Josué 6

Ukottolhiya ni ulhakalhihiya iwani yo Uyeriko

1 Mikhora chulhupalhe cho ukelhelha iwani yo Uyeriko chaari chinatteiye rata wo nhina, wiira yaatiyelhelhe Aisraeli ahikelhe. Khaawo ntu onrie ukhelha wala ukhuma yeyo iwani iyo. 2 Apwiiya Nlhuku nkayeerelha Nayoshua wiira, "Mwooneke, Miyaano kinouvahani machiri o ukottolha iwani yo Uyeriko vamoka ni amwene aya ni manyaasikari aya. 3 Inyuva ni alhe arii ni ikerero onkhaye nrukurerieke yeyo iwani iyo nkwaha mmoka kila nihuku wo mahuku sita. 4 Opochera ishaani saba, kila mmoka nakushilhe niphenga nawe no inyaka yo ikhondoro ilhopwana, aholhelheke uhoolho wo Nsanduku no Malhehano. Ni nihuku no saba nrukurierieke yeyo iwani iyo mikwaha saba uno opochera ishaani yoopaka maphenga. 5 Vanohalha aya woopa yayo maphenga ayo wo nlhove nulhuphalhe, ni inyu mwiiwaka etu nenno nlhove nno, attu onkhaye akhuwelheke chinene ni ishiri cho iwani chinoowulhuwa vathi. Kila ntu akelheke vawani vawo, wo ukhuma vakittu veemenlhe awe."

6 Paahi, Nayoshua anaaya Nanuni nkayeehana opochera ishaani, nkayeerelha, "Nkusheke Nsanduku no Malhehano, ni opochera ishaani saba akusheke maphenga saba o inyaka cho ikhondoro chilhopwana, ahoolhelheke uhoolho wo Nsanduku na Apwiiya Nlhuku." 7 Nayoshua enre wiira, "Arweeke uhoolho nrukurerieke iwani, ni attu anovara ikerero ayo arweeke uhoolho Nsanduku no Malhehano na Apwiiya Nlhuku."