1 ಲೆವಿ ಘರಾನಾಚ್ಯಾ ಮುಖಂಡಾನಿ ಕಾನಾನ್ ದೆಶಾಚ್ಯಾ ಶಿಲೊವಾತ್ ಹೊತ್ತ್ಯಾ ಮೊಟೊಯಾಜಕ್ ಎಲಿಯಾಜರ್, ನುನಾಚೊ ಲೆಕ್ ಜೊಶ್ವಾ ಅನಿ ಇಜ್ರಾಯೆಲಾಂಚ್ಯಾ ಘರಾನಾಚಿ ಮುಖಂಡಾ ಹೆಂಚ್ಯಾ ಜಗ್ಗೊಳ್ ಯೆವ್ನ್, 2 ಅಮ್ಕಾ ವಸ್ತಿ ರಾವ್ಕ್ ಶಾರಾ, ಅನಿ ಜನಾವರಾಕ್ನಿ ಚರುಕ್ ಮಾಳ್ ಜಾಗೊ, ದಿವ್ಚೆ ಮನುನ್ ಸರ್ವೆಸ್ಪರಾನ್ ಮೊಯ್ಜೆಚ್ಯಾ ವೈನಾ ಹುಕುಮ್ ದಿಲಾ ನ್ಹಯ್, ಮನ್ತಾನಾ, 3 ತೆನಿ ಸರ್ವೆಸ್ಪರಾಚ್ಯಾ ಹುಕುಮಾ ಸಾರ್ಕೆ, ಅಪ್ಲ್ಯಾ ವಾಟ್ಯಾಚ್ಯಾ ಖಾಲ್ತಿ ಲಿವಲ್ಲಿ ಶಾರಾ ಅನಿ ಜನಾವರಾಕ್ನಿ ಚಾರ್ವುಕ್ ಮಾಳ್ ಜಾಗೊ ದಿಲ್ಯಾನಿ. 4 ಕೆಹಾತ್ಯಾಕ್ನಿ ವಾಟೊ ದಿತಾನಾ, ಆರೊನಾಚ್ಯಾ ಪಿಳ್ಗಿಚ್ಯಾ ಲೆವಿಯಾಕ್ನಿ, ಜುದೆವ್, ಸಿಮೊನ್ ಅನಿ ಬೆಂಜ್ಯಾಮಿನಾಂಚ್ಯಾ ಘರಾನಾಂಚ್ಯಾಕ್ನಾ ತೆಂಕಾ ತೆರಾ ಶಾರಾ ಗಾವ್ಲಿ. 5 ಹುರಲ್ಲ್ಯಾ ಕೆಹಾತ್ಯಾಕ್ನಿ ಎಫ್ರಾಯಿಮ್ ಅನಿ ದಾನಾಚ್ಯಾ ಘರಾನಾಂಚ್ಯಾಕ್ನಾ ಅನಿ ಮನಸ್ಸೆಚ್ಯಾ ಅರ್ಧ್ಯಾ ಘರಾನಾಕ್ನಾ ಧಾ ಶಾರಾ ಗಾವ್ಲಿ. 6 ಪರ್‍ತುನ್ ಅನಿ ಚಿಟಿ ಘಾಲ್ತಾನಾ, ಇಸ್ಸಾಕಾರ್, ಅಶೆರ್ ಅನಿ ನಪ್ತಾಲಿಂಚ್ಯಾ ಘರಾನಾಂಚ್ಯಾಕ್ನಾ ಅನಿ ಬಾಶಾನಾತ್ ಹೊತ್ತ್ಯಾ ಮನಸ್ಸೆಚ್ಯಾ ಅರ್ದ್ಯಾ ಘರಾನಾಕ್ನಾ ತೆರಾ ಶಾರಾ ಗೊರ್ಶೆನ್ಯಾಕ್ನಿ ಗಾವ್ಲಿ. 7 ರುಬೆನ್, ಗಾದ್ ಅನಿ ಜೆಬುಲುನಾಚ್ಯಾ ಘರಾನಾಂಚ್ಯಾಕ್ನಾ ಬಾರಾ ಶಾರಾ ಮೆರಾರಿ ಗೊತ್ರಾಚ್ಯಾಕ್ನಿ ಗಾವ್ಲಿ. 8 ಸರ್ವೆಸ್ಪರಾನ್ ಮೊಯ್ಜೆಕ್ನಾ ಹುಕುಮ್ ದಿಲ್ಲ್ಯಾ ಸಾರ್ಕೆ ಇಜ್ರಾಯೆಲಾನಿ ಚಿಟಿ ಘಾಲುನ್ ಲೆವಿಯಾಕ್ನಿ ಯೆವ್ಡಿ ಶಾರಾ ಅನಿ ಜನಾವರಾಕ್ನಿ ಚಾರ್ವುಕ್ ಮಾಳ್ ಜಾಗೊ ದಿಲ್ಯಾನಿ. 