1 Ninfɛ di SAATE nwu latɔkɔ Yosua alɛ: 2 "Tɔkɔ Israel batii falɛ badiki katanikokɔ sekpoo nwu batɛ, fɛ mmle latɔkɔ ye lafenko ni di Mose suoto, 3 alɛ otii lele nielo otii di difua kamɛ, ninanle kafɔɔ ɔtɛ ɛɛtɛ yi, otii nwu katoso ansifi ta mmle aawɛ ni katĩtĩi di otii wɔ beelo ni asaa letɛ nɔɔ dilɔbalo nwɔ akyisa nii.

4 "Nse eetoso eesifi sekpoo se mmle onwii kamɛ yi, ayila di okpoo kplɛ nwu kasukunya, aayɔ ɔlaa nɔɔ atɛ di okpoo kplɛ nwu banɔɔfo anu. Ni baafũ nwɔ di okpoo kplɛ lɛma nwu, baatɔɔ lɛba asiɛ ku mma. 5 Nse otii wɔ eelo ni asaa letɛ leti nwɔ yi, batandiki nnwɔ niɛbla ni okpile nwu baata, diekye eelo owo nɔɔ nwu ninanle ɔtɛ ɛɛtɛ nii, ninanle ni osi asi nwɔ ni oso. 6 Asiɛ di okpoo kplɛ nwu dilaase di obe wɔ babakanko nwɔ ni di okpoo dudu nwu anu, ninaase ni kafɔɔ di obe wɔ di oletatɛ-nɔɔfo wɔ nikɔbla ni kasumu ɔsaabla di obe nwu kamɛ lekpi ni fiɛ. Ni aafuo okple osifi leyo nɔɔ nimu di okpoo wɔ aatoso aadie ni kamɛ."

7 Nioso baadiki Kedes di Galilea di Naftali kale lekpenkpe osi ku Sekem di Efraim kale lekpenkpe osi ku Kiriat Arba (ninle ni Hebron) di Yuda kale lekpenkpe baatɛ. 8 Di Yordan kufĩ katunkɔ lɛkyɛ di Yeriko yi, baadiki Beser di ɔfaafuu di ɔtaata kamɛ di Ruben kɔna ku Ramot di Gilead di Gad kɔna kamɛ ku Golan di Basan di Manase kɔna kamɛ baatɛ. 9 Israel otii lele ee ɔfɔɔ lele ninsi ni kaamɛ lɛma nielo otii owo di difua kamɛ katoso ansifi sekpoo se mmle beediki bɛɛtɛ ni, alɛ otii wɔ eelo ni asaa letɛ nɔɔ dilaalo nwɔ alesa ni katũ fiɛ baakanko nwɔ ni di okpoo dudu anu.