ಜೊಶುವಾ 7

ಆಕಾನಾಚೊ ಪಾಪ್

1 ಜುದೆವಾಂಚ್ಯಾ ಘರಾನಾಚೊ, ಜೆರಹಾಚ್ಯಾ ಗೊತ್ರಾಚೊ, ಜಬ್ದಿಚ್ಯಾ ಕುಟ್ಮಾಚೊ ಕರ್ಮಿಚೊ ಲೆಕ್ ಆಕಾನಾನ್, ಸರ್ವೆಸ್ಪರಾಕ್ ನೆಮುನ್ ಥವಲ್ಲ್ಯಾ ಸಾಮಾನಾತ್ನಿ ಉಲ್ಲೆ ಚೊರುನ್ ಘೆಟಲ್ಲ್ಯಾ ಸಾಟ್ನಿ, ಸಗ್ಳಿ ಇಜ್ರಾಯೆಲ್ ಲೊಕಾ ಚುಕಿದಾರ್ ಹೊಲಿ, ಅನಿ ಸರ್ವೆಸ್ಪರಾಚೊ ರಾಗ್ ತೆಂಚ್ಯಾ ವರ್‍ತಿ ಪೆಟ್ಲೊ. 2 ಜೊಶ್ವಾನ್ ಅಪ್ನಾಚ್ಯಾ ಲೊಕಾಕ್ನಿ ಬಲ್ವುನ್, ತುಮಿ ಮಡ್ಡಿ ಚಡುನ್ ಬೆತೆಲಿಚ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾಕ್, ಬೆತ್ ಆವೆನಿಚ್ಯಾ ಜಗ್ಗೊಳ್ ಹೊತ್ತ್ಯಾ ಆಯಿ ಮನ್ತಲ್ಯಾ ಶಾರ್‍ಹಾತ್ ಫಿರುನ್ ಬಗಾ, ಮನುನ್ ತೆಂಕಾ ಜೆರಿಕೊತ್ನಾ ಹುಕುಮ್ ದಿವ್ನ್ ಧಾಡ್ಲ್ಯಾನ್, ತೆನಿ ಜಾವ್ನ್ ಆಯಿ ಮನ್ತಲೆ ಶಾರ್ ಫಿರುನ್ ಬಗುನ್, 3 ಫಾಟಿ ಪರ್‍ತುನ್ ಯೆವ್ನ್ ಜೊಶ್ವಾಕ್ಡೆ, "ಸಗ್ಳಿ ಲೊಕಾ ಜಾತಲೆ ನಕ್ಕೊ, ದೊನ್ ನಾತರ್ ತಿನ್ ಹಾಜಾರ್ ಲೊಕಾ ಗೆಲ್ಯಾರ್ ಫಿರೆ ತೆಂಕಾ ಹಾರ್ವುಕ್ ಹೊತಾ, ಫುಕೊಟ್ ಕಶ್ಯಾಕ್ ಸಗ್ಳ್ಯಾಕ್ನಿ ಧಾಡುನ್ ತರಾಸ್ ಕರ್‍ತಲೆ, ತೆನಿ ಉಲ್ಲಿಸಿಚ್ ಲೊಕಾ ಹಾತ್" ಮಟ್ಲ್ಯಾನಿ. 4 ತಸೆಚ್ ಲೈ ಕರುನ್ ತಿನ್ ಹಾಜಾರ್ ಲೊಕಾ ಗೆಲಿ, ಖರೆ ತೆನಿ ಆಯಿ ಮನ್ತಲ್ಯಾ ಗಾಂವಾಚ್ಯಾ ಇದ್ರಾಕ್ನಾ ಪಳುನ್ ಯೆತಲೆ ಹೊಲೆ. 