ಜೊಶುವಾ 9

ಗಿಬ್ಬೆಯಾಚ್ಯಾನಿ ಜೊಶ್ವಾಕ್ ಪಶ್ವಲ್ಲೆ

1 ಜೊರ್ದಾನ್ ನ್ಹಯಿಚ್ಯಾ ತಿಕುಲ್ಲ್ಯಾ ಮಡ್ಡಿಚೊ ವೈಲೊ ಭಾಗ್, ಉತ್ರನಿಚೊ ಭಾಗ್, ಅನಿ ಲೆಬೊನಾಚ್ಯಾ ಇದ್ರಾಕ್ಲ್ಯಾ ಮೊಟ್ಟ್ಯಾ ಸಮುಂದರಾಚೊ ದಂಡೆಚೊ ಭಾಗ್ ಹ್ಯಾತುರ್ನಿ ವಸ್ತಿ ರ್‍ಹಾತಲೆ ಅಮೊರಿತಾ, ಹಿತ್ತಿಯಾ, ಕಾನಾನ್ಯಾ, ಪೆರಿಜ್ಜಿಯಾ ಅನಿ ಹಿವ್ವಿಯಾ, ಜೆಬುಸಿಯಾ ಹೆಂಚೆ ರಾಜಾನಿ ಹೊಲ್ಲಿ ಸಂಗ್ತಿಯಾ ಆಯ್ಕುನ್, 2 ಇಜ್ರಾಯೆಲ್‌ಕಾರಾಕ್ನಿ ಅನಿ ಜೊಶ್ವಾಕ್ ವಿರೊದ್ ಲಡಾಯಿಕ್ ಕರುಕ್ ಎಕುಚ್ ಮನಾನ್ ಗೊಳಾ ಹೊಲ್ಯಾನಿ.

3 ಖರೆ ಜೆರಿಕೊ ಅನಿ ಆಯಿ ಶಾರಾಚ್ಯಾಕ್ನಿ ಜೊಶ್ವಾನ್ ಹಾರ್ವುಲ್ಯಾನ್ ಮನ್ತಲಿ ಖಬರ್ ಗಿಬೊನ್ಯಾಚ್ಯಾ ಹಿವ್ವಿಯಾಕ್ನಿ ಕಳಲ್ಲ್ಯಾ ತನ್ನಾ, 4 ತೆನಿ ತೆಕಾ ಪಶ್ವುಚೆ ಮನುನ್ ನಿರ್ದಾರ್ ಕರುನ್, ಅಪ್ನಾಚ್ಯಾ ಗಾಡ್ವಾಂಚ್ಯಾ ವರ್‍ತಿ ಜುನ್ನಿ ಚಿಲಾ ಘಾಲುನ್, ತೆಜ್ಯಾ ವೈನಾ ಪಿಂಜುನ್ ಗೆಲ್ಲಿ, ದರಾಕ್ಷಾಚಿ ಬುದ್ಲಿಯಾ ವಾವುನ್, 5 ಪಿಂಜ್ಕಿ ವ್ಹಾನಯಾ ನೆಸುನ್ಗೆವ್ನ್, ಪಿಂಜ್ಕೆ ಕಪ್ಡೆ ಕಾಂಬ್ರುನ್ಗೆವ್ನ್, ವಾಳ್ಕ್ಯಾ ಅನಿ ಬುರುಸ್ ಧರಲ್ಲ್ಯಾ ಬಾರಿಕ್ಲಿಯಾಂಚೆ ತುಕ್ಡೆ ಭಾಂದುನ್ಗೆವ್ನ್, 6 ಅಪ್ನಿ ರಾಯ್ಬಾರೆ ಮನುನ್ಗೆತ್, ಜೊಶ್ವಾಚ್ಯಾ ಪಾಳೆಯಾಕ್ ಯೆವ್ನ್, ತೆಕಾ ಅನಿ ಇಜ್ರಾಯೆಲ್ ಲೊಕಾಕ್ನಿ, ಅಮಿ ಧುರ್‍ಲ್ಯಾ ದೆಸಾಕ್ನಾ ಯೆಲ್ಯಾಂವ್ ತುಮಿ ಅಮ್ಚ್ಯಾ ವಾಂಗ್ಡಾ ಕರಾರ್ ಕರುನ್ಗೆವಾ, ಮಟ್ಲ್ಯಾನಿ. 