1 Se nyumu ko nɛ a tsɛɛ lɛ ke Anania kɛ e yo hu ya jua a weto nɔ́ ko 2 nɛ a ngɔ sika a fa kɛ ba nɛ a ba de bɔfo ɔmɛ ke sika a kulaa nɛ a kɛ ba a nɛ.

3 Se Petro bi Anania ke, "Anania, mɛni he je nɛ Abosiami sɛ o mi nɛ o ngɛ Mumi Klɔuklɔu ɔ lakpa yee ke sika a kulaa ji nɛ ɔ? 4 Weto nɔ́ ɔ, mo nitsɛ o nɔ́ i, nɛ o jua lɛ bɔ nɛ o suɔ. Ja a nɔuu o ma nyɛ ke bɔ nɛ o suɔ. Mɛni he je nɛ o ngɛ lakpa yee mɔ? Mawu nɛ o ngɛ sisie se pi wɔ."

5 Petro nya nɔɛ si nɛ Anania nɔ si ngɛ zugba nɛ e gbo amlɔ ɔ nɔuu. Nɔ tsuaa nɔ tsui po, nɛ a ye gbeye. 6 Kɛkɛ nɛ nihewi komɛ nɛ ngɛ lejɛ ɔ ba dla gbogboe ɔ nɛ a wo lɛ ya pu.

7 Safira li nɔ nɛ ba e huno ɔ nɔ. Maa pee ngmlɛfia etɛ se ɔ, lɛ hu e ba lejɛ ɔ. 8 Nɛ Petro bi lɛ ke, "Anɛ bɔ nɛ nyɛ jua nyɛ zugba a ha ji nɛ ɔ lo?" E ha lɛ heto ke, "Ee, ja a nɛ wa jua lɛ." 9 Kɛkɛ nɛ Petro bi lɛ ke, "Mɛni he je nɛ o kɛ o huno ɔ pee kake kɛ ngɛ Mawu Mumi ɔ kae kaa e le nɔ́ nɛ ngɛ nɔ yae ɔ lo? Nihi nɛ ya pu o huno ɔ, mɛ nɛ a daa si ngɛ sinya a se ɔ nɛ, nɛ a ma wo mo hu kɛ ho piɔ."

10 Oya a nɔuu nɛ e nɔ si nɛ e gbo. Benɛ nihewi ɔmɛ ba ba na kaa e gbo ɔ, a wo lɛ nɛ a ya pu lɛ ngɛ e huno ɔ kasa mi. 11 Asafo ɔ kɛ nihi kulaa nɛ nu nɔ́ nɛ ba a he ɔ ye gbeye saminya.

12 Jamɛ a be ɔ mi ɔ, bɔfo ɔmɛ ya kpee daa ngɛ Salomo Ablanaa a nɔ ngɛ Sɔlemi We ɔ, nɛ a tsuɔ nyakpɛ níhi nɛ a peeɔ okadi nguahi ngɛ ma a mi. 13 Nihi nɛ be asafo ɔ mi nɛ be a ngɔ tete po buu mɛ saminya ngɛ ma a mi. 14 Se nihi babauu nɛ ji nyumuhi kɛ yihi tsuo nɛ he Nutsɔ ɔ nɔ ye ɔ ba piɛ a he. 15 Nɛ a wo hiɔtsɛhi kɛ ba gbɛjegbɛ ɔmɛ a tue ngɛ sahi a nɔ nɛ a ngɛ mlɛe konɛ ke Petro bee ɔ, e nini nɛ pue a nɔ. 16 Nihi babauu je Yerusalem kɔpe ɔmɛ a mi nɛ a wo hiɔtsɛhi kɛ nihi nɛ mumi yayami ngɛ a mi kɛ ba a ngɔ nɛ a tsa a ti nɔ tsuaa nɔ.

