ଏନେଟେଦ୍‌ 45

ହାଗାକକେ ଯୋଷେଫ୍‌ ଆୟାଃ ପାରିଚାଏ ଉଦୁବ୍‌

1 ଯୋଷେଫ୍‌ ଆୟାଃ ହେପାଦ୍‌ରେ ତିଙ୍ଗୁକାନ୍‌ ହଡ଼କଆଃ ସାମ୍‌ନାଙ୍ଗ୍‌ରେ ଆପାନ୍‌କେ ସାହାତିଙ୍ଗ୍‌ କା ଦାଡ଼ିକେଦ୍‌ତେ କାଉରିକେଦ୍‌ଲଃ କାଜିକେଦାଏ, "ସବେନ୍‌କକେ ଆଇଁୟାଃ ହେପାଦ୍‌ଏତେ ବାହାରି ଅଡଙ୍ଗ୍‌କପେ।" ଏନ୍ତେ ଆୟାଃ ହାଗାକ ଏସ୍‌କାର୍‌ ଏନ୍ତାଃରେ ତାଇୟାନାକ। ଯୋଷେଫ୍‌ ଇନ୍‌କୁଆଃ ସାମ୍‌ନାଙ୍ଗ୍‌ରେ ଆୟାଃ ପାରିଚାଏ ଏମ୍‌କେଦାଏ। 2 ଇନିଃ ନିମିନ୍‌ ପୁରାଃଗି କାଉରିକେଦ୍‌ତେ ରାଆଃକେଦାଏ ଯେ, ମିସାର୍‌ରେନ୍‌ ହଡ଼କ ଆୟୁମ୍‌କେଦାକ ଓଡ଼ୋଃ ଫାରୋରାଃ ଅଡ଼ାଃରେନ୍‌ ହଡ଼କ ହଗି ଏନ୍‌ ରାନାଃ ଆୟୁମ୍‌କେଦାକ। 3 ଯୋଷେଫ୍‌ ଆୟାଃ ହାଗାକକେ କାଜିକେଦ୍‌କଆ, "ଆଇଙ୍ଗ୍‌ ଯୋଷେଫ୍‌ ତାନିଙ୍ଗ୍‌। ଆଇଁୟାଃ ଆପୁଇଙ୍ଗ୍‌ ତିସିଙ୍ଗ୍‌ ଜାକେଦ୍‌ ଜୀନିଦ୍‌ ମେନାଇୟା ଚି ?" ଆୟାଃ ହାଗାକ ଆୟାଃ ସାମ୍‌ନାଙ୍ଗ୍‌ରେ ପୁରାଃଗି ବରକେଦ୍‌ତେ ଜେତ୍‌ନାଃ କାକ କାଜିରୁହାଡ଼୍‌ ଦାଡ଼ିୟାନା। 4 ଏନ୍ତେ ଯୋଷେଫ୍‌ ଆୟାଃ ହାଗାକକେ କାଜିକେଦ୍‌କଆ, "ଦାୟାକେଦ୍‌ତେ ଆଇଁୟାଃ ହେପାଦ୍‌ତେ ହିଜୁଃପେ।" ଇନ୍‌କୁ ହେପାଦ୍‌ତେ ହିଜୁଃୟାନ୍‌ ହରାତେ ଇନିଃ କାଜିକେଦାଏ, "ଆଇଙ୍ଗ୍‌ ଆପେୟାଃ ହାଗା ଯୋଷେଫ୍‌ ତାନିଙ୍ଗ୍‌, ଅକଏକେଚି ଆପେ ମିସାର୍‌ତେ ସେନଃ ତାଇକେନ୍‌ ହଡ଼କତାଃରେ ଆଖ୍‌ରିଙ୍ଗ୍‌ କାଇତାଇକେନାପେ। 5 ଆପେ ଆଇଙ୍ଗ୍‌କେ ନେତାଃ କୁଲ୍‌ ନାଙ୍ଗ୍‌ ଆଖ୍‌ରିଙ୍ଗ୍‌କିୟାଁପେ ମେନ୍ତେ ଆଲ୍‌ପେ ଦୁକୁନାଃ, ଚାଏ ଆପ୍‌ନାଃ ଚେତାନ୍‌ରେ ଖିସ୍‌ ଆଲପେ ରିକାନାଃ। ଚିଆଃଚି ପାର୍‌ମେଶ୍ୱାର୍‌ ପୁରାଃ ହଡ଼କଆଃ ଜୀଉବାଞ୍ଚାଅ ନାଗେନ୍ତେ ଆଇଙ୍ଗ୍‌କେ ସିଦାରେ କୁଲ୍‌କେଦିୟାଁ। 6 ନେଲେପେ, ବାର୍‌ ବାରାଷ୍‌ ଏସ୍‌କାର୍‌ ରିଙ୍ଗା ହବାକାନା, ଆଡଃଗି ମଣେୟାଁ ବାରାଷ୍‌ ରିଙ୍ଗା ହବାଅଃ ନାଗେନ୍ତେ ମେନାଃ, ଏନ୍‌ ଥାଲାରେ ଜେତ୍‌ନାଃ ହେର୍ ଚାଏ ଇରଃ କା ହବାଅଃଆ। 7 ଏନାମେନ୍ତେ ପାର୍‌ମେଶ୍ୱାର୍‌ ଅତେଦିଶୁମ୍‌ରେ ଆପେୟାଃ କିଲି ବାଞ୍ଚାଅ ନାଙ୍ଗ୍‌ ଓଡ଼ୋଃ ପୁରାଃ ମାରାଙ୍ଗ୍‌ ବାଞ୍ଚାଅ ହରାତେ ଆପେ ସବେନ୍‌କଆଃ ଜୀଉ ବାଞ୍ଚାଅ ନାଙ୍ଗ୍‌ ଆଇଙ୍ଗ୍‌କେ ସିଦାରେ କୁଲ୍‌କେଦିୟାଁ। 8 ଏନାମେନ୍ତେ ଆପେ ଆଇଙ୍ଗ୍‌କେ ନେତାଃତେ କୁଲ୍‌କେଦିୟାଁପେ, ଏନା କାହାଗି, ମେନ୍‌ଦ ପାର୍‌ମେଶ୍ୱାର୍‌ ଆଇଙ୍ଗ୍‌କେ କୁଲାକାଦିୟାଁ। ଇନିଃ ଆଇଙ୍ଗ୍‌କେ ଫାରୋରାଃ ଆପୁ ଲେକା, ଆୟାଃ ଅଡ଼ାଃରେନ୍‌ ଗମ୍‌କେ ଓଡ଼ୋଃ ଗଟା ମିସାର୍‌ ଦିଶୁମ୍‌କେ ଚାଲାଅ ନାଗେନ୍ତେ ଆକ୍‌ତେୟାର୍‌ ଏମାକାଦିୟାଁଏ।