5 ಆಯಿ ಮನ್ತಲ್ಯಾ ಗಾಂವಾಚ್ಯಾ ಲೊಕಾನಿ ತೆಂಕಾ ಗಾಂವಾಚ್ಯಾ ದಡ್ಪ್ಯಾಕ್ನಾ ಫಾಟ್ ಲಾಗುನ್, ಕಲ್ಲು ಗುನಿ ಪತರ್ಬಿ ಯೆವ್ನ್, ತೆಂಕಾ ಉತ್ರನಿತ್ ಪಾಡ್ವುನ್ ಹಾರ್ವುನ್, ತಿಸಾರ್ ಸಾ ಲೊಕಾಕ್ನಿ ಜಿವ್ ಕಾಡ್ಲ್ಯಾನಿ, ಹೆಚ್ಯಾ ವೈನಾ ಇಜ್ರಾಯೆಲ್ ಲೊಕಾಂಚಿ ಮನಾ ಭಿಂವ್ನ್ ಪಾನಿ ಸಾರ್ಕಿ ಹೊಲಿ. 6 ತನ್ನಾ ಜೊಶ್ವಾನ್ ಅನಿ ಇಜ್ರಾಯೆಲಾಚ್ಯಾ ಜಾಂನ್ತ್ಯಾ ಲೊಕಾನಿ ಅಪ್ನಾಚೆ ಕಪ್ಡೆ ಪಿಂಜುನ್ ಘೆವ್ನ್, ಟಕ್ಲ್ಯಾ ವರ್‍ತಿ ರಕ್ಕಾ ಘಾಲುನ್ ಘೆವ್ನ್, ಸಾಂಜ್ ಪಾತರ್ಬಿ ಸರ್ವೆಸ್ಪರಾಚ್ಯಾ ಕರರಾಚ್ಯಾ ಪೆಟಿಚ್ಯಾ ಇದ್ರಾಕ್ ಡಬ್ಬ್ ಪಡುನ್ ಅಳಾಪ್ ಕರುನ್ಗೆತ್ ಹೊತ್ತ್ಯಾನಿ. 7 ಅನಿ ಜೊಶ್ವಾನ್, ಅಯ್ಯೊ ಸರ್ವೆಸ್ಪರಾ, ದೆವಾ, ತಿಯಾ ಕಶ್ಯಾಕ್ ಹ್ಯಾ ಲೊಕಾಕ್ನಿ ಜೊರ್ದಾನ್ ನ್ಹಯ್ ದಾಟ್ವುಲೆಯ್, ಅಮ್ಕಾ ಅಮೊರಿತಾಂಚ್ಯಾ ಹಾತಿತ್ ದಿವ್ನ್ ನಾಶ್ ಕರುಚೆ ಮನುನ್ ಕರ್ಲೆ ಕಾಯ್, ಅಮಿ ಯೆವ್ಡೆಚ್ ಫಿರೆ ಮನುನ್ ಜೊರ್ದಾನ್ ನ್ಹಯಿಚ್ಯಾ ತಿಕ್ಡಿನುಚ್ ರಾಲ್ಯಾರ್ ಕವ್ಡೆಕಿ ಬರೆ ಹೊತ್ತೆ. 8 ದೆವಾ, ಇಜ್ರಾಯೆಲಾನಿ ವಿರೊಧಿಯಾಕ್ನಿ ಫಾಟ್ ದಾಕ್ವುಲ್ಯಾನಿ ನ್ಹಯ್, ಅತ್ತಾ ಮಿಯಾ ಕಾಯ್ ಸಾಂಗು, 9 ಕಾನಾನ್ ಗಾರಾ ಅನಿ ದೆಶಾಚಿ ಹುರಲ್ಲಿ ಲೊಕಾ ಹೆ ಆಯ್ಕುನ್ ಅಮ್ಕಾ ನಾಶ್ ಕರುನ್ ಜಿಮ್ನಿ ವರ್‍ತಿ ಅಮ್ಚೆ ನಾವ್ ನಾ ಸಾರ್ಕೆ ಕರ್‍ತಾತ್, ತುಜ್ಯಾ ಮೊಟ್ಟ್ಯಾ ನಾವಾ ಸಾಟ್ನಿ ಕಾಯ್ ಕರ್‍ತೆ, ಮಟ್ಲ್ಯಾನ್. 