17,18 Kɛkɛ nɛ Osɔfo Nɔkɔtɔma a kɛ e wekuli kɛ e huɛmɛ nɛ ngɛ Saduki bi ɔmɛ a kpɛti ɔ hɛ dɔ nɛ a ba nu bɔfo ɔmɛ kɛ ya wo tsu. 19 Se Nutsɔ ɔ bɔfo ko ba bli tsu ɔ nya ha mɛ nyɔ mi kpɛti nɛ e je mɛ kpo, nɛ e de mɛ ke, 20 "Nyɛɛ ya Sɔlemi We ɔ nɛ nyɛ ya fiɛ Wami nɛ ɔ he sane kɛ tsɔɔ ma a."

21 A pue nɔ kɛ ho Sɔlemi We ɔ ya. A ya su lejɛ ɔ benɛ je mi ngɛ tsɔe nɛ a bɔni fiɛmi nɔuu. Pee se ɔ, Osɔfo Nɔkɔtɔma a kɛ e se nyɛɛli ɔmɛ ba Sɔlemi We ɔ jamɛ a mɔtu ɔ nɛ a tsɛ Yuda bi ɔmɛ a nikɔtɔma amɛ ngɛ ma a mi kpe; nɛ a tsɔ ke a ya kpaka bɔfo ɔmɛ kɛ ba nɛ a kojo mɛ. 22 Se benɛ tsɔli ɔmɛ ba he nɛ a wo mɛ tsu ngɛ ɔ, a na kaa bɔfo ɔmɛ be tsu ɔ mi, lɔ ɔ he je ɔ a kpale ya bɔ kpe ɔ amaniɛ ke, 23 "A ngmɛ tsu ɔmɛ a nya kpɛii nɛ buli ɔmɛ hu daa si ngɛ agbo ɔmɛ a nya pɛpɛɛpɛ. Se benɛ wa bli tsu ɔmɛ a nya a, wa nɛ nɔ ko ngɛ a mi."

24 Benɛ tsɔli ɔmɛ bɔ mɛ nɔ́ nɛ a ya na a, polisi ɔmɛ a nyatsɛ ɔ kɛ osɔfo nikɔtɔma amɛ pee yaa nɛ a bɔni nɔ́ nɛ maa ba kɛ e nyagbe ɔ he susumi. 25 Kɛkɛ nɛ nɔ ko ba ba de mɛ ke ni ɔmɛ nɛ a wo tsu ɔ, a je kpo nɛ a ya ngɛ fiɛe ha ni ɔmɛ ngɛ Sɔlemi We ɔ.

26,27 Nɛ polisi ɔmɛ a nyatsɛ ɔ kɛ e we bi ɔmɛ ho ya kpaka mɛ blɛuu kɛ ba kpe ɔ hɛ mi. A pee we mɛ basabasa, ejakaa a ngɛ gbeye yee kaa ke a pee mɛ jamɛ a nɔ ko ɔ, ma mi bi ɔmɛ maa gbe mɛ.

28 Kɛkɛ nɛ Osɔfo Nɔkɔtɔma a bi mɛ ke, "Anɛ wa bɔɛ nyɛ kɔkɔ ke nyɛ ko fiɛ ngɛ Yesu biɛ mi ngɛ ma nɛ ɔ mi hu lo? Nyɛ ha nɛ Yerusalem tsuo hyi tɔ kɛ nyɛ ni tsɔɔmi ɔ; nɛ nyɛ ngɛ hlae nɛ nyɛ pia wɔ ngɛ nyumu nɛ ɔ gbenɔ ɔ he."

