1 ಜೊಶ್ವಾನ್ ರುಬೆನ್ಯಾ ಅನಿ ಗಾದಾಂಚ್ಯಾ ಅನಿ ದಿಸ್ ಉಗಾವ್ತಲ್ಯಾ ದಿಕ್ಕಾಚ್ಯಾ ಮನಸ್ಸೆಚ್ಯಾ ಘರಾನಾಚ್ಯಾ ಲೊಕಾಕ್ನಿ ಬಲ್ವುಕ್ ಲಾವ್ನ್ ತೆಂಕಾ, 2 ತುಮಿ ಸರ್ವೆಸ್ಪರಾಚೊ ಸೆವಕ್ ಮೊಯ್ಜೆಚ್ಯಾ ಸಗ್ಳ್ಯಾ ಹುಕುಮಾಂಚ್ಯಾ ಸಾರ್ಕೆ ಚಲ್ಲ್ಯಾಸಿ, ಅನಿ ಮಿಯಾ ಹುಕುಮ್ ದಿಲ್ಲೆ ಸಗ್ಳೆ ಕರ್ಲ್ಯಾಸಿ. 3 ಹ್ಯಾ ಎಳಾರ್ ತುಮಿ ತುಮ್ಚ್ಯಾ ಭಾವಾಂಚ್ಯಾಕ್ನಾ ಧುರ್ ಹೊಯ್ನಸ್ತಾನಾ, ತುಮ್ಚ್ಯಾ ಸರ್ವೆಸ್ಪರ್ ದೆವಾಚಿ ಹುಕುಮಾ ಲೈ ಬರ್ಯಾ ಮನಾನ್ ಪಾಳಿತ್ ಯೆಲ್ಯಾಸಿ. 4 ಅತ್ತಾ ತುಮ್ಚ್ಯಾ ಸರ್ವೆಸ್ಪರ್ ದೆವಾನ್, ಅಪ್ಲ್ಯಾ ಗೊಸ್ಟಿ ಸಾರ್ಕೆ ತುಮ್ಚ್ಯಾ ಭಾವಾಕ್ನಿ ಸಮಾಧಾನ್ ದಿಲ್ಲ್ಯಾ ಸಾಟ್ನಿ, ತೆಜೊ ಸೆವಕ್ ಮೊಯ್ಜೆನ್ ಜೊರ್ದಾನಾಚ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ತುಮ್ಕಾ ದಿಲ್ಲ್ಯಾ ಜಾಗ್ಯಾಕ್ ತುಮ್ಚ್ಯಾ ಘರಾಕ್ನಿ ಜಾವ್ಕ್ ಹೊತಾ. 5 ಖರೆ ಸರ್ವೆಸ್ಪರಾಚೊ ಸೆವಕ್ ಮೊಯ್ಜೆನ್ ತುಮ್ಕಾ ದಿಲ್ಲ್ಯಾ ಕರಾರಾಂಚಿ ನಿಯಮಾ ಹುಶ್ಯಾರ್ಕಿನ್ ಪಾಳಾ, ತಸೆಚ್ ತುಮ್ಚೊ ದೆವ್ ಸರ್ವೆಸ್ಪರಾಕ್ ಪ್ರೆಮ್ ಕರುನ್, ತೆಜ್ಯಾ ಸಗ್ಳ್ಯಾ ವಾಟೆನುಚ್ ಚಲುನ್, ತೆಚಿ ಹುಕುಮಾ ಪಾಳುನ್, ತೆಜ್ಯಾ ವರ್‍ತಿ ವಿಶ್ವಾಸ್ ಥವ್ನ್, ಫುರಾ ಮನಾನ್ ಅನಿ ಕಾಳ್ಜಾನ್ ತೆಕಾ ಆರಾದನ್ ಕರಾ. 6 ಮನುನ್, ಜೊಶ್ವಾನ್ ತೆಂಕಾ ಆಶಿರ್ವಾದ್ ದಿವ್ನ್ ಧಾಡ್ಲ್ಯಾನ್, ತೆನಿ ಅಪ್ಲ್ಯಾ ಘರಾಕ್ನಿ ಗೆಲೆ. 