9 ತಸೆ ಹೊವ್ನ್, ಇಜ್ರಾಯೆಲಾನಿ ತೆಂಕಾ ಜುದೆವ್ ಸಿಮೊನಾಚ್ಯಾ ಘರಾನಾಂಚ್ಯಾಕ್ನಾ ಶಾರಾ ದಿಲ್ಲ್ಯಾ ಶಾರಾಂಚಿ ನಾವಾ ಅಸಿ ಹಾತ್, 10 ಲೆವಿಚ್ಯಾ ಕುಳಿಚ್ಯಾ ಕೆಹಾತ್ಯಾಚ್ಯಾ ಗೊತ್ರಾಚ್ಯಾ ಆರೊನಾಚ್ಯಾ ಕುಟ್ಮಾಚ್ಯಾಕ್ನಿ ಪೈಲೆಚಿ ಚಿಟಿ ಗಾವಲ್ಲಿ, 11 ಹ್ಯಾತುರ್ ಜುದೆವಾಂಚೊ ಮಡ್ಡಿಚೊ ಜಾಗೊ ಅನಿ ಹೆಬ್ರೊನಾಚೊ ಜನಾವರಾಕ್ನಿ ಚಾರ್ವುತಲೊ ಜಾಗೊ ಹೊತ್ತೆ ಕಿರ್ಯಾತರ್ಬ್ ಬಿ ಮಿಳ್ತಾ, ಕಿರ್ಯಾತರ್ಬ್ ಮಟ್ಲ್ಯಾರ್, ಅನಾಕಾಚೊ ಬಾಬಾ ಅರ್ಬ್ ಮನ್ತಲ್ಯಾಚೆ ಶಾರ್, ತೆಜ್ಯಾ ಭೊತ್ಯಾನಿ ಹೊತ್ತಿ ಶಾರಾ ಅನಿ ತೆಂಚಿ ಉಪ ಶಾರಾಬಿ ತೆಂಕಾ ದಿಲ್ಯಾನಿ. 12 ಖರೆ ಹೆಬ್ರೊನ್ ಶಾರಾಚ್ಯಾ ಭೊತ್ಯಾನ್ ಹೊತ್ತಿ ಸೆತಾ ಅನಿ ತೆಕಾ ಸಮಂದ್ ಪಡಲ್ಲಿ ಗಾಂವಾ ಜೆಪುನ್ನೆಚೊ ಲೆಕ್ ಕಾಲೆಬಾಕ್ ದಿಲ್ಯಾನಿ. 13 ಮೊಟೊಯಾಜಕ್ ಆರೊನಾಚ್ಯಾ ಪಿಳ್ಗಿಚ್ಯಾಕ್ನಿ ವರ್‍ತಿ ಸಾಂಗಲ್ಲ್ಯಾ ದೊನ್ ಘರಾನಾಂಚ್ಯಾಕ್ನಾ ಹೆಬ್ರೊನ್ ಮನ್ತಲೆ ಆಧಾರಾಚೆ ಶಾರ್, ಅನಿ ಹಿ ಶಾರಾ ದಿವ್ನ್ ಹೊಲಿ ಲಿಬ್ನಾ, 14 ಜತ್ತಿರ್, ಎಶ್ಟೆಮೊಹ್, 15 ಹೊಲೊನ್, ದೆಬಿರ್, 16 ಆಯಿನ್, ಜುಟ್ಟಾ, ಬೆತ್ ಶೆಮೆಶ್ ಹಿ ನ್ಹವ್ ಶಾರಾ ಅನಿ ಜನಾವರಾಕ್ನಿ ಚಾರ್ವುತಲೆ ಜಾಗೆ, ಜುದೆವ್ ಅನಿ ಸಿಮೊನಾಚ್ಯಾ ಘರಾನಾಂಚ್ಯಾಕ್ನಾ ದಿವ್ನ್ ಹೊಲಿ. 17 ಅನಿ ಬೆನ್ಯಾಮಿನಾಚ್ಯಾ ಘರಾನಾಕ್ನಾ ಗಿಬ್ಬೆಯಾ ಅನಿ ಗೆಬ್, 18 ಅನಾತೊತ್, ಅಲ್ಮೊನ್ ಹಿ ಚಾರ್ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತಿ ಶಾರಾ ಗಾವ್ಲಿ. 