7 ತನ್ನಾ ಹಿವ್ವಿಯಾಂಚ್ಯಾ ತೆಂಕಾ ಇಜ್ರಾಯೆಲಾನಿ, ತುಮಿ ಹ್ಯಾಚ್ ದೆಶಾಚೆ ಕಾಯ್ಕಿ, ತಸೆ ರ್‍ಹಾತಾನಾ ಅಮಿ ಕಸೆ ತುಮ್ಚ್ಯಾ ವಾಂಗ್ಡಾ ಕರಾರ್ ಕರುನ್ ಘೆವ್ಕ್ ಹೊತಾ, ಮನುನ್ ಜವಾಬ್ ದಿಲ್ಯಾನಿ. 8 ತೆನಿ ಜೊಶ್ವಾಕ್, "ಅಮಿ ತುಜಿ ಗುಲಾಮಾ" ಮನ್ತಾನಾ, ಜೊಶ್ವಾನ್ ತೆಂಕಾ, ಕೊನ್ ತುಮಿ, ಖೈತ್ಲೆ ತುಮಿ, ಮನುನ್ ಇಚಾರ್‍ಲ್ಯಾನಿ. 9 ತನ್ನಾ ತೆನಿ, "ತುಜಿ ಗುಲಾಮಾ ಅಮಿ, ತುಜ್ಯಾ ಸರ್ವೆಸ್ಪರ್ ದೆವಾಚ್ಯಾ ನಾವಾಚ್ಯಾ ಮಹಿಮಾಸಾಟ್ನಿ ಹಿತ್ತೆ ಲೈ ಧುರ್‍ಲ್ಯಾ ದೆಸಾಕ್ನಾ ಯೆಲ್ಯಾಂವ್, ಅಮ್ಚ್ಯಾ ಪುರ್ವಜಾನಿ ತೆನಿ ಇಜಿಪ್ತಾತ್ ಕರಲ್ಲ್ಯಾ ಅಜಾಪಾಚ್ಯಾ ಕಾಮಾಂಚಿ ಖಬರ್, 10 ಅನಿ ತೆನಿ ಹೆಶ್ಬೊನಾಚೊ ರಾಜಾ ಸಿಹೊನ್, ಅಶ್ಟರೊತಿತ್ ವಸ್ತಿ ಹೊತ್ತೊ ಬಾಶಾನಾಚೊ ರಾಜಾ ಒಗ್, ಮನ್ತಲ್ಯಾ ಅಮೊರಿತಾಂಚ್ಯಾ ದೊನ್ ರಾಜಾಕ್ನಿ ಕರಲ್ಲೆ ಸಗ್ಳೆ ಆಯ್ಕುನ್, 11 ಅಮ್ಚ್ಯಾ ಪರ್ಯಾನಾಕ್ ಸಾಟ್ನಿ ಜೆವಾನ್ ಭಾಂದುನ್ಗೆವ್ನ್ ಯೆವ್ನ್, ಅಮಿ ತುಮ್ಚಿ ಗುಲಾಮಾ, ತುಮಿ ಅಮ್ಚ್ಯಾ ವಾಂಗ್ಡಾ ಕರಾರ್ ಕರುನ್ಗೆವಾ ಮನುನ್ ತೆಂಕಾ ಮಾಗುನ್ಗೆವಾ ಮನುನ್ ಅಮ್ಕಾ ಧಾಡ್ಲ್ಯಾನಿ. 12 ಅಮಿ ತುಮ್ಕಾ ಭೆಟುಕ್ ಘರ್‍ಹಾತ್ನಾ ಸೊಡ್ತಾನಾ, ಹಿ ಭಾಕ್ರಿಯಾ ಹುನ್ ಹೊತ್ತಿ, ಅತ್ತಾ ವಾಳುನ್ ತುಕ್ಡೆ ಹೊಲಾತ್ ಬಗಾ, 13 ಅಮಿ ವಾಯ್ನ್ ಭರಲ್ಲಿ ಬುದ್ಲಿಯಾ ನ್ಹವಿ ಹೊತ್ತಿ, ಅತ್ತಾ ಪಿಂಜ್ಲಾತ್, ಅಮ್ಚೆ ಕಪ್ಡೆ ಅನಿ ವ್ಹಾನಯಾ ಲೈ ಚಲ್ತಲ್ಯಾ ಧುರ್‍ಲ್ಯಾ ಪರ್ಯಾನಾ ಸಾಟ್ನಿ ಜುನ್ನಿ ಹೊಲಾತ್" ಮಟ್ಲ್ಯಾನಿ. 