ಜೊಶುವಾ 8

ಆಯಿ ಶಾರ್ ಸ್ವತಾಕ್ ಕರುನ್ ಘೆವ್ನ್ ನಾಶ್ ಕರಲ್ಲೆ

1 ತೆಜ್ಯಾ ಮಾನಾ ಸರ್ವೆಸ್ಪರಾನ್ ಜೊಶ್ವಾಕ್, ಭಿವ್ ನಕ್ಕೊ, ಘಾಬ್ರುನಕ್ಕೊ, ಉಟ್ ಅನಿ ಲಡಾಯಿಕ್ ತಯಾರ್ ಹೊತ್ತ್ಯಾ ಸೈನಿಕಾಕ್ನಿ ಘೆವ್ನ್ ಆಯಿಕ್ತಾತ್ ಜಾ, ಅಬಕ್, ಆಯಿ ಮನ್ತಲ್ಯಾ ಶಾರಾಚೊ ರಾಜಾ, ಲೊಕಾ, ಶಾರ್, ದೆಶ್, ಹೆ ಸಗ್ಳೆ ಮಿಯಾ ತುಜ್ಯಾ ಹಾತಿತ್ ದಿತಾ. 2 ಜೆರಿಕೊ ಅನಿ ತೆಚ್ಯಾ ರಾಜಾಕ್ ಕರಲ್ಲ್ಯಾ ಸಾರ್ಕೆಚ್ ಆಯಿಕ್ತಾತ್ ಅನಿ ತೆಚ್ಯಾ ರಾಜಾಕ್ ಕರ್ ಖರೆ ಥೈತ್ನಾ ಹಾನಲ್ಲಿ ಸಾಮಾನಾ ಅನಿ ಜನಾವರಾ ತುಮ್ಕಾಚ್ ಘೆವಾ, ತುಮ್ಚ್ಯಾತ್ಲಿ ಉಲ್ಲಿ ಲೊಕಾ ತ್ಯಾ ಗಾಂವಾಚ್ಯಾ ಫಾಟಿಕ್ಡೆ ನಿಪುನ್ ರಾಂವ್ದಿತ್, ಮನುನ್ ಸಾಂಗ್ತಾನಾ, 3 ತೊ ಉಟುನ್ ಬರ್ಯಾ ಸೈನಿಕಾತ್ನಿ ತಿಸ್ ಹಾಜಾರ್ ಸೈನಿಕಾಕ್ನಿ ಘೆವ್ನ್ ಆಯಿಕ್ತಾತ್ ಜಾವ್ಕ್ ರಾತ್ತಿನುಚ್ ಧಾಡ್ಲ್ಯಾನ್. 4 ಅನಿ ತೆಂಕಾ ಹುಕುಮ್ ದಿವ್ನ್, ತುಮಿ ಶಾರಾಚ್ಯಾ ಪಾಟಿಕ್ಡೆ ನಿಪುನ್ ರಾವಾ, ಶಾರಾಕ್ನಾ ಲೈ ಧುರ್ ರಾವ್ ನಕಾಶಿ, ಲಡಾಯಿಕ್ ತಯಾರಿತ್ ರಾವಾ, 5 ಮಿಯಾ ಅನಿ ಮಾಜ್ಯಾ ವಾಂಗ್ಡಾ ಹೊತ್ತಿ ಲೊಕಾ ಶಾರಾಚ್ಯಾ ಜಗ್ಗೊಳ್ ಜಾತಾಂವ್ ತೆನಿ ಫಾಟ್ಲ್ಯಾಪಟಿ ಯೆಲ್ಲ್ಯಾ ಸಾರ್ಕೆ ಅಮ್ಚ್ಯೆಕ್ನಾ ಲಡಾಯಿಕ್ ಯೆಲ್ಲೆ ತನ್ನಾ ಅಮಿ ಪಳುನ್ ಜಾತಾಂವ್. 6 ತೆನಿ ತನ್ನಾಚ್ಯಾ ಗತಿನುಚ್ ಅಮ್ಕಾ ಭಿವ್ನ್ ಪಳುನ್ ಜಾತ್ಯಾತ್ ಮನುನ್ ಅಮ್ಚಿ ಫಾಟ್ ಲಾಗ್ತ್ಯಾತ್, ತನ್ನಾ ಅಮಿ ಪಳುನ್ಗೆತುಚ್ ರ್‍ಹಾತಾಂವ್. 