1 Saulo fia pɛɛ si kaa e ma kpata Kristo se nyɛɛli ɔmɛ tsuo a hɛ mi. Lɔ ɔ he je ɔ, e ho Osɔfo Nɔkɔtɔma a ngɔ ya ngɛ Yerusalem; 2 nɛ e ya bi nɛ e ha lɛ womi nɛ e ma kɛ ya Damasko kpe he ɔmɛ nɛ e kɛ ya nuu asafo mi bi ɔmɛ, nyumuhi jio, yihi jio, nɛ e wo mɛ ga kɛ ba Yerusalem.

3 Se benɛ Saulo yaa ngɛ blɔ ɔ nɔ nɛ e piɛ bɔɔ nɛ e maa su Damasko ɔ, la ko kpɛ si kake too kɛ je hiɔwe kɛ ba bɔle lɛ. 4 E nɔ si; nɛ e nu gbi ko nɛ ngɛ lɛ dee ke, "Saulo! Saulo! Mɛni he je nɛ o ngɛ mi yi mi wae ɔ?"

5 Nɛ Saulo bi ke, "Mo mɛnɔ i, Nutsɔ?"

Nɛ gbi ɔ ha lɛ heto ke, "Imi Yesu, nɔ nɛ o ngɛ lɛ yi mi wae ɔ i. 6 Moo te si nɛ o ho ma a mi ya nɛ i ma tsɔɔ mo nɔ́ nɛ o maa pee."

7 Nihi nɛ a kɛ Saulo nyɛɛ ɔ plɛ mumuihi, nɛ a pee yaa, ejakaa a ngɛ gbi ɔ nue mohu se a nɛ nɔ ko. 8 Nɛ e ba mi kaa benɛ Saulo te si ɔ, e na kaa e hɛ yu. A kpaka lɛ kɛ ho Damasko ya. 9 E ya hi lejɛ ɔ ligbi etɛ sɔuu nɛ e hɛ yu. E yi ni nɛ e nui nyu hulɔ.

10 Jamɛ a be ɔ mi ɔ, kaselɔ ko hi Damasko nɛ a tsɛɛ lɛ ke Anania. Nutsɔ ɔ tsɛ lɛ ngɛ ni nami mi ke,

11 "Anania!" Nɛ e he nɔ ke, "Nutsɔ, o nɛ mi." Nɛ Nutsɔ ɔ de lɛ ke, "Yaa he ko nɛ a tsɛɛ ke Gbɛjegbɛ Tlɔmɔɔ ɔ nɛ o ya bi Tarso nyumu ko nɛ a tsɛɛ lɛ ke Saulo ɔ si ngɛ Yuda we ɔ mi. E ngɛ sɔlee kɛ ngɛ mi tsɛe amlɔ nɛ ɔ. 12 I ha nɛ e na ngɛ ni nami mi kaa nyumu ko nɛ a tsɛɛ lɛ ke Anania a ma e ngɔ nɛ e kɛ e nine ba ta e he bɔ nɛ pee nɛ e hɛ ngmɛ nɛ bli ekohu."

13 Se Anania he nɔ nɛ e de ke, "Nutsɔ, i nu awi nɛ nyumu nɛ ɔ ye kaseli ɔmɛ nɛ ngɛ Yerusalem ɔ he. 14 Nɛ wa nu kaa osɔfo nikɔtɔma amɛ ha lɛ he wami nɛ e ma kɛ ya nuu kaseli ɔmɛ ngɛ Damasko."

15 Se Nutsɔ ɔ de lɛ ke, "Yaa nɛ o ya pee bɔ nɛ i de mo ɔ. Ejakaa Saulo ji ye tsɔlɔ nɛ i hla nɛ e ma wo ye munyu ɔ kɛ ya ha ma je li kɛ matsɛmɛ kɛ Israel bi ɔmɛ hu. 16 Nɛ ma tsɔɔ lɛ amanehlu abɔ nɛ e maa na ngɛ ye biɛ mi."

17 Anania pue nɔ kɛ ho nɛ e ya na Saulo nɛ e kɛ e nine pue e nɔ, nɛ e de lɛ ke, "Anyɛmi Paulo, Nutsɔ Yesu, nɔ nɛ je e he si kɛ tsɔɔ mo ngɛ blɔ ɔ nɔ ɔ, e tsɔ mi o ngɔ bɔ nɛ pee nɛ o na Mumi Klɔuklɔu ɔ nɛ o hɛ ngmɛ ɔ nɛ bli nɛ o hyɛ nɔ́ ekohu."

18 Kɛkɛ nɛ ni komɛ kaa lo totohi je e hɛ ngmɛ ɔmɛ a nɔ pue si amlɔ ɔ nɔuu nɛ e bɔni nɔ́ hyɛmi, nɛ a baptisi lɛ. 19 E ye ni, nɛ e na he wami nɛ e kɛ Damasko kaseli ɔmɛ hi si be saii, 20 nɛ e bɔni Yesu Manye Munyu ɔ fiɛmi amlɔ ɔ nɔuu ngɛ kpe he ɔmɛ kaa anɔkuale mi ɔ, Yesu ji Mawu Bi ɔ nɛ.

21 Nɔ tsuaa nɔ nɛ nu kaa Paulo ngɛ Manye Munyu ɔ fiɛe ɔ, a nya kpɛ a he nɛ a bi ke, "Anɛ tsa pi nyumu nɛ ɔ nɔuu nɛ wa kaseli ɔmɛ yi mi ngɛ Yerusalem ɔ lo? A ha nɛ wa le kaa e ba hiɛmɛ nɛ ɔ nɛ e ba nu kaseli ɔmɛ nɛ e wo mɛ ga kɛ ya ha osɔfo nikɔtɔma amɛ."

