ಜೊಶುವಾ 18

ಹುರಲ್ಲ್ಯಾ ಜಿಮ್ನಿಚೆ ವಾಟೆ

1 ಫುರಾ ದೆಶ್ ಅಪ್ನಾಚ್ಯಾ ತಾಬೆತ್ ಹೊಲ್ಲ್ಯಾ ಮಾನಾ ಇಜ್ರಾಯೆಲಾಂಚ್ಯಾ ತಾಂಡ್ಯಾಚಿ ಸಗ್ಳಿ ಲೊಕಾ ಶಿಲೊವಿತ್ ಗೊಳಾಹೊವ್ನ್ ಯೆವ್ನ್ ದೆವಾಕ್ ಬಗ್ತಲಿ ಗುಡಿ ಇಬೆ ಕರ್ಲ್ಯಾನಿ. 2 ಇಜ್ರಾಯೆಲಾತ್ನಿ ಸಾತ್ ಕುಳಿಯಾಕ್ನಿ ಅಜುನ್ಬಿ ವಳ್ಕುನ್ ಥವಲ್ಲಿ ಜಿಮಿನ್ ವಾಟ್ಯಾಕ್ ಗಾವ್ಕ್ ನಸಲ್ಲಿ. 3 ತನ್ನಾ ಜೊಶ್ವಾನ್ ಇಜ್ರಾಯೆಲ್‌ಕಾರಾಕ್ನಿ, ತುಮ್ಚ್ಯಾ ಪುರ್ವಜಾಂಚೊ ದೆವ್ ಸರ್ವೆಸ್ಪರಾನ್ ತುಮ್ಕಾ ದಿಲ್ಲೊ ದೆಶ್ ಸ್ವತಾಚೊ ಕರುನ್ ಘೆವ್ಕ್ ಅಜುನ್ಬಿ ಕಶ್ಯಾಕ್ ತಡೊ ಕರ್ತ್ಯಾಶಿ. 4 ಹರಿ ಯೆಕ್ ಘರಾನಾಕ್ನಾ ತಿನ್ ತಿನ್ ಲೊಕಾಕ್ನಿ ಎಚುನ್ಗೆವಾ, ಮಿಯಾ ತೆಂಕಾ ಧಾಡ್ತಾ, ತೆನಿ ಜಾವ್ನ್ ಸಗ್ಳ್ಯಾ ದೆಸಾತ್ ಫಿರುನ್ ಅಪಪ್ಲ್ಯಾ ಪಿಳ್ಗಿಚ್ಯಾ ಪರ್ಕಾರ್ ಸಗ್ಳ್ಯಾ ಜಾಗ್ಯಾಂಚಿ ಪಟ್ಟಿ ಲಿವ್ನ್ ಹಾನುಂನ್ದಿತ್. 5 ಮಾನಾ ತೆನಿ ಸಾತ್ ವಾಟೆ ಕರುನ್ ಅಪ್ನಾ ಅಪ್ನಾಕ್ ವಾಟುನ್ಗೆಂವ್ದಿತ್, ದಕ್ಷಿನಾಕ್ ಜುದೆವಾಂಚ್ಯಾ ಘರಾನಾಚ್ಯಾಕ್ನಿಬಿ ಅನಿ ಉತ್ತರಾಕ್ ಜೊಸೆಪಾಚ್ಯಾ ಘರಾನಾಚ್ಯಾಕ್ನಿಬಿ ವಾಟೊ ಗಾವ್ನ್ ರ್‍ಹಾತಾ, ತೊ ತೆಂಕಾಚ್ ರಾಂವ್ದಿತ್. 