1 ಜೊಶ್ವಾ ಲೈ ಮ್ಹಾತಾರೊ ಹೊಲ್ಲ್ಯಾ ತನ್ನಾ ಸರ್ವೆಸ್ಪರಾನ್ ತೆಕಾ, ಅತ್ತಾ ತಿಯಾ ಮ್ಹಾತಾರೊ ಹೊಲೈ, ಸ್ವತಾಕ್ ಕರುನ್ ಘೆವ್ಕ್ ಹೊಲ್ಲಿ ದೆಶಾ ಅಜುನ್ಬಿ ಹಾತ್, 2 ತಿ ದೆಶ್ಯಾ ಖಲಿ ಮಟ್ಲ್ಯಾರ್, ಇಜಿಪ್ತಾಚ್ಯಾ ಹಿಕುಲ್ಲ್ಯಾ ಶಿಹೊರ್ ನ್ಹಯಿಕ್ನಾ, ಕಾನಾನ್ ಗಾರಾಂಚ್ಯಾ ಜಾಗ್ಯಾಚಿ ಉತ್ತರ್ ದಿಕ್ಕಾಚಿ ಘಡಿ, ಎಕ್ರೊನಿ ಪತರ್. 3 ಗಾಜಾ, ಅಶ್ಡೊತ್, ಅಶ್ಕೆಲೊನ್, ಗತುರ್, ಎಕ್ರೊನ್ ಮನ್ತಲ್ಯಾ ಶಾರಾಂಚ್ಯಾ ಪಾಂಚ್ ಪಿಲಿಸ್ಟಿಯಾಂಚ್ಯಾ ಹಾತಿತ್ ಹೊತ್ತೆ ಪಿಲಿಸ್ಟಿಯಾಂಚೆ ಪ್ರಾಂತ್ಯಾ, 4 ಗೆಶುರ್ಯಾಂಚೆ ಸಿಮೆ, ದಕ್ಷಿನ್ ದಿಕ್ಕಾಚೊ ಹಿವ್ವಿಯಾಂಚೊ ದೆಶ್, ಚಿದೊನ್ಯಾಂಚ್ಯಾ ಮೆಯರಾಕ್ನಾ, ಅಮೊರಿತಾಂಚಿ ಘಡಿ ಅಫೆಕ್ ಪತರ್ಲೆ ಕಾನಾನಾಂಚೆ ದೆಶ್, 5 ಅನಿ ಗೆಬಾಲಾಂಚೆ ಸಿಮೆ, ಹೆರ್ಮೊನ್ ಮಡ್ಡಿಚ್ಯಾ ಮಾಳಾಚ್ಯಾ ಬಾಲ್ಗಾದಿಕ್ನಾ ಹಾಮಾತಿಚ್ಯಾ ವಾಟೆಪತರ್ ಹೊತ್ತ್ಯಾ ಲೆಬೊನಾಚೊ ದಿಸ್ ಉಗಾವ್ತಲ್ಯಾ ದಿಕ್ಕಾಚೊ ಜಾಗೊ, 6 ಒಟ್ಟು ಲೆಬೊನಿಕ್ನಾ ಮಿಸ್ರೆಪೊತ್ಮಯಿ ಪತರ್ ಹೊತ್ತೆ ಚಿದೊನಾಂಚಿ ಸಗ್ಳಿ ಮಡ್ಡಿಯಾಂಚಿ ಪ್ರಾಂತ್ಯಾ ಹಾತ್, ಹ್ಯಾ ಲೊಕಾಕ್ನಿ ಮಿಯಾಚ್ ಇಜ್ರಾಯೆಲ್ ಲೊಕಾಂಚ್ಯಾ ಇದ್ರಾಕ್ನಾ ಪಳ್ಸುತಾ, ಮಿಯಾ ಅದ್ದಿಚ್ ಹುಕುಮ್ ದಿಲ್ಲ್ಯಾ ಸಾರ್ಕೆ, ತಿಯಾ ಇಜ್ರಾಯೆಲ್‌ಕಾರಾಕ್ನಿ ದೆಶ್ ವಾಟುನ್ ದಿತಾನಾ, 7 ಹೆ ಸಗ್ಳೆಬಿ ಮಿಳುನ್ ದೆಶ್ ನ್ಹವ್ವ್ ಘರಾನಾಕ್ನಿ ಅನಿ ಮನಸ್ಸೆಚ್ಯಾ ಘರಾನಾಚ್ಯಾ ಅರ್ದ್ಯಾ ಲೊಕಾಕ್ನಿ ವಾಟುನ್ ದಿ ಮಟ್ಲ್ಯಾನ್.

