1 Roma soja nɔkɔtɔma ko hi Kaisarea nɛ a tsɛɛ lɛ ke Kornelio; nɛ le ji Italia soja amɛ a asafoatsɛ. 2 Kornelio jaa Mawu nɛ e kɛ e we ɔ tsuo yee Mawu gbeye. E mi mi jɔ nɛ e naa ohiafohi mɔbɔ, nɛ e sɔleɔ daa. 3 Ligbi ko piani ngmlɛ etɛ mi ɔ, Kornelio na ngɛ nina mi paa kaa Mawu bɔfo ko nyɛɛ kɛ ma e ngɔ. Kɛkɛ nɛ e tsɛ lɛ ke, "Kornelio!"

4 Kornelio hyɛ bɔfo ɔ too nɛ e ye gbeye nɛ e bi lɛ ke, "Nutsɔ, mɛni o ngɛ hlae kaa ma pee ha mo?" Bɔfo ɔ de lɛ ke, "Mawu nu o sɔlemi ɔmɛ, nɛ e na kpakpa amɛ nɛ o ngɛ pee ɔ. 5 Lɔ ɔ he je ɔ, moo tsɔ kɛ ya Yopa nɛ a ya tsɛ nyumu ko nɛ a tsɛɛ lɛ Simon Petro ɔ kɛ ba. 6 E ya to Simon lohwe he womi tsopa wolɔ ɔ we ɔ mi ngɛ wo ɔ nya. Ke e ba a, e ma ba tsɔɔ mo nɔ́ nɛ sa nɛ o pee."

7 Bɔfo ɔ kuɛ se mi laa we nɛ Kornelio tsɛ e sɔmɔli enyɔ kɛ e he buli ɔmɛ a ti nɔ kake nɛ yee Mawu gbeye ɔ; 8 nɛ e bɔ mɛ nɔ́ nɛ e na a, nɛ e tsɔ mɛ Yopa.

9 E nɔ jena benɛ e piɛ bɔɔ nɛ tsɔli ɔmɛ maa su Yopa ma a mi ɔ, Petro ho e tsu yi mi ya nɛ e ya sɔle. Jamɛ a be ɔ mi ɔ, a fia piani ngmlɛ nyɔngma kɛ enyɔ. 10 Hwɔ bɔni lɛ yemi, se a ngɛ niye ni hooe. Kɛkɛ ɔ, benɛ e piɛ bɔɔ nɛ a maa gbe niye ni ɔ nya a Petro pee kaa nɔ ko nɛ nɔ́ nɔ e nɔ. 11 Nɛ e na nɛ hiɔwe nya bli, nɛ a pɛtɛ nɔ́ ko nɛ ngɛ kaa bo ngua ko e kɔ nya eywiɛ ɔmɛ a he kɛ ma zugba. 12 Nɛ e na je mi lohwehi slɔɔtohi, sinɔhi kɛ lohwe pɛlitsɛhi ngɛ jamɛ a bo ɔ mi. 13 Kɛkɛ nɛ gbi ko de lɛ ke, "Petro, yaa gbe lohwe nɛ ɔmɛ a ti nɔ́ nɛ o suɔ nɛ o ye."

14 Se Petro ha gbi ɔ heto ke, "Dabi, Nutsɔ, i yi lohwe nɛ ɔmɛ a ti eko hyɛ, ejakaa wɔ Yuda bi ɔmɛ wa mlaa ngmɛ blɔ kaa waa ye."

15 Nɛ gbi ɔ de lɛ ekohu ke, "Mo ko je Mawu nguane, ejakaa ke e ke nɔ ko he tsɔ ɔ, e he tsɔ kɛ pi si."

16 A je nina nɛ ɔ ngɔ tsɔɔ lɛ si etɛ, kɛkɛ nɛ a sa bo ɔ kɛ ho hiɔwe ya ekohu. 17 Jehanɛ ɔ, Petro pee yaa, ejakaa e nui nɔ́ nɛ e na a kɛ nɔ́ nɛ a ngɛ lɛ tsɔɔe ɔ sisi. Benɛ e ngɛ ní nɛ ɔmɛ a he susue ɔ, Kornelio tsɔli ɔmɛ ba su agbo ɔ nya, 18 nɛ a ngɛ e si bie.

