ಜೊಶುವಾ 11

ಜೊಶ್ವಾನ್ ಜೆಬಿನಾಕ್ ಅನಿ ತೆಜ್ಯಾ ವಾಂಗ್ಡಿಯಾಕ್ನಿ ಹಾರ್ವಲ್ಲೆ

1 ಹಾಚೊರಾಜೊ ರಾಜಾ ಜೆಬಿನಾನ್ ಹೆ ಸಗ್ಳೆ ಆಯ್ಕುನ್, ಮಾದೊನಾಚೊ ರಾಜಾ ಜಾಬಾನ್, ಶಿಮ್ರೊನಾಚೊ ರಾಜಾ ಅಕ್ಷಾಪಿನ್, ಉತ್ತರ್ ದಿಕ್ಕಾಚೊ ಮಡ್ಡಿಯಾಂಚೊ ಜಾಗೊ, 2 ಕಿನ್ನೆರೊತ್ ಸಮುಂದರಾಚ್ಯಾ, ದಕ್ಷಿನ್ ದಿಕ್ಕಾಚೊ ಜಾಗೊ, ಉತ್ರನಿಚೊ ಜಾಗೊ, ದೊರ್ ಮನ್ತಲ್ಯಾ ಗಾಂವಾಚ್ಯಾ ದಿಸ್ ಬುಡ್ತಲ್ಯಾ ದಿಕ್ಕಾಚ್ಯಾ ಮಡ್ಡಿ ವೈಲೊ ಜಾಗೊ, ಹೆಂಚೆ ರಾಜಾ ದಿಸ್ ಬುಡ್ತಲ್ಯಾ ಅನಿ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಿ ಹೊತ್ತ್ಯಾ, 3 ಕಾನಾನ್ಯಾ, ಅಮೊರಿತಾ, ಹಿತ್ತಿಯಾ, ಪೆರಿಜ್ಜಿಯಾ, ಮಡ್ಡಿ ವೈಲ್ಯಾ ಜಾಗ್ಯಾಚೆ ಜೆಬುಸಿಯಾ ಅನಿ ಹೆಬ್ರೊನ್ ಖಡ್ಡ್ಯಾತ್ಲೆ ಮಿಚ್ಪಾ ದೆಶಾಚ್ಯಾ ಹಿವ್ವಿಯಾ ಲೊಕಾಕ್ನಿ ಬಲ್ವುಕ್ ಧಾಡ್ಲ್ಯಾನ್. 4 ತೆನಿ ಲಗ್ಗುನಾ ಅಪ್ನಾಚಿ ಲೈ ರಥಾ ಅನಿ ಘೊಡ್ಕಿಯಾ ಘೆವ್ನ್ ಯೆವ್ಕ್ ಲಾಗ್ಲೆ, ತೆಂಚೊ ಅಂಕೊ ಸಮುಂದರಾಚ್ಯಾ ರೆತಿ ಗತಿನ್ ಮೆಜುಕ್ ಹೊಯ್ನಾ ತವ್ಡೊ ಹೊತ್ತೊ. 5 ಹೆ ಸಗ್ಳೆ ರಾಜಾನಿ ಗೊಳಾ ಹೊವ್ನ್, ಮರೊಮ್ ಮನ್ತಲ್ಯಾ ಪಾನಿಯಾಚ್ಯಾ ಜಾಗ್ಯಾಕ್ಡೆ ಇಜ್ರಾಯೆಲಾಂಚ್ಯಾ ವಾಂಗ್ಡಾ ಲಡಾಯ್ ಕರುಕ್ ಮನುನ್ ಯೆಲ್ಯಾನಿ. 