1 Paulo kɛ Sila ya Derbe kekle loko a pue nɔ kɛ ho Listra ya, he nɛ a ya na kaselɔ ko nɛ a tsɛɛ lɛ ke Timoteo ngɛ. Timoteo nyɛ ɔ Yuda no i, nɛ e ngɛ asafo ɔ mi. Se e tsɛ ɔ lɛɛ Hela no i. 2 Timoteo ji kaselɔ ko nɛ Listra kɛ Ikonium nyɛmi ɔmɛ tuɔ e he munyu kpakpa. 3 Lɔ ɔ he je ɔ, Paulo suɔ nɛ e kɛ mɛ nɛ ya. Se akɛnɛ nɔ tsuaa nɔ le kaa Hela no ji Timoteo tsɛ ɔ he je ɔ, Paulo wo lɛ nyumu mi ngɛ Yuda bi ɔmɛ a he loko ji a hia blɔ. 4 A kpa mahimahi a nɔ, nɛ a tsɔɔ mɛ mlaa amɛ, nɛ ji mlaahi nɛ bɔfo ɔmɛ kɛ nikɔtɔma amɛ ngɛ Yerusalem ɔ wo, nɛ kɔɔ Hela bi ɔmɛ a he ɔ, konɛ mɛ hu a ye nɔ. 5 Nɛ asafo ɔ bɔni klemi, nɛ e bɔni wami ngɛ hemi kɛ yemi hu mi.

6 Nɛ akɛnɛ Mumi Klɔuklɔu ɔ de mɛ ke, a ko ya Turkia nɛ ngɛ Asia zugba a nɔ, ngɛ jamɛ a be ɔ mi he je ɔ, a po mi ngɛ Frigia kɛ ba Galatia zugba a nɔ. 7 Benɛ a ba su Misia zugba a nɔ ɔ, a ka kaa a maa ya Bitinia, se Yesu Mumi ɔ ngmɛ́ mɛ blɔ. 8 Lɔ ɔ he je ɔ, a gu Misia nɔ́ ɔmɛ a mi kɛ ba Troia ma a mi.

9 Nɛ jamɛ a nyɔ ɔ mi nɛ a hwɔɔ si ɔ, Paulo na ni nami ko. E na nɛ Makedonia nyumu ko ngɛ lɛ pɛɛ kpae ke, "Ba Makedonia nɛ o ba ye ke bua wɔ." 10 Kɛkɛ nɛ wa dla wa he nɛ wa pue Makedonia blɔ ejakaa wa na kaa Mawu nɛ ngɛ wɔ tsɔe nɛ wa ya fiɛ Manye Munyu ɔ ngɛ lejɛ ɔ.

11 Amlɔ ɔ nɔuu ɔ, wa wo lɛ kɛ je Troia kɛ ba Samotrake, nɛ wa ba Neapoli e nɔ́ jena nɔ; 12 loko wa ba su Filipi nɛ ji Roma bi a nɔ yemi he nɛ ngɛ Makedonia zugba a nɔ, ngɛ Makedonia huzu nya; nɛ wa ba hi lejɛ ɔ be saii.

13 Benɛ e su Hejɔɔmi Ligbi ɔ, wa je ma a mi kɛ ho pa ko nya ya, he ko nɛ a pɔɔ sɔlemi peemi ngɛ ɔ, nɛ wa ya tsɔɔ yi komɛ nɛ ba lejɛ ɔ Ngmami Klɔuklɔu ɔ. 14 A kpɛti nɔ kake ji Lidia. E je Tiatira, nɛ e juaa bo nɛ a tsɛɛ ke kuajai ɔ. Lidia jaa Mawu. Lɔ ɔ he je ɔ, benɛ e ngɛ wɔ tue bue ɔ, Mawu bli e tsui nya nɛ e he nɔ́ tsuaa nɔ nɛ Paulo de ɔ ye. 15 Nɛ benɛ a sɔle lɛ kɛ e we ɔ tsuo ɔ, e bi wɔ nɛ wa ba to e ngɔ. E de wɔ ke, "Ke nyɛ buu mi kaa i heɔ Nutsɔ ɔ nɔ yeɔ anɔkuale mi ɔ, lɛɛ nyɛ ba to ye we ɔ mi." E ngɛ nɔ hluu kɛ ya si wa kplɛɛ.

16 Ligbi ko benɛ wa yaa pa a nya he nɛ a peeɔ Sɔlemi ngɛ ɔ, waa kɛ mawayo ko nɛ mumi yayami ngɛ e mi, nɛ naa ni ɔ ya kpe. Yoyo nɛ ɔ gu enɛ ɔ nɔ nɛ e ha nɛ e nutsɔ ɔmɛ na ni fuu. 17 E bɔni wa se nyɛɛmi kɛ ngmlaa ke, "Mawu tsɔli ji nimli nɛ ɔmɛ, nɛ a ba hiɛ ɔ nɛ a ba de nyɛ bɔ nɛ a kɛ nyɛ he yayami ɔmɛ maa ke nyɛ ha."

18 Yoyo nɛ ɔ ya nɔ kɛ ngmlaa kpami nɛ ɔ kɛ ya su be ko nɛ Paulo kɛ abofu nga mumi yayami ɔ yi ke, "I ngɛ mo fae ngɛ Yesu Kristo biɛ mi ke o je kpo kɛ je e mi." Nɛ nɔuu ɔ, mumi yayami ɔ je e mi.

