1 ಸರ್ವೆಸ್ಪರಾನ್ ಇಜ್ರಾಯೆಲಾಂಚ್ಯಾ ಭೊತ್ಯಾನಿ ಹೊತ್ತ್ಯಾ ವಿರೊದಿಕ್ನಿ ನಾಶ್ ಕರುನ್ ತೆಂಕಾ ಆರಾಮ್ ಕರ್ಲ್ಯಾನ್, ಲೈ ದಿಸಾಂಚ್ಯಾ ಮಾನಾ ಜೊಶ್ವಾ ದಿಸ್ ಭರಲ್ಲೊ ಮ್ಹಾತಾರೊ ಹೊಲೊ. 2 ತೆನಿ ಇಜ್ರಾಯೆಲಾಂಚ್ಯಾ ಜಾಂನ್ತ್ಯಾ ಧನಿಯಾಕ್ನಿ, ನ್ಯಾಯ್ ಕರ್‍ತಲ್ಯಾಕ್ನಿ, ಅಧಿಕಾರಿಯಾಕ್ನಿ ಅನಿ ಸಗ್ಳ್ಯಾ ಇಜ್ರಾಯೆಲ್ ಲೊಕಾಕ್ನಿ ಅಪ್ನಾಕ್ಡೆ ಬಲ್ವುನ್, ತೆಂಕಾ, ಮಿಯಾ ಲೈ ಮ್ಹಾತಾರೊ ಹೊಲಾ, 3 ತುಮ್ಚೊ ದೆವ್ ಸರ್ವೆಸ್ಪರಾನ್ ತುಮ್ಚ್ಯಾ ಸಾಟ್ನಿ ಲೊಕಾಕ್ನಿ ಕರಲ್ಲೆ ಸಗ್ಳೆಬಿ ತುಮಿ ಸಗ್ಳ್ಯಾನಿ ಬಗಟ್ಲ್ಯಾಸಿ, ಹೊಯ್, ತುಮ್ಚ್ಯಾ ಸಾಟ್ನಿ ಝಗ್ಡೊ ಕರಲ್ಲೊ ತುಮ್ಚೊ ದೆವ್ ಸರ್ವೆಶ್ವರುಚ್. 4 ಮಿಯಾ ಜೊರ್ದಾನಾಕ್ನಾ ದಿಸ್ ಬುಡ್ತಲ್ಯಾ ದಿಕ್ಕಾಚ್ಯಾ ಸಮುಂದರಾ ಪತರ್ ಹೊತ್ತ್ಯಾ ಲೊಕಾಕ್ನಿ ಮರಲ್ಲ್ಯಾಂಚೊ ಅನಿ ಝಿತ್ತೆ ಹೊತ್ತ್ಯಾಂಚೊ ತುಮ್ಚ್ಯಾ ವಾಟ್ಯಾಕ್ ಸ್ವತಾಕ್ ಮನುನ್ ದಿಲಾ. 5 ತುಮ್ಚ್ಯಾ ಡೊಳ್ಯಾಂಚೆ ಇದ್ರಾಕುಚ್ ತುಮ್ಚೊ ಸರ್ವೆಸ್ಪರ್ ದೆವ್ ತೆಂಕಾ ಭಾಯ್ರ್ ಘಾಲ್ತಾ, ತೆಜ್ಯಾ ಗೊಸ್ಟಿ ಸಾರ್ಕೆ ತೆಂಚೊ ದೆಶ್ ತುಮಿ ಸ್ವತಾಚೊ ಕರುನ್ಗೆತ್ಯಾಸಿ. 6 ಮೊಯ್ಜೆಚೆ ಖಾಯ್ದೆ ಅನಿ ನೆಮಾ ಬರ್ಯಾ ಮನಾನ್ ಪಾಳಾ, ತೆ ಸೊಡುನ್ ಉಜ್ವ್ಯಾಕ್ ನಾತರ್ ಡಾವ್ಯಾಕ್ ಪರ್ತು ನಕಾಸಿ. 