9 "ଏନାମେନ୍ତେ ନାହାଁଃଦ ଆପେ ଜାଲ୍‌ଦିଗି ଆପୁତାଃ ସେନଃପେ, ଓଡ଼ୋଃ କାଜିପେ, ଆମାଃ ହନ୍‌କଡ଼ା ଯୋଷେଫ୍‌ କାଜିକାଦାଏ, ‘ପାର୍‌ମେଶ୍ୱାର୍‌ ଆମାଃ ହନ୍‌କେ ଗଟା ମିସାର୍‌ ଦିଶୁମ୍‌କେ ଚାଲାଅ ନାଙ୍ଗ୍‌ ଗମ୍‌କେରାଃ ଆକ୍‌ତେୟାର୍‌ ଏମାକାଇଜାଏ। ଆମ୍‌ ଆଇଙ୍ଗ୍‌ତାଃ ହିଜୁଃମେ, ଆଲମ୍‌ ବିଲାମେୟା। 10 ଆମ୍‌, ଆମାଃ ହନ୍‌ଗାଁଣା, ଜାଇହନ୍‌କ ଓଡ଼ୋଃ ଗୋଟ୍‌ରେନ୍‌ ସବେନ୍‌ ଜାଁତୁକକେ ସାବ୍‌କେଦ୍‌ତେ ହିଜୁଃମେ ଓଡ଼ୋଃ ଗୋଶେନ୍‌ ପାର୍‌ଗାନ୍‌ରେ ତାଇନ୍‌ମେ, ନେ’ଲେକାତେ ଆମ୍‌ ଆଇଁୟାଃ ହେପାଦ୍‌ରେମ୍‌ ତାଇନ୍‌ ଦାଡ଼ିୟା। 11 ଏନ୍ତାଃରେ ଆଇଙ୍ଗ୍‌ ଆମାଃ ଜାତାନ୍‌ ଇଦି ଦାଡ଼ିୟାଇଙ୍ଗ୍‌, ଚିଆଃଚି ଆଡଃଗି ମଣେୟାଁ ବାରାଷ୍‌ ଜାକେଦ୍‌ ରିଙ୍ଗା ହବାଅଃଆ। ଆମ୍‌ କାମ୍‌ ହିଜୁଃରେଦ, ଆମ୍‌ ଓଡ଼ୋଃ ଆମାଃ ଅଡ଼ାଃରେନ୍‌ ସବେନ୍‌କଆଃ ଦାସା ପୁରାଃଗି ନାରାଦୁରା ହବାକେନଃଆ।’"