19 Petro ngɛ ni nami ɔ he susue nɛ Mumi Klɔuklɔu ɔ de lɛ ke, "Nyumuhi etɛ komɛ ngɛ mo hlae. 20 Mo kple si nɛ o ya na mɛ, nɛ o kɛ mɛ nɛ ya, ejakaa ami ji nɔ nɛ tsɔ mɛ."

21 Petro kple si kɛ ba a ngɔ nɛ e de mɛ ke, "Ami ji nɔ nɛ nyɛ ngɛ hlae ɔ nɛ, mɛni sane he je?"

22 Tsɔli ɔmɛ de lɛ Roma Tatsɛ Kornelio sɛ ɔ; bɔ nɛ e ji Mawu jalɔ kɛ Nɔmlɔ kpakpa nɛ Yuda bi ɔmɛ buu lɛ, kɛ bɔ nɛ Mawu bɔfo je e he kpo kɛ tsɔɔ lɛ, nɛ e de lɛ ke e tsɔ kɛ ba tsɛ lɛ nɛ e ba tsɔɔ lɛ nɔ́ nɛ Mawu ngɛ hlae nɛ e pee ɔ.

23 Kɛkɛ nɛ Petro tsɛ mɛ kɛ ba we ɔ mi nɛ e pee mɛ nubwɔ nɛ e ha a hwɔ. Nɛ benɛ je na a, e kɛ tsɔli ɔmɛ kɛ kaseli ɔmɛ a ti ni komɛ nɛ je Yopa a pue nɔ kɛ ho Kaisarea ya.

24 Benɛ a ya su Kaisarea e nɔ jena a, e na kaa Kornelio kɛ e wekuli kɛ e suɔli tsuo bua a he nya kɛ ngɛ lɛ blɔ hyɛe. 25 E ba mi kaa benɛ Petro sɛ we ɔ mi ɔ, Kornelio kpla si ngɛ e nane nya nɛ e ma ja lɛ.

26 Se Petro de lɛ ke, "Tee si! Tsa pi Mawu ji mi!"

27 Nɛ e te si nɛ e kɛ lɛ sɛɛ ni saii loko ji a ya sɛ we ɔ mi he nɛ nihi nɛ e kpee ɔmɛ bua a he nya ngɛ ɔ.

28 Nɛ Petro de mɛ ke, "Nyɛ le kaa Yuda bi ɔmɛ a mlaa amɛ ngmɛ we blɔ kaa ma ba ma kpa mi no ko we mi kaa kikɛ ɔ. Se Mawu tsɔɔ mi ngɛ ni nami mi kaa ma ko tsɛ nɔ ko ke yaka nɔmlɔ, aloo ma ko de ke e he tsɔ we. 29 Enɛ ɔ ha nɛ i nyɛɛ nyɛ tsɛmi ɔ nɔ amlɔ ɔ nɔuu kɛ ba. Lɔ ɔ he je ɔ, nyɛ de mi nɔ́ he je nɛ nyɛ ba tsɛ mi ngɛ."

30 Nɛ Kornelio he nɔ nɛ e ha Petro heto ke, "Mwɔnɛ ɔ ji ligbi eywiɛ nɛ i ngɛ sɔlee kaa bɔ nɛ i pɔɔ peemi daa piani ngmlɛ etɛ mi ɔ. Nyumu ko nɛ wo tade nɛ ngɛ kpɛe ba da ye hɛ mi; 31 nɛ e de mi ke, ‘Kornelio, Mawu nu o sɔlemi ɔmɛ, nɛ e na kpakpahi nɛ o ngɛ pee ɔ. 32 Enɛ ɔ he je ɔ, moo tsɔ nɛ a ya tsɛ Simon Petro kɛ ba. E ya to nubwɔ ngɛ Simon nɔ nɛ woɔ lohwe he womi tsopa a we ɔ mi ngɛ wo ɔ nya ngɛ Yopa ma a mi. Ke e ba a, e ma ba tsɔɔ mo nɔ́ nɛ o maa pee.’ 33 Lɔ ɔ he je nɛ i tsɔ nɛ a ba tsɛ mo nɔuu ngɛ; nɛ mo hu o ye ye gbi ɔ nɔ. Enɛ ɔ he nɛ wa bua wa he nya ngɛ Nutsɔ ɔ hɛ mi ngɛ hiɛ ɔ ngɛ konɛ waa bu sɛ nɛ e kɛ ha mo ke o ba de wɔ ɔ tue."