6 ತನ್ನಾ ಸರ್ವೆಸ್ಪರಾನ್ ಜೊಶ್ವಾಕ್ ತಿಯಾ ತೆಂಕಾ ಭಿಂವ್ ನಕ್ಕೊ, ಉದ್ದ್ಯಾ ಹ್ಯಾಚ್ ಎಳಾರ್ ಮಿಯಾ ತೆಂಕಾ ಇಜ್ರಾಯೆಲಾಂಚ್ಯಾ ಹಾತಿತ್ ದಿತಾ, ಇಜ್ರಾಯೆಲ್ ಲೊಕಾ ತೆಂಕಾ ನಾಶ್ ಕರ್‍ತಾತ್, ಅನಿ ತಿಯಾ ತೆಂಚ್ಯಾ ಘೊಡ್ಕಿಯಾಂಚಿ ಹಿಂಬ್ಡಾ ಕಾಪುನ್ ರಥಾ ಜಾಳ್ವುಚೆ, ಮಟ್ಲ್ಯಾನ್. 7 ಜೊಶ್ವಾನ್ ಮಿಚ್ಚೆತ್ಲ್ಯಾ ಸಗ್ಳ್ಯಾ ಸೈನ್ಯಾಕ್ ಘೆವ್ನ್ ಮೆರೊಮ್ ಪಾನಿಯಾಚ್ಯಾ ಜಾಗ್ಯಾಕ್ಡೆ ಹೊತ್ತ್ಯಾ ವಿರೊಧಿಯಾಕ್ನಿ ಹಾರ್ವುಲ್ಯಾನ್. 8 ಸರ್ವೆಸ್ಪರಾನ್ ತೆಂಕಾ ಇಜ್ರಾಯೆಲಾಂಚ್ಯಾ ಹಾತಿತ್ ದಿಲ್ಯಾನ್, ತೆನಿ ತೆಂಕಾ ಮೊಟ್ಟೆ ಚಿದೊನ್ ಅನಿ ಮಿಸ್ರೆ ಫೊತ್ಮಯಿಮ್ ಮನ್ತಲ್ಯಾ ಗಾಂವಾ ಪತರ್ ಅನಿ ದಿಸ್ ಉಗಾವ್ತಲ್ಯಾ ದಿಕ್ಕಾಚ್ಯಾ ಮಿಚ್ಪೆಚ್ಯಾ ಮಾಳ್ ಜಾಗ್ಯಾ ಪತರ್ಬಿಬಿ ಫಾಟ್ ಲಾಗುನ್ ಮಾರ್ಲ್ಯಾನಿ, ಎಕ್ಲ್ಯಾಕ್ಬಿ ಹುರ್ವಿನಸ್ತಾನಾ ಸಗ್ಳ್ಯಾಕ್ನಿ ನಾಶ್ ಕರ್ಲ್ಯಾನಿ. 9 ತನ್ನಾ ಜೊಶ್ವಾನ್ ಸರ್ವೆಸ್ಪರಾಚ್ಯಾ ಹುಕುಮಾ ಸಾರ್ಕೆ ತೆಂಚ್ಯಾ ಘೊಡ್ಕಿಯಾಂಚಿ ಹಿಂಬ್ಡಾ ಕಾಪುನ್, ರಥಾ ಜಾಳ್ವುಲ್ಯಾನ್. 10 ಜೊಶ್ವಾನ್ ಲಗ್ಗುನಾಚ್ ಪರ್‍ತುನ್ ಹಾಜೊರ್ ಅನಿ ತೆಂಚ್ಯಾ ರಾಜಾಕ್ನಿ ನಾಶ್ ಕರ್ಲ್ಯಾನ್, ಹಾಜೊರ್ ಅದ್ಲ್ಯಾ ಕಾಲಾತ್ಲ್ಯಾ ಸಗ್ಳ್ಯಾ ರಾಜ್ಯಾತ್ನಿ ಮೊಟ್ಟೆ ಹೊಲ್ಲೆ. 11 ಇಜ್ರಾಯೆಲಾನಿ ಹಾಜೊರ್ ಶಾರ್‍ಹಾತ್ಲ್ಯಾ ಸಗ್ಳ್ಯಾಕ್ನಿ ಎಕ್ಲ್ಯಾಕ್ಬಿ ಹುರ್ವಿನಸ್ತಾನಾ ಕೊಯ್ತ್ಯಾನ್ ನಾಶ್ ಕರುನ್, ತೆ ಶಾರ್ ಜಾಳ್ವುಲ್ಯಾನಿ. 