1 Afei bɛfale Amfipoli ne Apolonia bɛwale Tɛsalonika, né Yudafoɛ le sua bɔ beyia nu wɔ berɛ. 2 Kyɛbɔ ne Paul taa yɛ ne, ɔhɔle sua bɔ beyia nu nanu, na ɔfale homeda nza ne bɛ susuli tworɔnzɛm nanwo, 3 na ohyirehyirele nu mane bɛ adanzeɛ bɔ okyire kyɛ, né odikyɛ Kristo ne nwu amaneɛ, na bɛtingye ye bɛfi ewue nu, na ɔhane kyɛ: "Yesu bɔ meka ye nwo dwirɛ mekyire ɛmɔ ne, ye yeɛ ole Kristo ne." 4 Yeti, bɛ nu biemɔ yɛle gyidifoɛ, na bɛfale bɛ nwo bɛbɔle Paul ne Silas. Na Greekfoɛ pee bɔ bɛsõ Nyameɛ ne mmrasua bɔ bɛte atitire nanu pee koso yɛle sɔ. 5 Na ahoɔyaa ti, Yudafoɛ nemɔ boɔboale mmrienzua biemɔ bɔ bɛnate kuro nanu mbaen noa, bɛboale sɔ atuturafoɛ nemɔ noa maa bɛyɛle basabasa, na bɛmaa kuro nanu yɛle bagya-bagya. Bɛhɔle Yason awuro kyɛ bɛkwaahwe Paul ne Silas bɛ berɛ atuturafoɛ nemɔ. 6 Ná bannwu bɛ ne, bɛfale Yason ne aliemaa biemɔ bɛwale kuro nanu mbanyi ne nyunu, na bɛteɛteane nu kyɛ: "Mmenia hemɔ bɔ bamaa wiase ne ayɛ basabasa ne, bawa ɛwa koso, 7 na Yason alɛ́ bɛ ahɔ ye awuro. Sɔ mmrienzua he amukoraati dwɔso tia Kaesare ahyɛdeɛ, na bɛnwa ɔhene foforɛ bie wɔ berɛ, na yeɛ ole Yesu." 8 Mmerɛ bɔ kuro nanufoɛ ne atumvoɛ ne tele sɔ dwirɛ ne, ɔhale bɛ paa. 9 Yeti, bɛmaa Yason ne bɛ ngaa ne tuale sikaa bie fa lili agyinam, yeɛ bɛyakyile bɛ maa bɛhɔle ɔ.

10 Ná kɔngɔen nala, aliemaa nemɔ maa Paul ne Silas hɔle Berea. Bɛdwuli berɛ ne, bɛhɔle Yudafoɛ sua bɔ beyia nu nanu. 11 Né ɛhemɔ adwene nu la berɛ tra bɛ bɔ bɛwɔ Tɛsalonika ne, ofikyɛ bɛfale b’ahone mukoraati bɛlɛle edwirɛ ne, na daa biala né bɛneɛnea Tworɔnzɛm nanu bɛnea kyɛ, bɔ bɛka ne te nahorɛ a. 12 Yeti bɛ nu pee yɛle gyidifoɛ, na Greekfoɛ mmrasua ne mmrienzua bɔ bɛte atitire nanu pee koso yɛle gyidifoɛ. 13 Nakoso mmerɛ bɔ Yudafoɛ bɔ bɛwɔ Tɛsalonika ne tele kyɛ Paul ka Nyameɛ dwirɛ ne wɔ Berea ne, bɛwale berɛ, na bɛtutu bɛguale mmenia ne so anu maa bɛyɛle basabasa. 14 Yeti aliemaa nemɔ yɛle ndɛ guale Paul ate maa ɔhɔle ɛpo ne noa, na Silas ne Timoteo de, bɛtenane berɛ. 15 Nakoso, bɛ bɔ bɛɛsomane Paul ne fale ye hɔle alaa bɛɛdwuli Atene. Ná besa bɛba ne, Paul mane bɛ ngraa kyɛ, bɛha behyire Silas ne Timoteo kyɛ, bɛyɛ ye ndɛ bɛbra ye nwo dɔ.

