44 Kula kumbuga vakukwetu vavaga na lihema lyo lyalajilaga kuta Mulungu avaga hamwe nawo. Lihema lyo lyavaga litsentsilwe kota hila Mulungu fyo avaga amulajitse Musa. 45 Kaha vakukwetu vanuche lihema ilyo na viyanuchilaga vene kwa vene kwa kulongotswa na Yosuwa mbaka vakinjilaje ku wutavala wa vanu va inyi tsila, na lihema ilyo lyavaga baho mbaka ha siku tsa Dawudi. 46 Dawudi yo idichilwe na Mulungu, nayo akamusukaje ili amudichile kumutsenjela Mulungu Nyumba yo akumufugamila mwene Dawudi hamwe na vanu veka va Isilaheli. 47 Lechelelo Nyumba ya Mulungu yatsentsilwe na Selemani.

48 Nayivaje ihyo Mulungu yo ali kilanga ndalahela, siikalaga mu nyumba tso tsitsentsilwe na vanu, kota fyo alontsile muloli mutunga,

49 Mutwa anlonga kuta,

Kilanga cho chigoda changu cha wutavala,

na inyi ho hono ha kukanyajila magulu gangu.

Mukuntsenjela nyumba yinya ndawuli?

Awu hono hachi ho ngikala?

50 Mbe, si heni yo tsadisile finu fyeka fino?