Gênesis 21

ଇସାକ୍‌ଆଃ ଜାନାମ୍‌

1 ପ୍ରାଭୁ ଆୟାଃ କାଜି ଲେକାତେ ସାରାକେ ଆଶିଷ୍‌କିୟା ଓଡ଼ୋଃ ଆୟାଃ ବାନାର୍‌ସା ଏମାକାଇ ଲେକାତେ କାମିକେଦା। 2 ଏନ୍ତେ ଆବ୍ରାହାମ୍‌ଆଃ ହାଡ଼ାମ୍‌ ଦିପିଲିରେ ସାରାରାଃ ହାମ୍ବାଲ୍‌ରୋୱା ହବାୟାନା ଓଡ଼ୋଃ ପାର୍‌ମେଶ୍ୱାର୍‌ଆଃ ହରାତେ ଠାହାରାଅକାନ୍‌ ଦିପିଲିରେ କଡ଼ାହନ୍‌ ହବାୟାନାଏ। 3 ଆବ୍ରାହାମ୍‌ ସାରାଏତେ ଜାନାମ୍‌କାନ୍‌ କଡ଼ାହନ୍‌ରାଃ ନୁତୁମ୍‌ ଇସାକ୍‌*21:3 ନେଆଁରାଃ ମୁଣ୍ଡି ଲାନ୍ଦା ଏମ୍‌କିୟାଏ। 4 ପାର୍‌ମେଶ୍ୱାର୍‌ ଆଚୁକାଦ୍‌ ଲେକାତେ ଆବ୍ରାହାମ୍‌ ହନ୍ତେକଡ଼ା ଇସାକ୍‌ରାଃ ଇରାଲିୟା ହୁଲାଙ୍ଗ୍‌ ହବାୟାନା ଇମ୍‌ତା ଖାତ୍‌ନାଅକିୟାଏ। 5 ଆବ୍ରାହାମ୍‌ଆଃ ମିଦ୍‌ଶାଅ ବାରାଷ୍‌ ହବାକାନ୍‌ ତାଇକେନା ଇମ୍‌ତା ଆୟାଃ ହନ୍ତେକଡ଼ା ଇସାକ୍‌ ଜାନାମ୍‌ୟାନାଏ। 6 ସାରା କାଜିକେଦାଏ, "ପାର୍‌ମେଶ୍ୱାର୍‌ ଆଇଁୟାଃ ମଚାରେ ଲାନ୍ଦା ଓଡ଼ୋଃ ରାସ୍‌କା ଏମାକାଦିଙ୍ଗ୍‌ୟାଁଏ, ଏନାମେନ୍ତେ, ନେ କାଜି ଆୟୁମ୍‌ତାନ୍‌ ସବେନ୍‌ ହଡ଼କ ଆଇଁୟାଃଲଃ ଲାନ୍ଦାୟାକ।" 7 ଇନିଃ ଆଡଃଗି କାଜିକେଦା, "ସାରା ହନ୍‌କକେ ତଆ ଆନୁକଆଏ, ନେ କାଜି ଆବ୍ରାହାମ୍‌କେ ଅକଏ କାଜି ଦାଡ଼ିତେୟାଃଏ ? ଚିଆଃଚି ଆଇଙ୍ଗ୍‌ଦ ଆୟାଃ ହାଡ଼ାମ୍‌ ଦିପିଲିରେ କଡ଼ାହନ୍‌ ଜାନାମ୍‌କିୟାଇଙ୍ଗ୍‌।"

8 ଏନ୍‌ ସିଟିୟା ହାରାୟାନାଏ ଓଡ଼ୋଃ ତଆ ନୁଁ ବାଗିକେଦାଏ। ଅକ ହୁଲାଙ୍ଗ୍‌ ଇସାକ୍‌ ତଆ ନୁଁ ବାଗିକେଦାଏ, ଏନ୍‌ ହୁଲାଙ୍ଗ୍‌ ଆବ୍ରାହାମ୍‌ ମିଆଁଦ୍ ମାରାଙ୍ଗ୍‌ ଜଜମାଃ ବାଇକେଦାଏ।