22 Se mohu Paulo na he wami agbo ko kɛ ngɛ Manye Munyu ɔ fiɛe, nɛ Yuda bi ɔmɛ nɛ ngɛ Damasko ɔ a nya kpɛ a he, ejakaa e ngɛ mɛ dee paa ke Yesu ji Yiwamihelɔ ɔ nɛ. 23 E ba mi kaa Yuda bi ɔmɛ a nikɔtɔma amɛ muɔ a yi mi kpɔ kaa a maa gbe lɛ. 24 Se Paulo na le kaa a ngɛ ma a agbo ɔmɛ a nya bue nyɔ kɛ pia nɛ a maa gbe lɛ. 25 Nɛ kaseli ɔmɛ ekomɛ wo lɛ kɛ wo kusii mi nyɔ mi kpɛti nɛ a kɛ lɛ gu gbogbo nɔ kɛ je kpo ngɛ ma a mi.

26 E ba mi kaa benɛ Paulo ya su Yerusalem ɔ, e bɔ mɔde kaa e maa piɛ kaseli ɔmɛ a he, se a ngɛ lɛ gbeye yee, ejakaa a he we lɛ yi kaa kaselɔ ji lɛ. 27 Se Barnaba nu e kɔni si kɛ ba bɔfo ɔmɛ a ngɔ nɛ e bɔ mɛ bɔ nɛ Nutsɔ ɔ je e he kpo kɛ tsɔɔ Paulo ngɛ Damasko blɔ ɔ nɔ kɛ nɔ nɛ Nutsɔ ɔ de lɛ, kɛ bɔ nɛ e ngɛ fiɛe ngɛ Damasko ngɛ Yesu biɛ mi ɔ. 28 Enɛ ɔ ha nɛ a he lɛ kɛ wo a kpɛti, 29 nɛ e fiɛ Munyu ɔ paa ngɛ Nutsɔ ɔ biɛ mi kɛ he wami. Se Hela bi komɛ nɛ e kɛ mɛ sa nya a, a pee a juɛmi kaa a maa gbe lɛ. 30 Benɛ kaseli ɔmɛ nu awi nɛ a ngɛ hlae nɛ a ye lɛ ɔ he ɔ, a wo lɛ kɛ ho Kaisarea ya, nɛ a ya wo lɛ blɔ kɛ ho e ma mi ya ngɛ Tarso.

31 Jehanɛ ɔ, asafohi nɛ ngɛ Yudea kɛ Galilea kɛ Samaria a, a na tue mi jɔmi nɛ a nane nu si nɛ a he ba hiɛ fuu. A hi si ngɛ Mawu gbeye yemi mi, nɛ a na bua jɔmi ngɛ Mumi Klɔuklɔu ɔ mi.

32 E ba mi kaa benɛ Petro ngɛ ni klɔuklɔu ɔmɛ slaae ngɛ mahi a nɔ ɔ, e ba su Lida, 33 nɛ e na nyumu ko nɛ a tsɛɛ lɛ ke Ainea nɛ e ku pue si, nɛ e nyɛɛ we jeha kpaanyɔ sɔuu. 34 Kɛkɛ nɛ Petro de lɛ ke, "Ainea, Yesu Kristo tsa mo! Tee si nɛ o dla o sa a!" Nɛ e te si amlɔ ɔ nɔuu. 35 Enɛ ɔ ha nɛ Lida kɛ Saron bi tsuo plɛ Kristo se nyɛɛli.

36 Se yo kaselɔ ko ngɛ Yopa nɛ a tsɛɛ lɛ ke Tabita nɛ e peeɔ kpakpa kɛ haa nihi, titli ɔ, ohiafohi. 37 Nɛ e ba mi jamɛ a be ɔ mi kaa e wo hiɔ nɛ e gbo, nɛ a wluɔ e gbogboe ɔ si ngɛ hiɔwe tsu ko mi. 38 Se benɛ a nu kaa Petro ngɛ Lida ngɛ a kasa nya a, a tsɔ nyumuhi enyɔ nɛ a ya kpa lɛ pɛɛ nɛ e kɛ mɛ nɛ ba Yopa nɔuu. 39 E ye a gbi ɔ nɔ nɛ e kɛ tsɔli ɔmɛ pue nɔ kɛ ba Yopa. Nɔuu nɛ a nyɛɛ e hɛ mi kɛ ho hiɔwe tsu mi he nɛ a wluɔ gbogboe ɔ si ngɛ ɔ ya. Tsu ɔ mi hyi kɛ yalɔyihi nɛ ngɛ ya foe. A ngɛ tadehi nɛ Tabita kpɛ ha mɛ ɔ tsɔɔe. 40 Se Petro fie mɛ tsuo ngɛ tsu ɔ mi nɛ e kpla si nɛ e sɔle. Kɛkɛ nɛ e sa kɛ su gbogboe ɔ he nɛ e de ke, "Tabita tee si!" Amlɔ ɔ nɔuu nɛ e bli e hɛ ngmɛ, nɛ benɛ e na Petro ɔ, e te si nɛ e hi si. 41 Petro wo e nɔ nɛ e tsɛ kaseli ɔmɛ kɛ yalɔyi ɔmɛ, nɛ e ngɔ Tabita kɛ wo a dɛ.

42 Sane nɛ ɔ gbɛ fia ngɛ Yopa ma a mi tsuo nɛ nihi fuu he Nutsɔ ɔ nɔ ye. 43 Nɛ Petro hi Simon, nɔ nɛ woɔ lohwe he womi tsopa a ngɔ be saii ngɛ Yopa.