7 ಅಮಿ ಅನಿ ತೆನಿ ಶಾರಾಕ್ನಾ ಧುರ್ ಗೆಲ್ಲ್ಯಾ ತನ್ನಾ ನಿಪುನ್ ಬಸಲ್ಲೆ ತುಮಿ ಶಾರ್‍ಹಾತ್ ಗುಸುನ್ ತೆ ಸ್ವತಾಕ್ ಕರುನ್ ಘೆವಾ, ತುಮ್ಚೊ ಸರ್ವೆಸ್ಪರ್ ದೆವ್ ತೆ ತುಮ್ಕಾ ದಿತಾ. 8 ತುಮಿ ಶಾರಾತ್ಲೆ ಸಗ್ಳೆ ಘೆಟಲ್ಲ್ಯಾ ಮಾನಾ ತೆಕಾ ಆಗ್ ಲಾವ್ನ್, ಸರ್ವೆಸ್ಪರಾಚ್ಯಾ ಗೊಸ್ಟಿ ಸಾರ್ಕೆ ಚಲಾ, ಹ್ಯೊಚ್ ಮಾಜೊ ಹುಕುಮ್ ಮನುನ್ ತ್ಯಾಚ್ ರಾತ್ತಿನ್ ತೆಂಕಾ ಧಾಡುನ್ ದಿಲ್ಯಾನ್. 9 ತೆನಿ ನಿಪುನ್ ಬಸುಕ್ ಗೆಲ್ಲಿ ಲೊಕಾ ಜಾವ್ನ್ ಬೆತೆಲಾಚ್ಯಾ ಅನಿ ಆಯಿಚ್ಯಾ ಮದ್ದಿ ದಿಸ್ ಬುಡ್ತಲ್ಯಾ ದಿಕ್ಕಾಕ್ ನಿಪ್ಲ್ಯಾನಿ, ಜೊಶ್ವಾ ದಿಸ್ ಅನಿ ರ್‍ಹಾತ್ ಲೊಕಾಂಚ್ಯಾ ವಾಂಗ್ಡಾ ಹೊತ್ತೊ. 10 ತೊ ಸಕ್ಕಾಳಿ ಉಟುನ್ ಇಜ್ರಾಯೆಲಾಚ್ಯಾ ಜಾನ್ತ್ಯಾಂಚ್ಯಾ ವಾಂಗ್ಡಾ ಸೈನ್ ಗೊಳಾ ಕರುನ್ ಘೆವ್ನ್, ಆಯಿಕ್ತಾತ್ ಜಾವ್ನ್ ತೆಂಚ್ಯಾ ಫಿಡೆ ಲಾಗ್ಲೊ. 11 ತೆಚ್ಯಾ ವಾಂಗ್ಡಾ ಹೊತ್ತಿ ಸಗ್ಳಿ ಸೈನಿಕಾ ಮಡ್ಡಿ ಚಡುನ್ ಶಾರಾಚ್ಯಾ ಮುಖ್ಯಾ ದಡ್ಪ್ಯಾಕ್ಡೆ ಜಗ್ಗೊಳ್ ಯೆವ್ನ್, ಉತ್ತರ್ ದಿಕ್ಕಾಕ್ ಠಿಕಾನೊ ಘಾಟ್ಲ್ಯಾನಿ, ತೆಂಚ್ಯಾ ಅನಿ ಆಯಿಚ್ಯಾ ಮದ್ದಿ ಎಕ್ ಖಡ್ಡೊ ಹೊತ್ತೊ. 12 ಖರೆ ಜೊಶ್ವಾನ್ ಲೈ ಕರುನ್ ಪಾಂಚ್ ಹಾಜಾರ್ ಲೊಕಾಕ್ನಿ ಎಚುನ್ ಘೆವ್ನ್ ಬೆತೆಲಾಕ್ ಅನಿ ಆಯಿಕ್ತಾತ್ ಮದ್ದಿ ಶಾರಾಚ್ಯಾ ದಿಸ್ ಬುಡ್ತಲ್ಯಾ ದಿಕ್ಕಾಕ್, ನಿಪ್ವುನ್ ಥವ್ಲ್ಯಾನ್. 