ହାଗାର୍‌ ଓଡ଼ୋଃ ଇଶ୍ମାଏଲ୍‌ ହାର୍‌ ଅଡଙ୍ଗ୍‌ୟାନାକିନ୍‌

9 ମୁସିଙ୍ଗ୍‌ ହୁଲାଙ୍ଗ୍‌ ମିସାର୍‌ରେନ୍‌ ହାଗାର୍‌, ଆବ୍ରାହାମ୍‌ ନାଗେନ୍ତେ ଅକ କଡ଼ାହନ୍‌ ଜାନାମ୍‌କାଇ ତାଇକେନାଏ, ଇନିଃ ସାରାରାଃ ହନ୍ତେକଡ଼ା ଇସାକ୍‌କେ ଲାନ୍ଦାଇତାନ୍‌ତେୟାଃ ସାରା ନେଲ୍‌କେଦ୍‌ତେ, 10 ଆବ୍ରାହାମ୍‌କେ କାଜିକିୟା, "ଆମ୍‌ ନେ କାମ୍‌ଡ଼ି କୁଡ଼ିକେ ଓଡ଼ୋଃ ଆୟାଃ ହନ୍ତେକଡ଼ାକେ ସାଙ୍ଗିନ୍‌ତେ ହାର୍‌ ଅଡଙ୍ଗ୍‌କିନ୍‌ମେଁ। ଚିଆଃଚି କାମ୍‌ଡ଼ି କୁଡ଼ିରାଃ ହନ୍ତେକଡ଼ା ଆଇଁୟାଃ ହନ୍‌କଡ଼ା ଇସାକ୍‌ଲଃ ସାମ୍ପାତିରାଃ ଆକ୍‌ତେୟାର୍‌ କାଏ ନାମେୟା।" 11 ନେ କାଜି ଆୟୁମ୍‌କେଦ୍‌ତେ ଆବ୍ରାହାମ୍‌ ଆୟାଃ ହନ୍ତେକଡ଼ା ଇଶ୍ମାଏଲ୍‌ ନାଗେନ୍ତେ ପୁରାଃଗି ହୁଡିଙ୍ଗ୍‌ ଜୀଉୟାନା। 12 ମେନ୍‌ଦ ପାର୍‌ମେଶ୍ୱାର୍‌ ଆବ୍ରାହାମ୍‌କେ କାଜିକିୟା, "ଆମ୍‌ ନେ ହନ୍‌ ଓଡ଼ୋଃ କାମ୍‌ଡ଼ି ହାଗାର୍‌ ନାଗେନ୍ତେ ଆଲମ୍‌ ହୁଡିଙ୍ଗ୍‌ ଜୀଉଃଆ। ସାରା ଅକଆଃ କାଜି ତାନାଏ, ଏନାକେ ମାନାତିଙ୍ଗ୍‌ମେ। ଚିୟାଃଚି ଇସାକ୍‌ଆଃ ହରାତେ ଆମାଃ କିଲିକ ପସାଅଃଆ। 13 ଆଇଙ୍ଗ୍‌ କାମ୍‌ଡ଼ି କୁଡ଼ିରାଃ ହନ୍ତେକଡ଼ାତାଃଏତେ ହଗି କିଲିକ ଉପାନ୍‌କଆଇଙ୍ଗ୍‌, ଚିଆଃଚି ଇନିଃ ଆମାଃ ହନ୍‌କଡ଼ା ତାନିଃ।"

