1 Mmerɛ bɔ ne Apolo wɔ Korinto ne, Paul fale nekaa bɔ ɔmbingye ɛpo wale Efeso. Odwuli berɛ ne, onwuni asuafoɛ biemɔ, 2 yeɛ obisale bɛ kyɛ: "Ɛmɔ yɛle gyidifoɛ ne, ɛmɔ nyane honhom krongron?" Bɛhane kyɛ: "Saa, yɛtelle ye lle kyɛ honhom krongron bie po wɔ berɛ." 3 Yeti osa bisale bɛ kyɛ: "Asu beni yeɛ ɛmɔ bɔle ne?" Bɛhane kyɛ: "Yohane asubɔ ne." 4 Paul hane kyɛ: "Yohane asubɔ ne de, né okyire adwene-sakra, na né ɔka kyire mmenia ne kyɛ benya bɔ oli ye si ɔba nanu gyidie, na ye yeɛ ole Yesu." 5 Bɛtele ɛhe ne, bɛbɔle asu wɔ Awurade Yesu dumaa nu. 6 Na mmerɛ bɔ Paul fale ye sa guale bɛ so ne, honhom krongron ne wale bɛ so, na bɛhyɛle yebo bɛhane dwudwolɛ foforɛ, na bɛhyɛle ngɔm. 7 Bɛ mukoraati, né bɛte mmrienzua kɔyɛ kyɛ 12.

8 Ɔfale bosome nza hɔle sua bɔ beyia nu nanu, na ɔfale akukuduro dwudwole, na ɔne bɛ susuli Nyameɛ Ahennie nanwo, kyɛbɔ ɔkɔyɛ a bɛkɔte yebo ɔ. 9 Nakoso né ebiemɔ ahone yɛ se, na banne banni, ná bɛkekane edwirɛ bɔ ɔttemaye bɛfale Atee nanwo wɔ mmenia ne nyunu. Yeti ɔhwene ye nwo fili bɛ nwo, na ɔmaa asuafoɛ nemɔ koso hwene bɛ nwo. Na daa biala né ɔka edwirɛ ne wɔ Tirano sukuu sua nanu. 10 Ɔyɛle sɔ alaa afoɛ nyɔ, yeti bɛ bɔ bɛwɔ Asia mandam nanu namukoraati, Yudafoɛ ne Greekfoɛ mukoraati tele Awurade dwirɛ ne.

11 Na Nyameɛ nate Paul sa so yɛle nningyein mbiri-mbiri paa, 12 sɛ́ bɛfa ɛtena ne ndadeɛ bɔ waha ye ne po bɛma ayarefoɛ a, ne b’anwonyerɛ né ahɔ, na sunzummɔne mɔ po fi bɛ nu fite. 13 Né Yudafoɛ biemɔ koso nate nu bɛtu sunzummɔne, yeti bɛyɛle kyɛ, bɛkɔbɔ Awurade Yesu dumaa bɛkogua bɛ bɔ bɛle sunzummɔne nemɔ so kyɛ: "Mehyɛ wɔ wɔ Yesu bɔ Paul ka ye nwo dwirɛ ne dumaa nu." 14 Né Yudaniɛ sɔfo panyi bie bɔ bɛfrɛ Skewa le mmaa mmrienzua nzoo bɔ né bɛyɛ sɔ nikye ne bie. 15 Nakoso, sunzummɔne ne ha hyirele bɛ kyɛ: "Mese Yesu, na mese Paul, na ɛmɔ de, ɛmɔfi nisua?" 16 Na biaa bɔ sunzummɔne wɔ ye so ne fa guale bɛ so, na ɔbole bɛ mukoraati. Yeti bɛnwati bɛfili awuro berɛ, na bɛkɔ ne, né bɛ nwo la so, na né bapire-pira. 17 Yudafoɛ ne Greekfoɛ bɔ bɛte Efeso namukoraati tele ye nwo dwirɛ, na esuronyi tɔle bɛ mukoraati so, na bɛyele Yesu dumaa ne ayɛ paa. 18 Na gyidifoɛ pee wale, na bɛtole bɛ noa nu tui bɛhane bɔne bɔ bayɛ namukoraati wɔ badwanu, bamva komapɛ po bamvea. 19 Bɛ bɔ bɛyɛ magyek nanu pee fale bɛ nwomaa wale, na bɛyerale ye maa ebiala nwuni ye. Na bɛ sesene ne, bɛnwuni kyɛ ye nyɔboɛ te dwetɛ 50,000. 20 Na Awurade dwirɛ ne hɔle so trɛle, na ɔyɛle se.

21 Ɛhemɔ si ne, Paul bɔle ye ti anu kyɛ, ɔkɔfa Makedonia ne Akaia kɔhɔ Yerusalem. Ɔhane kyɛ: "Sɛ medwu berɛ a, odikyɛ mekɔ Roman koso." 22 Yeti, ɔsomane bɛ bɔ bɛboka ye nanu nyɔ, Timoteo ne Erasto maa bɛhɔle Makedonia, na ye de, ɔtenane Asia mandam nanu berɛ kaa.

