1 ದುಸ್ರೆದಿಸಿ ಸಕ್ಕಾಳಿ ಜೊಶ್ವಾ ಅನಿ ಸಗ್ಳಿ ಇಜ್ರಾಯೆಲಾಚಿ ಲೊಕಾ ಲಗ್ಗುನಾ ಉಟುನ್, ಶಿಟ್ಟಿಮ್ ಸೊಡುನ್ ಜೊರ್ದಾನಾಕ್ ಗೆಲ್ಯಾನಿ, ಅನಿ ಉಲ್ಲೆ ಫಿಡೆ ಜಾವ್ನ್ ಥೈ ರಾಲ್ಯಾನಿ. 2 ತಿನ್ ದಿಸಾ ಹೊಲ್ಲ್ಯಾ ಮಾನಾ ಲೊಕಾಂಚಿ ಮುಖಂಡಾ ತ್ಯಾ ಜಾಗ್ಯಾರ್ ಜಾವ್ನ್, 3 ಲೊಕಾಕ್ನಿ, ಯಾಜಕಾ ಲೆವಿನಿ ತುಮ್ಚ್ಯಾ ಸರ್ವೆಸ್ಪರ್ ದೆವಾಚಿ ಕರಾರಾಚಿ ಪೆಟಿ ಘೆವ್ನ್ ಜಾತಲೆ ದಿಸಲ್ಲೆ ತನ್ನಾ ತುಮ್ಚೊ ಜಾಗೊ ಸೊಡುನ್ ತೆಚ್ಯಾ ಫಾಟ್ನಾ ಜಾವಾ ಮಟ್ಲ್ಯಾನಿ. 4 ಖರೆ ತುಮ್ಚ್ಯಾ ಅನಿ ಕರಾರಾಚ್ಯಾ ಪೆಟಿಚ್ಯಾ ಮದ್ದಿ ಎಕ್ ಕಿಲೊ ಮಿಟರ್ ಧುರ್ ರಾವ್ಚೆ, ಜಗ್ಗೊಳ್ ಜಾವ್ ನಕಾಸಿ, ಅಸೆ ತುಮಿ ಜಾವ್ಚಿ ಹೊಲ್ಲಿ ವಾಟ್ ತುಮ್ಕಾ ಕಳ್ತಾ, ತುಮಿ ಹೆಜ್ಯಾನ್ ಅದ್ದಿ ತ್ಯಾ ವಾಟೆನ್ ಜಾವ್ಕ್ ನತ್ತ್ಯಾಶಿ ನ್ಹಯ್ ಮಟ್ಲ್ಯಾನ್. 5 ಜೊಶ್ವಾನ್ ಲೊಕಾಕ್ನಿ ತುಮ್ಕಾ ನಿತಳ್ ಕರುನ್ ಘೆವಾ, ಕಶ್ಯಾಕ್ ಮಟ್ಲ್ಯಾರ್, ಉದ್ದ್ಯಾ ಸರ್ವೆಸ್ಪರ್ ತುಮ್ಚ್ಯಾ ಮದ್ದಿ ಆಜಾಪ್ ಕರ್ನಾರ್ ಹಾಯ್ ಮಟ್ಲ್ಯಾನ್. 6 ತನ್ನಾ ತೆನಿ ಯಾಜಕಾಕ್ನಿ, ಕರಾರಾಚಿ ಪೆಟಿ ಘೆವ್ನ್ ಲೊಕಾಂಚ್ಯಾ ಫಿಡೆ ಜಾವ್ನ್ ಜೊರ್ದಾನ್ ನ್ಹಯ್ ದಾಟಾ ಮನುನ್ ಹುಕುಮ್ ದಿಲ್ಯಾನ್. 