7 ಮೊಯ್ಜೆನ್ ಮನಸ್ಸೆಚ್ಯಾ ಘರಾನಾಚ್ಯಾ ಅರ್ದ್ಯಾ ಜೊರ್ದಾನಾಚ್ಯಾ ಲೊಕಾಕ್ನಿ ದಿಸ್ ಉಗಾವ್ತಲ್ಯಾ ದಿಕ್ಕಾಕ್, ಅನಿ ಹುರಲ್ಲ್ಯಾ ಅರ್ದ್ಯಾ ಲೊಕಾಕ್ನಿ ಜೊಶ್ವಾನ್ ಜೊರ್ದಾನ್ ನ್ಹಯಿಚ್ಯಾ ದಿಸ್ ಬುಡ್ತಲ್ಯಾ ದಿಕ್ಕಾಕ್ ದುಸ್ರ್ಯಾ ಕುಳಿಚ್ಯಾ ಲೊಕಾಂಚ್ಯಾ ವಾಂಗ್ಡಾ ವಾಟೊ ದಿಲ್ಯಾನ್, ತವ್ಡೆಚ್ ನಸ್ತಾನಾ ಜೊಶ್ವಾನ್ ತೆಂಕಾ ಆಶಿರ್ವಾದ್ ದಿವ್ನ್ ತೆಂಚ್ಯಾ ಸ್ವತ್ಯಾಚ್ಯಾ ಜಾಗ್ಯಾಕ್ನಿ ಧಾಡ್ತಾನಾ, 8 ತುಮಿ ಲೈ ವಾಡ್ವಳ್ಕಿ ಹೊವ್ನ್ ಗೊರಾ, ಬಕ್ರಿ, ಸೊನೆ, ಚಾಂದಿ, ಲೊಂಗಾಟ್, ತಾಂಬೆ, ಕಪ್ಡೆ ಹಿ ಸಗ್ಳಿ ಸಾಮಾನಾ ಘೆವ್ನ್ ತುಮ್ಚ್ಯಾ ತುಮ್ಚ್ಯಾ ಘರಾಕ್ನಿ ಜಾವಾ, ಅನಿ ತುಮ್ಚ್ಯಾ ವಿರೊದಿಯಾಂಚ್ಯಾಕ್ನಾ ಕಾಡುನ್ಗೆಟಲ್ಲ್ಯಾ ಸಾಮಾನಾತ್ನಿ ತುಮ್ಚ್ಯಾ ಭಾವಾಕ್ನಿಬಿ ವಾಟೊ ದಿವಾ ಮಟ್ಲ್ಯಾನ್.

9 ತನ್ನಾ ರುಬೆನ್ಯಾನಿ, ಗಾದಾನಿ ಅನಿ ಮನಸ್ಸೆಚ್ಯಾ ಘರಾನಾಚಿ ಅರ್ದಿ ಲೊಕಾ ಕಾನಾನ್ ದೆಶ್ಯಾಚ್ಯಾ ಶಿಲೊವಿತ್ ಹೊತ್ತ್ಯಾ ಇಜ್ರಾಯೆಲ್‌ಕಾರಾಕ್ನಿ ಸೊಡುನ್ ಸರ್ವೆಸ್ಪರಾಚ್ಯಾ ಹುಕುಮಾ ಸಾರ್ಕೆ, ಮೊಯ್ಜೆಕ್ನಾ ಅಪ್ನಾಕ್ ಸ್ವತಾಕ್ ಗಾವಲ್ಲ್ಯಾ ಗಿಲ್ಯಾದ್ ದೆಶ್ಯಾಕ್ ಗೆಲ್ಯಾನಿ.

10 ರುಬೆನ್ಯ, ಗಾದ್ ಅನಿ ಮನಸ್ಸೆಚ್ಯಾ ಘರಾನಾಚಿ ಅರ್ದಿಲೊಕಾ ಕಾನಾನ್ ದೆಶಾಚ್ಯಾ ಗಲಿಲೊತ್ ಜೊರ್ದಾನ್ ನ್ಹಯಿಚ್ಯಾ ದಿಸ್ ಬುಡ್ತಲ್ಯಾ ದಿಕ್ಕಾಚ್ಯಾ ದಂಡೆಕ್ ಪಾವಲ್ಲ್ಯಾ ತನ್ನಾ ಥೈ ಮೊಟ್ಟೊ ಅನಿ ಸುಂದರ್ ಬಲಿ ಭೆಟ್ವುತಲೊ ಕಟ್ಟೊ ಭಾಂದ್ಲ್ಯಾನಿ. 