1 ಜೊಸೆಪಾಚೊ ಥೊರ್ಲೊ ಲೆಕ್ ಮನಸ್ಸೆಚ್ಯಾ ಪಿಳ್ಗಿಚ್ಯಾಕ್ನಿ ಗಾವಲ್ಲ್ಯಾ ಜಾಗ್ಯಾಂಚೊ ಇಸಬ್ ಅಸೊ ಹಾಯ್, ಮನಸ್ಸೆಚೊ ಥೊರ್ಲೊ ಲೆಕ್ ಗಿಲ್ಯಾದಾಚೊ ಬಾಬಾ ಮಾಕಿರ್, ಲಡಾಯಿತ್ ಬಲಿಸ್ಟ್ ಹೊತ್ತ್ಯಾ ಸಾಟ್ನಿ ತೆಕಾ ಗಿಲ್ಯಾದ್ ಅನಿ ಭಾಶಾನ್ ಮನ್ತಲಿ ಪ್ರಾಂತ್ಯಾ ಗಾವ್ಲಿ. 2 ಜೊಸೆಪಾಚೊ ಥೊರ್ಲೊ ಲೆಕ್ ಮನಸ್ಸೆಚಿ ಹುರಲ್ಲಿ ಲೆಕಾ, ಅಭಿಯೆಜೆರ್, ಹೆಲೆಕ್, ಅಸ್ರಿಯೆಲ್, ಶೆಕೆಮ್, ಹೆಫೆರ್ ಅನಿ ಶಮಿದ್ ಮನ್ತಲ್ಯಾಂಚ್ಯಾ ಪಿಳ್ಗಿಚ್ಯಾಕ್ನಿ ಜೊರ್ದಾನ್ ನ್ಹಯಿಚ್ಯಾ ಹಿಕ್ಡಿನ್ ಜಾಗೊ ಗಾವ್ಲೊ. 3 ಮನಸ್ಸೆಕ್ ಉಪಾಜಲ್ಲ್ಯಾ ಮಾಕಿರಾಚೊ ಪುತ್ರು ಗಿಲ್ಯಾದಾಚೊ ನಾತು ಹೆಫೆರಾಚೊ ಲೆಕ್ ಚೆಲ್ಪಹಾದಾಕ್, ಮಹ್ಲಾ, ನೊಯೆ, ಹೊಗ್ಲಾ, ಮಿಲ್ಕಾ, ತಿರ್ಚಾ ಮನ್ತಲಿ ಚೆಡ್ವಾಚ್ ಉಪಜ್ಲಿ ಖರೆ ಝಿಲ್ಗೆ ಉಪ್ಜುಕ್ ನಾತ್. 4 ಹ್ಯಾ ಚೆಡ್ವಾನಿ ಮೊಟೊ ಯಾಜಕ್ ಎಲಿಯಾಜರ್, ನುನಾಚೊ ಲೆಕ್ ಜೊಶ್ವಾ ಅನಿ ಘರಾನಾಂಚ್ಯಾ ಮುಖಂಡಾಂಚ್ಯಾಕ್ಡೆ ಯೆವ್ನ್, ಅಮ್ಚ್ಯಾ ಭಾವಾಂಚ್ಯಾ ಮದ್ದಿ ಅಮ್ಕಾಬಿ ವಾಟೊ ದಿವ್ಚೆ ಮನುನ್ ಸರ್ವೆಸ್ಪರಾನ್ ಮೊಯ್ಜೆಕ್ ಹುಕುಮ್ ದಿಲ್ಯಾನ್ ನ್ಹಯ್, ಮನುನ್ ಸಾಂಗ್ತಾನಾ, ಜೊಶ್ವಾನ್ ಸರ್ವೆಸ್ಪರಾಚ್ಯಾ ಹುಕುಮಾ ಸಾರ್ಕೆ ತೆಂಕಾ ತೆಂಚ್ಯಾ ಬಾಬಾಚ್ಯಾ ಭಾವಾಂಚ್ಯಾ ಮದ್ದಿ ಜಾಗ್ಯಾತ್ ವಾಟೊ ದಿಲ್ಯಾನ್. 5 ಮನಸ್ಸೆಚ್ಯಾ ಘರಾನಾಚ್ಯಾ ಚೆಡ್ವಾಕ್ನಿಬಿ ಝಿಲ್ಗ್ಯಾಂಚ್ಯಾ ವಾಂಗ್ಡಾ ವಾಟೊ ಗಾವಲ್ಲ್ಯಾ ಸಾಟ್ನಿ, ಮನಸ್ಸೆಚ್ಯಾ ಘರಾನಾಚ್ಯಾಕ್ನಿ ಜೊರ್ದಾನ್ ನ್ಹಯಿಚ್ಯಾ ತಿಕುಲ್ಲ್ಯಾ ಭಾಶಾನ್ ಅನಿ ಗಿಲ್ಯಾದ್ ಪ್ರಾಂತ್ಯಾಕ್ನಿ ಸೊಡುನ್ ಹಿಕ್ಡಿನ್ಬಿ ಧಾ ಪಟ್ ವಾಟೊ ಗಾವ್ಲೊ. 6 ಮನಸ್ಸೆಚ್ಯಾ ಹುರಲ್ಲ್ಯಾ ಗೊತ್ರಾಕ್ನಿ ಗಿಲ್ಯಾದ್ ಸಿಮೆ ಗಾವ್ಲಿ. 