12 "ନେଲେମେ, ଆଇଙ୍ଗ୍‌ ସାର୍‌ତିଗି ଯୋଷେଫ୍‌ ତାନିଙ୍ଗ୍‌ ଓଡ଼ୋଃ ଆମାଃଲଃ ଜାଗାର୍‌ତାନାଇଙ୍ଗ୍‌। ନେତାଃରେ ମେନାକ ସବେନ୍‌ ହାଗାକ ଆକଆଃ ଆପ୍‌ନାଃ ମେଦ୍‌ତେ ନେଲିଙ୍ଗ୍‌ତାନାକ ଓଡ଼ୋଃ ଆଇଁୟାଃ ହାଗା ବେଞ୍ଜାମିନ୍‌ ହଗି ଆୟାଃ ଆପ୍‌ନାଃ ମେଦ୍‌ତେ ନେଲିଙ୍ଗ୍‌ ତାନା। 13 ଏନାମେନ୍ତେ ମିସାର୍‌ ଦିଶୁମ୍‌ରେ ଆଇଙ୍ଗ୍‌ ଅକ ଆକ୍‌ତେୟାର୍‌ ନାମ୍‌କେଦ୍‌ତେ ମାଇନ୍‌ ନାମେତାନାଇଙ୍ଗ୍‌ ଏନା ଆପେ ନେଲ୍‌ତାନାପେ, ଏନ୍‌ ସବେନାଃ ଆପୁଇଙ୍ଗ୍‌କେ ଉଦୁବାଇପେ ଓଡ଼ୋଃ ଜାଲ୍‌ଦିଗି ନେତାଃତେ ଆଉଇପେ।"

14 ଏନ୍ତେ ଇନିଃ ଆୟାଃ ହାଗା ବେଞ୍ଜାମିନ୍‌କେ ହାମ୍ବୁଦ୍‌କେଦ୍‌ତେ ରାଆଃକେଦାଏ ଓଡ଼ୋଃ ବେଞ୍ଜାମିନ୍‌ ହଗି ଇନିଃକେ ହାମ୍ବୁଦ୍‌କେଦ୍‌ତେ ରାଆଃକେଦାଏ। 15 ଯୋଷେଫ୍‌ ଆୟାଃ ଏଟାଃ ହାଗାକକେ ଚଅଃତାନ୍‌ଲଃ ରାଆଃକେଦାଏ। ଏନ୍ତେ ଆୟାଃ ହାଗାକ ଇନିଃଲଃ ଜାଗାର୍‌ ଏଟେଦ୍‌କେଦାକ।

