Apocalipse 15

1 Nza nwuni nzɛngyerɛneɛ foforɛ wɔ anwuro, né ɔte piri, na né ɔyɛ suro; abɔfo nzoo bɔ bɛtire-tira ɔhaw nzoo; ɛhene yeɛ ole ɔhaw bɔ ɔpɛ yebo ne, ofikyɛ ɔnate ɛhe aso yeɛ Nyameɛ yaa ne kɔwa awieɛ ɔ.

2 Na nwuni nikye bie te kyɛ ahwehwɛ-ɛpo bɔ ɔne see ali afra. Na bɛ bɔ bali kaka ne, ye statu ne, ɔne ye dumaa namba naso ngunim ne gyigyi ahwehwɛ-ɛpo nanwo, bɔ bɛtira Nyameɛ dwotai ne wɔ bɛ sa nu. 3 Né bɛto Nyameɛ akoaa Mose dwein ne Boan Ba ne dwein kyɛ:

"Awurade, Otumvoɛ Nyameɛ,

Wɔ nyumaa te mbiri na ɔyɛ nwanwa!

Ɔhene bɔ ɛwɔ berɛ daa,

W’atee tengyɛ na ɔte nahorɛ.

4 Awurade, nwa yeɛ ɔngosuro wɔ ɔ?

Na nwa yeɛ ɔngɔhyɛ wɔ dumaa ne anuonyam ɔ?

Wɔ ngome yeɛ ɛte krongron ɔ.

Maen namukoraati kɔwa wɔ nyunu kɔɔsõ wɔ,

ofikyɛ w’ahyɛdeɛ bɔ ɔtengyɛ ne ala ali."

5 Ɛhe si ne, nwuni kyɛ babukye adanzeɛ tɛnt né nekaa krongron ne wɔ anwuro, 6 na abɔfo nzoo bɔ bɛtira ɔhaw nzoo ne fili nekaa krongron berɛ fitele, né bɛwura nwera fufue hyɛnn, na né bafa sikaa kɔkorɛ abɔsoɛ bapɛ bɛ nu. 7 Na ateasefoɛ nna nanu kõ mane sɔ abɔfo nzoo ne sikaa kɔkorɛ kyɛnzee nzoo, né Nyameɛ bɔ ɔte ase daa ne yaa ne ayi ye dɛm. 8 Na Nyameɛ anuonyam ne ye tumi nati, nwosina yɛle nekaa krongron berɛ munguu, na ebiala angora anwura nekaa krongron berɛ oodwuli kyɛ abɔfo nzoo ne haw nzoo ne yiele ɔ.