19 Akɛnɛ yoyo ɔ nutsɔ ɔmɛ a ni nami ɔ se po he je ɔ, a nu Paulo kɛ Sila nɛ a sa mɛ si kɛ ba kojoli a hɛ mi ngɛ ma nɔ.

20 A ya po a nya ngɛ kojomi he ɔ kɛ ngmlaa ke, "Kikɛmɛ a Yuda bi nɛ ɔmɛ wo basabasa kɛ ngɛ wa ma a mi bae, 21 ejakaa a ngɛ ma mi bi ɔmɛ tsɔɔe nɛ a pee níhi nɛ sɛ kaa a peeɔ ngɛ Roma mlaa amɛ a nya."

22 Amlɔ ɔ nɔuu ɔ, ma mi bi ɔmɛ te si kɛ wo Paulo kɛ Sila, nɛ kojoli ɔmɛ ha nɛ a kpɔ a tadehi ngɛ a he nɛ a fiaa mɛ kpa saminya. 23 E ba mi kaa benɛ a fiaa mɛ kpa a ta a, a wo mɛ kɛ ya wo tsu mi. Nɛ a wo a he bulɔ ɔ si kaa a maa gbe lɛ ke e ha nɛ Paulo kɛ Sila ma fo kɛ je tsu ɔ mi. 24 Enɛ ɔ he je ɔ, e kɛ mɛ ya wo se tsu ɔ mi nɛ e wo a nane kɔsɔkɔsɔ.

25 Se benɛ nyɔ mi kpɛti su, nɛ Paulo kɛ Sila ngɛ sɔlee nɛ a ngɛ lae, nɛ nihi nɛ a wo mɛ hu tsu mi kɛ piɛ a he ngɛ lejɛ ɔ ngɛ mɛ tue bue ɔ, 26 kɛkɛ nɛ zugba huanya si kake too nɛ tsu ɔ mi gba. Sinya amɛ tsuo bli nɛ nɔ tsuaa nɔ kɔsɔkɔsɔ ɔ kplɔ pue si. 27 Benɛ a he bulɔ ɔ he tsiɛ nɛ e na kaa sinya amɛ kulaa bli ɔ, e susu kaa Paulo kɛ Sila kɛ nihi nɛ a wo mɛ hu tsu mi ɔ tsuo tu fo kɛ je. Lɔ ɔ he je ɔ, e hia klaate nɛ e ma kɛ gbe e he.

28 Se Paulo hia ngmlaa ke, "Koo gbe o he! Wɔ tsuo wa ngɛ hiɛ ɔ!"

29 Kɛkɛ nɛ e bi nɛ a ba ha lɛ kane, nɛ e sa fo kɛ sɛ se tsu ɔ mi kɛ gbeye yemi nɛ e ya kpla si ngɛ Paulo kɛ Sila hɛ mi. 30 Nɛ benɛ e kɛ mɛ je kpo ngɛ tsu ɔ mi ɔ, e bi mɛ ke, "Mawetsɛmɛ, kɛ ma pee kɛɛ nɛ ma na yi wami hemi?"

31 A ha lɛ heto ke, "Mo he Nutsɔ Yesu nɔ nɛ o ye, nɛ a ma he o kɛ o we ɔ tsuo yi wami."

32 Paulo kɛ Sila fiɛ Nutsɔ ɔ Manye Munyu ɔ kɛ tsɔɔ lɛ kɛ e we ɔ tsuo. 33 Nɛ e tsɔɔ a pa amɛ ha mɛ jamɛ a ngmlɛfia a mi nɔuu, nɛ a sɔle lɛ kɛ e we ɔ kulaa. 34 E kɛ mɛ ba e we ɔ mi nɛ e ngmɛ okplɔɔ ha mɛ, nɛ e kɛ e we ɔ na bua jɔmi kaa jehanɛ ɔ a plɛ Mawu jali. 35 Nɛ e ba mi kaa benɛ je na a, kojoli ɔmɛ tsɔ nɛ a ya de bulɔ ɔ ke, "Moo ngmɛɛ nimli ɔmɛ a he nɛ a ho!" 36 Kɛkɛ nɛ bulɔ ɔ de Paulo ke a ngmɛɛ a he, lɔ ɔ he je ɔ, a ma nyɛ maa ya.

37 Se Paulo ha tsɔli ɔmɛ heto ke, "Dabi! A ngmɛɛ we wa he lolo, ejakaa Roma bi ji wɔ, nɛ a fiaa wɔ kpa ngɛ ma nɔ, nɛ a wo wɔ tsu mi benɛ a kojo we wɔ. Mɛni a na nɛ a ngɛ hlae nɛ a ngmɛɛ wa he zaa? Dabi! Ha nɛ mɛ nitsɛmɛ a ba nɛ a ba ngmɛɛ wa he."

38 Benɛ polisi ɔmɛ ya bɔ kojoli ɔmɛ amaniɛ, nɛ a nu kaa Roma bi ji Paulo kɛ Sila a, a ye gbeye. 39 Lɔ ɔ he je ɔ, a ba tsu womi he ɔ nɛ a ba kpa mɛ pɛɛ. Benɛ a je mɛ kpo ɔ, a hɛɛ mɛ blɛuublɛuu kɛ pɛɛ kpami ke a je ma a mi. 40 Se Paulo kɛ Sila kpale kɛ ho Lidia we ɔ mi ya ekohu, nɛ a ya na kaseli ɔmɛ ngɛ lejɛ ɔ nɛ a fiɛ munyu ɔ kɛ wo mɛ he wami loko ji a je ma a mi.