16 ଯୋଷେଫ୍‌ଆଃ ହାଗାକ ରାଜ୍‌ମାହାଲ୍‌ ହିଜୁଃକାନାକ ମେନ୍ତେ ଫାରୋ ଓଡ଼ୋଃ ଆୟାଃ ଦାସିକ ଆୟୁମ୍‌କେଦ୍‌ଚି ପୁରାଃଗି ରାସ୍‌କାୟାନାକ। 17 ଏନ୍ତେ ଫାରୋ ଯୋଷେଫ୍‌କେ କାଜିକିୟା, "ଆମାଃ ହାଗାକକେ କାଜିକମେ, ଇନ୍‌କୁ ନେ’ଲେକା ରିକାଏକାକ, ଆକଆଃ ମାଲ୍‌ ଗଅଃତାନ୍‌ ସବେନ୍‌ ଜାଁତୁକଆଃ ଚେତାନ୍‌ରେ ଜମେୟାଁଃ ଲାଦିକେଦ୍‌ତେ କିନାନ୍‌ ଦିଶୁମ୍‌ତେ ରୁହାଡ଼୍‌କାକ। 18 ଏନ୍ତେ ଆକଆଃ ଆପୁକେ ଓଡ଼ୋଃ କୁଟୁମ୍‌କକେ ଆଉକେଦ୍‌ତେ ଆଇଙ୍ଗ୍‌ତାଃ ହିଜୁଃକାକ। ଆଇଙ୍ଗ୍‌ ଇନ୍‌କୁକେ ମିସାର୍‌ ଦିଶୁମ୍‌ରେୟାଃ ସବେନାଃଏତେ ବୁଗିନ୍‌ ବିଷାଏ ଏମାକଆଇଙ୍ଗ୍‌ ଓଡ଼ୋଃ ଇନ୍‌କୁକେ ଦିଶୁମ୍‌ରାଃ ପୁରାଃ ବୁଗିନ୍‌ ଠାୟାଦ୍‌ ଏମାକଆଇଙ୍ଗ୍‌। 19 ଆଡଃଗି ଇନ୍‌କୁକେ କାଜିକମେ, ଇନ୍‌କୁ ଆକଆଃ କୁଡ଼ି ଓଡ଼ୋଃ ହନ୍‌କକେ ଆଉକ ନାଙ୍ଗ୍‌ ମିସାର୍‌ ଦିଶୁମ୍‌ଏତେ ଗାଡ଼ି ଇଦିକାକ ଓଡ଼ୋଃ ଆକଆଃ ଆପୁକେ ହଗି ଆଉକେଦ୍‌ତେ ହିଜୁଃକାକ। 20 ଇନ୍‌କୁ ଏନ୍ତାଃରେ ଆକଆଃ ସାମ୍ପାତ୍ତି ବିଷାଏରେ ଆଲକାକ ଉଡ଼ୁଗେକା, ଚିଆଃଚି ଗଟା ମିସାର୍‌ ଦିଶୁମ୍‌ରାଃ ବୁଗିନ୍‌ ବିଷାଏକ ଇନ୍‌କୁଆଃ ହବାଅଃଆ।"