19 ಮೊಟೊ ಯಾಜಕ್ ಆರೊನಾಚ್ಯಾ ಘರಾನಾಚ್ಯಾಂಚ್ಯಾ ವಾಟ್ಯಾಕ್ ಯೆಲ್ಲಿ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತಿ ಹಿ ತೆರಾ ಶಾರಾ ಹಾತ್. 20 ಲೆವಿಯಾ ಘರಾನಾಚ್ಯಾ ಕೆಹಾತ್ಯಾಂಚ್ಯಾ ಹುರಲ್ಲ್ಯಾ ಕುಟ್ಮಾಕ್ನಿ, ಎಪ್ರಾಯಿಮಾಂಚ್ಯಾ ವಾಟ್ಯಾತ್ನಾ ಶಾರಾ ದಿವ್ನ್ ಹೊಲೆ, 21 ತೆಂಕಾ ದಿವ್ನ್ ಹೊಲ್ಲಿ ಶಾರಾ ಖಲಿ ಮಟ್ಲ್ಯಾರ್, ಎಪ್ರಾಯಿಮ್ಯಾಂಚ್ಯಾ ಆಸ್ತಿಚ್ಯಾ ಮಡ್ಡಿತ್ ಹೊತ್ತೆ ಶೆಕೆಮ್ ಮನ್ತಲೆ ಆಧಾರಾಚೆ ಶಾರ್, ಗೆಜೆರ್ ಅನಿ ತೆಜೊ ಜನಾವರಾ ಚಾರ್ವುತಲೊ ಜಾಗೊ, 22 ಕಿಬ್ಟೈಮ್ ಅನಿ ಬೆತ್ಹೊರೊಮ್ ಹಿ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತಿ ಚಾರ್ ಶಾರಾ ತೆಂಕಾ ದಿವ್ನ್ ಹೊಲೆ, 23 ದಾನ್ಯಾಂಚ್ಯಾ ಆಸ್ತಿಕ್ನಾ ಎಲ್ತೆಕ್, ಗಿಬ್ಬೆತೊನ್, 24 ಅಯ್ಯಾಲೊನ್, ಗತ್ ರಿಮೊನ್ ಮನ್ತಲಿ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹಿತ್ತಿ ಹಿ ಚಾರ್ ಶಾರಾ ಗಾವ್ಲಿ. 25 ದಿಸ್ ಬುಡ್ತಲ್ಯಾ ದಿಕ್ಕಾಚೆ ಮನಸ್ಸೆಚ್ಯಾ ಘರಾನಾಂಚ್ಯಾಕ್ನಾ ಆಸ್ತಿ ತಾನಾಕ್, ಗತ್ ರಿಮ್ಮೊನ್ ಮನ್ತಲಿ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತಿ ದೊನ್ ಶಾರಾ ಚಿಟಿಕ್ನಾ ಗಾವ್ಲಿ. 26 ಒಟ್ಟು ಕೆಹಾತ್ಯಾಕ್ನಿ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತಿ ಧಾ ಶಾರಾ ಗಾವ್ಲಿ. 