14 ଏଟାଃ ହୁଲାଙ୍ଗ୍‌ ଆବ୍ରାହାମ୍‌ ସେତାଃ ଇଦାନ୍‌ରେ ବିରିଦ୍‌ୟାନାଏ ଓଡ଼ୋଃ ଉହୁର୍‌ରାଃ ବାଇୟାକାନ୍‌ ଥାଇଲାରେ ଦାଆଃ ଓଡ଼ୋଃ ଜଜମାଃ ହାଗାର୍‌ରାଃ ତାରାନ୍‌ରେ ଲାଦିକେଦା ଏନ୍ତେ ହନ୍ତେକଡ଼ାଲଃ ବିଦାକେଦ୍‌କିନା। ହାଗାର୍‌ ହରା ସେନ୍‌ ସେନ୍‌ ସେନଃତାନ୍‌ଲଃ ବେର୍‌ଶେବା ନୁତୁମ୍‌ ମିଆଁଦ୍‌ ବିର୍‌ ଠାୟାଦ୍‌ରେ ହରା ଆଦ୍‌ୟାନାଏ। 15 ଏନ୍‌ ଉହୁର୍‌ରେୟାଃ ଥାଇଲାରାଃ ଦାଆଃ ଚାବାୟାନା ଇମ୍‌ତା, ହାଗାର୍‌ ଆୟାଃ ହନ୍‌କେ ମିଆଁଦ୍‌ ଚୁପାଦ୍‌ରେ ବାଗିତାଇଜା। 16 ଓଡ଼ୋଃ ଇନିଃ ମିଦ୍‌ଶାଅ ତିଃଇ ସାଙ୍ଗିନ୍‌ ସେନ୍‌କେଦ୍‌ତେ ଦୁବ୍‌ୟାନା, ଚିଆଃଚି ଇନିଃ ମନ୍‌ରେ ଉଡ଼ୁଃକେଦ୍‌ତେ କାଜିକେଦା, "ଆଇଙ୍ଗ୍‌ ଆଇଁୟାଃ ମେଦ୍‌ ସାମ୍‌ନାଙ୍ଗ୍‌ରେ ହନିଙ୍ଗ୍‌ କଡ଼ାରାଃ ଗନଏଃ କାଇଙ୍ଗ୍‌ ନେଲ୍‌ ଦାଡ଼ିୟା।" ଇନିଃ ଏନ୍ତାଃରେ ଦୁବ୍‌କେଦ୍‌ତେ ରାଆଃକେଦା।

17 ପାର୍‌ମେଶ୍ୱାର୍‌ ହନ୍‌ଆଃ ରାଆଃ ଆୟୁମ୍‌କେଦାଏ ଓଡ଼ୋଃ ପାର୍‌ମେଶ୍ୱାର୍‌ଆଃ ଦାସି ସିର୍ମାଏତେ କାଜିକିୟା, "ଏ ମାଈ ହାଗାର୍‌, ଆମାଃ ଚିନାଃ ହବାୟାନା ? ଆଲମ୍‌ ବରଏୟା, ଚିୟାଃଚି ଅକ୍‌ତାଃରେ ହନ୍‌ତାମାଃ ମେନାଇୟା, ଏନ୍ତାଃରେ ପାର୍‌ମେଶ୍ୱାର୍‌ ଇନିୟାଃ ରାନାଃ ଆୟୁମାକାଦା। 18 ଆମ୍‌ ବିରିଦ୍‌ମେ ଓଡ଼ୋଃ ସିଟିଆକେ ଆମାଃ ତିଃଇଲଃ ସାବ୍‌କେଦ୍‌ତେ ଇଦିମେ, ଚିଆଃଚି ଇନିଃତାଃଏତେ ଆଇଙ୍ଗ୍‌ ମିଆଁଦ୍ ମାରାଙ୍ଗ୍‌ କିଲିକଇଙ୍ଗ୍‌ ଉପାନ୍‌କଆ।" 19 ଏନ୍ତେ ପାର୍‌ମେଶ୍ୱାର୍‌ ହାଗାର୍‌ରାଃ ମେଦ୍‌ରେ ନେଲ୍‌ ଦାଡ଼ିରେୟାଃ ପେଡ଼େଃ ଏମ୍‌କିଃ ହରାତେ, ଇନିଃ ମିଆଁଦ୍ କୁଆଁ ନେଲ୍‌କେଦାଏ ଓଡ଼ୋଃ ଏନ୍ତାଃତେ ସେନ୍‌ୟାନ୍‌ଲଃ ଆୟାଃ ଉହୁର୍‌ରାଃ ଥାଇଲାରେ ଦାଆଃ ପେରେଃ ଆଉକେଦ୍‌ତେ ଆୟାଃ ହନ୍‌କେ ଦାଆଃ ଆନୁକିୟାଏ। 20 ପାର୍‌ମେଶ୍ୱାର୍‌ ସିଟିଆରାଃ ଯାତାନ୍‌ ଇଦିକେଦ୍‌ ହରାତେ, ଇନିଃ ହାରାୟାନାଏ ଓଡ଼ୋଃ ପାରାନ୍‌ ବିର୍‌ରେ ତାଇକେଦ୍‌ତେ ମିଆଁଦ୍‌ ପାର୍‌ଧିଆ ହବାୟାନାଏ। 21 ଇନିଃ ପାରାନ୍‌ ନୁତୁମ୍‌ ବିର୍‌ରେ ତାଇନ୍‌ୟାନା ଓଡ଼ୋଃ ଆୟାଃ ଏଙ୍ଗାତେ ମିସାର୍‌ରେନ୍‌ ମିଆଁଦ୍‌ କୁଡ଼ିଲଃ ଇନିଃକେ ଆଣ୍‌ଦିକିୟା।

