1 ಜೊರ್ದಾನ್ ನ್ಹಯಿಚ್ಯಾ ದಿಸ್ ಬುಡ್ತಲ್ಯಾ ದಿಕ್ಕಾಚ್ಯಾ ಸಗ್ಳ್ಯಾ ಅಮೊರಿತಾಂಚೆ ರಾಜಾ ಅನಿ ಸಮುಂದರಾಚ್ಯಾ ಜಗ್ಗೊಳ್ ಹೊತ್ತೆ ಕಾನಾನಾಚೆ ಸಗ್ಳ್ಯಾ ರಾಜಾನಿ ಸರ್ವೆಸ್ಪರಾನ್ ಇಜ್ರಾಯೆಲ್ ಲೊಕಾಕ್ನಿ ಜೊರ್ದಾನ್ ನ್ಹಯ್ ವಾಳಿ ಸಾರ್ಕೆ ಕರುನ್, ದಾಟ್ವುಲ್ಯಾನ್ ಮನ್ತಲಿ ಖಬರ್ ಆಯ್ಕುನ್, ಲೈ ಭಿಂವ್ಲ್ಯಾನಿ, ಅನಿ ಇಜ್ರಾಯೆಲಾಂಚ್ಯಾ ವಿಶಯಾತ್ ತೆಂಕಾ ಧೈರೊ ಪಾವುಕ್ನಾ.

2 ತ್ಯಾ ಎಳಾರ್ ಸರ್ವೆಸ್ಪರಾನ್ ಜೊಶ್ವಾಕ್, "ಗುಂಡ್ಯಾಚೆ ಧಾರ್ ಕೊಯ್ತೆ ಕರುನ್ ಘೆವ್ನ್ ಇಜ್ರಾಯೆಲ್ ಲೊಕಾಕ್ನಿ ಅನಿ ಪರ್‍ತುನ್ ಸುನ್ನತ್ ಕರಸ್" ಮನುನ್ ಸಾಂಗ್ತಾನಾ, 3 ತೆನಿ ಉಲ್ಲೆ ಗುಂಡೆ ಧಾರ್ ಕರುನ್ ಘೆವ್ನ್ ಇಜ್ರಾಯೆಲ್ ಲೊಕಾಕ್ನಿ ಸುನ್ನತಿಚ್ಯಾ ಮಡ್ಡಿವರ್‍ತಿ ಸುನ್ನತ್ ಕರ್ಲ್ಯಾನ್. 4 ಇಜಿಪ್ತಾಕ್ನಾ ಯೆಲ್ಲ್ಯಾ ಘವ್ಮಾನ್ಸಾಂತ್ಲಿ ಲಡಾಯಿಚಿ ಸೈನಿಕಾ ಸಗ್ಳಿ ತೆ ದೆಶ್ ಸೊಡ್ಲ್ಯಾ ಮಾನಾ ಡಂಗ್ಳಿತುಚ್ ಮರುನ್ ಗೆಲ್ಲ್ಯಾ ವೈನಾ, ಜೊಶ್ವಾನ್ ಸುನ್ನತ್ ಕರ್‍ತಲೆ ಹೊಲೆ. 5 ಥೈತ್ನಾ ಯೆಲ್ಲ್ಯಾ ಸಗ್ಳ್ಯಾಕ್ನಿ ಸುನ್ನತ್ ಹೊಲ್ಲಿ, ಖರೆ ಇಜಿಪ್ತ್ ಸೊಡುನ್ ಯೆಲ್ಲ್ಯಾ ಮಾನಾ ಡಂಗ್ಳಿತ್ ಉಪಾಜಲ್ಲ್ಯಾಕ್ನಿ ಸುನ್ನತ್ ಹೊವ್ಕ್ ನಸಲ್ಲಿ. 