11 ರುಬೆನ್ಯ, ಗಾದ್ ಅನಿ ಮನಸ್ಸೆಚ್ಯಾ ಅರ್ದ್ಯಾ ಲೊಕಾನಿ ಇಜ್ರಾಯೆಲಾಚ್ಯಾ ಕಾನಾನಾಚ್ಯಾ ಗಲಿಲೊತ್ ಜೊರ್ದಾನ್ ನ್ಹಯಿಚ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾಚ್ಯಾ ದಂಡೆಕ್ ಬಲಿಭೆಟ್ವುತಲೊ ಕಟ್ಟೊ ಭಾಂದ್ಲಾತ್ ಮನ್ತಲಿ ಖಬರ್ ಹುರಲ್ಲ್ಯಾ ಇಜ್ರಾಯೆಲ್‌ಕಾರಾಕ್ನಿ ಕಳಲ್ಲ್ಯಾ ತನ್ನಾ, 12 ಹೆ ಇಜ್ರಾಯೆಲ್ ಲೊಕಾನಿ ಆಯ್ಕಲ್ಲ್ಯಾ ತನ್ನಾ ತೆನಿ ಸಗ್ಳ್ಯಾನಿ ಶಿಲೊವಿತ್ ಗೊಳಾಹೊವ್ನ್, ತೆಂಚ್ಯಾ ವಾಂಗ್ಡಾ ಲಡಾಯಿಕ್ ಜಾವ್ಕ್ ತಯಾರ್ ಹೊಲ್ಯಾನಿ. 13 ತೆಜ್ಯಾ ಅದ್ದಿ ಗಿಲ್ಯಾದಾತ್ ಹೊತ್ತ್ಯಾ ರುಬೆನ್ಯ, ಗಾದ್ ಅನಿ ಮನಸ್ಸೆಚ್ಯಾ ಘರಾನಾಚ್ಯಾ ಅರ್ದ್ಯಾ ಲೊಕಾಂಚ್ಯಾಕ್ಡೆ ಮೊಟೊ ಯಾಜಕ್ ಎಲಿಯಾಜರಾಚೊ ಲೆಕ್ ಫಿನೆಹಾಸನಾಕ್, 14 ಅನಿ ಘರಾನಾಕ್ ಎಕ್ಲ್ಯಾ ಸಾರ್ಕೆ ಧಾ ಮುಖಂಡಾಂಚ್ಯಾಕ್ನಿ ಧಾಡ್ಲ್ಯಾನಿ, ಹ್ಯಾತುರ್ಲೊ ಹರ್ ಎಕ್ಲೊಬಿ ಅಪ್ನಾ ಅಪ್ನಾಚ್ಯಾ ಕುಳಿಯಾಂಚ್ಯಾ ಕುಟ್ಮಾಕ್ನಿ ಮುಖಂಡ್ ಹೊಲ್ಲೊ ಹೊತ್ತೊ. 15 ಹೆನಿ ಗಿಲ್ಯಾದಾತ್ಲ್ಯಾ ರುಬೆನ್ಯ, ಗಾದ್, ಅನಿ ಮನಸ್ಸೆಚ್ಯಾ ಘರಾನಾಚ್ಯಾ ಅರ್ದ್ಯಾ ಲೊಕಾಂಚ್ಯಾಕ್ಡೆ ಯೆವ್ನ್, 16 ಸರ್ವೆಸ್ಪರ್ ದೆವಾಚ್ಯಾ ಸಗ್ಳ್ಯಾ ಬೈಟೆಕಾಚಿ ಗೊಸ್ಟ್ ಆಯ್ಕಾ, ತುಮಿ ಇಜ್ರಾಯೆಲಾಚ್ಯಾ ದೆವಾಕ್ ವಿರೊಧ್ ಅಸ್ಲಿ ಚುಕ್ ಕರ್ಲ್ಯಾಸಿ, ತುಮ್ಚ್ಯಾ ಸಾಟ್ನಿ ಬಲಿಭೆಟ್ವುತಲೊ ಕಟ್ಟೊ ಭಾಂದುನ್ಗೆಟಲ್ಲ್ಯಾ ಸಾಟ್ನಿ, ತುಮಿ ಸರ್ವೆಸ್ಪರಾಕ್ ಪಸ್ವಲ್ಲೆ ಸಾರ್ಕೆ ಹೊಲೆ, ಅನಿ ತುಮಿ ಆಜ್ ಸರ್ವೆಸ್ಪರಾಕ್ ವಿರೊದ್ ಹೊಲೆ ಸಾರ್ಕೆ ಹೊಲೆ. 