8 ಮನಸ್ಸೆಚ್ಯಾ ಘರಾನಾಚ್ಯಾ ಹುರಲ್ಲ್ಯಾ ಅರ್ದ್ಯಾ ಲೊಕಾಕ್ನಿ, ರುಬೆನ್ಯಾಕ್ನಿ ಅನಿ ಗಾದಾಕ್ನಿ ಮೊಯ್ಜೆಕ್ನಾ ಜೊರ್ದಾನ್ ನ್ಹಯಿಚ್ಯಾ ತಿಕ್ಡಿನುಚ್ ಜಾಗೊ ಗಾವ್ಲೊ, ಸರ್ವೆಸ್ಪರಾಚೊ ಸೆವಕ್ ಮೊಯ್ಜೆನ್ ತೆಂಕಾ ದಿಲ್ಲೆ ಪ್ರಾಂತ್ಯಾ ಖಲೆ ಮಟ್ಲ್ಯಾರ್, 9 ಅರ್ನೊನ್ ಖಡ್ಡ್ಯಾಚ್ಯಾ ಮುಲ್ಲ್ಯಾಚೆ ಅರೊಯೆರ್ ಶಾರ್, ಅನಿ ಖಡ್ಡ್ಯಾತುಚ್ ಹೊತ್ತ್ಯಾ ಶಾರಾಕ್ನಾ ದಿಬೊನಾಚ್ಯಾ ಪತರ್ ಪಗ್ಳುನ್ ಹೊತ್ತೊ ಮೆದೆಬಾಚೊ ಸಮಾ ಜಾಗೊ, 10 ಹೆ ಸಗ್ಳೆ ಹೆಶ್ಪೊನಿತ್ ರಾಜ್ವಡ್ಕಿ ಕರ್‍ತಲ್ಯಾ ಅಮೊರಿತಾಂಚೊ ರಾಜಾ ಸಿಹೊನಾಚ್ಯಾ ತಾಬೆತ್ ಹೊತ್ತೆ, ಅಮ್ಮೊನಿಯಾಂಚಿ ಘಡಿಚ್ಯಾ ಹಿಕ್ಡಿನ್ ಹೊತ್ತಿ ಸಗ್ಳಿ ಶಾರಾ. 11 ಗಿಲ್ಯಾದ್ ಸಿಮೆ, ಗೆಶುರ್ಯಾಂಚಿ ಅನಿ ಮಾಕತಿಯಾಂಚಿ ಪ್ರಾಂತ್ಯಾ, ಹೆರ್ಮೊನ್ ಮಡ್ಡಿಚ್ಯಾ ವೈಲೆ ಸಗ್ಳೆ ಜಾಗೆ, ಸಲ್ಕಾ ಶಾರಾ ಪತರ್ಬಿ ಪಗ್ಳುನ್ ಹೊತ್ತ್ಯಾ ಬಾಶಾನಿಚಿ ಸಗ್ಳಿ ಪ್ರಾಂತ್ಯಾ ಹಿಚ್, 12 ಅಶ್ಟರೊತ್, ಎದ್ರೈ ಮನ್ತಲ್ಯಾ ಗಾಂವಾತ್ನಿ ರಾಜ್ವಡ್ಕಿ ಕರಿತ್ ಹೊತ್ತೊ, ಹ್ಯೊ ಒಗ್ ರೆಫಾಯಾಂಚ್ಯಾ ಪಿಳ್ಗಿಚೊ ಎಕ್ಲೊಚ್ ಹೊತ್ತೊ ರಾಜಾ. ಹೆಕಾ ಮೊಯ್ಜೆನ್ ಮಾರುನ್ ಪಳ್ಸುನ್ ತೆಂಚಿ ದೆಶಾ ಅಪ್ನಾಚಿ ಕರುನ್ಗೆಟಲ್ಯಾನ್. 13 ಇಜ್ರಾಯೆಲಾನಿ ಗೆರ್ಶುಯಾಕ್ನಿ ಅನಿ ಮಾಕತಿಯಾಕ್ನಿ ದೆಸಾತ್ನಾ ಪಳ್ಸುಕ್ ನಾತ್, ತಸೆ ಹೊವ್ನ್ ತೆನಿ ಅಜುನ್ಬಿ ಇಜ್ರಾಯೆಲಾಂಚ್ಯಾ ಮದ್ದಿಚ್ ವಸ್ತಿ ಕರ್‍ತಾತ್. 