6 ಇಜಿಪ್ತಾಕ್ನಾ ಯೆಲ್ಲ್ಯಾ ಇಜ್ರಾಯೆಲ್ ಲೊಕಾನಿ ಸರ್ವೆಸ್ಪರಾಚಿ ಗೊಸ್ಟ್ ಆಯ್ಕು ನಸಲ್ಲ್ಯಾ ಸಾಟ್ನಿ, ತೆಂಚ್ಯಾತ್ಲಿ ಲಡಾಯಿಚಿ ಲೊಕಾ ಮರುನ್ ಸರಿ ಪತರ್ಬಿ ಚಾಳಿಸ್ ವರಿಸ್ ಡಂಗ್ಳಿತುಚ್ ಫಿರುನ್ಗೆತ್ ರಾವ್ಚೆ ಹೊಲೆ, ಸರ್ವೆಸ್ಪರಾನ್ ಅಪ್ನಿಚ್ ತೆಂಚ್ಯಾ ಪುರ್ವಜಾಕ್ನಿ ಗೊಸ್ಟ್ ದಿಲ್ಲ್ಯಾ ಮ್ಹಾವ್ ಅನಿ ದುದ್ದ್ ಹೊಂವ್ತಲ್ಯಾ ದೆಸಾತ್ ತೆಂಕಾ ಜಾವ್ಕ್ ದಿಯ್ನಾ ಮನುನ್ ಆನ್ ಘಾಲುನ್ ಸಾಂಗಲ್ಲ್ಯಾನ್. 7 ತೆಂಚ್ಯಾ ಬದ್ಲಾಕ್ ತೆಂಕಾ ಉಪಾಜಲ್ಲ್ಯಾ ಪೊರಾಕ್ನಿ ಜೊಶ್ವಾನ್ ಸುನ್ನತ್ ಕರಲ್ಯಾನ್, ತೆಂಕಾ ವಾಟೆ ವರ್‍ತಿ ಕೊನಿಬಿ ಸುನ್ನತ್ ಕರಲ್ಲಿ ನತ್ತ್ಯಾ ಸಾಟ್ನಿ ತೆನಿ ಸುನ್ನತ್ ಹೊಯ್ ನಸಲ್ಲೆ ಹೊಲ್ಲೆ. 8 ಇಜ್ರಾಯೆಲ್ ಲೊಕಾಕ್ನಿ ಸಗ್ಳ್ಯಾಕ್ನಿ ಸುನ್ನತ್ ಹೊಲ್ಲ್ಯಾಮಾನಾ ಘಾವ್ ಮರಿಪತರ್ಬಿ ತೆನಿ ಅಪ್ನಾಚ್ಯಾ ಬಿಡಾರಾತ್ನಿಚ್ ರಾಲ್ಯಾನಿ. 9 ಸರ್ವೆಸ್ಪರಾನ್ ಜೊಶ್ವಾಕ್, ಮಿಯಾ ಆಜ್ ಇಜಿಪ್ತಾಚ್ಯಾ ಗುಲಾಮ್ ಗಿರಿತ್ನಾ ತುಮ್ಕಾ ಸುಟ್ಕಾ ಕರ್ಲೊ ಮನುನ್ ಸಾಂಗಲ್ಲ್ಯಾ ಸಾಟ್ನಿ ತ್ಯಾ ಜಾಗ್ಯಾಕ್ ಗಿಲ್ಗಾಲ್ ಮನ್ತಲೆ ನಾವ್ ಅಜುನ್ ಪತರ್ಬಿ ಹಾಯ್. 10 ಇಜ್ರಾಯೆಲ್ ಲೊಕಾನಿ ಗಿಲ್ಗಾಲಿತ್ ರ್‍ಹಾತಾನಾ, ಪೈಲ್ಯಾ ಮೈನ್ಯಾಚ್ಯಾ ಚವ್ದಾವ್ಯಾ ದಿಸಾಚ್ಯಾ ಸಾಂಜೆಕ್ಡೆ ಜೆರಿಕೊಚ್ಯಾ ಮಾಳ್ ಜಾಗ್ಯಾರ್ ಪಾತ್ಕಾಚೊ ಸನ್ ಕರ್ಲ್ಯಾನಿ, 11 ಅನಿ ದುಸ್ರ್ಯಾ ದಿಸಾಕ್ನಾ ತೆನಿ ಕಾನಾನ್ ದೆಸಾತ್ಲೆ ದಾನೆ ಜೆವ್ನಾಕ್ ವಾಪ್ರುಕ್ ಶುರು ಕರ್ಲ್ಯಾನಿ, ಕಸೆ ಮಟ್ಲ್ಯಾರ್ ತ್ಯಾಚ್ ದಿಸಿ ತೆನಿ ಫುಗ್ ನಸಲ್ಲಿ ಭಾಕ್ರಿಯಾ ಅನಿ ಜಾಳ್ವಲ್ಲಿ ಕನ್ಸಾ ಖಾಲ್ಯಾನಿ. 