1 Ninfɛ di Israel batii dikudi nimuu lasi di Silo, ni baapɛ Lɛkpaayo le Mansi ni ninfa nɛ. Baalenkee kale nwu di anu lɛma, 2 kafɔɔ Israel batii ana akuɛnsĩ lakple aabu anadifũ ni atesaa lɛma.

3 Nioso Yosua lakaalɛ Israel batii nwu alɛ: "Ɔmɛmbe bibasiɛ minaase fiɛ bibalaayɔ kasɔ ka di SAATE nwu, bate lee Yaa nwu lɛta ye ni? 4 Bidiki basuɔtɔ batiɛ, batiɛ di kɔna biala kamɛ bitɛɛ. Kamakpee ma manaanyu kasɔ nwu, mankpana letembi lɛka di obiala atesaa kanya. Fiɛ nfɛ babakple manwa ɔkyɛ nii. 5 Dikpeni biɛsɛ kasɔ nwu di akyuu akuɛnsĩ. Yuda asiɛ osiɛ di kasɔ nɔɔ suoto di kala-kasɔ nwu, di Yosef leyo kafɔɔ asiɛ di kasɔ nɔɔ suoto di katoo-kasɔ nwu. 6 Nse bitɔɔkpana kasɔ akyuu akuɛnsĩ nwu letembi bieloo, biɛyɔ nya biwakoe ninfũ. Kamawii atrebi nta ye di SAATE Yaa loo anu. 7 Lewi batii ditawɛ kalekɔ di kamɛ lee, diekye SAATE nwu oleɔta ɔsaabla nwu ninle atesaa lɛma. Gad, Ruben ku Manase kɔna-kakyɛ kanwii kafɔɔ ntoofũ atesaa lɛma kofokofoko di Yordan kufĩ katunkɔ lɛkyɛ. SAATE nwu kpɛmblatɛ Mose niayɔ ka aata ma."

8 Di basuɔtɔ nwu layefe ni osuku alɛ bɔɔlaatɛ ni kasɔ nwu nsũ yi, ni di Yosua latɔkɔ ma alɛ, "Bidie bikyɛ biɛlaanyu kasɔ nwu, biɛkpana letembi lɛka. Nni sɛmaa biekple biwa ɔkyɛ nii. Kamawii atrebi nta ye ninfũ, di Silo di SAATE nwu anu." 9 Nioso basuɔtɔ nwu lasifi baalaafenfe di kasɔ nwu. Baakpana letembi lɛka di kukũ suoto, okpoo, okpoo di akyuu akuɛnsĩ, ni baakple baawa Yosua nfũ di kasiɛkɔ nwu di Silo nɛ. 10 Ninfɛ di Yosua lawii atrebi aata ma di Silo di SAATE nwu anu, nfa kafɔɔ aasɛ kasɔ nwu aata Israel batii di ana lɛma letembi kanya nɛ.

11 Atrebi owii nwu latika di Benyamin kɔna, di kafaabi, kafaabi kanya. Kasɔ ka baata ma ni nte di Yuda ku Yosef ana obo:

12 Di katoo-kasɔ lɛkyɛ yi, kɔmɛ lɛma lakye kasɔ di Yordan, kuafe di Yeriko lɛyɔnsa katoo-kasɔ, ni kuakyɔɔ lekpenkpe kale kufĩ kamɛɛkɔ anu, kuabadie di Bet Awen ɔfaafuu nɛ. 13 Kɔmɛ nwu ladie ninfa kuawaalɛ kualaadu Lus kala-kasɔ lɛyɔnsa (nfa ninle Betel nɛ), kuasoo kuasifi Atarot Adar di Kala Bet Horon kala-kasɔ lɛkpenkpe suoto.

14 Kɔmɛ nwu ladie di lekpenkpe le niɛkyɔɔ ni Bet Horon anu di kala-kasɔ, kuamunikĩi di kala-kasɔ kuafe kufĩ kamɛɛkɔ lɛkyɛ, ni kuabadie di Kiriat Baal (nfa ninle Kiriat Yearim nɛ), Yuda batii okpoo. Nkũ niale kufĩ kamɛɛkɔ lɛkyɛ kole nɛ.

15 Kala-kasɔ lɛkyɛ kɔmɛ lakye kasɔ di Kiriat Yearim kasũkunya di kufĩ kamɛɛkɔ. Ninfɛ di kɔmɛ nwu labadie di Neftoa ntu kataakɔ nɛ. 16 Kɔmɛ nwu lasoo kuasifi lekpenkpe le nkpaa niɛkyɔɔ ni Ben Hinom Ɔtaata anu di Refaim Ɔtaata katoo-kasɔ. Kuakple kuasoo di Hinom Ɔtaata kuafe di Yebusi batii okpoo kala-kasɔ lɛyɔnsa kualaadu En Rogel. 17 Kɔmɛ nwu lakɛ di katoo-kasɔ, kuafe di En Semes, kuakple kualaadu Gelilot wɔ niɛkyɔɔ ni Adumim Kobokote anu, ni kuasoo kualaadu Ruben obisuɔtɔbi Bohan Difuɔ katũ nɛ. 18 Kuakple kuafe di Bet Araba katoo-kasɔ lɛyɔnsa ni kuasoo kuabuo di Araba nɛ. 19 Ni kuafe di Bet Hogla katoo-kasɔ lɛyɔnsa kuabadie di Mmba lekpo lɛpanta katoo-kasɔ, di nfũ di Yordan lekpee ni kanya di lekpo di kala-kasɔ. Nkũ niale kala-kasɔ kɔmɛ nɛ.

20 Yordan niɛbla kɔmɛ di kufĩ-katunkɔ lɛkyɛ.

N-ya niale amɛ ya niatuo ni Benyamin nfaabi atesaa di nkyɛ nwu mmuu nɛ.

21 Benyamin kɔna di kafaabi, kafaabi kanya lawɛ sekpoo se mmle:

Yeriko, Bet Hogla, Emek Kesis, 22 Bet Araba, Semaraim, Betel, 23 Awim, Para, Ofra, 24 Kefar, Amonai, Ofni ku Geba- ekpoo lefosi-ɛnyɔ ku sekpooenyii nɔɔ.

25 Gibeon, Rama, Beerot, 26 Mispa, Kefira, Mosa, 27 Rekem, Yirpeel, Tarala, 28 Sela, Haelef ku Yebusi okpoo (nwu ninle Yerusalem nɛ), Gibeat ku Kiriat- ekpoo lefosi-ɛna ku sekpooenyii nɔɔ.

Nle mmle niale Benyamin atesaa ɛɛta ni nfaabi nɔɔ nɛ.