6 ತೆನಿ ಪಟ್ಟಿತ್ ದೆಶಾಚೆ ಸಾತ್ ವಾಟೆ ಕರುನ್ ಹಿತ್ತೆ ಮಾಜ್ಯಾಕ್ಡೆ ಘೆವ್ನ್ ಯೆಂವ್ದಿತ್, ಮಿಯಾ ತುಮ್ಚ್ಯಾ ಸಾಟ್ನಿ ಅಮ್ಚೊ ದೆವ್ ಸರ್ವೆಸ್ಪರಾಚ್ಯಾ ಇದ್ರಾಕ್ ಚಿಟಿ ಘಾಲ್ತಾ. 7 ಲೆವಿಯಾಕ್ನಿ ತುಮ್ಚ್ಯಾ ವಾಂಗ್ಡಾ ವಾಟೊ ಗಾಯ್ನಾ, ಸರ್ವೆಸ್ಪರಾಚಿ ಸೆವಾಚ್ ತೆಂಚಿ ಆಸ್ತಿ ಹೊವ್ನ್ ಹಾಯ್, ಗಾದ್ ಅನಿ ರುಬೆನ್ ಘರಾನಾಚ್ಯಾಕ್ನಿಬಿ ಅನಿ ಮನಸ್ಸೆಚ್ಯಾ ಘರಾನಾಚ್ಯಾ ಅರ್ಧ್ಯಾ ಲೊಕಾಕ್ನಿಬಿ ಜೊರ್ದಾನ್ ನ್ಹಯಿಚ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ಸರ್ವೆಸ್ಪರಾಚೊ ಸೆವಕ್ ಮೊಯ್ಜೆಕ್ನಾ ಆಸ್ತಿ ಗಾವ್ಲಾ ಮಟ್ಲ್ಯಾನ್. 8 ದೆಶಾಚಿ ಪಟ್ಟಿ ಕರ್ತಲಿ ಲೊಕಾ ಜಾವ್ಚ್ಯಾ ಅದ್ದಿ ಜೊಶ್ವಾನ್ ತೆಂಕಾ, ಜಾವ್ನ್ ಫುರಾ ದೆಶ್ಯಾಚಿ ಪಟ್ಟಿ ಕರುನ್ ಘೆವ್ನ್ ಶಿಲೊವಿಕ್ ಮಾಜ್ಯಾಕ್ಡೆ ಯೆವಾ, ಮಿಯಾ ತುಮ್ಚ್ಯಾ ಸಾಟ್ನಿ ಸರ್ವೆಸ್ಪರಾಚ್ಯಾ ಇದ್ರಾಕ್ ಚಿಟಿ ಘಾಲ್ತಾ ಮನುನ್ ಧಾಡ್ಲ್ಯಾನ್. 9 ತಿ ಲೊಕಾ ಜಾವ್ನ್ ಫುರಾ ದೆಸಾತ್ ಫಿರುನ್, ಎಕ್ ಪುಸ್ತಕಾತ್ ತೆಚಿ ಫುರಾ ಗಾಂವಾ ಲಿವ್ನ್, ಸಾತ್ ವಾಟೆ ಕರುನ್ ಜೊಶ್ವಾಚ್ಯಾ ಬಿಡಾರಾಕ್ ಪರ್‍ತುನ್ ಯೆಲ್ಯಾನಿ, 10 ತನ್ನಾ ಜೊಶ್ವಾನ್ ಸರ್ವೆಸ್ಪರಾಚ್ಯಾ ಇದ್ರಾಕ್ ತೆಂಚ್ಯಾ ಸಾಟ್ನಿ ಚಿಟಿ ಘಾಲುನ್, ಸರ್ವೆಸ್ಪರಾಚ್ಯಾ ಸಲಹಾ ಸಾರ್ಕೆ ದೆಶ್ ತೆಂಚ್ಯಾ ಶಾಕೆಕ್ನಿ ವಾಟುನ್ ದಿಲ್ಯಾನ್.

