1 Nnya kasɔ ka baata ni Manase kɔna fɛ Yosef dibite, ninle ni Makir, Manase dibite kale. Makir niale Gilead batii waawa, nnwɔ niafũ ni Gilead ku Basan, ta Makir batii lale ni bakpɛtɛ siene oso. 2 Nioso kasɔ ka mmle lale Manase batii bule kale- Abieser, Helek, Asriel, Sekem, Hefer ku Semida nfaabi. Mba mmle ninle Yosef obisuɔtɔbi Manase banantii-suɔtɔ bamba di nfaabi lɛma kanya nɛ.

3 Ninfɛ di Manase obisuɔtɔbi Makir, obisuɔtɔbi Gilead, obisuɔtɔbi Hefer, obisuɔtɔbi Selofehad ditawɛ babisuɔtɔbi nɛ, kafɔɔ babisankobi lete. Ayooto lɛma niale, Mahla, Noa, Hogla, Milka ku Tirsa nɛ. 4 Baakyɛ oletatɛ Eleasar ku Nun obisuɔtɔbi Yosua ku batunletɛ nwu ɔkyɛ alɛ, "SAATE nwu latɔkɔ Mose alɛ ata wo atesaa di babiloo-suɔtɔbi kamɛ." Nioso Yosua lata ma atesaa ku ote lɛma babilɛma-suɔtɔbi, di SAATE nwu ɔlaa kanya. 5 Manase kasɔ lale nlekɔ lefosi di Gilead ku Banan ɔlɔɔkɔ di Yordan kufĩ-katunkɔ. 6 Diekye Manase kɔna babisankobi lafũ atesaa di babisuɔtɔbi kamɛ. Gilead kasɔ nwu nle Manase banantii yɛntɛle kale.

7 Manase kasɔ ladie di Aser kalaadu Mikmetat di Sekem kufĩ-katunkɔ. Kɔmɛ nwu lafe di kala-kasɔ lɛkyɛ, kuayɔ ninfa kuakpa batii ba ninsi ni di En Tapua kuakpee kaamɛ. 8 (Tapua kasɔ nwu nle Manase kale, kafɔɔ Tapua okpoo omu di Manase kɔmɛ nwu suoto nle Efraim batii ole.) 9 Ninfɛ di kɔmɛ nwu lakple kuafe di kala-kasɔ kualaadu Kana Kɔwɛ. Sekpoo se ninle ni Efraim sele nte sikpɔtɔɔ di Manase sekpoo kamɛ, kafɔɔ Manase kɔmɛ niale kɔwɛ nwu katoo-kasɔ lɛkyɛ, kualaayɛntɛ di lekpo. 10 Kasɔ nwu di kala-kasɔ nle Efraim kale, nka di katoo-kasɔ nle Manase kale. Manase kasɔ ladu lekpo, ate kɔmɛ ku Aser di katoo-kasɔ, kufĩ-katunkɔ kafɔɔ ku Isakar.

11 Di Isakar ku Aser nwu kamɛ yi, Manase kafɔɔ lawɛ Bat San, Yibleam, Dor, Endor, Taanak ku Megido batii, mma ku nsiɛkɔ lɛma be niɛmana ma diekyi ni (otiɛfa kaamɛ ninle Nafot).

12 Kafɔɔ Manase batii ditafuo sekpoo se mmle ofũ, diekye Kanaan batii latɛ alɛ boosiɛ di kasɔ nwu. 13 Kafɔɔ, obe wɔ di Israel batii lawɛ osie baakyakaa nii, baanyinka Kanaan batii baabla sɛkpɛ siene, kafɔɔ batatososa ma baadiki klekle.

14 Yosef batii latɔkɔ Yosua alɛ, "Obe oso di kasɔ lɛba ninwii ku kalekɔ kanwii lete fɛɛta falɛ kale wo atesaa? Batii ba nimpɔ ni bule, SAATE nwu kafɔɔ lɛta wo lɛtɔtrɔ osie kanya."

15 Ninfɛ di Yosua ladiki kanya alɛ, "Nse bipɔ, di Efraim lekpenkpe kale lesii ye obiibii yi, ni bikata bikyɛ biɛlaakpɛ lepoo nwu ninfa bita suoto lee di Perisi batii ku Refait batii kasɔ nwu."

16 Ninfɛ di Yosef batii latɔkɔ nwɔ alɛ, "Lekpenkpe kasɔ nwu diɛpɔ wo, Kanaan batii ba kafɔɔ ninsi ni di ɔtaata nwu nkpe abɔɔsaa bakeke ba di bapɔnkɔ nnanfi ni, manko mba di Bet Sean ku nsiɛkɔ be ninwu ku mba di Yesreel Ɔtaata."

17 Kafɔɔ Yosua latɔkɔ Yosef leyo batii- Efraim ku Manase alɛ, "Bipɔ, biɛtɛ bikpe osie kafɔɔ. Bilɔbawɛ kasɔ lɛba ninwii lete, 18 kafɔɔ ku lekpenkpe kale lepoo. Bikpɛ ni, ni kasekɔ ninka di lɛkaana kamɛ kamale ye kale; kuntɛ Kanaan batii nwu nkpe abɔɔsaa bakeke ba di bapɔnkɔ nnanfi ni, kuntɛ bakpe osie kafɔɔ yi, bibafuo ma otososa odiki."