16 Paul nwondɛ bɛ wɔ Atene ne, onwuni kyɛ bosoen alɛ́ kuro ne abɔ so, ná ne ɔyɛ ye ahomete. 17 Yeti ɔne Yudafoɛ ne bɛ bɔ bɛsõ Nyameɛ ne susuli tworɔnzɛm nanwo wɔ sua bɔ beyia nu nanu, na daa biala né ɔkɔ dwaaso, na bɛ bɔ okonya bɛ wɔ berɛ ne koso, né ɔne bɛ susu edwirɛ nwo. 18 Nakoso, Epikurofoɛ ne Stoafoɛ bɔ bɛse nwomaa ne suli ye aporowaa. Na ebiemɔ hane kyɛ: "Nzu yeɛ akoaa he bɔ odwudwo nwora ne pena kyire ne?" Ebiemɔ koso hane kyɛ: "Ɔka nyameɛ foforɛ bie nwo dwirɛ." Bɔ ɔte yeɛ ole kyɛ né ɔka Yesu bɔ batingye ye bafi ewue nu nanwo dwirɛ. 19 Yeti bɛfale ye bɛhɔle Areopago, na bɛbisale ye kyɛ: "Ngyerɛkyerɛ foforɛ bɔ ɛka ye nwo dwirɛ ne, ɛkɔhora kohyire nu kohyire yɛ? 20 Ofikyɛ nningyein bɔ ɛka ye nwo dwirɛ ne, yɛtelle bie lle, na yɛpena kyɛ yɛnwu bɔ okyire ɔ." 21 Atenefoɛ ne ɛwɔfoɛ bɔ bɛte kuro nanu ne, sɛ́ bɛnyɛ hwee a, bɔ bɛyɛ ala yeɛ ole kyɛ bɛkɔha edwirɛ foforɛ anaa bɛkotie edwirɛ foforɛ.

22 Yeti, Paul gyinane Areopago né afia, na ɔhane kyɛ: "Atene mmrienzua, menwu ye kyɛ ɛmɔ kuro nyamesom paa. 23 Ofikyɛ mmerɛ bɔ nnate kuro nanu ne, ndole me bo ase nneane nningyein bɔ ɛmɔsõ bɛ ne. Ná nwuni afɔleɛ bokyea bie po bɔ bahworɔ ye nwo kyɛ, ‘Ɛhe te nyameɛ bɔ yɛnze ye ne deɛ.’ Yeti bɔ ɛmɔsõ ye, nakoso ɛmɔnze ye ne, ye nwo dwirɛ yeɛ meka mekyire ɛmɔ ne. 24 Nyameɛ bɔ ɔbɔle wiase ne nikye biala bɔ ɔwɔ nu ne, ye yeɛ ɔte anwuro ne aseɛ ne Wura ɔ. Na ɔtte asɔre sua bɔ sona asi nu. 25 Yeɛ nná sona sa yeɛ bɛfa bɛsõ ye ɔ, ofikyɛ onhia hwee. Na ye bɔbɔ yeɛ ɔma ebiala ngoa ne nwomeɛ ne nikye biala ɔ. 26 Na mmenia bɔ bɛwɔ maen biala nu ne, ɔyɛle bɛ fili sona-horɛ nu, kyɛ bɛtena aseɛ he aso mukoraati. Na ɔhyɛle mmerɛ ahoroɛ, yeɛ ɔfale ɛwɛen tole nekaa biala bɔ bɛkɔtena ne, 27 kyɛbɔ ɔkɔyɛ a bɛkɔpena Nyameɛ, na bayere bɛ nwo bapena ye alaa kodwu kyɛ bekonwu ye. Nakoso bɔ ɔte yeɛ ole kyɛ, ɔne yɛnu biala afia annwa. 28 Ofikyɛ, ye ti yeɛ yɛle ngoa, yɛkeka yɛ nwo, na yɛte ase ne, na bɛ bɔ bɛtworɔ anwenzɛm wɔ ɛmɔ wa ne, bɛ nu biemɔ po aha kyɛ, ‘Yɛ koso, yɛte ye mmaa mɔ.’ 29 Na sɛ yɛte Nyameɛ mmaa de a, nnɛmɔ maa yɛnya adwene kyɛ Ɛdangama ne te kyɛ sikaa kɔkorɛ anaa dwetɛ anaa nyɔboɛ bie bɔ kuro sona abɔ ye ti anu ayɛ ɔ. 30 Bɔ ɔte yeɛ ole kyɛ, Nyameɛ bule ye nye guale mmerɛ bɔ né yɛnze hwee naso, nakoso kesaalae de, ɔka kyire mmenia bɔ bɛwɔ wiase mukoraati ne kyɛ, bɛsakra b’adwene. 31 Ofikyɛ waye kyẽa bie wasie berɛ, na wabɔ ye ti anu kyɛ sɔ kyẽa ne, ɔnate sona bie bɔ waye ye so kobu bɛ bɔ bɛte aseɛ naso namukoraati atɛn wɔ tenenee nu. Ná watingye sɔ sona ne wafi ewue nu wafa wayɛ adanzeɛ wama ebiala."

32 Mmerɛ bɔ bɛtele ewue tingyele nanwo dwirɛ ne, ebiemɔ gorole Paul nwo, na ebiemɔ koso hane kyɛ: "Sɔ dwirɛ he ati, yɛkosa yekotie wɔ bieku." 33 Yeti Paul fili berɛ hɔle, 34 nakoso ebiemɔ fale bɛ nwo bɔle ye, na bɛɛyɛle gyidifoɛ. Bɛ nu biemɔ yeɛ ole Dionisio bɔ ɔboka Areopago naso ne, ɔne brasua bie bɔ bɛfrɛ ye Damari, ne mmenia foforɛ bie.