ಬೆನ್ಯಾಮಿನಾಕ್ನಿ ದಿಲ್ಲೊ ವಾಟೊ

11 ಪೈಲೆ ಚಿಟ್ ಬೆಂಜ್ಯಾಮಿನ್ಯಾಂಚ್ಯಾ ಘರಾನಾಚ್ಯಾಕ್ನಿ ಪಡ್ಲಿ, ತೆಂಚ್ಯಾ ಗೊತ್ರಾಕ್ನಿ ಗಾವಲ್ಲೊ ಜಾಗೊ ಜುದೆವಾಂಚ್ಯಾ ಅನಿ ಜುಜೆಚ್ಯಾ ಘರಾನಾಂಚ್ಯಾ ಪ್ರಾಂತ್ಯಾಂಚ್ಯಾ ಮದ್ದಿ ಹಾಯ್. 12 ತೆಚಿ ಉತ್ತರ್ ದಿಕ್ಕಾಚಿ ಘಡ್, ಜೊರ್ದಾನ್ ನ್ಹಯಿಕ್ನಾ ಜೆರಿಕೊಚ್ಯಾ ಉತ್ತರಾಕ್ ಹೊತ್ತ್ಯಾ ಮಡ್ಡಿ ವೈನಾ ದಿಸ್ ಬುಡ್ತಲ್ಯಾ ದಿಕ್ಕಾಕ್ ಜಾವ್ನ್ ಮಡ್ಡಿ ಚಡುನ್ ಬೆತ್ ಆವೆನಾಚ್ಯಾ ಡಂಗ್ಳಿತ್ ಸರ್ತಾ. 13 ಥೈತ್ನಾ ದಕ್ಷಿನಾಕ್ ಪರ್‍ತುನ್, ಅತ್ತಾ ಬೆತೆಲ್ ಮನ್ತಲ್ಯಾ ಲುಜ್ ಗಾಂವಾಚ್ಯಾ ಮಡ್ಡಿಕ್ ಜಾವ್ನ್ ಥೈತ್ನಾ ಅಟಾರೊದ್ದಿಕ್ನಾ ಖಾಲ್ತಿ ಹೊತ್ತ್ಯಾ ಬೆತ್ ಹಾರೊನಿಚ್ಯಾ ಜಗ್ಗೊಳ್ ಹೊತ್ತ್ಯಾ ಮಡ್ಡಿಕ್ಡೆ ಜಾತಾ. 14 ತೆಚಿ ಘಡಿ ದಿಸ್ ಬುಡ್ತಲ್ಯಾ ದಿಕ್ಕಾಚ್ಯಾ ಮುಲ್ಲ್ಯಾತ್ಲ್ಯಾ ಹ್ಯಾ ಮಡ್ಡಿಕ್ನಾ ತಿ ದಕ್ಷಿನಾಕ್ ಪರ್‍ತುನ್ ಕಿರ್ಯಾತ್ ಬಾಳ್ ಮನ್ವುನ್ಗೆತಲ್ಯಾ ಜುದೆವಾಂಚ್ಯಾ ಕಿರ್ಯಾತಯಿಮ್ ಮನ್ತಲ್ಯಾ ಶಾರ್‍ಹಾತ್ ಸರ್ತಾ, ಹಿಚ್ ತೆಂಚಿ ದಿಸ್ ಉಗಾವ್ತಲ್ಯಾ ದಿಕ್ಕಾಚಿ ಘಡಿ. 15 ದಕ್ಷಿನ್ ದಿಕ್ಕಾಚಿ ಘಡಿ ದಿಸ್ ಉಗಾವ್ತಲ್ಯಾ ದಿಕ್ಕಾಚೊ ಮುಲ್ಲೊ ಕಿರ್ಯಾತಯಿಮಾಚ್ಯಾ ಪ್ರಾಂತ್ಯಾಕ್ನಾ, ನೆಪ್ತುಹ್ ಮನ್ತಲ್ಯಾ ಝರಿ ವರ್‍ತಿ ಬೆನಹಿನ್ನೊಮ್ ಕೊಳ್ಳಾಚ್ಯಾ ಹಿಕ್ಡಿನ್, 16 ಅನಿ ರೆಫಾಯಿಮ್ ಕೊಳ್ಳಾಚ್ಯಾ ಉತ್ತರಾಕ್ ಹೊತ್ತ್ಯಾ ತುದಿಕ್ ಜಾವ್ನ್ ಥೈತ್ನಾ ಜೆಬುಸಿಯಾಂಚ್ಯಾ ಮಡ್ಡಿಚ್ಯಾ ದಕ್ಷಿನಾಚ್ಯಾ ಬೆನಹಿನ್ನೊಮ್ ಕೊಳ್ಳಾಚ್ಯಾ ವಾಟೆನ್ ಎನರೊಗೆಲಿ ಪತರ್ ಯೆತಾ. 