13 ಶಾರಾಚ್ಯಾ ಉತ್ತರ್ ದಿಕ್ಕಾಚ್ಯಾ ಸಗ್ಳ್ಯಾ ಸೈನ್ಯಾಕ್ ಅನಿ ಶಾರಾಚ್ಯಾ ದಿಸ್ ಬುಡ್ತಲ್ಯಾ ದಿಕ್ಕಾಚ್ಯಾ ಸೈನ್ಯಾಕ್ ಸಮಾ ಕರುನ್ ಘೆವ್ನ್, ಜೊಶ್ವಾ ತ್ಯಾ ರ್‍ಹಾತ್ತಿ ಖಡ್ಡ್ಯಾಕ್ಡೆ ಗೆಲೊ. 14 ಆಯಿ ಶಾರಾಚ್ಯಾ ರಾಜಾಕ್ ಸಕ್ಕಾಳಿ ಹೆ ಕಳ್ತಾನಾ, ಲಗ್ಗುನಾ ಸೈನ್ ಗೊಳಾ ಕರುನ್ ಘೆವ್ನ್, ಇಜ್ರಾಯೆಲಾಂಚ್ಯಾ ವಾಂಗ್ಡಾ ಲಡಾಯಿಕ್ ಗೆಲೊ, ತೊ ಅಪ್ನಾಚ್ಯಾ ಲೊಕಾಂಚ್ಯಾ ವಾಂಗ್ಡಾ ಅರಬಾ ಮನ್ತಲೊ ಖಡ್ಡೊ ದಿಸ್ತಲ್ಯಾಕ್ಡೆ ಯೆಲೊ, ಶಾರಾಚ್ಯಾ ವಾಟೆಕ್ಡೆ ಸೈನಿಕಾ ನಿಪುನ್ ಬಸಲ್ಲೆ ತೆಕಾ ಗೊತ್ತ್ ನತ್ತೆ. 15 ಜೊಶ್ವಾ ಅನಿ ತೆಚ್ಯಾ ವಾಂಗ್ಡಾ ಹೊತ್ತಿ ಇಜ್ರಾಯೆಲ್ ಲೊಕಾ ಹಾರಲ್ಯಾಂಚ್ಯಾ ಸಾರ್ಕೆ ಡಂಗ್ಳಿಚ್ಯಾ ವಾಟೆನ್ ಪಳುಕ್ ಲಾಗ್ಲೆ. 16 ಆಯಿ ಮನ್ತಲ್ಯಾ ಶಾರಾಚಿ ಲೊಕಾ ಅನಿ ಗಾಂವಾತ್ ಹೊತ್ತಿ ಸಗ್ಳಿ ಲೊಕಾಬಿ ಜೊಶ್ವಾಕ್ ಫಾಟ್ ಲಾಗುನ್ ಶಾರಾಕ್ನಾ ಧುರ್ ಗೆಲಿ. 17 ಆಯಿ ಅನಿ ಬೆತೆಲಾತ್ಲಿ ಲೊಕಾ ಎಕ್ ಘವ್ಮಾನುಸ್ಬಿ ರಾಯ್ ನಸ್ತಾನಾ, ಗಾಂವಾಚೊ ದಡ್ಪೊ ಉಗ್ಡೊ ಸೊಡುನ್ ಇಜ್ರಾಯೆಲಾಚ್ಯಾ ಲೊಕಾಂಚಿ ಫಾಟ್ ಲಾಗುನ್ ಗೆಲ್ಯಾನಿ. 18 ಸರ್ವೆಸ್ಪರಾನ್ ಜೊಶ್ವಾಕ್, ತುಜ್ಯಾ ಹಾತಿತ್ಲಿ ಬರ್ಚಿ ಆಯಿಕ್ಡೆ ದಾಕ್ವು, ತೆ ಶಾರ್ ಮಿಯಾ ತುಕಾ ದಿಲಾ ಮಟ್ಲ್ಯಾನ್, ಅನಿ ತೆನಿ ತೆ ಬರ್ಚಿ ದಾಕ್ವುಲ್ಯಾನ್. 