7 ಮನಸ್ಸೆಚ್ಯಾ ಜಾಗ್ಯಾಚಿ ಘಡ್ ಅಶೆರ್ ಗಾಂವಾಕ್ನಾ ಶುರುಹೊವ್ನ್, ಶೆಕೆಮಾಚ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾಚ್ಯಾ ಮಿಕೆತಿ ವೈನಾ ದಕ್ಷಿನ್ ದಿಕ್ಕಾಚ್ಯಾ ತಪ್ಪುಹಾಚ್ಯಾ ಝರಿಕ್ಡೆ ಪಾವ್ತಾ. 8 ತಪ್ಪುಹ್ ಶಾರಾಕ್ ಪಾವ್ತಲಿ ಜಿಮಿನ್ ಮನಸ್ಸೆಂಚಿ, ಖರೆ ತೆಜ್ಯಾ ಘಡಿಕ್ ಹೊತ್ತೆ ತಪ್ಪುಹ್ ಶಾರ್ ಎಫ್ರಾಯಿಮಾಚೆ ಹೊವ್ನ್ ಹಾಯ್. 9 ತೆಚಿ ಘಡ್ ಥೈತ್ನಾ ಉತ್ರುನ್ಗೆತ್ ಕಾನಾ ನ್ಹಯಿಚ್ಯಾ ದಕ್ಷಿನಾಕ್ ಜಾತಾ, ಥೈ ಮನಸ್ಸೆಕ್ನಿ ಹೊತ್ತ್ಯಾ ಸಾರ್ಕೆಚ್ ಎಫ್ರಾಯಿಮಾಕ್ನಿಬಿ ಉಲ್ಲಿ ಶಾರಾ ಹಾತ್, ಮನಸ್ಸೆಂಚಿ ಫಿಡ್ಲಿ ಘಡ್ ನ್ಹಯಿಚ್ಯಾ ಉತ್ತರ್ ದಿಕ್ಕಾಚ್ಯಾ ದಂಡೆಕ್ನಾ ಸಮುಂದರಾಚ್ಯಾ ದಂಡೆಕ್ ಜಾವ್ನ್ ಸರ್ತಾ. 10 ನ್ಹಯಿಚಿ ದಕ್ಷಿನ್ ದಿಕ್ಕಾಚಿ ದಂಡ್ ಎಫ್ರಾಯಿಮಾಚಿ, ಅನಿ ಉತ್ತರ್ ದಿಕ್ಕಾಚಿ ಘಡ್ ಮನಸ್ಸೆಂಚಿ, ಹೆಚಿ ದಿಸ್ ಬುಡ್ತಲ್ಯಾ ದಿಕ್ಕಾಚಿ ಘಡ್ ಮೊಟೆ ಸಮುಂದರ್, ಉತ್ತರ್ ದಿಕ್ಕಾಕ್ ಅಶೆರ್ ಘರಾನಾಂಚೆ ಪ್ರಾಂತ್ಯಾ, ಅನಿ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ಇಸ್ಸಾಕಾರ್ ಘರಾನಾಚ್ಯಾಂಚೆ ದೆಶ್ ಹಾಯ್. 11 ತವ್ಡೆಚ್ ನಸ್ತಾನಾ, ಇಸ್ಸಾಕಾರ್, ಅಶೆರ್ ಮನ್ತಲ್ಯಾಂಚ್ಯಾ ಪ್ರಾಂತ್ಯಾತ್ನಿ ಬೆತ್ ಶೆಯಾನ್, ಇಬ್ಲೆಯಾಮ್, ಅನಿ ದೊರ್ ಮನ್ತಲಿ ಶಾಲಿ ಅನಿ ತೆಂಚಿ ಗಾಂವಾ, ಅನಿ ದುರ್ಗಾತ್ರಯಾಚೆ ಎಂದೊರ್, ತಾನಕ್ ಅನಿ ಮೆಗಿದ್ದೊ ಮನ್ತಲಿ ಶಾರಾ ಅನಿ ತೆಂಚಿ ಗಾಂವಾ ಮನಸ್ಸೆಚ್ಯಾ ಘರಾನಾಕ್ನಿ ಗಾವ್ಲಿ. 12 ಖರೆ ಮನಸ್ಸೆಚ್ಯಾ ಘರಾನಾಚ್ಯಾ ಲೊಕಾಂಚ್ಯಾಕ್ನಾ ತ್ಯಾ ಶಾರ್‍ಹಾತ್ಲ್ಯಾ ಲೊಕಾಕ್ನಿ ಪಳ್ಸುಕ್ ಹೊವ್ಕ್ ನಾ, ತಸೆ ಹೊವ್ನ್ ಕಾನಾನ್ ಗಾರಾಕ್ನಿ ಥೈಚ್ ರಾವ್ಕ್ ಅವ್ಕಾಸ್ ಹೊಲೊ. 13 ಇಜ್ರಾಯೆಲ್ ಲೊಕಾನಿ ಅಪ್ನಿ ಬಲಿಸ್ಟ್ ಹೊಲ್ಯಾ ಮಾನಾ ಕಾನಾನ್ ಗಾರಾಕ್ನಿ ಪಳ್ಸಿನಸ್ತಾನಾ ತೆಂಕಾ ಗುಲಾಮ್ ಗಿರಿಕ್ ಲಾವ್ಲ್ಯಾನಿ.