12 ತೆನಿ ತ್ಯಾ ದೆಶಾಚಿ ಪಿಕ್ ಖಾಲ್ಲ್ಯಾ ದುಸ್ರೆಂದಿಸಿಚ್ ಮನ್ನಾ ಗಾವ್ತಲೆ ಬಂದ್ ಹೊಲೆ, ತೆಂಕಾ ತೆ ಅನಿ ಕನ್ನಾಬಿ ಪರ್‍ತುನ್ ಗಾವ್ಕ್ ನಾ, ಇಜ್ರಾಯೆಲ್ ಲೊಕಾನಿ ತ್ಯಾ ವರ್ಸಾತ್ ಫುರಾ ಕಾನಾನ್ ದೆಶಾಚೆ ಪಿಕ್ ಖಾಲ್ಯಾನಿ.

13 ಎಕ್ ದಿಸಿ ಜೆರಿಕೊತ್ ರ್‍ಹಾತಾನಾ, ಎಗ್ದಮ್ ಜೊಶ್ವಾನ್ ಡೊಳೆ ವರ್‍ತಿ ಕರುನ್ ಬಗ್ತಾನಾ, ಎಕ್ಲೊ ಮಾನುಸ್ ಧಾರ್ ಹೊತ್ತೊ ಕೊಯ್ತೊ ಹಾತಿತ್ ಧರುನ್ಗೆವ್ನ್ ಅಪ್ನಾಚ್ಯಾ ಇದ್ರಾಕ್ ಇಬೆ ಹೊತ್ತೆ ಬಗಟ್ಲ್ಯಾನ್, ಅನಿ ತೆಜ್ಯಾ ಜಗ್ಗೊಳ್ ಜಾವ್ನ್, ತಿಯಾ ಅಮ್ಚೊಕಿ ಕಾಯ್ ವಿರೊಧಿ ಲೊಕಾಂಚೊ, ಮನುನ್ ಇಚಾರ್‍ತಾನಾ, 14 ತ್ಯಾ ಮಾನ್ಸಾನ್, ಮಿಯಾ ತಸ್ಲೊ ಕೊನ್ ನ್ಹಯ್, ಸರ್ವೆಸ್ಪರಾಚೊ ಸೈನಿಕಾಂಚೊ ಮುಖಂಡ್ ಮಿಯಾ, ಹಿತ್ತೆ ಯೆಲಾ ಮಟ್ಲ್ಯಾನ್, ತನ್ನಾ ಜೊಶ್ವಾ ತೆಕಾ ಡಬ್ಬ್ ಪಡುನ್ ನಮಸ್ಕಾರ್ ಕರುನ್, ಸಾಯ್ಬಾ, ತುಮ್ಚ್ಯಾ ಸೆವಕಾಕ್ ಮಾಕಾ ಕಾಯ್ ಹುಕುಮ್ ದಿತ್ಯಾಸಿ, ಮಟ್ಲ್ಯಾನ್, 15 ತನ್ನಾ ಸರ್ವೆಸ್ಪರಾಚ್ಯಾ ಸೈನಿಕಾಂಚ್ಯಾ ಮುಖಂಡಾನ್, ತುಜ್ಯಾ ಪಾಂಯಾಂತ್ಲಿ ವಾನಾ ಕಾಡ್, ತಿಯಾ ಇಬೆ ಹೊತ್ತೊ ಜೊಗೊ ನಿತಳ್ ಹಾಯ್, ಮನ್ತಾನಾ, ಜೊಶ್ವಾನ್ ತಸೆಚ್ ಕರ್ಲ್ಯಾನ್.