Neemias 1

Nehemia Ɔlaa Ɔpɛ

1 Hakalia obisuɔtɔbi Nehemia sɛlaa ninle nse mmle nɛ:

Di Yuda batii kɔwɛntɛ ko manlɛɛ ni Kislew*1.1 kɔwɛntɛ nwu ninle kɔnaasinle di Babilonia awɛntɛ kamɛ nɛ, ku le ni kɔwɛntɛ lefosi kunwii ntɛɛ ku lefosi kɔnyɔɔfa ntɛɛ. kamɛ, di alɛɛ afosi-anyɔ kamɛ, di obe wɔ lawɛ ni di Susa okpoo katanikokɔ nwu yi, 2 ni di Hanani, babiloo-suɔtɔbi onwii lakye Yuda aawa ku basuɔtɔ bamba bawo, ni lakaalɛ ma ɔlaa lakyeko Yuda batii balanle ba niabu baasiɛ ni nkpa, ku Yerusalem batii kafɔɔ nɛ.

3 Ni baatɔkɔ mi alɛ, "Batii ba niawɛ ni nkpa di sɛlanle kamɛ, batookple bɛɛwa ni kasɔ nwu nfɛ nsi di dibuo kplɛ ku sinunsɔ kamɛ. Yerusalem oyoyiɛ ntoobiɛ kute kaasɔ, beefiɛ kafɔɔ n-yoko ninwu ku ɔtɔ."

4 Lanu ni sɛlaa se mmle yi, ni lataba kaasɔ lawi nɛ. Lawi kaku, lanii kanya, ni lapɛ ɔlaa di Yaa wɔ di osi anu di ayi awo kamɛ nɛ. 5 Ninfɛ labuɛ nlɛ:

"Oo SAATE, Yaa wɔ di osi, Yaa kplɛ ku nnwɔ di lɛyɛkɛ nsi ni, nnwɔ ninklee ni lɛbɔmbɔ kanya ninii ku batii ba nimbɔmbɔ nwɔ ni, mankyɔɔ ni afiofa nɔɔ kotoko, 6 ta atoko lɛfɔ ate kaayi di anu lɛfɔ kafɔɔ atikiti, aanu kpɛmblatɛ lɛfɔ ɔlaa ɔpɛ wɔ ɔɔpɛ ni di anu lɛfɔ kakũ ku kakyɛ anta ni bakpɛmblatɛ lɛfɔ, Israel batii nwu. Kodiki sikpile se di awo Israel batii, di ami omu ku teemi leyo kamɛ batii nkyakaa nii, buabla ni di suoto lɛfɔ mbuɛ. 7 Buadiki kɔkpaa kpile osie kanya di suoto lɛfɔ. Butakyɔɔ ɔlaa lɛfɔ atoko, bukyɛ di sisuku lɛfɔ, butale kafɔɔ afiofa ya faata ni kpɛmblatɛ lɛfɔ Mose.

8 "Nyuma ɔlaa wɔ faata ni kpɛmblatɛ lɛfɔ Mose, faabuɛ ni falɛ, ‘Nse bieele onukwale yi, kamasamiisa ye nkpee di nnle nwu kamɛ, 9 kafɔɔ nse biekple biɛwa ɔkyɛ nii, biɛkyɔɔ sɛlaa nii atoko, ni bia nse balanle lee nkpe di kasɔ ku kolo nkyakakɔ fanfa yi, ni kamasiisa ma nkyeko nfa, nkpaa ma nwako lɛba le lediki nlɛ Leyooto nii dite nii.’

10 "Bakpɛmblatɛ lɛfɔ ku batii lɛfɔ bale, mba faadiki ni ku osie kplɛ lɛfɔ ku kɔnɛɛ lɛfɔ siene. 11 Oo Saate, ta atoko lɛfɔ ate kaayi aanu kpɛmblatɛ lɛfɔ wɔ mmle ɔlaa ɔpɛ ku bakpɛmblatɛ lɛfɔ ba ninnya ni suoto lɛyɔɔ manta ni leyooto lɛfɔ dibu ɔlaa ɔpɛ.Ta dilɛ dita kpɛmblatɛ lɛfɔ miɛ, faale nwɔ sibualɛ di osuɔtɔ wɔ mmle anu."

Ami niale nta nyɛɛnɛtɛ lata ɔka nɛ.