14 ಲೆವಿ ಘರಾನಾಚ್ಯಾಕ್ನಿ ವಾಟೊ ಗಾವ್ಕ್ ನಾ, ಇಜ್ರಾಯೆಲಾಂಚ್ಯಾ ಸರ್ವೆಸ್ಪರ್ ದೆವಾನ್ ಹುಕುಮ್ ದಿಲ್ಲ್ಯಾ ಸಾರ್ಕೆ ತೆಚಿ ಕರಾರಾಚಿ ಪೆಟಿಚ್ ತೆಂಕಾ ಆಸ್ತಿ.

15 ಮೊಯ್ಜೆನ್ ರುಬೆನ್ಯಾಂಚ್ಯಾ ಗೊತ್ರಾಕ್ನಿ ದಿಲ್ಲೊ ಜಾಗೊ ಖಲೊ ಮಟ್ಲ್ಯಾರ್, 16 ಅರ್ನೊನ್ ಖಡ್ಡ್ಯಾಚ್ಯಾ ಮುಲ್ಲ್ಯಾತ್ಲೆ ಅರೊಯೆರಾಕ್ನಾ ಹೆ ಸಗ್ಳೆ ಅನಿ ಮೆದೆಬಾಚ್ಯಾ ಸಮಾಜಾಗ್ಯಾಚೆ ಹೆಶ್ಬೊನ್ ಶಾರ್ ಅನಿ ತ್ಯಾ ಖಡ್ಡ್ಯಾಚ್ಯಾ ಮದ್ಲೆ ಶಾರ್. 17 ಹೆ ಸಗ್ಳೆ ಅನಿ ಉಪ್ಪರ್ಲ್ಯಾ ಮಾಳ್ ಜಾಗ್ಯಾ ವೈಲೆ ದಿಬೊನ್, ಬಾಮೊತ್ಬಾಳ್, ಬೆತ್ಬಾಳ್ಮೆಯೊನ್, 18 ಯಹಚ್ಯಾ, ಕೆದೆಮೊತ್, ಮೆಫಾಯಾತ್, 19 ಕಿರ್ಯಾತಯಿಮ್, ಸಿಬ್ಮಾ ಮನ್ತಲಿ ಹೆಶ್ಬೊನಿಚಿ ಉಪ್ ಗಾಂವಾ, ಖಡ್ಡ್ಯಾತ್ ಹೊತ್ತ್ಯಾ ಮಡ್ಡಿ ವೈಲೆ ಚೆರೆತ್ ಶಾರ್, 20 ಬೆತ್ಪಗೊರ್ ಮನ್ತಲಿ ಶಾರಾ, ಪಿಸ್ಗಾಚ್ಯಾ ಮಾಳಾತ್ಲೆ ಸಿಮೆ, ಬೆತ್ ಯೆಶಿಮೊತ್ ಶಾರ್, 21 ಒಟ್ಟು ಮಿಶೊರ್ ಮನ್ತಲ್ಯಾ ಉಪ್ಪರ್ಲ್ಯಾ ಮಾಳ್ ಜಾಗ್ಯಾ ವೈಲಿ ಸಗ್ಳಿ ಶಾರಾ, ಅನಿ ಹೆಶ್ಬೊನಿತ್ ರಾಜ್ವಡ್ಕಿ ಕರ್ತಲೊ ಅಮೊರಿತಾಂಚೊ ರಾಜಾ ಸಿಹೊನಾಚೊ ಸಗ್ಳೊ ರಾಜ್ಜ್ಯ್, ಮೊಯ್ಜೆನ್ ತ್ಯಾ ದೆಸಾತ್ ವಸ್ತಿ ರ್‍ಹಾತಲ್ಯಾ ಸಿಹೊನ್, ಎವಿ, ರೆಕೆಮ್, ಚುರ್, ಹುರ್ ಅನಿ ರೆಬಾ ಹ್ಯಾ ಸಗ್ಳ್ಯಾ ಮಿದ್ಯಾನ್ ಧನಿಯಾಂಚ್ಯಾ ರಾಜಾಕ್ನಿ ನಾಶ್ ಕರ್ಲ್ಯಾನ್. 