10 ತನ್ನಾ ಸರ್ವೆಸ್ಪರಾನ್ ಜೊಶ್ವಾಕ್, "ಉಟ್ ತಿಯಾ ಅಸೊ ಕಶ್ಯಾಕ್ ಡಬ್ಬ್ ಪಡ್ಲೆಯ್. 11 ಇಜ್ರಾಯೆಲ್ ಲೊಕಾ ಮಾಜಿ ನೆಮಾ ಸೊಡುನ್, ಪಾಪಿಸ್ಟ್ ಹೊಲ್ಯಾತ್, ನೆಮುನ್ ಥವಲ್ಲಿ ಸಾಮಾನಾ ಚೊರುನ್ ಅಪ್ನಾಚ್ಯಾ ಸಾಮಾನಾತ್ನಿ ಥವ್ನ್ ಪಸ್ವುಲ್ಯಾನಿ. 12 ತಸೆ ಹೊವ್ನ್, ಇಜ್ರಾಯೆಲ್ ಲೊಕಾ ವಿರೊದಿಯಾಂಚ್ಯಾ ಇದ್ರಾಕ್ ಇಬೆ ರಾಯ್ ನಸ್ತಾನಾ ತೆಂಕಾ ಫಾಟ್ ದಾಕ್ವುನ್ ಪಳ್ತ್ಯಾತ್, ತೆನಿ ಶರಾಪಾತ್ ಹಾತ್, ತ್ಯಾ ಶರಾಪಾಕ್ ಕಾರನ್ ಹೊಲ್ಯಾಕ್ ತುಮ್ಚ್ಯಾ ಮದ್ನಾ ಕಾಡುನ್ ಟಾಕಿ ಪತರ್ ಮಿಯಾ ತುಮ್ಚ್ಯಾ ವಾಂಗ್ಡಾ ಯೆಯ್ನಾ. 13 ಉಟ್ ಲೊಕಾಕ್ನಿ ನಿತಳ್ ಕರ್, ತೆಂಕಾ ತಿಯಾ ಇಜ್ರಾಯೆಲಾನು, ಉದ್ದ್ಯಾ ಸಾಟ್ನಿ ತುಮ್ಕಾ ತುಮಿ ನಿತಳ್ ಕರುನ್ಗೆವಾ, ತುಮ್ಚ್ಯಾ ಮದ್ದಿ ಶರಾಪಾಕ್ ಕಾರನ್ ಹೊಲ್ಲೊ ಹಾಯ್, ತೆ ತುಮಿ ಕಾಡುನ್ ಟಾಕಿ ಪಾತರ್ ವಿರೊಧಿಯಾಂಚ್ಯಾ ಇದ್ರಾಕ್ ಇಬೆ ರಾಯ್ ನ್ಯಾಸಿ ಮನುನ್ ಸರ್ವೆಸ್ಪರ್ ದೆವ್ ಸಾಂಗುಲ್ಲಾ. 14 ಉದ್ದ್ಯಾ ಸಕ್ಕಾಳಿ ತುಮಿ ಘರಾನಾಂಚ್ಯಾ ಪರ್ಕಾರ್ ಮಾಜೆಕ್ಡೆ ಯೆವ್ಚೆ ಸರ್ವೆಸ್ಪರ್ ಖಲ್ಯಾ ಘರಾನಾಕ್ ಧರ್‍ತಾ, ತ್ಯಾ ಘರಾನಾಚ್ಯಾ ಗೊತ್ರಾಚ್ಯಾ ಪರ್ಕಾರ್, ಅನಿ ಖಲ್ಯಾ ಕುಳಿಕ್ ಧರ್‍ತಾ, ತ್ಯಾ ಗೊತ್ರಾಚೆ ಕುಟ್ಮಾ ಕುಟ್ಮಾ ಹೊವ್ನ್ ಅನಿ ಖಲ್ಯಾ ಕುಟ್ಮಾಕ್ ಧರ್‍ತಾ ತ್ಯಾ ಕುಟ್ಮಾಚೊ ಎಕೆಕ್ಲೊ ಯೆವ್ಚೆ. 