19 ತೆನಿ ಬರ್ಚಿ ದಾಕ್ವುತಾನಾ, ನಿಪುನ್ ಬಸಲ್ಲ್ಯಾ ಲೊಕಾನಿ ಲಗ್ಗುನಾ ಪಳುನ್ ಜಾವ್ನ್ ಶಾರ್‍ಹಾತ್ ಗುಸುನ್ ತೆಕಾ ಆಗ್ ಲಾವ್ಲ್ಯಾನಿ. 20 ಆಯಿ ಶಾರಾಚ್ಯಾ ಲೊಕಾನಿ ಫಾಟಿ ಬಗ್ತಾನಾ, ಶಾರ್‍ಹಾತ್ನಾ ಡುಕೊಟ್ ಮಳ್ಬಾಕ್ಡೆ ಚಡುಲಾಗಲ್ಲೊ ದಿಸ್ತಾ, ತೆನಿ ಖಲ್ಯಾ ವಾಟೆನ್ಬಿ ಚುಕ್ವುನ್ ಘೆವ್ಕ್ ಹೊವ್ಕ್ ನಾ, ಅನಿ ಡಂಗ್ಳಿಕ್ಡೆ ಪಳುನ್ ಗೆಲ್ಲಿ ಇಜ್ರಾಯೆಲ್ ಲೊಕಾ ಫಾಟ್ ಲಾಗಲ್ಯಾಂಚ್ಯಾಕ್ಡೆ ಪರತ್ಲಿ. 21 ಜೊಶ್ವಾನ್ ಅನಿ ಇಜ್ರಾಯೆಲ್ ಲೊಕಾನಿ ಅಪ್ನಾಚ್ಯಾ ಲೊಕಾನಿ ಶಾರ್ ಸ್ವತಾಕ್ ಕರುನ್ ಘೆವ್ನ್ ಜಾಳ್ವಲ್ಲೆ ಅನಿ ಡುಕೊಟ್ ಮಳ್ಬಾಕ್ಡೆ ಚಡುಲಾಗಲ್ಲೆ ಬಗುನ್, ತೆನಿ ಫಾಟಿ ಪರ್‍ತುನ್ ಆಯಿ ಶಾರಾಚ್ಯಾ ಲೊಕಾಕ್ನಿ ಮಾರುಕ್ ಲಾಗ್ಲ್ಯಾನಿ. 22 ಶಾರ್‍ಹಾತ್ ಗುಸಲ್ಲಿ ಲೊಕಾಬಿ ಯೆಲ್ಲ್ಯಾ ಸಾಟ್ನಿ ಆಯಿ ಶಾರಾಚಿ ಲೊಕಾ ಇಜ್ರಾಯೆಲಾಂಚ್ಯಾ ಮದ್ದಿ ಗಾವ್ನ್ ಪಡ್ಲಿ ತೆನಿ ಸಗ್ಳ್ಯಾಕ್ನಿಬಿ ಮಾರ್ಲ್ಯಾನಿ ಕೊನಿಬಿ ಚುಕ್ವುನ್ ಘೆವ್ಕ್ ಹೊವ್ಕ್ ನಾ ಅನಿ ಎಕ್ಲೊಬಿ ಹುರುಕ್ನಾ. 23 ಖರೆ ಆಯಿ ಶಾರಾಚ್ಯಾ ರಾಜಾಕ್ ಝಿತ್ತೊಚ್ ಧರುನ್ ಜೊಶ್ವಾಕ್ಡೆ ಹಾನ್ಲ್ಯಾನಿ. 24 ಇಜ್ರಾಯೆಲ್ ಲೊಕಾನಿ ವಿರೊಧಿಯಾಕ್ನಿ ಹರ್ ಎಕ್ಲ್ಯಾಕ್ಬಿ ಫಾಟ್ ಲಾಗುನ್ ಡಂಗ್ಳಿಚ್ಯಾ ಮಾಳ್ ಜಾಗ್ಯಾರ್ ಜಿವ್ ಕಾಡ್ಲ್ಯಾನಿ, ಮಾನಾ ತೆನಿ ಆಯಿಕ್ತಾತ್ ಪರ್‍ತುನ್ ಜಾವ್ನ್ ಥೈ ಹೊತ್ತ್ಯಾ ಹರ್ ಎಕ್ಲ್ಯಾಕ್ಬಿ ಜಿವಾನ್ಸಿ ಮಾರ್ಲ್ಯಾನಿ. 