ाज़री ज़ांऊं तंऐं आपणअ ज़ोर रहैऊअ। 4 शुरू ओर्ही आझ़ तैणीं नां ताह ज़िहअ परमेशर कुंण हुअ अर नां भाल़अ अर नां कुंणी इहअ शूणअ कि ताखा महान कुंण होर होए। ताखा सुआई निं होर कोहै परमेशर आथी ज़ुंण इहै भलै काम करा अर ज़सरै आसरै रही सके।✝64:4 भज. 31:19; 1 करि. 2:9 5 तूह करा तिन्‍नें मज़त ज़ुंण भलअ करा अर ज़िहअ तूह च़ाहा तेही ज़िन्दगी ज़िऊआ। पर पाप करनै आल़ै लै एछा ताह रोश्शै। हाम्हैं बी रहै पाप करदै लागी अर शुरू ओर्ही आसा म्हारी एही ई दशा, तेखअ किहअ करै च़ाल्‍लअ म्हारअ उद्धार हई। 6 हाम्हैं सोभै मणछ आसा पापी, इहै छ़ोतलै मणछा ज़िहै ज़ुंण तेरी पबित्र ज़ैगा एछी निं सकदअ। म्हारै धर्में काम बी आसा चकल़ित्तै च़िथल़ै ज़िहै। किल्हैकि म्हारै पाप आसा शुक्‍कै दै पाचा ज़िहै ज़ेता बागरी दूर फर्ल़ाऊआ। 7 ताह सेटा निं कोहै अरज़ करदअ, नां ताह सेटा लै कुंण मज़त मांगदअ एछदअ। तैही आसा तूह हाम्हां का दूर डेऊअ द अर तंऐं डाहै हाम्हैं म्हारै पापे बशै शोटी।

8 पर बिधाता, तूह आसा म्हारअ बाब। हाम्हैं आसा माट्टै ज़िहै, तूह आसा खमार। हाम्हैं आसा तंऐं बणाऐं दै,✝64:8 भज. 100:3; गल. 3:26 9 तूह निं हाम्हां लै खास्सै रोश्श करी नां इहअ करी कि तूह सदा म्हारै पाप आद डाहे। हाम्हैं आसा तेरी परज़ा, तूह कर हाम्हां लै झींण। 10 भाल़, तेरी पबित्र नगरी*64:10 तेरी पबित्र नगरी यहूदा मुल्खै एरुशलेम नगरी संघी लागै बाण-भेखल़, एरुशलेम नगरी हुई उज़र अर बरैबाद। 11 तेरी पबित्र ज़ैगा अर तेथ तेरी शान-शोभा आल़अ भबन ज़ेथ म्हारै दाद-बाब तेरी पूज़ा-गाज़ा करा तै, सह बी किअ आगी जैंदरी दहई खतम। ज़ेतरी बी ज़ैगा म्हारी दिला लोभणैं आल़ी थिई तिंयां किई पठी बरैबाद। 12 हे बिधाता, एतरी गल्‍ला हई बी ताह किछ़ै निं करनअ? ताह कै इहअ ई च़ुप्पी रहणअ बेशी अर ताह कै हाम्हां लै होर आफ़त दैणअ पल़णै ज़ेता हाम्हैं ज़िरी निं सकदै?