21 ଏନ୍ତେ ଯାକୁବ୍‌ଆଃ ହନ୍‌କ ଏନ୍‌ ଲେକାଗି କାମି ରିକାକେଦାକ, ଓଡ଼ୋଃ ଫାରୋ ଆଚୁକାଦ୍‌ ଲେକାଗି ଯୋଷେଫ୍‌ ଇନ୍‌କୁକେ ଗାଡ଼ି ଏମାଦ୍‌କଆ ଓଡ଼ୋଃ ହରାରେ ଜମ୍‌ ନାଙ୍ଗ୍‌ ଜମେୟାଁଃ ହଗି ଏମାଦ୍‌କଆ। 22 ଆଡଃଗି ଇନିଃ ମିପିହୁଡ଼୍‌ ସବେନ୍‌କକେ ମିମିଦ୍‌ ଜଡ଼ା ଲିଜାଃ ଏମାଦ୍‌କଆଏ, ମେନ୍‌ଦ ବେଞ୍ଜାମିନ୍‌କେ ରୁପା ଟାକା ଓଡ଼ୋଃ ମଣେୟାଁ ଜଡ଼ା ଲିଜାଃ ଏମ୍‌କିୟାଏ। 23 ଇନିଃ ଆପୁତେ ନାଙ୍ଗ୍‌ ମିସାର୍‌ ଦିଶୁମ୍‌ରାଃ ହିତା ଓଡ଼ୋଃ ବୁଗିନ୍‌ ଜଜମାଃ, ଗେଲେୟା ଗାଧା ଚେତାନ୍‌ରେ ଲାଦିକେଦ୍‌ତେ କୁଲ୍‌କେଦା। 24 ନେ’ଲେକାତେ ଯୋଷେଫ୍‌ ଆୟାଃ ହାଗାକକେ ବିଦା ଏମାଦ୍‌କଆଏ, ଓଡ଼ୋଃ ଇନ୍‌କୁକେ କାଜିକେଦ୍‌କଆ, "ନେଲେପେ, ହରାରେ ଜେତାଏ ଆଲପେ ଏପେଗେର୍‌ଆଃ।"

25 ଇନ୍‌କୁ ମିସାର୍‌ ଦିଶୁମ୍‌ ବାଗିକେଦ୍‌ତେ, କିନାନ୍‌ ଦିଶୁମ୍‌ ଆକଆଃ ଆପୁ ଯାକୁବ୍‌ତାଃ ସେଟେର୍‌ୟାନାକ। 26 ଇନ୍‌କୁ ଆପୁତେକେ କାଜିକିୟାକ, "ଯୋଷେଫ୍‌ ତିସିଙ୍ଗ୍‌ ଜାକେଦ୍‌ ଜୀନିଦ୍‌ ମେନାଇୟା। ଇନିଃ ଗଟା ମିସାର୍‌ ଦିଶୁମ୍‌ରେ ରାଇଜ୍‌ ତାନା।" ଇନ୍‌କୁଆଃ କାଜି ଆୟୁମ୍‌କେଦ୍‌ତେ ଯାକୁବ୍‌ ଆକ୍‌ଚାକାଅୟାନାଏ, ଚିଆଃଚି ଇନିଃ ଇନ୍‌କୁଆଃ କାଜିରେ କାଏ ବିଶ୍ୱାସ୍‌କେଦା।

27 ମେନ୍‌ଦ ଇନିଃ ଚିମ୍‌ତା ଯୋଷେଫ୍‌ ଅକ କାଜିକଏ କାଜିକାଦ୍‌କ ତାଇକେନା, ଏନା ଇନ୍‌କୁତାଃଏତେ ଆୟୁମ୍‌କେଦା ଓଡ଼ୋଃ ଆଇଃକ୍‌କେ ମିସାର୍‌ତେ ଇଦି ନାଙ୍ଗ୍‌ ଯୋଷେଫ୍‌ କୁଲାକାଦ୍‌ ଗାଡ଼ିକ ନେଲ୍‌କେଦାଏ, ଇମ୍‌ତା ଯାକୁବ୍‌ ବିଶ୍ୱାସ୍‌କେଦାଏ। 28 ଓଡ଼ୋଃ ଯାକୁବ୍‌ କାଜିକେଦାଏ, "ଆଇଁୟାଃ ହନ୍‌ ଯୋଷେଫ୍‌ ତିସିଙ୍ଗ୍‌ ଜାକେଦ୍‌ ଜୀନିଦ୍‌ ମେନାଇୟା, ଏନାଗି ଆଇଁୟାଃ ନାଙ୍ଗ୍‌ ରାସ୍‌କାରାଃ କାଜିତାନାଃ। ଆଇଙ୍ଗ୍‌ ସେନାଇଙ୍ଗ୍‌ ଓଡ଼ୋଃ ଆଇଁୟାଃ ଗନଏଃ ସିଦାରେ ଇନିଃକେ ନେଲିୟାଇଙ୍ଗ୍‌।"