34 Kɛkɛ nɛ Petro de ke, "I na paa kaa tsa pi Yuda bi ɔmɛ kɛkɛ nɛ Mawu suɔ. 35 Se mohu e ngɛ nihi ngɛ ma tsuaa ma nɔ, nihi nɛ jaa lɛ nɛ peeɔ kpakpa nɛ a sa e hɛ mi. 36 I he ye kaa nyɛ nu Manye Munyu ɔ nɛ a kɛ ba ha Israel bi ɔmɛ, kaa kɛ gu Yesu Yiwamihelɔ kɛ je ɔ tsuo Nutsɔ ɔ nɔ ɔ, a ma na Mawu dɛ mi he jɔmi ɔ. 37 Yohane Baptisilɔ nɛ je kikɛmɛ a munyu nɛ ɔ fiɛmi sisi kɛ je Galilea nɛ e gbɛ kɛ fia Yudea tsuo. 38 I he ye kaa nyɛ le bɔ nɛ Mawu ngɔ Mumi Klɔuklɔu ɔ kɛ he wami kɛ pɔ Yesu nɛ je Nazaret ɔ nu. E kpa si nɛ e pee kpakpa. E tsa nihi nɛ mumi yayami ngɛ a mi ɔmɛ, ejakaa Mawu kɛ lɛ ngɛ.

39 Nɛ wɔ bɔfo ɔmɛ ji odase yeli ngɛ nɔ́ fɛɛ nɔ nɛ e pee ɔ he, ngɛ Israel zugba a nɔ kɛ Yerusalem he nɛ a sɛu lɛ ngɛ ɔ. 40 Se Mawu tle lɛ si kɛ je gbeje ligbi etɛ se nɛ e je lɛ kpo ngɔ tsɔɔ, 41 tsa pi ma a tsuo, se mohu odase yeli komɛ nɛ Mawu hla kɛ fɔ si nɛ ji wɔ nihi nɛ waa kɛ lɛ ye ni nɛ wa nu ni benɛ e te si kɛ je gbeje ɔ. 42 Nɛ e tsɔ wɔ nɛ wa ya fiɛ Manye Munyu ɔ ngɛ he fɛɛ he, nɛ waa ye odase nɛ wa de ke, Yesu ji nɔ nɛ Mawu to kojolɔ kɛ ha nɔ tsuaa nɔ, hɛ kali kɛ ni gbogboehi tsuo. 43 Nɛ gbali ɔmɛ tsuo ye e he odase ke, nɔ tsuaa nɔ nɛ ma he e nɔ maa ye ɔ, a kɛ e he yayami maa ke lɛ ngɛ e biɛ mi."

44 Benɛ Petro ngɛ munyu nɛ ɔmɛ tue ɔ, Mumi Klɔuklɔu ɔ ba nɔ tsuaa nɔ nɛ ngɛ lɛ tue bue ɔ nɔ. 45 Enɛ ɔ ha nɛ Yuda bi ɔmɛ nɛ piɛ Petro he ɔ a nya kpɛ a he kaa a ngɔ Mumi Klɔuklɔu nɔ́ke nɔ ɔ kɛ ha ma je li hulɔ. 46,47 A ji he nguane, ejakaa a nu paa nɛ a ngɛ gbi slɔɔtohi tue nɛ a ngɛ Mawu yi jee. Kɛkɛ nɛ Petro bi ke, "Anɛ nɔ́ ko maa tsi mi blɔ ke ma ko baptisi nimli nɛ ɔmɛ nɛ na Mumi Klɔuklɔu ɔ kaa wɔ nɔuu ɔ lo?" 48 Nɛ e baptisi mɛ ngɛ Yesu Yiwamihelɔ ɔ biɛ mi. Nɛ pee se ɔ, Kornelio kpa Petro pɛɛ ke e hi a ngɔ be bɔɔ ko.