27 ಗೊರ್ಶೆನ್ಯಾಂಚ್ಯಾ ಘರಾನಾಚ್ಯಾಕ್ನಿ ಜೊರ್ದಾನಾಚ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾಚೆ ಮನಸ್ಸೆಚ್ಯಾ ಘರಾನಾಂಚ್ಯಾಕ್ನಾ ಗಾವಲ್ಲಿ ಆಸ್ತಿಚಿ ಶಾರಾ ಹಿಚ್, ಜಿವ್ ಕಾಡಲ್ಲ್ಯಾಕ್ ಆಧಾರಾಕ್ ಹೊತ್ತೆ ಬಾಶಾನಾಚೆ ಗೊಲಾನ್, ಬೆಯೆಶ್ಟೆರಾ ಮನ್ತಲೆ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತಿ ದೊನ್ ಶಾರಾ ಗಾವ್ಲಿ. 28 ಇಸ್ಸಾಕಾರಾಂಚ್ಯಾ ಆಸ್ತಿಕ್ನಾ ಕಿಶ್ಯೊನ್ ಅನಿ ದಾಬೆರತ್, 29 ಜಮುರ್ತ್, ಎಂಗನ್ನಿಮ್ ಹಿ ಚಾರ್ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತಿ ಶಾರಾ ಗಾವ್ಲಿ. 30 ಅಶೆರಾಚ್ಯಾ ಘರಾನಾಕ್ನಾ ಮಿಶಾಯೆಲ್ ಅನಿ ಅಬ್ದೊನ್, 31 ಹಲ್ಕಾತ್, ರೆಹೊಬ್ ಹಿ ಚಾರ್ ಗೊಟೆ ಹೊತ್ತಿ ಶಾರಾ ಗಾವ್ಲಿ. 32 ನಪ್ತಾಲಿಚ್ಯಾ ಜಾಗ್ಯಾಕ್ನಾ, ಜಿವ್ ಕಾಡಲ್ಲ್ಯಾಕ್ ನಿಪುಕ್ ಹೊತ್ತೆ ಆಧಾರಾಚೆ ಶಾರ್ ಗಲಿಲಾಯಾಚೆ ಕೆದೆಶ್, ಹಮ್ಮೊತ್, ದೊರ್, ಕರ್ತಾನ್, ಹ್ಯಾ ತಿನ್ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತಿ ಶಾರಾ ಗಾವ್ಲಿ. 33 ಗೊರ್ಶೆನ್ಯಾಕ್ನಿ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತಿ ತೆರಾ ಶಾರಾ ಗಾವ್ಲಿ. 34 ಹುರಲ್ಲ್ಯಾ ಲೆವಿಂಚ್ಯಾ ಮೆರಾರಿ ಗೊತ್ರಾಕ್ನಿ ಜೆಬುಲುನಾಚ್ಯಾ ಜಾಗ್ಯಾಕ್ನಾ ಜಾಕ್ನೆಯಾಮ್, ಕರ್ತಾ, 35 ದಿಮ್ನಾ ಅನಿ ನಹಲ್ಲಾಲ್ ಹಿ ಚಾರ್ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತಿ ಶಾರಾ ಗಾವ್ಲಿ. 