17 ಅಮಿ ಪೆಗುರಾತ್ ಚುಕಿದಾರ್ ಹೊಲ್ಲೆ ಫಿರೆ ಹೊವ್ಕ್ ನಾ ಕಾಯ್, ತೆಜ್ಯಾ ವೈನಾ ಸರ್ವೆಸ್ಪರಾಚ್ಯಾ ತಾಂಡ್ಯಾಕ್ ರೊಗ್ ಯೆಲ್ಯಾರ್ಬಿ ಅಮಿ ಅಜುನ್ಬಿ ತ್ಯಾತುರ್ನಾ ಫುರಾ ನಿತಳ್ ಹೊವ್ಕ್ ನಾವ್. 18 ಅತ್ತಾ ತುಮಿ ಅನಿ ಪರ್‍ತುನ್ ಸರ್ವೆಸ್ಪರಾಕ್ ಢಕ್ಲುನ್ ಟಾಕ್ಲ್ಯಾಸಿ ಕಾಯ್, ತುಮಿ ಆಜ್ ಸರ್ವೆಸ್ಪರಾಕ್ ವಿರೊಧ್ ಉಟ್ಲ್ಯಾರ್, ಉದ್ದ್ಯಾಚ್ ಸರ್ವೆಸ್ಪರಾಚೊ ಆಗಿಚೊ ರಾಗ್ ಇಜ್ರಾಯೆಲಾಚ್ಯಾ ಸಗ್ಳ್ಯಾ ತಾಂಡ್ಯಾ ವರ್‍ತಿ ಪೆಟ್ತಾ. 19 ತುಮ್ಚೊ ದೆಶ್ ನಿತಳ್ ನಾ ಸಾರ್ಕೆ ದಿಸ್ಲ್ಯಾರ್, ಸರ್ವೆಸ್ಪರಾಚಿ ಗುಡಿ ಹೊತ್ತ್ಯಾ ತೆಜ್ಯಾ ಸ್ವತ್ಯಾಚ್ಯಾ ಸಿಮೆಕ್ ಯೆವ್ನ್ ಅಮ್ಚ್ಯಾ ಮದ್ದಿ ಹೊತ್ತೊ ವಾಟೊ ಕಾಡುನ್ ಘೆವಾ, ಅಮ್ಚ್ಯಾ ಸರ್ವೆಸ್ಪರ್ ದೆವಾಚ್ಯಾ ಬಲಿ ಭೆಟ್ವುತಲ್ಯಾ ಕಟ್ಟ್ಯಾಕ್ ಸೊಡುನ್ ತುಮ್ಚ್ಯಾ ಸಾಟ್ನಿ ಅನಿ ಎಕ್ ಕಟ್ಟೊ ಭಾಂದುನ್ಗೆವ್ನ್ ಸರ್ವೆಸ್ಪರಾಕ್ ಅನಿ ಅಮ್ಕಾ ವಿರೊದ್ ಹೊವ್ ನಕಾಸಿ. 20 ಜೆರಹಾಚೊ ಲೆಕ್ ಆಕಾನಾನ್ ಸರ್ವೆಸ್ಪರಾಚಿ ಆಸ್ತಿ ಚೊರುನ್ಗೆವ್ನ್ ಚುಕಿದಾರ್ ಹೊಲ್ಲ್ಯಾ ತನ್ನಾ, ಸರ್ವೆಸ್ಪರಾಚೊ ರಾಗ್ ಇಜ್ರಾಯೆಲಾಂಚ್ಯಾ ಸಗ್ಳ್ಯಾ ತಾಂಡ್ಯಾವರ್‍ತಿ ಯೆಲೊ, ತೆಜ್ಯಾ ಪಾಪಾಕ್ ಲಾಗುನ್ ತೆಜ್ಯಾ ವಾಂಗ್ಡಾ ಲೈ ಲೊಕಾ ಮರ್ತಲೆ ಹೊಲೆ ನ್ಹಯ್ ಮಟ್ಲ್ಯಾನ್. 