12 ಮಾನಾ ಜೊಶ್ವಾನ್ ಹುರಲ್ಲ್ಯಾ ರಾಜಾಕ್ನಿ ಅನಿ ತೆಂಚ್ಯಾ ಹುರಲ್ಲ್ಯಾ ಸಗ್ಳ್ಯಾ ಶಾರಾಕ್ನಿ ಧರುನ್ ಸರ್ವೆಸ್ಪರಾಚೊ ಸೆವಕ್ ಮೊಯ್ಜೆಚ್ಯಾ ಹುಕುಮಾ ಸಾರ್ಕೆ ಕೊಯ್ತ್ಯಾನ್ ನಾಶ್ ಕರ್ಲ್ಯಾನ್. 13 ಜೊಶ್ವಾನ್ ಜಾಳ್ವಲ್ಲೆ ಹಾಜೊರ್ ಶಾರ್ ಸೊಡುನ್ ಇಜ್ರಾಯೆಲ್ ಲೊಕಾನಿ ಮಡ್ಡಿ ವೈಲ್ಯಾ ದುಸ್ರ್ಯಾ ಖಲ್ಯಾಬಿ ಶಾರಾಕ್ ಜಾಳ್ವುಕ್ನಾತ್. 14 ಇಜ್ರಾಯೆಲ್ ಲೊಕಾನಿ ತ್ಯಾ ಶಾರಾಂತ್ಲಿ ಜನಾವರಾ ಅನಿ ಸಾಮಾನಾ ಚೊರುನ್ ಘೆಟ್ಲ್ಯಾನಿ, ಖರೆ ಸಗ್ಳ್ಯಾ ಲೊಕಾಕ್ನಿ ಕೊಯ್ತ್ಯಾನ್ ನಾಶ್ ಕರ್ಲ್ಯಾನಿ, ಶ್ವಾಸ್ ಖೆಳ್ತಲೆ ಕಾಯ್ಬಿ ಹುರ್ವುಕ್ನಾತ್. 15 ಸರ್ವೆಸ್ಪರಾಚೊ ಸೆವಕ್ ಮೊಯ್ಜೆನ್ ಅಪ್ನಾಕ್ ದೆವಾನ್ ಸಾಂಗಲ್ಲೆ ಸಗ್ಳೆ ಜೊಶ್ವಾಕ್ ಸಾಂಗಟ್ಲ್ಯಾನ್, ಸರ್ವೆಸ್ಪರಾನ್ ಮೊಯ್ಜೆ ವೈನಾ ಹುಕುಮ್ ದಿಲ್ಲೆ ಎಕ್ಬಿ ಇಸ್ರಿನಸ್ತಾನಾ ಜೊಶ್ವಾನ್ ಸಗ್ಳೆಬಿ ಕರ್ಲ್ಯಾನ್.

ಜೊಶ್ವಾನ್ ಜಾಗೆ ಘೆಟಲ್ಲೆ

16 ಅಶೆ ಮಡ್ಡಿ ವೈಲೊ ಜಾಗೊ, ದಕ್ಷಿನ್ ಪ್ರಾಂತ್ಯಾಚೊ ಗೊಶೆನ್ ಸಿಮೆ, ಉತ್ರನಿಚೊ ಜಾಗೊ, ಖಡ್ಡ್ಯಾಂಚೊ ಜಾಗೊ, ಇಜ್ರಾಯೆಲಾಚೊ ಮಡ್ಡಿಯಾಂಚೊ ಜಾಗೊ ಅನಿ ತೆಜೊ ಉತ್ರನಿಚೊ ಜಾಗೊ, ಹೆ ಸಗ್ಳೆ ಜೊಶ್ವಾಚ್ಯಾ ವಾಟ್ಯಾಕ್ ಗಾವ್ಲೆ. 17 ತೆನಿ ಸೆಯಾರಿಚ್ಯಾ ವಾಟೆಕ್ಲ್ಯಾ ಹಾಲಾಕ್ ಮಡ್ಡಿಚ್ಯಾ ಹೆರ್ಮೊನಾಚ್ಯಾ ಮುಳಾತ್ಲ್ಯಾ ಲೆಬೊನ್ ಕೊಳ್ಳಾಚ್ಯಾ ಬಾಲ್ಗಾದ್ ಶಾರಾ ಪತರ್ಲೊ ಸಗ್ಳೊ ದೆಶ್ ಅನಿ ತೆಚ್ಯಾ ರಾಜಾಕ್ನಿ ಬಂಧಿ ಕರುನ್ ನಾಶ್ ಕರ್ಲ್ಯಾನ್. 