36 ರುಬೆನ್ಯಾಂಚ್ಯಾ ಆಸ್ತಿಕ್ನಾ ಬೆಚೆರ್, ಜಹಾಜ್, 37 ಕೆದೆಮೊತ್ ಅನಿ ಮೆಫಾಯಾತ್ ಹಿ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತಿ ಚಾರ್ ಶಾರಾ ಗಾವ್ಲಿ. 38 ಗಾದಾಂಚ್ಯಾ ಜಾಗ್ಯಾಕ್ನಾ ಜಿವ್ ಕಾಡಲ್ಲ್ಯಾಕ್ ನಿಪುಕ್ ಆಧಾರ್ ಹೊವ್ನ್ ಹೊತ್ತೆ ಗಿಲಾದಾಚೆ ರಾಮೊತ್, ಮಹನಯಿಮ್, 39 ಹೆಶ್ಬೊನ್, ಜಗ್ಜೆರ್ ಹಿ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತಿ ಚಾರ್ ಶಾರಾ ಗಾವ್ಲಿ. 40 ಮೆರಾರಿ ಗೊತ್ರಾಕ್ನಿ ಸಗ್ಳೆ ಮಿಳುನ್ ಒಟ್ಟು ಬಾರಾ ಶಾರಾ ಗಾವ್ಲಿ. 41 ಲೆವಿಯಾಕ್ನಿ ಇಜ್ರಾಯೆಲಾಂಚ್ಯಾಕ್ನಾ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತಿ ಚಾಳಿಸಾರ್ ಆಟ್ ಶಾರಾ ಗಾವ್ಲಿ. 42 ಹ್ಯಾತುರ್ ಹರ್ ಎಕ್ ಶಾರಾಕ್ಬಿ ಜನಾವರಾಕ್ನಿ ಚಾರ್ವುತಲೆ ಜಾಗೆ ಹೊತ್ತೆ, ಅನಿ ಸಗ್ಳ್ಯಾ ಶಾರಾಕ್ನಿಬಿ ಅಸೆಚ್ ಹೊತ್ತೆ.

43 ಅಸೆ ಸರ್ವೆಸ್ಪರಾನ್ ಇಜ್ರಾಯೆಲಾಂಚ್ಯಾ ಪುರ್ವಜಾಕ್ನಿ ಗೊಸ್ಟ್ ದಿಲ್ಲೊ ದೆಶ್ ದಿಲ್ಯಾನ್, ತೆನಿ ತೆ ಸ್ವತಂತ್ರ್ ಕರುನ್ ಘೆವ್ನ್ ಥೈ ವಸ್ತಿ ರಾಲ್ಯಾನಿ. 44 ಸರ್ವೆಸ್ಪರಾನ್ ತೆಂಚ್ಯಾ ಪುರ್ವಜಾಕ್ನಿ ಆನ್ ಥವ್ನ್ ಸಾಂಗಲ್ಲ್ಯಾ ಸಾರ್ಕೆ ತೆಂಕಾ ಸಗ್ಳ್ಯಾಕ್ನಾ ಸಮಾಧಾನ್ ದಿಲ್ಯಾನ್, ಎಕ್ ವಿರೊಧಿಬಿ ತೆಂಚ್ಯಾ ಇದ್ರಾಕ್ ಇಬೆ ರ್‍ಹಾಯ್ನಾ, ತೆನಿ ಸಗ್ಳ್ಯಾಕ್ನಿ ತೆಂಚ್ಯಾ ಹಾತಿತ್ ದಿಲ್ಯಾನ್. 45 ಸರ್ವೆಸ್ಪರಾನ್ ಇಜ್ರಾಯೆಲ್‌ಕಾರಾಕ್ನಿ ದಿಲ್ಲ್ಯಾ ಲೈ ಬರ್ಯಾ ಗೊಸ್ಟಿಯಾತ್ನಿ ಎಕ್ಬಿ ಚುಕುಕ್ನಾ, ಸಗ್ಳೆಬಿ ಫುರಾ ಹೊಲೆ.