21 ತನ್ನಾ ರುಬೆನ್ಯ, ಗಾದ್, ಅನಿ ಮನಸ್ಸೆಚ್ಯಾ ಘರಾನಾಚ್ಯಾ ಅರ್ದ್ಯಾ ಲೊಕಾನಿ ಇಜ್ರಾಯೆಲಾಂಚ್ಯಾ ಮುಖಂಡಾಕ್ನಿ ಅಸೆ ಜವಾಬ್ ದಿಲ್ಯಾನಿ, 22 ಮೊಹನ್ನತ್ ದೆವ್ ಸರ್ವೆಸ್ಪರ್ ಹೆಕಾ ಸಾಕ್ಷಿ ಹೊವ್ನ್ ಹಾಯ್, ತ್ಯಾ ಮೊಹನ್ನತ್ ದೆವ್ ಸರ್ವೆಸ್ಪರಾಕ್ ಹೆ ಗೊತ್ತ್ ಹಾಯ್, ಅನಿ ಇಜ್ರಾಯೆಲ್‌ಕಾರಾಕ್ನಿ ಕಳ್ತಾ, ಅಮಿ ಚುಕಿ ದಾರ್ ಅನಿ ಸರ್ವೆಸ್ಪರಾಕ್ ವಿರೊಧ್ ಪಾಪ್ ಕರಲ್ಲೆ ಹೊಲ್ಯಾರ್ ತೊ ಆಜುಚ್ ಅಮ್ಚಿ ಜಿವಾ ಕಾಡುಂದಿತ್, 23 ಅಮಿ ಆಂಗ್ ಬಲಿ ಅನಿ ಸಮಾಧಾನಾಚಿ ಬಲಿ ದಾನ್ ಅನಿ ಕಾನಿಕಾ ಹೆ ಸಗ್ಳೆ ಭೆಟ್ವುಕ್ ಸರ್ವೆಸ್ಪರಾಚ್ಯಾ ವಿರೊಧ್ ಹೊವ್ನ್ ಹ್ಯೊ ಬಲಿಚೊ ಕಟ್ಟೊ ಭಾಂದಲ್ಲೊ ಹೊಲ್ಯಾರ್ ಸರ್ವೆಶ್ವರುಚ್ ಆಮ್ಕಾ ಶಿಕ್ಷ್ಯಾ ದಿಂವ್ದಿತ್. 24 ನಾ, ಅಮಿ ಎಕ್ ವಿಶೆಸ್ ಉದ್ದೆಶಾ ವೈನಾ ಹೆ ಕಾಮ್ ಕರ್ಲಾಂವ್ ತವ್ಡೆಚ್, ಫಿಡೆ ತುಮ್ಚಿ ಪೊರಾ ಅಮ್ಚ್ಯಾ ಪೊರಾಕ್ನಿ, ಇಜ್ರಾಯೆಲಾಂಚ್ಯಾ ದೆವಾಕ್ನಾ ತುಮ್ಕಾ ಕಾಯ್ ಸಮಂದ್ ಹಾಯ್, 25 ರುಬೆನ್ಯಾನು, ಅನಿ ಗಾದಾನು, ಸರ್ವೆಸ್ಪರಾನ್ ತುಮ್ಚ್ಯಾ ಅನಿ ಅಮ್ಚ್ಯಾ ಮದ್ದಿ ಹಿ ಜೊರ್ದಾನ್ ನ್ಹಯ್ ಘಡ್ ಕರುನ್ ಥವ್ಲಾ, ಸರ್ವೆಸ್ಪರಾಕ್ಡೆ ತುಮ್ಕಾ ಕಾಯ್ಬಿ ವಾಟೊ ನಾ, ಮನುನ್ ತುಮ್ಚಿ ಪೊರಾ ಅಮ್ಚ್ಯಾ ಪೊರಾಕ್ನಿ ದೆವಸ್ಪಾನಾತ್ನಾ ಧುರ್ ಕರ್ತಿಲ್ ಮನುನ್ ಭಿಂಯಾಲ್ಯಾಂವ್, 26 ಹ್ಯಾ ಕಾರನಾ ಸಾಟ್ನಿ ಎಕ್ ಬಲಿ ಭೆಟ್ವುತಲೊ ಕಟ್ಟೊ ಭಾಂದುಂವಾ ಯೆವಾ ಮನುನ್ ಅಮಿ ಭಾಂದ್ಲಾಂವ್, ತೆ ಸಗ್ಳೆ ಆಂಗ್ ಬಲಿ ಭೆಟ್ವುಕ್ ನ್ಹಯ್. 