14 ಖರೆ ಜೊಸೆಪಾಚ್ಯಾ ಘರಾನಾಚ್ಯಾನಿ ಜೊಶ್ವಾಕ್, ತಿಯಾ ಚಿಟ್ ಘಾಲುನ್ ಅಮ್ಕಾ ಎಕುಚ್ ಭಾಗ್ ಕಶ್ಯಾಕ್ ದಿಲೈ, ಅಮ್ಕಾ ಸರ್ವೆಸ್ಪರಾನ್ ಅಜುನ್ಬಿ ಆಶಿರ್ವಾದ್ ದಿಲ್ಲ್ಯಾ ಸಾಟ್ನಿ ಲೈ ಮೊಟೆ ಲೊಕಾ ಹೊಲ್ಯಾಂವ್ ನ್ಹಯ್, ಮನುನ್ ಸಾಂಗ್ತಾನಾ, 15 ಜೊಶ್ವಾನ್ ತೆಂಕಾ, ಮೊಟ್ಟ್ಯಾ ಲೊಕಾಕ್ನಿ ತುಮ್ಕಾ ಎಫ್ರಾಯಿಮಾಂಚೊ ಮಡ್ಡಿಚೊ ಜಾಗೊ ನಸ್ಲ್ಯಾರ್, ರೆಫಾಯಿಮಾಂಚ್ಯಾ ಸಿಮೆಕ್ ಜಾವ್ನ್ ಥೈತ್ಲಿ ಡಂಗಳ್ ತೊಡುನ್ ಜಾಗೊ ಕರುನ್ಗೆವಾ ಮಟ್ಲ್ಯಾನ್. 16 ತೆನಿ ಅನಿ ಪರ್‍ತುನ್ ಜೊಶ್ವಾಕ್, ಅಮ್ಚೊ ಮಡ್ಡಿಚೊ ಜಾಗೊ ಅಮ್ಕಾ ಫಿರೆ ಹೊಯ್ನಾ, ಬೆತ್ ಶೆಯಾನ್ ಅನಿ ತೆಕಾ ಲಾಗುನ್ ಹೊತ್ತ್ಯಾ ಗಾಂವಾಂಚ್ಯಾ ಖಡ್ಡ್ಯಾತ್ನಿ ಅನಿ ಜೆಜ್ರೆಲಿಚ್ಯಾ ಕೊಳ್ಳಾತ್ನಿ ವಸ್ತಿ ರ್‍ಹಾತಲ್ಯಾ ಸಗ್ಳ್ಯಾ ಕಾನಾನ್ ಲೊಕಾಕ್ನಿ ಲೊಂಗ್ಟಾಚಿ ರಥಾ ಹಾತ್. ಮನ್ತಾನಾ, 17 ತೆನಿ ಜೊಸೆಪಾಚ್ಯಾ ಎಫ್ರಾಯಿಮ್ ಅನಿ ಮನಸ್ಸೆ ಘರಾನಾಚ್ಯಾ ಲೊಕಾಕ್ನಿ, ತುಮಿ ಮೊಟೆ ಲೊಕಾ ಅನಿ ಲೈ ಬಳಾಚೆ ಹೊತ್ತೆ ಕಾಯ್ ಖರೆ, ತುಮಿ ಎಕಾಕಿಂತಾ ಲೈ ಭಾಗ್ ಘೆವ್ಕ್ ಹೊತಾ ನ್ಹಯ್. 18 ತೊ ಮಡ್ಡಿಚೊ ಜಾಗೊ ತುಮ್ಕಾ ದಿತಾ, ತ್ಯಾತುರ್ ಡಂಗಳ್ ರಾಲ್ಯಾರ್ಬಿ ತಿ ತುಮಿ ತೊಡುನ್ ಟಾಕಾ, ಅನಿ ತೆಕಾ ಸಮಂದ್ ಪಡಲ್ಲೊ ಮ್ಹಾಳ್ ಜಾಗೊಬಿ ತುಮ್ಚೊಚ್, ಕಾನಾನ್ ಗಾರಾ ಬಳಾಚಿ ಅನಿ ಲೊಂಗ್ಟಾಚಿ ರಥಾ ಹೊತ್ತೆ ಹೊಲ್ಯಾರ್ಬಿ, ತುಮಿ ತೆಂಕಾ ಪಳಸ್ತ್ಯಾಸಿ, ಮನುನ್ ಜವಾಬ್ ದಿಲ್ಯಾನ್.