ଆବ୍ରାହାମ୍‌ ଓଡ଼ୋଃ ଅବିମେଲେକ୍‌ ଥାଲାରେ ରାଜିନାମା

22 ଏନ୍‌ ଦିପିଲିରେ ଅବିମେଲେକ୍‌ ଓଡ଼ୋଃ ଫିଖଲ୍‌ ନୁତୁମ୍‌ ଆୟାଃ ସିପାଇକଆଃ ଆଗୁଆଇ ଆବ୍ରାହାମ୍‌କେ କାଜିକିୟା, "ପାର୍‌ମେଶ୍ୱାର୍‌ ଆମାଃ ସବେନ୍‌ କାମିରେ ଆଶିଷ୍‌କାଦ୍‌ମେୟାଁ। 23 ଏନାମେନ୍ତେ ଆମ୍‌ ପାର୍‌ମେଶ୍ୱାର୍‌ରାଃ ସାମ୍‌ନାଙ୍ଗ୍‌ରେ କିରିୟାକେଦ୍‌ତେ କାଜିମେ, ଆମ୍‌ ଆଇଁୟାଃଲଃ, ଆଇଁୟାଃ ହନ୍‌ଗାଁଣାକଲଃ ଚାଏ କିଲିକଲଃ ବେଦା କାମି ଆଲମ୍‌ ରିକାଏ। ଆଇଙ୍ଗ୍‌ ଆମ୍‌କେ ଦାୟାକାଦ୍‌ମେ ଲେକାଗି, ଆମ୍‌ ଆଇଙ୍ଗ୍‌କେ ଓଡ଼ୋଃ ଆମ୍‌ ତାଇନ୍‌ତାନ୍‌ ନେ ଦିଶୁମ୍‌ରେନ୍‌ ହଡ଼କକେ ଦାୟାକମେ।"

24 ଆବ୍ରାହାମ୍‌ କାଜିକେଦାଏ, "ଆଇଙ୍ଗ୍‌ କିରିୟାଏତାନାଇଙ୍ଗ୍‌।"