23 Sɔ mmerɛ nanu ne, edwirɛ bie dwɔsole wɔ Atee nanwo. 24 Bɔ ɔwale yeɛ ole kyɛ, né Demetrio te ebie bɔ ɔfa dwetɛ yɛ nningyein. Na né ɔfa dwetɛ yɛ Artemi bosoen sua ne bie, na ɛhe maa bɛ bɔ bɛyɛ dwetɛ nwo adwuma ne nyane sikaa paa. 25 Yeti, ɔboale bɛ bɔ bɛyɛ sɔ adwuma ne noa, yeɛ ɔha hyirele bɛ kyɛ: "Mmrienzua, ɛmɔse kyɛ sɔ adwuma he yeɛ wamaa yanya yɛ nwo ɔ. 26 Na kesaalae nnaa ɛmɔ anwu ye, na ɛmɔ ate kyɛbɔ Paul he amaa mmeni pee anya adwene foforɛ ne; yenwa, nyameɛ bɔ kuro sona ayɛ ne, ɔtte nyameɛ biala. Nná Efeso ngome yeɛ waha sɔ dwirɛ ne ɔ, mmom Asia mandam nanu mukoraati. 27 Na bɔ mesuro po yeɛ ole kyɛ, nná y’adwuma ne ngome yeɛ mmenia kɔkeka ye nwo dwirɛ ɔ, mmom annea a, yɛ nyameɛ* kandinga Artemi sua ne koso, mmenia ngonya obuo biala ngɔma ye kõ. Na Artemi bɔ bɛsõ ye wɔ Asia mandam nanu ne wiase mukoraati ne, ye anuonyam kɔbɔ ye."

28 Mmenia ne tele ɛhe ne, bɛfɛle yaa paa, na bɛhyɛle yebo bɛteɛteane nu kyɛ: "Efesofoɛ Artemi né te piri paa!" 29 Yeti kuro nanu yɛle bagya-bagya, na bɛ mukoraati bɛtuli bum bɛhɔle park naso,* na bɛhwene Gaius ne Aristarko, Makedoniafoɛ nyɔ bɔ bɛne Paul tutu atee ne bɛhɔle berɛ. 30 Né Paul pena kyɛ ɔkɔ mmenia nanu, nakoso asuafoɛ ne amma ye ate. 31 Ye nnamvo bɔ ne bɛte mbanyi wɔ Asia mandam nanu ne somane ebiemɔ maa bɛɛsrɛle ye kyɛ, nnɛmaa ɔfa ye ngoa to asane nu kɔ park naso. 32 Né ɛberɛ ayɛ bagya-bagya, sɛ ebie tea nu ka ɛhe a, na ebiemɔ koso atea nu aha ɛhe. Né bɛ nu pee nala nze bɔ yeti bayia nu berɛ ne po. 33 Na bɛmaa Alɛzanda fite fili mmenia nanu, na Yudafoɛ nemɔ piepiane ye maa oogyinane anyunu dɔ. Na Alɛzanda mane ye sa so, fa yɛle nzɛngyerɛneɛ hyirele bɛ kyɛ bɛyɛ dinn ma ɔye ye nwo noa. 34 Nakoso mmerɛ bɔ bɛnwuni kyɛ ɔte Yudaniɛ ne, mmenia namukoraati teɛteane nu kyɛ: "Efesofoɛ Artemi né te piri paa!" Bɛyɛle sɔ alaa kɔyɛ dɔnhwere nyɔ. 35 Mmerɛ bɔ kuro né krakye ne maa bɛyɛle dinn ne, ɔhane kyɛ: "Efeso mmrienzua, nwa yeɛ ɔnze kyɛ Efeso kuro he yeɛ ɔnea Artemi kandinga né asɔre sua, ɔne ye statu bɔ ofi anwuro wale naso ɔ? 36 Aporowaa biala nne ɛhe anwo, yeti ɛmɔha ɛmɔ ahone bɛto ɛmɔ kunu, na nnɛmɔ pere ɛmɔ nwo. 37 Ofikyɛ mmenia bɔ ɛmɔ afa bɛ bawa ɛwa ne, bɛwialle asɔre sua nu nningyein, yeɛ bɛhanne mmusue dwirɛ biala bɛfalle yɛ nyameɛ nanwo. 38 Yeti, sɛ Demetrio ne bɛ bɔ ɔne bɛ yɛ dwetɛ nwo adwuma ne le bɛ nwo dwirɛ bie a, kɔɔto ne wɔ berɛ, na amrado nemɔ koso wɔ berɛ. Edwirɛ biala bɔ bɛle ye ne, bɛfa bɛbra. 39 Nakoso sɛ ɔte nikye bie bɔ ɔtra ɛhe de a, sana mbanyi ne frɛ maen namukoraati maa bɛbayia, na besi ye nwo gyinayɛ. 40 Ná bɔ wahɔ so ɛnɛ ne, annea a né babɔ yɛ sommoɛ kyɛ yate atua, ofikyɛ yɛngɔhora yɛngohyire bɔ yeti yeɛ yɛyɛle sɔ basabasa ne." 41 Ɔhane ɛhe yiele ne, ɔmaa mmenia namukoraati hɔle.