27 ಖರೆ ಸರ್ವೆಸ್ಪರಾಚ್ಯಾ ಇದ್ರಾಕ್ ಸಗ್ಳೆ ಆಂಗ್ ಬಲಿ, ಸಮಾದಾನಾಚಿ ಬಲಿ, ಹೆ ಸಗ್ಳೆ ಭೆಟ್ವುನ್ ಆರಾದನ್ ಕರುಕ್ ಅಮ್ಕಾಬಿ ಹಕ್ಕ್ ಹಾಯ್ ಮನ್ತಲ್ಯಾಕ್ ಹೆಚ್ ತುಮ್ಕಾ ಅನಿ ಅಮ್ಕಾ, ತುಮ್ಚ್ಯಾ ಪಿಳ್ಗಿಕ್ ಅನಿ ಅಮ್ಚ್ಯಾ ಪಿಳ್ಗಿಕ್ ಸಾಕ್ಷಿ ಹೊವ್ನ್ ರ್‍ಹಾತಾ, ಹೆಜ್ಯಾ ವೈನಾ ಫಿಡೆ ತುಮ್ಚ್ಯಾ ಪೊರಾನಿ ಅಮ್ಚ್ಯಾ ಪೊರಾಕ್ನಿ ಸರ್ವೆಸ್ಪರಾಕ್ಡೆ ತುಮ್ಕಾ ವಾಟೊ ನಾ ಮನುನ್ ಸಾಂಗುಕ್ ಆವ್ಕಾಸ್ ರ್‍ಹಾಯ್ನಾ. 28 ತೆನಿ ಫಿಡೆ ಅಮ್ಕಾ ಹೊಂವ್ದಿತ್ ಅಮ್ಚ್ಯಾ ಪಿಳ್ಗಿಕ್ ಹೊಂವ್ದಿತ್ ಅಸೆ ಸಾಂಗ್ಲ್ಯಾರ್ ಅಮಿ ತೆಂಕಾ, ಸರ್ವೆಸ್ಪರಾಚೊ ಬಲಿ ಭೆಟ್ವುತಲೊ ಕಟ್ಟೊ ಬಗಾ, ಅಮ್ಚ್ಯಾ ಪುರ್ವಜಾನಿ ಹೆ ಸಗ್ಳೆ ಆಂಗ್ ಬಲಿ ಭೆಟ್ವು ಸಾಟ್ನಿ ಭಾಂದುಕ್ನಾತ್, ಹೆ ಅಮ್ಚ್ಯಾ ಅನಿ ತುಮ್ಚ್ಯಾ ಮದ್ದಿ ಎಕ್ ಸಾಕ್ಷಿ ಹೊವ್ನ್ ಹಾಯ್, ಮನುನ್ ಸಾಂಗ್ತಾಂವ್. 29 "ಅಮ್ಚೊ ದೆವ್ ಸರ್ವೆಸ್ಪರಾಚ್ಯಾ ಗುಡಿಚ್ಯಾ ಇದ್ರಾಕ್ ಹೊತ್ತೊ ಬಲಿ ಭೆಟ್ವುತಲೊ ಕಟ್ಟೊ ಸೊಡುನ್ ಹೆ ಸಗ್ಳೆ ಆಂಗ್ ಬಲಿ ಭೆಟ್ವುತಲೆ, ಖಾನ್ ಭೆಟ್ವುತಲೆ, ಸಮಾದಾನಾಚಿ ಬಲಿ ಹೆ ಸಗ್ಳೆ ಭೆಟ್ವುಕ್, ಅನಿ ಎಕ್ ಬಲಿ ಭೆಟ್ವುತಲೊ ಕಟ್ಟೊ ಭಾಂದುನ್, ಸರ್ವೆಸ್ಪರಾಕ್ ವಿರೊದ್ ಚುಕಿದಾರ್ ಹೊವ್ನ್ ರ್‍ಹಾತಲೆ ನಕ್ಕೊ, ಅನಿ ಅಮ್ಕಾ ಕನ್ನಾಬಿ ತಸೆ ಹೊತಲೆ ನಕ್ಕೊ" ಮಟ್ಲ್ಯಾನಿ. 