7 ಹುರಲ್ಲ್ಯಾ ಹ್ಯಾ ದುಸ್ರ್ಯಾ ಲೊಕಾಂಚೆ ವಾಂಗ್ಡಿ ಹೊವ್ನ್ ಕಾಸಿ, ತೆಂಚ್ಯಾ ದೆವತೆಂಚಿ ನಾಂವಾ ಸಾಂಗುನ್ ಆರಾದನ್ಬಿ ಅನಿ ಆನ್ಬಿ ಕರುನಕಾಸಿ, ತೆಂಕಾ ಡಬ್ಬ್ ಪಡುನ್ ಆರಾದನ್ಬಿ ಕರುನಕಾಸಿ. 8 ಅತ್ತಾ ಪತರ್ ಕಸೆ ಹಾಸಿ ತಸೆಚ್ ಹೆಚ್ಯಾನ್ ಫಿಡೆಬಿ ತುಮ್ಚ್ಯಾ ಸರ್ವೆಸ್ಪರ್ ದೆವಾಕುಚ್ ಆರಾದನ್ ಕರಾ. 9 ಸರ್ವೆಸ್ಪರಾನ್ ಮೊಟಿ ಪರಾಕರ್ಮಿಯಾ ಹೊವ್ನ್ ಹೊತ್ತ್ಯಾ ಲೊಕಾಕ್ನಿ ತುಮ್ಚ್ಯಾ ಇದ್ರಾಕ್ನಾ ಪಳ್ಸುನ್ ಘಾಟ್ಲಾ, ಆಜ್ ಪತರ್ ಎಕ್ಲೊಬಿ ತುಮ್ಚ್ಯಾ ಇದ್ರಾಕ್ ಟಕ್ಲೆ ಉಕ್ಲುನ್ ಇಬೆ ರಾವ್ಕ್ ನಾ ನ್ಹಯ್. 10 ತುಮ್ಚೊ ಸರ್ವೆಸ್ಪರ್ ದೆವ್ ಅಪ್ನಿ ಗೊಸ್ಟ್ ದಿಲ್ಲ್ಯಾ ಸಾರ್ಕೆ ತುಮ್ಚ್ಯಾ ಸಾಟ್ನಿ ಝಗ್ಡೊ ಕರಲ್ಲ್ಯಾ ಸಾಟ್ನಿ ತುಮ್ಚ್ಯಾತ್ಲೊ ಎಕ್ಲೊ ಹಾಜಾರ್ ಲೊಕಾಕ್ನಿ ಪಳ್ಸುಕ್ ಹೊಲೆ. 11 ಅಸೆ ರ್‍ಹಾತಾನಾ ತುಮ್ಚ್ಯಾ ತುಮ್ಚ್ಯಾ ಮನಾಕ್ನಿ ಲೈ ಹುಶ್ಯಾರ್ಕಿನ್ ರಾಕುನ್ಗೆವ್ನ್ ತುಮ್ಚೊ ದೆವ್ ಸರ್ವೆಸ್ಪರಾಕುಚ್ ಪ್ರೆಮ್ ಕರಾ. 12 ತುಮ್ಚ್ಯಾ ದೆವಾಕ್ ವಿರೊದ್ ಹೊವ್ನ್ ತುಮ್ಚ್ಯಾ ಮದ್ದಿ ಹೊತ್ತ್ಯಾ ಲೊಕಾಂಚ್ಯಾ ವಾಂಗ್ಡಾ ಮಿಳುನ್ ತೆಂಚ್ಯಾಕ್ನಾ ಚೆಡ್ವಾ, ಝಿಲ್ಗೆ ದಿವ್ನ್-ಘೆವ್ನ್ ಸಮಂದ್ ಥವ್ನ್ ಘೆಟ್ಲ್ಯಾರ್, 13 ತುಮ್ಚೊ ಸರ್ವೆಸ್ಪರ್ ತೆಂಕಾ ತುಮ್ಚ್ಯಾ ಇದ್ರಾಕ್ನಾ ಧಾಡಿಚ್ ನಾ ಮನ್ತಲೆ ಕಳ್ವುನ್ ಘೆವಾ, ತುಮ್ಕಾ ತೆನಿಚ್ ಪಾಸೊ ಅನಿ ಡೊಂಬ್ ಹೊವ್ನ್ ಹಾತ್, ತೆನಿ ಪಕ್ಡಿತ್ ಮಾರ್ತಲೊ ಬಾರ್ಕೊಲ್ ಅನಿ ಡೊಳ್ಯಾಕ್ ಟೊಪ್ತಲ್ಯಾ ಕಾಟ್ಯಾ ಸಾರ್ಕೆ ಹಾತ್, ಆಕ್ರಿಕ್ ಸರ್ವೆಸ್ಪರ್ ದೆವಾನ್ ತುಮ್ಕಾ ದಿಲ್ಲ್ಯಾ ಹ್ಯಾ ಬರ್ಯಾ ದೆಶ್ಯಾತ್ ತುಮಿ ರಾಯ್ನ್ಯಾಸಿ. 14 ಸಗ್ಳಿ ಜಗಾಚಿ ಲೊಕಾ ಜಾತಲಿ ವಾಟುಚ್ ಮಿಯಾ ಅತ್ತಾ ಧರುಚೆ ಹೊಲಾ, ತುಮ್ಚೊ ದೆವ್ ಸರ್ವೆಸ್ಪರಾನ್ ತುಮ್ಚ್ಯಾ ವಿಶಯಾತ್ ಸಾಂಗಲ್ಲಿ ಆಶಿರ್ವಾದಾ ಎಕ್ಬಿ ಹಾಳ್ ಹೊವ್ಕ್ ನಾ, ಸಗ್ಳೆಬಿ ಫುರಾ ಹೊಲಾ ಮನ್ತಲೆ ತುಮ್ಕಾ ಕಳುಕ್ ಫಿರೆ ನ್ಹಯ್. 15 ತುಮ್ಚೊ ಸರ್ವೆಸ್ಪರ್ ದೆವ್ ಅಪ್ನಾಚ್ಯಾ ಗೊಸ್ಟಿಸಾರ್ಕೆ ಅತ್ತಾ ತುಮ್ಕಾ ಸಗ್ಳ್ಯಾ ನಮುನಿ ಬರೆ ಕರಲ್ಲ್ಯಾ ಸಾರ್ಕೆಚ್, ತುಮ್ಚ್ಯಾ ವರ್‍ತಿ ಸಗ್ಳ್ಯಾ ನಮುನ್ಯಾನ್ ಬುರ್ಸೆಪಾನ್ ಯೆಯ್ ಸಾರ್ಕೆ ಕರುನ್, ಅಪ್ನಿ ದಿಲ್ಲ್ಯಾ ಹ್ಯಾ ಬರ್ಯಾ ದೆಶ್ಯಾತ್ನಾ ತುಮ್ಕಾ ಕಾಡುನ್ ನಾಶ್ ಕರ್ತಾ. 16 ತುಮ್ಚ್ಯಾ ಸರ್ವೆಸ್ಪರ್ ದೆವಾಚ್ಯಾ ಕರಾರಾಕ್ನಿ ಚುಕುನ್ ದುಸ್ರ್ಯಾ ದೆವಾಕ್ನಿ ಡಬ್ಬ್ ಪಡುನ್ ಆರಾದನ್ ಕರ್ಲ್ಯಾರ್, ತುಮ್ಚ್ಯಾ ವರ್‍ತಿ ಸರ್ವೆಸ್ಪರಾಚೊ ರಾಗ್ ಪೆಟ್ತಾ, ಅನಿ ತೆನಿ ದಿಲ್ಲ್ಯಾ ಬರ್ಯಾ ದೆಶ್ಯಾತ್ನಾ ತುಮಿ ಕಾಡುನ್ ಟಾಕುನ್ ಹೊವ್ನ್ ಲಗ್ಗುನಾ ನಾಶ್ ಹೊತ್ಯಾಸಿ, ಮಟ್ಲ್ಯಾನ್.