29 Se Petro kɛ bɔfo ɔmɛ he nɔ nɛ a de mɛ ke, "E sa kaa waa bu Mawu tue pe nimli. 30 Wa nɛmɛ a Mawu ɔ nɛ tle Yesu si kɛ je gbeje benɛ nyɛ sɛu lɛ ngɛ sɛumi tso nɔ nɛ e gbo ɔ. 31 Nɛ Mawu wo e nɔ gojoo kɛ he wami, nɛ e pee lɛ Matsɛ bi kɛ Yiwamihelɔ konɛ Israel bi ɔmɛ a na he blɔ nɛ a tsake a tsui nɛ a ngɔ a he yayami kɛ ke mɛ. 32 Wɔ ji kikɛmɛ a ní nɛ ɔmɛ a he odase yeli, kaa bɔ nɛ Mumi Klɔuklɔu ɔ nɛ Mawu kɛ haa nihi nɛ buu lɛ tue ɔ hu yeɔ he odase ɔ."

33 Petro munyu ɔ heto ɔ ha kpe ɔ na abofu wawɛɛ nɛ a pee a juɛmi kaa a maa gbe mɛ. 34 Se Farisi no mlaa tsɔɔlɔ ko nɛ a tsɛɛ lɛ ke Gamaliel, nɛ a buu lɛ ngɛ ma a mi ɔ, te si da si nɛ e de kpe ɔ ke a ha nɛ bɔfo ɔmɛ a je kpo bɔɔ. Ejakaa e maa suɔ nɛ e kɛ kpe ɔ nɛ na ni sɛɛmi.

35 Benɛ bɔfo ɔmɛ je kpo se ɔ, Gamaliel de kpe ɔ ke, "Israel bi, nyɛɛ hyɛ nyɛ he nɛ hi ngɛ nɔ́ nɛ nyɛ ngɛ hlae nɛ nyɛɛ pee nimli nɛ ɔmɛ ɔ he. 36 Nyɛ kai kaa be ko nɛ be ɔ, nyumu ko nɛ a tsɛɛ lɛ ke Teuda a te si nɛ e pee e he kaa nɔ ko ji lɛ nɛ nihi maa pee lafa eywiɛ nyɛɛ e se; se a gbe lɛ, nɛ e se nyɛɛli ɔmɛ gbɛ fia nɛ nɔ́ ko be.

37 Ngɛ nyumu nɛ ɔ se ɔ, Galilea no ko nɛ a tsɛɛ lɛ ke Yuda hu ba te si benɛ a ngɛ nimli a yi bɔ kanee ɔ. Ni komɛ nyɛɛ e se kaa e kaseli, se lɛ hu a gbe lɛ nɛ e se nyɛɛli ɔmɛ gbɛ fia.

38 Lɔ ɔ he je ɔ, i ngɛ nyɛ slɔe kaa nyɛɛ ngmɛɛ nimli nɛ ɔmɛ a he, nɛ nyɛ ko di mɛ. Ejakaa ke mɛ nitsɛmɛ a yi mi tomi he ni nɛ a ngɛ tsue ɔ, e be kɛe nɛ e se maa po. 39 Se ke Mawu ni tsumi nɛ a ngɛ tsue ɔ, lɛɛ nyɛ be a nya nyɛe maa tsi, nɛ e maa ba mi kaa nyɛɛ kɛ Mawu ngɛ ta hwue."

40 Kpe ɔ bu lɛ tue, nɛ a tsɛ bɔfo ɔmɛ kɛ ba a hɛ mi ekohu. A fiaa mɛ kpa nɛ a bɔ mɛ kɔkɔ ke a ko tu munyu ngɛ Yesu biɛ mi hu; kɛkɛ nɛ a ngmɛɛ a he ke a ho. 41 Nɛ a je a ngɔ kɛ bua jɔmi kaa Mawu bu mɛ nimli nɛ sa nɛ a bɔ mɛ ahlua ngɛ e biɛ ɔ he. 42 A ya nɔ nɛ a tsɔɔ ni, nɛ a fiɛ ngɛ Sɔlemi We ɔ kɛ Ngmami ɔ kasemi hehi ngɛ a wehi a mi daa ligbi ke Yesu ji Mesia a nɛ.