7 ತನ್ನಾ ಸರ್ವೆಸ್ಪರಾನ್ ಜೊಶ್ವಾಕ್, "ಮಿಯಾ ಆಜ್ ತುಕಾ ಇಜ್ರಾಯೆಲಾಂಚ್ಯಾ ಇದ್ರಾಕ್ ಮಾನ್ ದಿತಾ, ಮಿಯಾ ಮೊಯ್ಜೆಚ್ಯಾ ವಾಂಗ್ಡಾ ಹೊತ್ತ್ಯಾ ಸಾರ್ಕೆಚ್ ತುಜ್ಯಾ ವಾಂಗ್ಡಾಬಿ ರ್‍ಹಾತಾ ಮನ್ತಲೆ ತೆಂಕಾ ಗೊತ್ತ್ ಕಳ್ತಾ. 8 ಕರಾರಾಚಿ ಪೆಟಿ ವಾವುನ್ ಘೆಟಲ್ಲ್ಯಾ ಯಾಜಕಾಕ್ನಿ ಜೊರ್ದಾನ್ ನ್ಹಯಿಚ್ಯಾ ದಂಡೆಕ್ ಪಾವಲ್ಲ್ಯಾ ತನ್ನಾ ಥೈಚ್ ಇಬೆ ರಾವ್ಕ್ ಹುಕುಮ್ ದಿ" ಮಟ್ಲ್ಯಾನ್. 9 ತನ್ನಾ ಜೊಶ್ವಾನ್ ಇಜ್ರಾಯೆಲ್ ಲೊಕಾಕ್ನಿ, ಹಿತ್ತೆ ಯೆವ್ನ್ ಸರ್ವೆಸ್ಪರ್ ದೆವಾನ್ ಕಾಯ್ ಸಾಂಗ್ಲಾ ಮನ್ತಲೆ ಆಯ್ಕಾ, ಮನುನ್, 10 ಉಜ್ವೊಡ್ ದಿತಲೊ ಸರ್ವೆಸ್ಪರ್ ತುಮ್ಚ್ಯಾ ಮದ್ದಿ ಹಾಯ್ ಅನಿ ತೊ ಕಾನಾನ್, ಹಿತ್ತಿಯಾ, ಹಿವ್ವಿಯಾ, ಪೆರಿಜಿಯಾ, ಗಿರ್ಗಾಶಿಯಾ, ಅಮೊರಿತಾ, ಅನಿ ಜೆಬುಶಿಯಾ ಹೆಂಕಾ ಸಗ್ಳ್ಯಾಕ್ನಿ ತುಮ್ಚ್ಯಾ ಇದ್ರಾಕ್ನಾ ಪಳ್ಸುನ್ ಘಾಲುಕ್ ಚುಕಿನಾ ಅನಿ, 11 ತೆ ತುಮ್ಕಾ ಕಳ್ತಲೆ ಕಸೆ ಮಟ್ಲ್ಯಾರ್, ಸಗ್ಳ್ಯಾ ಜಗಾಚ್ಯಾ ವಡಿಲಾಚಿ ಕರಾರಾಚಿ ಪೆಟಿ ತುಮ್ಚ್ಯಾನ್ ಫಿಡೆ ಜಾವ್ನ್ ಜೊರ್ದಾನ್ ನ್ಹಯಿತ್ ಉತರ್ತಾನಾ, 12 ತುಮಿ ಇಜ್ರಾಯೆಲ್ ಘರಾನಾತ್ನಾ ಘರಾನಾಕ್ ಎಕ್ಲ್ಯಾ ಸಾರ್ಕೆ ಬಾರಾ ಲೊಕಾಕ್ನಿ ಎಚುನ್ ಘೆವಾ. 13 ಸಗ್ಳ್ಯಾ ಜಗಾಚೊ ವಡಿಲ್ ಸರ್ವೆಸ್ಪರಾಚಿ ಕರಾರಾಚಿ ಪೆಟಿ ವಾವುನ್ ಘೆಟಲ್ಲ್ಯಾ ಯಾಜಕಾನಿ ಅಪ್ನಾಚಿ ಪಾಂಯಾ ಜೊರ್ದಾನ್ ನ್ಹಯಿತ್ ಥವ್ತಾನಾ, ವೈನಾ ಹೊಂವ್ತಲೆ ಪಾನಿ ಹೊಂವಿ ನಸ್ತಾನಾ ಗೊಳಾ ಹೊವ್ನ್ ಥೈಚ್ ಇಬೆರ್‍ಹಾಲೆ, ಮನುನ್ ಸಾಂಗ್ಲ್ಯಾನ್. 