25 ଏନ୍ତେ ଆବ୍ରାହାମ୍‌ ଅବିମେଲେକ୍‌ରାଃ ଦାସିକ ଆବ୍ରାହାମ୍‌ଆଃ ମିଆଁଦ୍ କୁଆଁ ଆକ୍‌ତେୟାର୍‌କାଦ୍‌ ତାଇକେନାକ, ଏନାମେନ୍ତେ ଆବ୍ରାହାମ୍‌ ଅବିମେଲେକ୍‌କେ ଚେତାଅକେଦ୍‌ତେ କାଜିକିୟା। 26 ଏନ୍ତେ ଅବିମେଲେକ୍‌ କାଜିରୁହାଡ଼୍‌କିୟାଏ, "ନେ କାମି ଅକଏ ରିକାକାଦାଏ, ଏନା କାଇଙ୍ଗ୍‌ ସାରିୟା ଓଡ଼ୋଃ ଆମ୍‌ ହଁଗି ସିଦାରେ ଆଇଙ୍ଗ୍‌କେ କାମ୍‌ ଉଦୁବ୍‌ ? ତିସିଙ୍ଗ୍‌ ଆଇଙ୍ଗ୍‌ ନେ କାଜିଇଙ୍ଗ୍‌ ଆୟୁମେତାନା।" 27 ଏନ୍ତେ ଆବ୍ରାହାମ୍‌ ଅବିମେଲେକ୍‌କେ ମିଣ୍ଡି ଓଡ଼ୋଃ ଉରିଃକ୍‌ ଗୋଟ୍‌ ଏମ୍‌କିୟାଏ, ଏନ୍ତେ ବାରାନ୍‌କିନ୍‌ ଏନ୍ତାଃରେ ରାଜିନାମା ବାଇକେଦାକିନ୍‌। 28 ଆବ୍ରାହାମ୍‌ ଗୋଟ୍‌ଏତେ ଏୟା ମିଣ୍ଡିହନ୍‌ ଗେନା ଆତମ୍‌କେଦ୍‌ତେ ଦହକେଦ୍‌କଆ। 29 ଏନ୍ତେ ଅବିମେଲେକ୍‌ ଆବ୍ରାହାମ୍‌କେ କୁଲିକିୟା, "ଆମ୍‌ ନେ ଏୟା ମିଣ୍ଡିହନ୍‌ ଗେନା ଆତମ୍‌କେଦ୍‌ତେ ଦହକାଦ୍‌କଆମ୍‌, ଏନାରାଃ ମୁଣ୍ଡି ଚିନାଃ ତାନାଃ ?"

30 ଆବ୍ରାହାମ୍‌ କାଜିକିୟାଏ, "ଆଇଙ୍ଗ୍‌ ନେ କୁଆଁ ଉରାକାଦାଇଙ୍ଗ୍‌, ଏନାରାଃ ସାବୁଦ୍‌ ନାଗେନ୍ତେ ନେ ଏୟା ମିଣ୍ଡିହନ୍‌ ଆମ୍‌କେ ଇଦି ଲାଗାତିୟାଁଃ।" 31 ଏନାମେନ୍ତେ ଏନ୍ ଠାୟାଦ୍‌ରାଃ ନୁତୁମ୍‌ ବେର୍‌ଶେବା*21:31 ବେର୍‌ଶେବା କିରିୟାକାଦ୍‌ କୁଆଁ ହବାୟାନା, ଚିୟାଃଚି ଇନ୍‌କିନ୍‌ ଏନ୍ତାଃରେ କିରିୟାକାଦ୍‌ ତାଇକେନାକିନ୍‌।

32 ଇନ୍‌କିନ୍‌ ବେର୍‌ଶେବାରେ ଏନ୍‌ ରାଜିନାମା ହବାୟାନ୍‌ ତାୟମ୍‌ତେ, ଅବିମେଲେକ୍‌ ଓଡ଼ୋଃ ଆୟାଃ ସିପାଇକଆଃ ଆଗୁଆଇ ଫିଖଲ୍‌, ପାଲେଷ୍ଟାଇନ୍‌ ହଡ଼କଆଃ ଦିଶୁମ୍‌ତେ ରୁହାଡ଼୍‌ୟାନାକିନ୍‌। 33 ଆବ୍ରାହାମ୍‌ ଏନ୍‌ ବେର୍‌ଶେବାତାଃରେ ମିଆଁଦ୍‌ ଝାଉଁ ଦାରୁ ରଏକେଦାଏ ଓଡ଼ୋଃ ଏନ୍‌ ଠାୟାଦ୍‌ରେ ଜାନାଅ ଜୀଦାନ୍‌ ପ୍ରାଭୁ ପାର୍‌ମେଶ୍ୱାର୍‌ଆଃ ନୁତୁମ୍‌ତେ ବିନ୍ତିକେଦା। 34 ଆବ୍ରାହାମ୍‌ ପାଲେଷ୍ଟାଇନ୍‌ ହଡ଼କଆଃ ଦିଶୁମ୍‌ରେ ପୁରାଃ ମାହା ତାଇନ୍‌ୟାନା।