14 ತನ್ನಾ ಇಜ್ರಾಯೆಲಾನಿ ತೆಂಚ್ಯಾ ಜೆವ್ನಾತ್ ವಾಟೊ ಘೆಟ್ಲ್ಯಾನಿ, ಖರೆ ಸರ್ವೆಸ್ಪರಾಕ್ ಇಚಾರುಕ್ ನಾತ್. 15 ಅಶೆ ಜೊಶ್ವಾನ್, ತುಮ್ಕಾ ಝಿತ್ತೆ ರಾವ್ಕ್ ಸೊಡ್ತಾ ಮನುನ್ ತೆಂಚ್ಯಾ ವಾಂಗ್ಡಾ ಸಮಾಧಾನಾಚೊ ಕರಾರ್ ಕರುನ್ಗೆಟ್ಲ್ಯಾನ್, ತಾಂಡ್ಯಾಚ್ಯಾ ಮುಖಂಡಾನಿಬಿ ಆನ್ ಘಾಟ್ಲ್ಯಾನಿ. 16 ಕರಾರ್ ಕರುನ್ ತಿನ್ ದಿಸಾ ಹೊಲ್ಲ್ಯಾ ಮಾನಾ ತೆನಿ ಜಗ್ಗೊಳ್ಲೆಚ್ ಅನಿ ಅಪ್ನಾಚ್ಯಾ ಮದ್ದಿಚ್ ವಸ್ತಿ ರ್‍ಹಾತಲೆ ಮನುನ್ ಇಜ್ರಾಯೆಲ್‌ಕಾರಾಕ್ನಿ ಗೊತ್ತ್ ಹೊಲೆ. 17 ಇಜ್ರಾಯೆಲಾನಿ ಜಾವ್ನ್ ತಿನ್ವ್ಯಾ ದಿಸಾತ್ ಪಾವಲ್ಲೆ ಗಿಬೊನ್ನ್, ಕೆಫಿರಾ, ಬೆರೊತ್ ಅನಿ ಕಿರ್ಯಾತಯಿಮ್ ಮನ್ತಲಿ ಗಾಂವಾ ತೆಂಚಿಚ್ ಹೊಲ್ಲಿ. 18 ತಾಂಡ್ಯಾಚ್ಯಾ ಮುಖಂಡಾನಿ ಸರ್ವೆಸ್ಪರಾಚ್ಯಾ ನಾವಾನ್ ಕರಾರ್ ಕರಲ್ಲೆ ಹೊತ್ತ್ಯಾ ಸಾಟ್ನಿ ಇಜ್ರಾಯೆಲ್ ಲೊಕಾನಿ ತ್ಯಾ ವಿಶಯಾತ್ ಮುಖಂಡಾಂಚ್ಯಾಕ್ಡೆ ತಕ್ರಾರ್ ಕರ್ಲ್ಯಾನಿ. 19 ತನ್ನಾ ಸಗ್ಳ್ಯಾ ಮುಖಂಡಾನಿ ಸಗ್ಳ್ಯಾ ತಾಂಡ್ಯಾಕ್ ಅಮಿ ಇಜ್ರಾಯೆಲಾಂಚ್ಯಾ ಸರ್ವೆಸ್ಪರಾಚ್ಯಾ ನಾವಾನ್ ಕರಾರ್ ಕರಲ್ಲ್ಯಾ ಸಾಟ್ನಿ ತೆಂಕಾ ಅಪ್ಡುಕ್ಬಿ ಹೊಯ್ನಾ, 20 ಅಮಿ ಕರಾರ್ ಕರಲ್ಲ್ಯಾ ಸಾಟ್ನಿ ಸರ್ವೆಸ್ಪರಾಚೊ ರಾಗ್ ಅಮ್ಚ್ಯಾ ವರ್‍ತಿ ಯೆಯ್ನಾ ಸಾರ್ಕೆ ತೆಂಕಾ ಝಿತ್ತೆ ರಾವ್ಕ್ ಸೊಡುಚೆ, ಖರೆ ಎಕ್ ಕಾಮ್ ಕರುಂವಾ. 21 ತೆನಿ ಝಿತ್ತೆ ರಾಂವ್ದಿತ್ ಖರೆ, ತೆನಿ ಸಗ್ಳ್ಯಾಲೊಕಾಂಚ್ಯಾ ಸಾಟ್ನಿ ಪಾನಿ ಹಾನ್ತಲೆ ಅನಿ ನಾಕ್ಡಾ ಫೊಡ್ತಲೆ ಹೊವ್ನ್ ರಾಂವ್ದಿತ್ ಮಟ್ಲ್ಯಾನಿ, ಅಸೆ ಮುಖಂಡಾನಿ ತೆಂಕಾ ದಿಲ್ಲಿ ಗೊಸ್ಟ್ ಪಾಳುನ್ ಹೊಲಿ. 