1 Kafɔɔ Israel batii ditale onukwale di asaa ya baayɔ baata ni SAATE nwu suoto; Karmi obisuɔtɔbi Akan layɔ asaa nwu awo, ɔwa nɔɔ niale Sabdi, ɔwatɛtɛ nɔɔ kafɔɔ niale Serah wɔ niakye ni Yuda kɔna kamɛ nɛ. Nioso ɔblɔ lafiɛ SAATE nwu di Israel batii suoto.

2 Ninfɛ di Yosua lakpee basuɔtɔ bawo niakye ni Yeriko baakyɛ Ai ninkaako ni Bet Awen di Betel kufĩ katunkɔ alɛ, "Bikata bikyɛ biɛlaala kasɔ nwu." Nioso basuɔtɔ nwu lakata baakyɛ baalaala Ai.

3 Basuɔtɔ nwu lakple baawa babatɔkɔ Yosua alɛ, "Diele batii nwu bamuu dikaatɛ bɛɛkata bɛɛkyɛ bɛɛlaadieko Ai. Kpee basuɔtɔ nkpe nnyɔ ee ntiɛ baalaadieko nwu, tankpee batii bamuu kubuɛ, diekye basuɔtɔ basɛɛ lete ninkpe ninfa." 4 Nioso basuɔtɔ nkpe ntiɛ niakata baakyɛ; kafɔɔ Ai basuɔtɔ lalenkee ma, 5 Ai basuɔtɔ lalo fɛ afosi-atiɛ-bakuɔ lɛma. Baatikanko Israel batii baakyeko okpoo nwu kasũkunya baalaadu bia afuɔ kabibiɛkɔ* baalaalo ma di lɛyɔnsa nwu. Ta nle mmle oso batii nwu situ layɛlɛfɛ siabla fɛle ntu.

6 Ninfɛ di Yosua labɛbɛɛ akpeele nɔɔ, ni aafuusa anu kaasɔ di SAATE nwu kanya ninii lɛlakaa nwu anu nɛ, aaka ninfa dialaadu kɔtɔɔfɔ. Israel banɔɔfo kafɔɔ labla nkpo, ni baalɛ kɔtɛ baakpete di asi lɛma nɛ. 7 Ni di Yosua labuɛ alɛ, "Ao, SAATE Kplɛ, obe oso fɛɛkpaa batii ba mmle fɛɛwaalɛsa Yordan okle fɛɛbayɔ wo feekpee di Amori batii nnɛɛ falɛ bawɔɔsa wo? Nse fɛ munsiɛ di Yordan okle kakyɛ nyɔɔfa ditabalɛ ninta wo! 8 O SAATE, be nfɛ nimbuɛ, nunua wɔ mmle di balo ntoolenkee ni Israel? 9 Kanaan batii ku kale bamba batii kamanu ɔlaa wɔ mmle mamamana wo mankyi man-yɛɛsa leyooto loo di kasɔ suoto. Be nfɛ fababla fanta leyooto lɛfɔ kplɛ nwu?"

10 SAATE nwu latɔkɔ Yosua alɛ, "Taka fayila! Obe feefuusa anu lɛfɔ kaasɔ fɔɔbla? 11 Israel ntɔɔbla okpile; batɔɔlalaasa kanya ninii nii le latɔkɔ ma nlɛ bale nii. Batɔɔyɔ asaa ya bɛɛyɔ bɛɛta ni SAATE nwu awo; batooyu, batɔɔlaa, batɔɔyɔ nya beekpee di asaa lɛma amu kamɛ. 12 Nkpo oso di Israel batii dilɔbafuo balo lɛma oyilako nɛ; beemunikĩisa mmaa lɛma beetoso, diekye batɔɔbla ma bɛɛta kawɔɔ. Namasinwɛ di ɔkyɛ lee diediki biɛwɔɔsa lɛsaa le ninle ni lɛwɔɔsale kaamɛ lee.

13 "Tɔɔkyɛ falaakleklesa batii nwu suoto. Tɔkɔ ma falɛ, ‘Bikleklesa suoto lee di suoto ololaa ɔta kɔsɛɛ; diekye nnya ɔlaa wɔ di SAATE, Israel Yaa nwu kobuɛ ni alɛ: Oo Israel, nle bɛɛyɔ bɛɛta ni SAATE nwu nsi kaamɛ lee. Bilɔbafuo balo lee oyilako diediki biediki ni kaamɛ lee.