30 ಯಾಜಕ್ ಪಿನೆಹಾಸನ್ ಅನಿ ತೆಜ್ಯಾ ವಾಂಗ್ಡಾ ಯೆಲ್ಲಿ ಕುಳಿಯಾಂಚಿ ಮುಖಂಡಾ ಇಜ್ರಾಯೆಲಾಚಿ ಧನಿಯಾ ಹೆನಿ ರುಬೆನ್, ಗಾದ್ ಅನಿ ದಿಸ್ ಉಗಾವ್ತಲ್ಯಾ ದಿಕ್ಕಾಚ್ಯಾ ಮನಸ್ಸೆಚ್ಯಾ ಘರಾನಾಚ್ಯಾಂಚಿ ಬೊಲ್ನಿಯಾ ಆಯ್ಕುನ್ ಖುಶಿ ಹೊಲ್ಯಾನಿ. 31 ಮೊಟೊ ಯಾಜಕ್ ಎಲಿಯಾಜರಾಚೊ ಲೆಕ್ ಫಿನೆಹಾಸನಾನ್ ರುಬೆನ್, ಗಾದ್ ಅನಿ ಮನಸ್ಸೆಚ್ಯಾ ಘರಾನಾಚ್ಯಾಕ್ನಿ, "ತುಮಿ ಸರ್ವೆಸ್ಪರಾಕ್ ವಿರೊದ್ ಹೊವ್ನ್ ತಸ್ಲಿ ಚುಕ್ ಕರ್ಲ್ಯಾಸಿ, ತಸೆ ಹೊವ್ನ್ ತೊ ಅಮ್ಚ್ಯಾ ಮದ್ದಿ ಹಾಯ್ ಮನ್ತಲೆ ಅಮ್ಕಾ ಅತ್ತಾ ಕಳ್ಳೆ, ತಸೆ ಹೊವ್ನ್ ತುಮಿ ಇಜ್ರಾಯೆಲ್‌ಕಾರಾಕ್ನಿ ಸರ್ವೆಸ್ಪರಾಚ್ಯಾ ಶಿಕ್ಷ್ಯಾಚ್ಯಾ ಹಾತಿತ್ನಾ ಚುಕ್ವುಲ್ಯಾಸಿ" ಮಟ್ಲ್ಯಾನ್. 32 ಮೊಟೊ ಯಾಜಕ್ ಎಲಿಯಾಜರಾಚೊ ಲೆಕ್ ಫಿನೆಹಾಸನ್, ಧನಿಯಾ ಗಿಲ್ಯಾದ್ ಸಿಮೆತ್ ಹೊತ್ತೆ ರುಬೆನ್ಯಾ, ಗಾದ್ ಹೆಂಚ್ಯಾಕ್ನಾ ಕಾನಾನ್ ದೆಶ್ಯಾತ್ ಹೊತ್ತ್ಯಾ ಇಜ್ರಾಯೆಲಾಂಚ್ಯಾಕ್ಡೆ ಯೆವ್ನ್, ತೆಂಕಾ ಹಿ ಖಬರ್ ಸಾಂಗ್ತಾನಾ, 33 ತೆನಿ ಲೈ ಖುಶಿ ಹೊವ್ನ್ ದೆವಾಕ್ ಸ್ತುತಿ ಕರುನ್, ರುಬೆನ್ ಅನಿ ಗಾದ್ ಘರಾನಾಂಚ್ಯಾ ವಾಂಗ್ಡಾ ಲಡಾಯ್ ಕರುನ್ ತೆಂಚೊ ದೆಶ್ ಹಾಳ್ ಕರುಚೆ ಮನ್ತಲಿ ಯೆವ್ಜನ್ ಸೊಡ್ಲ್ಯಾನಿ. 34 ರುಬೆನ್ಯಾನಿ ಅನಿ ಗಾದಾನಿ ಸರ್ವೆಶ್ವರುಚ್ ದೆವ್ ಮನುಕ್ ಹ್ಯೊ ಬಲಿ ಭೆಟ್ವುತಲೊ ಕಟ್ಟೊಚ್ ಸಾಕ್ಷಿ ಮನುನ್ ತೆಕಾ ಎದ್ ಮನ್ತಲೆ ನಾವ್ ಥವ್ಲ್ಯಾನಿ.