15 ನೆಮಲ್ಲಿ ಸಾಮಾನಾ ಘೆವ್ನ್ ಧರುನ್ ಹೊಲ್ಲ್ಯಾ ಮಾನ್ಸಾಕ್, ಸರ್ವೆಸ್ಪರಾಚಿ ನೆಮಾ ಸೊಡುನ್ ಇಜ್ರಾಯೆಲಾತ್ನಿ ಬುದ್ದ್ ನಸಲ್ಲಿ ಕಾಮಾ ಕರಲ್ಲ್ಯಾ ಸಾಟ್ನಿ, ಅಪ್ನಾಚ್ಯಾ ಸಗ್ಳ್ಯಾ ಆಸ್ತಿಚ್ಯಾ ವಾಂಗ್ಡಾ ಜಾಳ್ವುನ್ ಹೊವ್ಚೆ ಮನುನ್ ಸಾಂಗ್" ಮಟ್ಲ್ಯಾನ್. 16 ಜೊಶ್ವಾನ್ ಸಕ್ಕಾಳಿ ಉಟುನ್ ಎಕೆಕುಚ್ ಘರಾನಾಕ್ನಿ ಬಲ್ವುತಾನಾ, ಜುದೆವ್ ಘರಾನಾಚ್ಯಾಕ್ನಿ ಧರುನ್ ಹೊಲೆ. 17 ತೆಂಚ್ಯಾ ಕುಳಿಯಾಕ್ನಿ ಬಲ್ವುತಾನಾ ಜೆರಹಾಚ್ಯಾ ಕುಳಿಕ್ನಿ ಧರುನ್ ಹೊಲೆ, ತ್ಯಾ ಕುಳಿಚ್ಯಾ ಕುಟ್ಮಾಕ್ನಿ ಬಲ್ವುತಾನಾ ಜಬ್ದಿಚ್ಯಾ ಕುಟ್ಮಾಕ್ ಧರುನ್ ಹೊಲೆ. 18 ತ್ಯಾ ಕುಟ್ಮಾಚ್ಯಾ ಘವ್ಮಾನ್ಸಾಕ್ನಿ ಬಲ್ವುತಾನಾ, ಜುದೆವ್ ಘರಾನಾಚೊ ಜೆರಹಾಚ್ಯಾ ಕುಳಿಚೊ, ಜಬ್ದಿಚ್ಯಾ ಕುಟ್ಮಾಚೊ ಕರ್ಮಿಚೊ ಲೆಕ್ ಆಕಾನಾಕ್ ಧರುನ್ ಹೊಲೆ. 19 ತನ್ನಾ ಜೊಶ್ವಾನ್ ಆಕಾನಾಕ್, "ಮಾಜ್ಯಾ ಲೆಕಾ ತಿಯಾ ಇಜ್ರಾಯೆಲಾಚ್ಯಾ ದೆವಾಕ್ ಸ್ತುತಿ ಕರ್, ತೆಕಾ ಆರಾದನ್ ಕರ್, ತಿಯಾ ಕರಲ್ಲೆ ಎಕ್ಬಿ ಧಾಪುನ್ ಥೈನಸ್ತಾನಾ ಸಗ್ಳೆಬಿ ಮಾಕಾ ಸಾಂಗ್" ಮಟ್ಲ್ಯಾನ್. 20 ತನ್ನಾ ಆಕಾನಾನ್ ಜೊಶ್ವಾಕ್, "ಶಿನಾರ್ ದೆಸಾಕ್ನಾ ಹಾನಲ್ಲೊ ಬರೊ ಝಗೊ, ದೊನ್ಸೆ ರುಪೈ ಚಾಂದಿ, ಪನ್ನಾಸ್ ಪೈಸ್ಯಾಚೆ ಸೊನೆ ಬಗುನ್ ತೆ ಮಿಯಾ ಆಶಾನಿ ಕಾಡುನ್ ಘೆಟ್ಲೊ. 21 ತೆ ಮಾಜ್ಯಾ ಬಿಡಾರಾಚ್ಯಾ ಮದ್ದಿ, ನಿಪ್ವುನ್ ಥವ್ಲೊ, ಚಾಂದಿ ಅಂಗಿಚ್ಯಾ ಬುಡಿ ಹಾಯ್ ಖರೆಚ್ ಬಿ ಮಿಯಾ ಅಸ್ಲೆ ಕಾಮ್ ಕರುನ್ ಇಜ್ರಾಯೆಲಾಂಚ್ಯಾ ಸರ್ವೆಸ್ಪರ್ ದೆವಾಕ್ ವಿರೊಧ್ ಪಾಪ್ ಕರ್ಲೊ" ಮನುನ್ ಜವಾಬ್ ದಿಲ್ಯಾನ್. 