18 ಜೊಶ್ವಾನ್ ಹ್ಯಾ ಸಗ್ಳ್ಯಾ ರಾಜಾಂಚ್ಯಾ ವಾಂಗ್ಡಾ ಲೈ ದಿಸಾ ಲಡಾಯ್ ಕರ್ಲ್ಯಾನ್. 19 ಗಿಬ್ಬೆಯಾಚ್ಯಾ ಹಿವ್ವಿಯಾಕ್ನಿ ಸೊಡುನ್ ಅನಿ ಖಲ್ಯಾ ಶಾರಾಚ್ಯಾ ಲೊಕಾನಿಬಿ ಇಜ್ರಾಯೆಲಾಂಚ್ಯಾಕ್ನಾ ಕರಾರ್ ಕರುನ್ ಘೆವ್ಕ್ ನ್ಯಾಯ್ ಸಗ್ಳ್ಯಾಕ್ನಿ ಲಡಾಯ್ ಕರುನುಚ್ ಕಾಡುನ್ ಘೆವ್ನ್ ಹೊಲೆ. 20 ಸರ್ವೆಸ್ಪರಾನ್ ಮೊಯ್ಜೆಕ್ ಹುಕುಮ್ ದಿಲ್ಲ್ಯಾ ಸಾರ್ಕೆ ತೆಂಕಾ ಸಗ್ಳ್ಯಾಕ್ನಿ ಇಜ್ರಾಯೆಲ್ ಲೊಕಾನಿ ಉಲ್ಲೆಬಿ ದಯಾ ದಾಕ್ವಿನಸ್ತಾನಾ ನಾಶ್ ಕರಿ ಸಾರ್ಕೆ ಸರ್ವೆಸ್ಪರಾನ್ ತ್ಯಾ ಲೊಕಾಂಚಿ ಮನಾ ಖಟೊರ್ ಕರುನ್ ತೆನಿ ಲಡಾಯಿಕ್ ಉಟಿ ಸಾರ್ಕೆ ಕರ್ಲ್ಯಾನ್. 21 ಜೊಶ್ವಾನ್ ತ್ಯಾ ಎಳಾರುಚ್ ಮಲ್ನಾಡಾಚೆ ಜಾಗೆ ಹೆಬ್ರೊನ್ ಹೆಚ್ ಅನಿ ಅನಾಬ್ ಮನ್ತಲ್ಯಾ ಗಾಂವಾತ್ನಿ ಅನಿ ಜುದೆವ್ ಅನಿ ಇಜ್ರಾಯೆಲ್ ಪ್ರಾಂತ್ಯಾಂಚ್ಯಾ ಮಡ್ಡಿಯಾತ್ನಿ ವಸ್ತಿ ರಾತಲ್ಲ್ಯಾ ಅನಾಕ್ಯಾಕ್ನಿ ನಾಶ್ ಕರುನ್ ತೆಂಚಿ ಶಾರಾ ನಾಶ್ ಕರ್ಲ್ಯಾನ್. 22 ಇಜ್ರಾಯೆಲಾಂಚ್ಯಾ ಪ್ರಾಂತ್ಯಾತ್ನಿ ಕೊನ್ಬಿ ಹುರುಕ್ನಾತ್, ಖರೆ ಗಾಜಾ, ಗತುರ್, ಅಶ್ಡೊದ್ ಮನ್ತಲ್ಯಾ ಗಾಂವಾತ್ನಿ ಉಲ್ಲಿ ಲೊಕಾ ಹುರಲ್ಲಿ. 23 ಸರ್ವೆಸ್ಪರಾನ್ ಮೊಯ್ಜೆಕ್ನಾ ಗೊಸ್ಟ್ ದಿಲ್ಲೆ ಜಾಗೆ ಜೊಶ್ವಾನ್ ಧರುನ್ಗೆವ್ನ್ ಇಜ್ರಾಯೆಲಾಂಚ್ಯಾ ಘರಾನ್ಯಾಂಚೆ ಪರ್ಕಾರ್ ವಾಟುನ್ ದಿಲ್ಯಾನ್, ಲಡಾಯ್ ಸರುನ್ ಸಗ್ಳ್ಯಾ ದೆಸಾತ್ ಶಾಂತ್ ಹೊಲೆ.