Atos 12

1 Sɔ mmerɛ ne, Ɔhene Herode hyɛle yebo yɛle asafo nanufoɛ biemɔ ayayade. 2 Ɔfale dadeɛ huni Yohane aliema Yakobo. 3 Onwuni kyɛ Yudafoɛ ne nye agye bɔ wayɛ nanwo ne, ɔhyele Petro koso. Sɔ mmerɛ ne, né bɛdi Paanoo bɔ Yiste nne nu afahyɛ ne. 4 Ɔhyele ye ne, ɔfale ye tole prizin ne, ná sogyafoɛ kue nná yeɛ ne bɛnea ye so ɔ; kue biala nu ne, sogyafoɛ nná yeɛ bɛwɔ nu ɔ. Sɛ kue he fi berɛ a, né foforɛ awa. Né Herode ayɛ ye adwene kyɛ, Pɛnu afahyɛ ne si ne, ɔkɔye ye maa okoogyina mmenia ne nyunu. 5 Yeti né Petro la prizin, nakoso ne asafo ne bɔ Nyameɛ mbaeɛ ma ye paa.

6 Kɔngɔen bɔ aleɛ kye a, né Herode ayɛ ye adwene kyɛ ɔkɔye Petro ne, né Petro la sogyafoɛ nyɔ afia, na né bafa kyenyi bakyekye ye sa nyɔ namu. Né sogyafoɛ nyɔ gyi anoa ne nyunu bɔ bɛbɔ prizin nanwo waen ɔ. 7 Komapɛ, Awurade bɔfo wale prizin berɛ, na kanea tale ɛberɛ mukoraati hyireinn. Na abɔfo ne bɔle Petro mvenu tingyele ye, yeɛ ɔha hyirele ye kyɛ: "Dwɔso ndɛ-ndɛ." Ná kyenyi ne fili ye sa guale ase. 8 Yeɛ abɔfo ne ha hyirele ye kyɛ: "Wuro-wura wɔ nwo, na wura wɔ mmaboa." Ɔyɛle sɔ, na abɔfo ne ha hyirele ye kyɛ: "Fa atadeɛ bɔ ogua wɔ so ne wura, na di me si." 9 Yeti Petro lili ye si maa bɛfitele, nakoso né ɔnze kyɛ bɔ abɔfo ne yɛ ne, ɔte nikye deinn bɔ ɔkɔso ɔ. Né y’adwene yɛ ye kyɛ, onya anisoadehu bie. 10 Bɛpɛle nu wɔ nekaa bɔ sogyafoɛ bɔ bɛli moa ne bɛ bɔ bɛtɔso nyɔ ne gyi ne, ná mmerɛ bɛ bɛdwuli buralɛ anoa bɔ ɔkɔ kuro nanu nanwo ne, anoa ne bɔbɔ bukye mane bɛ. Ná bɛfite bɛfale atee naso kaa ne, abɔfo ne yakyile ye berɛ hɔle. 11 Ɛberɛ yeɛ Petro nye wale ye nwo so ɔ, na ɔhane kyɛ: "Bekye bɔ manwu kyɛ, Awurade yeɛ ɔsomane ye abɔfo kyɛ oole me fi Herode sa nu, ná ɔye me fi nikye biala bɔ né Yudafoɛ ne nea atee nanu ɔ."

12 Onwuni ye sɔ ne, ɔhɔle Yohane bɔ bɛfrɛ ye Marko né maame Mary awuro, ɛberɛ yeɛ né mmeni pee ayia nu bɛbɔ mbaeɛ ne. 13 Mmerɛ bɔ ɔbɔle aluo berɛ anoa nanu ne, abaawa bie bɔ bɛfrɛ ye Roda wale berɛ kyɛ ɔbaanea sona-horɛ. 14 Mmerɛ bɔ ɔtele Petro konvi ne, ye nye gyele pa-pa, yeti wammukye anoa ne po; osa hɔle awuro dɔ ɔɔha hyirele bɛ kyɛ: "Petro gyi anoa ne si dɔ." 15 Bɛha bɛhyirele ye kyɛ: "Gyemia abɔ laen." Nakoso, ɔhɔle so ha hyirele bɛ kyɛ ɔte nahorɛ, yeti bɛhane kyɛ: "Ɔte ye abɔfo." 16 Nakoso, né Petro tɛ́ bɔ anoa nanu, na mmerɛ bɔ bɛbukyele, na bɛnwuni ye ne, bɛ nwo dwirili bɛ pa-pa. 17 Nakoso ɔfale ye sa yɛle nzɛngyerɛneɛ hyirele bɛ kyɛ bɛyɛ konn, na ɔhane kyɛbɔ Awurade yele ye fili prizin ne hyirele bɛ. Na ɔha hyirele bɛ kyɛ: "Ɛmɔɔha ɛhe behyire Yakobo ne aliemaa nemɔ." Na ofili berɛ hɔle nekaa foforɛ.

18 Aleɛ hene ne, né sogyafoɛ ne nnwu nekaa bɔ Petro afa ɔ, yeti né bɛnwu bɔ bɛyɛ bɛ nwo ɔ. 19 Herode penane ye wɔ bɔen biala nu, na mmerɛ bɔ wannwu ye ne, obisale sogyafoɛ nemɔ bɔ osili ɔ. Afei ɔhyɛle kyɛ bɛhu bɛ.*12:19 Anaa "Bɛhwe bɛ so." Na ye de, ofili Yudea hɔle Kaesarea ɔɔtenane dɔ kaa.

20 Afei de, ne Herode afɛ Tiro ne Sidonfoɛ naso yaa paa. Yeti, bɛ mukoraati bɛyɛle kõ bɛwale ye berɛ, na bɛsrɛle Blasto bɔ ɔnea ɔhene awuro naso né kyɛ, ɔha bie ma bɛ ma asomdwie bra, ofikyɛ ɔhene yeɛ ɔma bɛ maen né aleɛ ɔ. 21 Kyẽa titire bie dwuli, ná Herode wurale ye ahemvo atadeɛ, ɔtenane ye atemmuo bia so, yeɛ ɔhyɛle yebo kyɛ odwudwo kyire mmenia ne. 22 Na mmenia ne hyɛle yebo teɛteane nu kyɛ: "Ɛhe de ɔtte sona konvi, ɔte nyameɛ bie konvi!" 23 Ɛberɛ ala, Awurade bɔfo bɔle ye, ná ɔlɔle ngaka wuli, ofikyɛ wamva anuonyam né wamma Nyameɛ.

24 Nakoso Awurade dwirɛ ne trɛle paa, na mmeni pee lɛ lili.

25 Mmerɛ bɔ Barnaba ne Saul yiele adwuma bɔ bɛɛyɛle ye wɔ Yerusalem ne, besa bɛwale, bɛba ne, bɛne Yohane bɔ bɛfrɛ ye Marko ne yeɛ bɛwale ɔ.