22 ಇಜ್ರಾಯೆಲಾನಿ ಕೊಯ್ತ್ಯಾನ್ ಮಾರಲ್ಯಾತ್ನಿ ಬೆಯೊರಾಚೊ ಲೆಕ್ ಸಪ್ನಾ ಬಗ್ನಾರೊ ಬಿಳಾಮಾಬಿ ಹೊತ್ತೊ. 23 ಜೊರ್ದಾನ್ ನ್ಹಯ್ ರುಬೆನ್ಯಾಂಚಿ ದಿಸ್ ಬುಡ್ತಲ್ಯಾ ದಿಕ್ಕಾಚಿ ಘಡಿ ಹೊವ್ನ್ ಹೊತ್ತಿ, ರುಬೆನ್ ಘರಾನಾಚ್ಯಾ ಗೊತ್ರಾಕ್ನಿ ವಾಟ್ಯಾಕ್ ಗಾವಲ್ಲಿ ಗಾಂವಾ ಹಿಚ್.

24 ಮೊಯ್ಜೆನ್ ಗಾದ್ ಘರಾನಾಚ್ಯಾ ಗೊತ್ರಾಕ್ನಿ ವಾಟ್ಯಾಕ್ ದಿಲ್ಲೆ ಜಾಗೆ ಖಲೆ ಮಟ್ಲ್ಯಾರ್, 25 ಹೆಶ್ಬೊನಿಚೊ ರಾಜಾ ಸಿಹೊನಾಚ್ಯಾ ರಾಜಾಚಿ ಹುರಲ್ಲಿ ಭಾಗಾ, ಯೆಗ್ಜೆರ್ ಅನಿ ಹುರಲ್ಲಿ ಗಿಲ್ಯಾದಾಚಿ ಸಗ್ಳಿ ಶಾರಾ, ರಬ್ಬಾ ಗಾಂವಾಚ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾಚೆ ಅರೊಯೆರ್ ಶಾರಾಪತರ್ ಪಗ್ಳುನ್ ಹೊತ್ತ್ಯಾ ಅಮ್ಮೊನಿಯಾಂಚೊ ಅರ್ದೊ ರಾಜ್ಜ್ಯ್. 26 ಹೆಶ್ಬೊನಿಕ್ನಾ ರಾಮತ್ ಮಿಚ್ಪೆ, ಬೆಟೊನಿಮ್ ಮನ್ತಲ್ಯಾ ಗಾಂವಾಚ್ಯಾ ಪತರ್ಬಿ ಹೊತ್ತೆ ಜಾಗೆ, ಮಹನಯಿಮಾಕ್ನಾ ದೆಬಿರ್ ಪ್ರಾಂತ್ಯಾ ಪತರ್ ಹೊತ್ತೆ ಸಿಮೆ. 27 ಜೊರ್ದಾನ್ ಖಡ್ಡ್ಯಾತ್ಲೆ ಬೆತ್ ಹಾರಾಮ್, ಬೆತ್ ನಿಮ್ರಾ, ಸುಕ್ಕೊತ್, ಚಾಪೊನ್ ಮನ್ತಲಿ ಶಾರಾ, ಕಿನ್ನೆರೊತ್ ಸಮುಂದರಾಚ್ಯಾ ದಕ್ಷಿನ್ ದಿಕ್ಕಾಚ್ಯಾ ಮುಲ್ಲ್ಯಾ ಪತರ್ ಪಗ್ಳುನ್ ಹೊತ್ತ್ಯಾ ಜೊರ್ದಾನ್ ನ್ಹಯಿಚಿ ದಿಸ್ ಉಗಾವ್ತಲ್ಯಾ ದಿಕ್ಕಾಚಿ ಘಡಿ. 28 ಹಿ ಸಗ್ಳಿ ಗಾಂವಾ ಅನಿ ಶಾರಾ ಗಾದ್ ಘರಾನಾಂಚಿ ಆಸ್ತಿ ಹೊಲ್ಲೊ ಜಾಗೊ.