25 ತ್ಯಾ ದಿಸಿ ಆಯಿ ಶಾರಾಚಿ ಬಾಯ್ಕಾಮಾನ್ಸಾ ಅನಿ ಘವ್ಮಾನ್ಸಾ ಸಗ್ಳೆ ಬಾರಾ ಹಜಾರ್ ಲೊಕಾ ಮರ್ಲಿ. 26 ಶಾರಾಚ್ಯಾ ಸಗ್ಳ್ಯಾ ಲೊಕಾಕ್ನಿ ಮಾರುನ್ ಹೊಯ್ ಪಾತರ್ಬಿ ಜೊಶ್ವಾನ್ ಬರ್ಚಿ ಧರಲ್ಲೊ ಹಾತ್ ಫಿಡೆ ಕರಲ್ಲೊ ಫಾಟಿ ಕಾಡುಕ್ನಾ. 27 ಸರ್ವೆಸ್ಪರಾನ್ ಜೊಶ್ವಾಕ್ ಹುಕುಮ್ ದಿಲ್ಲ್ಯಾ ಸಾರ್ಕೆ, ಇಜ್ರಾಯೆಲ್ ಲೊಕಾನಿ ಥೈತ್ಲಿ ಜನಾವರಾ ಅನಿ ಉಲ್ಲಿ ಸಾಮಾನಾ ಘೆಟ್ಲ್ಯಾನಿ. 28 ಜೊಶ್ವಾನ್ ಆಯಿ ಮನ್ತಲೆ ಶಾರ್ ಜಾಳ್ವುಲ್ಯಾನ್ ತೆ ಕನ್ನಾಬಿ ಪರ್‍ತುನ್ ಭಾಂದುಕ್ ಹೊಯ್ನಾ ಸಾರ್ಕೆ ಹಾಳ್ ಪಡಲ್ಲೆ ಗಾಂವ್ ಕರ್ಲ್ಯಾನ್, ತೆ ಅಜುನ್ ಬಿ ತಸೆಚ್ ಹಾಯ್. 29 ತ್ಯಾ ಶಾರಾಚ್ಯಾ ರಾಜಾಕ್ ಸಾಂಜ್ ಪಾತರ್ಬಿ ಝಾಡಾಕ್ ಲೊಂಬಾತ್ ಘಾಲುನ್, ದಿಸ್ ಬುಡ್ತಲ್ಯಾ ಎಳಾರ್ ತೆಚೆ ಮಡೆ ಖಾಲ್ತಿ ಉತ್ರುನ್ ತೆ ಗಾಂವಾಚ್ಯಾ ದಡ್ಪ್ಯಾತ್ ಥವ್ನ್ ತೆಜ್ಯಾ ವರ್‍ತಿ ಗುಂಡ್ಯಾಂಚೊ ಗುಂಪೊ ಕರಸ್ಲ್ಯಾನ್, ತೆ ಅಜುನ್ ಪತರ್ಬಿ ತಸೆಚ್ ಹಾಯ್.

ಎಬಾಲ್ ಮಡ್ಡಿವರ್‍ತಿ ಕರಾರಾ ವಾಚಲ್ಲೆ

30 ತನ್ನಾ ಜೊಶ್ವಾನ್ ಇಜ್ರಾಯೆಲಾಂಚ್ಯಾ ಸರ್ವೆಸ್ಪರ್ ದೆವಾಕ್ ಎಬಾಲ್ ಮಡ್ಡಿ ವರ್‍ತಿ ಎಕ್ ಬಲಿ ಭೆಟ್ವುತಲೊ ಕಟ್ಟೊ ಭಾಂಧ್ಲ್ಯಾನ್. 31 ಸರ್ವೆಸ್ಪರಾಚೊ ಸೆವಕ್ ಮೊಯ್ಜೆನ್ ಲೊಕಾಕ್ನಿ ಹುಕುಮ್ ದಿವ್ನ್ ಸಾಂಗಲ್ಲ್ಯಾ ಸಾರ್ಕೆ ಲೊಂಗಾಟ್ ಲಾವ್ಕ್ ನಸಲ್ಲೆ ಗುಂಡೆ ಘೆವ್ನ್ ಬಲಿಭೆಟ್ವುತಲೊ ಕಟ್ಟೊ ಭಾಂದುನ್ ತೆಚ್ಯಾ ವರ್‍ತಿ ಲೊಕಾನಿ ಸರ್ವೆಸ್ಪರಾಕ್ ಸಗ್ಳೆ ಆಂಗ್ ಬಲಿ ಅನಿ ಸಮಾಧಾನಾಚಿ ಬಲಿಯಾ ಭೆಟ್ವುಲ್ಯಾನಿ. 