17 ತಿ ಥೈತ್ನಾ ಉತ್ತರ್ ದಿಕ್ಕಾಕ್ ಪರ್‍ತುನ್ ಉತ್ರುನ್ಗೆತ್, ಎನ್ ಶೆಮಸಿಕ್ ಅನಿ ತಿ ಅದುಮಿಚ್ಯಾ ವಾಟೆಚ್ಯಾ ಇದ್ರಾಕ್ ಹೊತ್ತ್ಯಾ ಗೆಲಿಲೊತಾಕ್ ಪಾವ್ನ್, ರುಬೆನಾಚೊ ಲೆಕ್ ಬೊಹಾಚ್ಯಾ ಗುಂಡ್ಯಾ ಪತರ್ ಉತ್ರುನ್, 18 ಅರಾಬಾಚ್ಯಾ ಉತ್ತರ್ ದಿಕ್ಕಾಕ್ ಹೊತ್ತಿ ಮಡ್ಡಿ ಹೆಜ್ಯಾ ವರ್‍ತಿ ಅರಬಾ ಮನ್ತಲ್ಯಾ ಕೊಳ್ಳಾಚ್ಯಾ ಜಾಗ್ಯಾಕ್ ಜಾತಾ. 19 ಥೈತ್ನಾ ತಿ ಘಡ್, ಬೆತ್ ಹೊಗ್ಲಾ ಮನ್ತಲ್ಯಾ ಗಾಂವಾಚ್ಯಾ ಉತ್ತರ್ ದಿಕ್ಕಾಕ್ ಹೊತ್ತ್ಯಾ ಮಡ್ಡಿ ವರ್‍ತಿ ಲವನ್ ಸಮುಂದರಾಚ್ಯಾ ದಕ್ಷಿನ್ ದಿಕ್ಕಾಚ್ಯಾ ಮುಲ್ಲ್ಯಾಕ್ ಜಾವ್ನ್, ಜೊರ್ದಾನ್ ನ್ಹಯ್ಕ್ ಯೆವ್ನ್ ಸಮುಂದರಾಕ್ ಮಿಳ್ತಲ್ಯಾ ಜಾಗ್ಯಾರ್ ಸರ್ತಾ, ದಕ್ಷಿನ್ ದಿಕ್ಕಾಚಿ ಘಡ್ ಹಿಚ್ ಹೊವ್ನ್ ಹಾಯ್. 20 ದಿಸ್ ಉಗಾವ್ತಲ್ಯಾ ದಿಕ್ಕಾಚಿ ಘಡ್ ಜೊರ್ದಾನ್ ನ್ಹಯುಚ್ ಹೊವ್ನ್ ಹಾಯ್, ಬೆಂಜ್ಯಾಮಿನಾಂಚ್ಯಾ ಗೊತ್ರಾಂಚ್ಯಾ ವಾಟ್ಯಾಚಿ ಭೊತ್ಯಾನಿ ಹೊತ್ತಿ ಘಡಿ ಹಿಚ್. 21 ಬೆಂಜ್ಯಾಮಿನಾಂಚ್ಯಾ ಗೊತ್ರಾಕ್ನಿ ವಾಟ್ಯಾಕ್ ಗಾವಲ್ಲಿ ಶಾರಾ ಖಲಿ ಮಟ್ಲ್ಯಾರ್, ಜೆರಿಕೊ, ಬೆತ್ ಹೊಗ್ಲಾ, ಎಮೆಕ್ಕೆಚ್ಚಿಚ್, 22 ಬೆತ್ ಅರಾಬಾ, ಚಮಾರಾಯಿಮ್, ಬೆತೆಲ್, 23 ಅವ್ವಿಮ್, ಪಾರಾ, ಒಪ್ರಾ, 24 ಅಮ್ಮೊನ್ಯ್, ಕೆಫೆರ್, ಒಪ್ನಿ, ಗೆಬಾ ಮನ್ತಲಿ ಬಾರಾ ಶಾರಾ ಅನಿ ತೆಂಚಿ ಗಾಂವಾ. 25 ಅನಿ ಗಿಬ್ಬೆಯಾ, ರಾಮಾ, ಬೆರೊತ್, 26 ಮಿಚ್ಪೆ, ಕೆಫಿರಾ, ಮೊಚಾ, 27 ರೆಕೆಮ್, ಇರ್ಫೆಲ್, ತರಲಾ, 28 ಚಿಲ್, ಎಲೆಫ್, ಜೆಬುಸಿಯಾಂಚಿ ಲೊಕಾ ಹೊತ್ತೆ ಜೆರುಜಲೆಮ್, ಗಿಬ್ಬೆಯಾತ್, ಅನಿ ಕಿರ್ಯಾತ್ ಮನ್ತಲಿ ಚವ್ದಾ ಶಾರಾ ಅನಿ ತೆಂಕಾ ಸಮಂದ್ ಪಡಲ್ಲಿ ಗಾಂವಾ ಹಿಚ್, ಬೆನ್ಯಾಮಿನಾಚ್ಯಾ ಘರಾನಾಚ್ಯಾ ಗೊತ್ರಾಕ್ನಿ ವಾಟ್ಯಾಕ್ ಗಾವಲ್ಲೆ ಹೆಚ್.