29 ಮಹನಯಿಮಿಚ್ಯಾ ಉತ್ತರ್ ದಿಕ್ಕಾಕ್ನಾ ಪೈಲೆ ಭಾಶಾನಿಚೊ ರಾಜಾ ಒಗಾಚೊ ರಾಜ್ಜ್ಯ್ ಸಗ್ಳಿ ಭಾಶಾನ್ ಸಿಮೆ, 30 ಮೊಯ್ಜೆನ್ ಮನಸ್ಸೆ ಘರಾನಾಚ್ಯಾ ಅರ್ದ್ಯಾ ಗೊತ್ರಾಕ್ನಿ ದಿಲ್ಯಾನ್. ಯಾಯಿರಾಚಿ ಗಾಂವಾ ಮನ್ವುನ್ ಘೆತಲಿ ಸಾಟ್ ಶಾರಾಬಿ ಹ್ಯಾತುರುಚ್ ಹಾತ್. 31 ಗಿಲ್ಯಾದಿಚೊ ಅರ್ದೊ ಭಾಗ್ ಅನಿ ಒಗಾಚಿ ರಾಜಧಾನಿ ಬಾಶಾನಿಚೆ ಅಶ್ಟರೊತ್, ಎದ್ರೈ ಮನ್ತಲಿ ಶಾರಾ, ಮನಸ್ಸೆಚೊ ಲೆಕ್ ಮಾಕಿರಾಚ್ಯಾ ಗೊತ್ರಾಚ್ಯಾ ಅರ್ದ್ಯಾ ಲೊಕಾಕ್ನಿ ಗಾವ್ಲೆ. 32 ಹೆನಿ ಜೊರ್ದಾನ್ ನ್ಹಯಿಚ್ಯಾ ತಿಕ್ಡಿನ್ ಜೆರಿಕೊಚ್ಯಾ ಇದ್ರಾಕ್ ಹೊತ್ತ್ಯಾ ಮೊವಾಬ್ಯಾಂಚ್ಯಾ ಮಾಳ್ ಜಾಗ್ಯಾರ್ ರ್‍ಹಾತಾನಾ, ಮೊಯ್ಜೆನ್ ತೆಂಕಾ ದಿಲ್ಲ್ಯಾನ್. 33 ಖರೆ ಲೆವಿಚ್ಯಾ ಘರಾನಾಕ್ನಿ ಮೊಯ್ಜೆನ್ ವಾಟೊ ದಿವ್ಕ್ ನಾ, ಇಜ್ರಾಯೆಲಾಂಚ್ಯಾ ಸರ್ವೆಸ್ಪರಾಚ್ಯಾ ಗೊಸ್ಟಿಚ್ಯಾ ಸಾರ್ಕೆ ತೊಚ್ ತೆಂಚೊ ವಾಟೊ ಹೊವ್ನ್ ಹಾಯ್.