22 ತನ್ನಾ ಜೊಶ್ವಾನ್ ಆಳಾಕ್ನಿ ಧಾಡ್ತಾನಾ, ತೆನಿ ಪಳುನ್ಗೆತ್ ಜಾವ್ನ್ ಬಿಡಾರಾತ್ ಬಗ್ತಾನಾ, ಝಗೊ ಪುರುನ್ ಥವಲ್ಲೊ ಅನಿ ಚಾಂದಿ ತೆಚ್ಯಾ ಬುಡಿ ಹೊತ್ತಿ. 23 ತೆನಿ ತೆ ಘೆವ್ನ್ ಜೊಶ್ವಾ ಅನಿ ಇಜ್ರಾಯೆಲ್ ಲೊಕಾ ಹೊತ್ತ್ಯಾಕ್ಡೆ ಯೆವ್ನ್ ಸರ್ವೆಸ್ಪರಾಚ್ಯಾ ಇದ್ರಾಕ್ ಥವ್ಲ್ಯಾನಿ. 24 ಜೊಶ್ವಾನ್ ಅನಿ ಹುರಲ್ಲ್ಯಾ ಇಜ್ರಾಯೆಲ್ ಲೊಕಾನಿ ಜೆರಹಾಚೊ ಲೆಕ್ ಆಕಾನಾಕ್, ತ್ಯಾ ಚಾಂದಿಕ್, ಝಗ್ಯಾಕ್, ಅನಿ ಸೊನ್ಯಾಚೆ ಪೈಸೆ, ತೆಚಿ ಲೆಕಾ, ಲೆಕಿಯಾ, ಗೊರಾಡೊರಾ, ಗಾಡ್ವಾ, ಬಕ್ರಿ ಶೆಳಿಯಾ ಅನಿ ತೆಚೆ ಬಿಡಾರ್ ಸಗ್ಳೆಚ್ ಘೆವ್ನ್ ಅಕೊರಿಚ್ಯಾ ಖಡ್ಡ್ಯಾಕ್ ಗೆಲೆ. 25 ಥೈ ಜೊಶ್ವಾನ್ ತೆಕಾ, ತಿಯಾ ಕಶ್ಯಾಕ್ ಅಮ್ಕಾ ತರಾಸಾತ್ ಘಾಟ್ಲೆಯ್, ಅತ್ತಾ ತುಕಾ ಸರ್ವೆಸ್ಪರ್ ತರಾಸ್ ದಿತಾ, ಮನ್ತಾನಾ ಸಗ್ಳ್ಯಾ ಇಜ್ರಾಯೆಲ್ ಲೊಕಾನಿ ತೆಕಾ ಗುಂಡ್ಯಾನಿ ಮಾರುನ್ ಜಿವ್ ಕಾಡ್ಲ್ಯಾನಿ, ಅನಿ ತೆಕಾ ಸಮಂದ್ ಪಡಲ್ಲ್ಯಾ ಸಗ್ಳ್ಯಾಕ್ನಿ ಗುಂಡೆ ಮಾರುನ್ ಆಗಿನ್ ಜಾಳ್ವುಲ್ಯಾನಿ. 26 ತೆಚ್ಯಾ ವರ್‍ತಿ ಗುಂಡ್ಯಾಂಚೊ ಗುಂಪೊ ಘಾಟ್ಲ್ಯಾನಿ, ತೊ ಆಜುನ್ ಪತರ್ಬಿ ಹಾಯ್, ಸರ್ವೆಸ್ಪರಾಚೊ ರಾಗ್ ಕಮ್ಮಿ ಹೊಲೊ, ಹೆಚ್ಯಾ ವೈನಾ ತ್ಯಾ ಜಾಗ್ಯಾಕ್ ಅಜುನ್ ಪತರ್ಬಿ ಅಕೊರಿಚೊ ಖಡ್ಡೊ ಮನ್ತಲೆ ನಾವ್ ಹಾಯ್.