14 ಲೊಕಾನಿ ಜೊರ್ದಾನ್ ನ್ಹಯ್ ದಾಟುಸಾಟ್ನಿ ಅಪ್ನಾಚಿ ಬಿಡಾರಾ ಉಕ್ಲುನ್ ಘೆವ್ನ್ ಜಾವ್ಕ್ ಲಾಗ್ಲ್ಯಾನಿ, ಕರಾರಾಚಿ ಪೆಟಿ ವಾವುನ್ ಘೆಟಲ್ಲಿ ಯಾಜಕಾ ತೆಂಚ್ಯಾನ್ ಫಿಡೆ ಜಾವ್ಕ್ ಲಾಗಲ್ಲ್ಯಾನಿ. 15 ಕರಾರಾಚಿ ಪೆಟಿ ವಾವುನ್ ಘೆಟಲ್ಲ್ಯಾ ಯಾಜಕಾನಿ ಜೊರ್ದಾನ್ ನ್ಹಯಿಕ್ ಯೆವ್ನ್ ಅಪ್ನಾಚಿ ಪಾಂಯಾ ಬುಡ್ವುತಾನಾ, ಕಾತ್ರನಿಚ್ಯಾ ಎಳಾರ್ ಫುರಾ ದಂಡೆಕ್ ಲಾಗುನ್ ಹೊಂವ್ತಲಿ ನ್ಹಯ್ ಇಬೆರಾಲಿ. 16 ವೈಲ್ಯಾ ಭಾಜುಕ್ನಾ ಹೊಂವ್ತಲೆ ಪಾನಿ ಲೈ ಧುರ್ ಹೊತ್ತ್ಯಾ ಚಾರೆತಾನಿಚ್ಯಾ ಜಗ್ಗೊಳ್ ಆದಾಮ್ ಗಾಂವಾ ಪಾತರ್ ಗೊಳಾ ಹೊವ್ನ್ ಇಬೆರ್‍ಹಾಲೆ, ಖಾಲ್ತಿ ಹೊತ್ತೆ ಪಾನಿ ಅರಬಾ ಖಡ್ಡ್ಯಾತ್ಲ್ಯಾ ಲವನ್ ಸಮುಂದರಾಕ್ ಹೊಂವ್ನ್ ಗೆಲೆ, ಅನಿ ಲೊಕಾನಿ ಜೆರಿಕೊಚ್ಯಾ ಇದ್ರಾಕ್ ನ್ಹಯ್ ದಾಟ್ಲ್ಯಾನಿ. 17 ಸಗ್ಳಿ ಲೊಕಾ ನ್ಹಯಿಚ್ಯಾ ಮದ್ದಿ ವಾಳ್ಕ್ಯಾ ಜಿಮ್ನಿ ವೈನಾ ದಾಟುನ್ ಗೆಲ್ಯಾನಿ, ಅನಿ ಸರ್ವೆಸ್ಪರಾಚ್ಯಾ ಕರಾರಾಚಿ ಪೆಟಿ ವಾವುನ್ ಘೆಟಲ್ಲಿ ಯಾಜಕಾ ಸಗ್ಳಿ ಇಜ್ರಾಯೆಲ್ ಲೊಕಾ ನ್ಹಯ್ ದಾಟಿ ಪತರ್ ನ್ಹಯಿಚ್ಯಾ ಮದ್ದಿ ಇಬೆ ಹೊತ್ತ್ಯಾನಿ, ಅಸೆ ಸಗ್ಳಿ ಲೊಕಾ ಜೊರ್ದಾನ್ ನ್ಹಯ್ ದಾಟುನ್ ತಿಕ್ಡಿನ್ ಪಾವ್ಲಿ.