1 Kana o Isus Navin phurilo, o GOSPOD phendas lešće: "Tu phurilan thaj dijan ande purane brš, a si još but phuv savi trubul te osvojil pe. 2 Akaja si e phuv savi još trubul te osvojil pe: o sasto područje katar e Filistejcurja thaj katar e Gešurcurja, 3 o područje katar e reka Šihor, istočno katar o Egipat, dži ke granica Ekron po sever – sa godola područja si katar e Hanaancurja. Inća trajin vi pandž filistejske vladarja: ande Gaza, ando Ašdod, ando Aškelon, ando Gat, ando Ekron, thaj e Avijcurja 4 po jugo – sasti hanaansko phuv thaj e Meara savi pripadil e Sidoncenđe, sa dži ko Afek pe amorejsko granica, 5 e phuv katar e Gevelacurja thaj o sasto Liban karing o istok, katar o Vaal-Gad tale gora Hermon dži ko Levo-Hamat.

6 Me korkoro tradava angle Izraelcurja sa e Sidoncen save trajin ande gorske krajurja katar o Liban dži ko Misrefot-Majim, a tu samo potrudisar tut te godoja phuv e kockasa razdelis e Izraelconenđe ando nasledstvo sago kaj zapovedisardem tuće. 7 Razdelisar e phuv sago nasledstvo pe inja plemenurja thaj opaš e Manasiješće plemenošće."

8 O Mojsije, o sluga e GOSPODESKO, dija e phuv katar e istočno rig e reka jordanošći ando nasledstvo akale plemenenđe: e Ruvimešće plemenošće, e Gadešće plemenošće thaj opaš e Manasiješće plemenošće. O Mojsije dodelisarda lenđe: 9 katar o gav Aroer, po rubo e klancosko Arnon, thaj katar o gav maškare o klanco, e sasti ravnica katar e Medva dži ko Divon, 10 sa e gava e Sihonešće, e amoreješće carošće, savo vladilas ando Hešbon, dži ke granica katar e Amoncurja, 11 askal o Gilad, o područje katar Gešurcurja thaj katar e Maahatovcurja, sasti gora Hermon thaj sasto Bašan sa dži ke Salha, 12 sa o carstvo katar o Og ando Bašan. O Og vladilas ando Aštarot thaj ando Edrej thaj sas jek katar e poslednje Refajcurja. O Mojsija pobedisarda len thaj osvojisarda lenđi phuv. 13 Ali e Izraelcurja či tradine e Gešurcen thaj e Maahatovcen, gajda kaj akala trajin maškar e Izraelcurja sa dži ađes.

14 Samo e Leviješće plemenošće o Mojsija či dija phuv ando nasledstvo, kaj lengo nasledstvo si e životinje save den pe jag sago žrtve e GOSPODEŠĆE, e Izraelošće Devlešće, sago kaj obećisarda lenđe.

15 Akaja phuv si savi o Mojsije dija e Ruvimešće plemenošće pale lenđe familije.

16 Lengo područje sas katar o gav Aroer, po rubo e klancosko Arnon, thaj katar o gav maškare o klanco, e sasti ravnica ke Medva, 17 e Hešbonesa thaj sa lešće gavenca pe ravnica ande soste đinaven pe vi o Divon, o Bamot-Vaal, o Bet-Vaal-Meon, 18 o Jahac, o Kedemot, o Mefaat, 19 o Kirjatajim, o Sivma, o Ceret-Šahar po brego ande dolina, 20 o Bet-Peor, e padine Pizga thaj o Bet-Ješimot, 21 sa e gava pe ravnica thaj o sasto carstvo katar o Sihon, e Amorejenđe caro, savo vladilas ando Hešbon. O Mojsija pobedisarda e Sihone thaj e midjanske starešine save akhardonas Evi, Rekem, Cur, Hur, thaj o Reva – e Sihonošće knezonen save trajinas ande godoja phuv. 22 Osim okola save si mudarde ande borba, e Izraelcurja e mačesa mudardine vi e vračares e Valaame, e Veorvešće čhave. 23 E granica katar e Ruvimovcurja sas e reka Jordan. Godola gava thaj e thana sas ando nasledstvo e Ruvimešće plemenošće pale lenđe familije.

24 Akaja phuv si savi o Mojsije dija e Gadešće plemenošće pale lenđe familija.

25 Lengo područje sas katar o Jaazer thaj sa e gava ando Gilad thaj opaš e phuv katar e Amoncurja sa dži ke Aroer paše ke Raba, 26 thaj katar o Hešbon dži ke Ramat-Micpa thaj Betonim, thaj katar Mahanajim dži ke granica Lo-Devar, 27 thaj e gava ande dolina: Bet-Haram, Bet-Nimra, Sukot thaj Cafon thaj aver gava katar o carstvo e Sihonesko, savo sas caro e Hešbonsko. Zapadno granica sas lenđe e reka Jordan sa dži ko Kineretsko more.

28 Godola gava thaj e thana sas ando nasledstvo e Gadešće plemenošće pale lenđe familije.

29 Akaja phuv si savi o Mojsije dija e opaš Manasiješće plemenošće pale lenđe familije.

30 Lengo područje sas katar o gav Mahanajim, so uključil vi o sasto carstvo katar o Bašansko caro Og thaj sa šovardeš Jairošće gava ando Bašan, 31 opaš o Gilad e Aštarotosa thaj e Edrejesa, e Ogošće carske gavenca ando Bašan. Godova pripadnisarda e potomkonenđe katar o Mahir, Manasiješće čhavešće – opaš e Mahirešće čhavenđe pale lenđe familije.

32 Godova si nasledstvo savo o Mojsija rasposdelisarda kana sas pe Moavske poljane, katar okoja rig e jordanošći istočno katar o Jerihon.

33 E Leviješće plemenošće o Mojsija či dija phuv ando nasledstvo. Lengo nasledstvo si o GOSPOD, o Del e Izraelosko, sago kaj obećisarda lenđe.