22 ಜೊಶ್ವಾನ್ ಗಿಬ್ಬೆಯಾಕ್ನಿ ಬಲ್ವುಕ್ ಲಾವ್ನ್, ತೆಂಕಾ, ತುಮಿ ಅಮ್ಚ್ಯಾ ಜಗ್ಗೊಳ್ಲೆಚ್ ಹೊವ್ನ್ಬಿ ಕಶ್ಯಾಕ್ ಲೈ ಧುರ್ಲೆ ಮನುನ್ ಪಸ್ವುಲ್ಯಾಸಿ 23 ಹೆಚ್ಯಾ ವೈನಾ ತುಮಿ ಶರಾಪಾತ್ ಪಡ್ಲ್ಯಾಸಿ, ತುಮಿ ಕನ್ನಾಬಿ ಗುಲಾಮಾ ಹೊವ್ನ್ ಅಮ್ಚ್ಯಾ ಸರ್ವೆಸ್ಪರಾಚ್ಯಾ ಲೊಕಾಂಚ್ಯಾ ಸಾಟ್ನಿ ನಾಕ್ಡಾ ಫೊಡುನ್ ದಿತಲೆ ಅನಿ ಪಾನಿ ಹಾನುನ್ ದಿತಲೆ ಹೊವ್ನ್ ರಾವ್ಚೆ ಮಟ್ಲ್ಯಾನ್. 24 ತೆನಿ ಜೊಶ್ವಾಕ್, ತುಜ್ಯಾ ಸರ್ವೆಸ್ಪರ್ ದೆವಾನ್ ಅಪ್ನಾಚೊ ಸೆವಕ್ ಮೊಯ್ಜೆಕ್, ತುಮ್ಕಾ ಮಿಯಾ ಹ್ಯೊ ದೆಶ್ ದಿತಾನಾ, ತುಮಿ ಹ್ಯಾ ಸಗ್ಳ್ಯಾ ಲೊಕಾಕ್ನಿ ಜಿವ್ ಕಾಡುಚೆ ಮನುನ್ ಹುಕುಮ್ ದಿಲ್ಲೆ ಆಯ್ಕುನ್, ಅಮ್ಚಿ ಜಿವಾಬಿ ಕಾಡ್ತೆಯ್ ಮನುನ್ ಭಿಂವ್ನ್ ಝುಟೆ ಸಾಂಗ್ಲ್ಯಾಂವ್, 25 ಅಬಕ್, ಅಮಿ ತುಜ್ಯಾ ಹಾತಿತ್ ಹಾಂವ್, ತುಕಾ ಬರೆ ದಿಸ್ತಲ್ಯಾ ಸಾರ್ಕೆ ಅಮ್ಕಾ ಕರ್ ಮಟ್ಲ್ಯಾನಿ. 26 ಜೊಶ್ವಾನ್ ತೆಂಕಾ ಅಪ್ನಿ ಅದ್ದಿ ಸಾಂಗಲ್ಲ್ಯಾ ಸಾರ್ಕೆಚ್ ಕರ್ಲ್ಯಾನ್, ತೆಂಕಾ ಇಜ್ರಾಯೆಲಾಂಚ್ಯಾ ಹಾತಿತ್ ಮ್ಹರ್ತಲ್ಯಾಕ್ನಾ ಚುಕ್ವುನ್, 27 ಸಗ್ಳ್ಯಾ ಲೊಕಾಂಚ್ಯಾ ಸಾಟ್ನಿ ಅನಿ ಸರ್ವೆಸ್ಪರಾನ್ ಅಪ್ನಾಕ್ ಬಲಿಭೆಟ್ವುಕ್ ಎಚುನ್ ಘೆಟಲ್ಲ್ಯಾ ಜಾಗ್ಯಾರ್ ಪಾನಿ ಹಾನುಕ್ ಅನಿ ನಾಕ್ಡಾ ಫೊಡುಕ್ ಮನುನ್ ನೆಮ್ಲ್ಯಾನ್, ತೆನಿ ಆಜ್ ಪತರ್ಬಿ ತೆಚ್ ಕಾಮ್ ಕರ್‍ತಲೆ ಹೊವ್ನ್ ಹಾತ್.