14 "‘Biwa anu nii ku olesɛ, di kɔna, kɔɔna kanya. Kɔna ko di SAATE nwu kamadiki ni kamadie kunwa sitũ di kafaabi, kafaabi kanya; kafaabi ka di SAATE nwu kamadiki ni kamadie kanwa sitũ, di leyo, leyo kanya; leyo le kafɔɔ di SAATE nwu kamadiki ni kamadie kunwa sitũ, di osuɔtɔ onwii, onwii kanya. 15 Otii lele beemufũ ku asaa ya bɛɛyɔ bɛɛta ni SAATE nwu yi, baawɔɔsɔɔ ku ɔtɔ manko asaa nɔɔ amuu. Otii nwu lɛlalaasa SAATE nwu kanya ninii, ɛɛbla kafɔɔ ninunsɔsaa di Israel!’ "

16 Di kaleesɛ kolesɛtũ, Yosua lata Israel batii ladie baawa sitũ di ana lɛma kanya, ni baadiki Yuda kɔna nɛ. 17 Yuda nfaabi ladie baawa sitũ, ni aadiki Serah batii nɛ. Ni aata Serah batii leyo kamɛ batii ladie baawa situ, ni aadiki Sabdi nɛ. 18 Ninfɛ di Yosua lata Sabdi leyo kamɛ batii lawa sitũ onwii, onwii, ni aadiki Karmi obisuɔtɔbi Akan, di ɔwa nɔɔ niale ni Sabdi, ɔwatɛtɛ nɔɔ kafɔɔ niale Serah wɔ niakye ni Yuda kɔna kamɛ nɛ.

19 Ninfɛ di Yosua latɔkɔ Akan alɛ, "Obisuɔtɔbi nii, yɔ dibu fata SAATE, Israel Yaa nwu, faayɔ katansa fatɔɔ. Tɔkɔ mi lɛsaa le fɛɛbla ni; tan-yɔ ni faakookaa mi."

20 Akan latuna alɛ, "Nwaako dile! Lɛbla okpile di SAATE, Israel Yaa nwu suoto. Nnya lɛsaa le lɛbla ni: 21 Lanya ni akpeele wua ya nikɔlɛ ni onyu di Babel batii* lɛsaawɛ nwu kamɛ, ku koto fututu onutũ alafa-anyɔ ku koto sɛɛle aboo onutũ afosi-anɔɔ, aasɛɛ mi anu, ni layɔ nya nɛ. Lekookaa nya kaasɔ di lɛkpaayo nii kamɛ, di koto fututu nwu nte ni kaalɔ."

22 Nioso Yosua lakpee batɔkyɛntɛ, baatoso baakyɛ lɛkpaayo nɔɔ, nfa aakookaa nya, di lɛkpaayo nɔɔ di koto fututu late ni kaalɔ nɛ. 23 Baayɔ asaa nwu di lɛkpaayo nwu kamɛ baakyɛnko Yosua ku Israel batii bamuu, ni baafukuti nya baatɛ di SAATE nwu anu nɛ.

24 Ninfɛ di Yosua ku Israel batii bamuu lakpaa Serah obisuɔtɔbi Akan ku koto fututu nwu, akpeele wua nwu, koto sɛɛle nwu, babisuɔtɔbi ku babisankobi nɔɔ, banankyue nɔɔ, babɔkɛɛ nɔɔ ba nintuka ni atoo, bafoso, lɛkpaayo nɔɔ ku asaa ya amuu niawɛ nwɔ nii baasifiko Akor Ɔtaata nɛ. 25 Ni di Yosua labuɛ alɛ, "Obe oso fɛɛyɔ dibuo le mmle feetika wo di suoto? SAATE kamayɔ dibuo antika fɔ di suoto miɛ."

Ninfɛ di Israel batii bamuu lasafɔ nwɔ afuɔ nɛ. Obe wɔ baasafɔ babule kafɔɔ afuɔ baaloo nii, ni baafiɛ ma nɛ. 26 Baasiisa afuɔ kplɛ ditii di Akan suoto, dite diɛbadu miɛ. Ninfɛ di SAATE nwu ɔblɔ yakayaka nwu kanya layɔɔ nɛ. Nioso diayɔ ni di obe nwu bɔɔlɛɛ lɛba nwu alɛ Akor Ɔtaata nɛ.