32 ಜೊಶ್ವಾನ್ ಥೈತ್ಲ್ಯಾ ಗುಂಡ್ಯಾಂಚ್ಯಾ ವರ್‍ತಿ ಸಗ್ಳ್ಯಾಲೊಕಾಂಚ್ಯಾ ಇದ್ರಾಕ್, ಮೊಯ್ಜೆಚ್ಯಾ ಕರಾರಾಂಚೊ ಎಕ್ ಭಾಗ್ ಲಿವ್ಲ್ಯಾನ್. 33 ಸಗ್ಳಿ ಇಜ್ರಾಯೆಲ್ ಲೊಕಾ ಜಾಂನ್ತೆ, ಅಧಿಕಾರಿಯಾ, ನ್ಯಾಯಾಧಿಪತಿಯಾ, ದುಸ್ರ್ಯಾ ದೆಶಾಚೆ, ಸ್ವತ್ಯಾಚ್ಯಾ ದೆಶಾಚೆ, ಹೆನಿ ಸಗ್ಳ್ಯಾನಿ, ಸರ್ವೆಸ್ಪರಾಚಿ ಕರಾರಾಚಿ ಪೆಟ್ ವಾವುನ್ ಹಾನಲ್ಲ್ಯಾ ಲೆವಿಯಾಂಚ್ಯಾ ಯಾಜಕಾಂಚ್ಯಾ ಇದ್ರಾಕ್ ಕರಾರಾಚ್ಯಾ ಪೆಟಿಚ್ಯಾ ಉಜ್ವ್ಯಾಕ್ ಅನಿ ಡಾವ್ಯಾ ಭಾಜುಕ್ ಇಬೆರಾಲ್ಯಾನಿ, ಮೊಯ್ಜೆನ್ ಅದ್ದಿಚ್ ಸಾಂಗಲ್ಲ್ಯಾ ಸಾರ್ಕೆ ಆಶಿರ್ವಾದಾಚಿ ಗೊಸ್ಟಿಯಾ ಸಾಂಗುಕ್ ಉಲ್ಲಿ ಲೊಕಾ ಗೆರಿಜ್ಜಿಮ್ ಮಡ್ಡಿಕ್ಡೆ ಫಾಟ್ ಕರುನ್ ಅನಿ ಅರ್ದಿ ಲೊಕಾ ಎಬಾಲ್ ಮಡ್ಡಿಕ್ಡೆ ಫಾಟ್ ಕರುನ್ ಇಬೆ ರ್‍ಹಾಲೆ. 34 ತೆಚ್ಯಾ ಮಾನಾ ಜೊಶ್ವಾನ್ ಕರಾರಾಚಿ ಸಗ್ಳಿ ಆಶಿರ್ವಾದಾ ಅನಿ ಶರಾಪಾಂಚಿ ಗೊಸ್ಟಿಯಾ ಪುಸ್ತಕಾತ್ ಕಸೆ ಹಾಯ್ ತಸೆಚ್ ವಾಚ್ಲ್ಯಾನ್. 35 ಜೊಶ್ವಾನ್ ಮೊಯ್ಜೆನ್ ಹುಕುಮ್ ದಿಲ್ಲ್ಯಾತ್ಲೆ ಎಕ್ಬಿ ಸೊಡಿನಸ್ತಾನಾ, ಬಾಯ್ಕಾ ಮನ್ನ್ಸಾಕ್ನಿಬಿ, ಬಾರಿಕ್ಲ್ಯಾಕ್ನಿಬಿ ಅನಿ ತ್ಯೆಂಚಾತ್ಲ್ಯಾ ದುಸ್ರ್ಯಾ ದೆಸಾತ್ಲ್ಯಾಕ್ನಿಬಿ ಆಯ್ಕಿ ಸಾರ್ಕೆ, ಇಜ್ರಾಯೆಲಾಚ್ಯಾ ಲೊಕಾಂಚ್ಯಾ ತಾಂಡ್ಯಾಚ್ಯಾ ಇದ್ರಾಕ್ ವಾಚ್ಲ್ಯಾನ್.