1 Di SAATE nwu kpɛmblatɛ Mose kukpi sɛmaa, SAATE nwu latɔkɔ Nun obisuɔtɔbi Yosua, Mose kyakaakotɛ alɛ: 2 "Kpɛmblatɛ nii Mose ntookpi. Nioso nunua, afɔ ku batii ba mmle bamuu, bilolaa suoto biɛlaawaalɛ Yordan Okle nwu bisifi kasɔ ka komiɛ nlɛ kɔyɔ nta ma ni- nta Israel batii. 3 Kamayɔ kakɔ biala biese kɔkpaa lee nta ye, fɛ mmle latɔkɔ ni Mose latɛ nii. 4 Kasɔ lee nwu kamadie di ɔfaafuu nwu kanaadu Lebanon, kandie kafɔɔ di Eufrate okle kplɛ nwu- Hiti batii kale kamuu- kanaadu Lekpo Kplɛ nwu di kufĩ kamɛɛkɔ. 5 Kuonwii dilɔbafuo ɔtaka oyila di suoto lɛfɔ di ayi lɛfɔ amuu kamɛ. Fɛ mmle lasiɛko ni Mose, nkpo kamasiɛko fɔ nɛ; namadiɛ fɔ diidii ee nsĩ fɔ.

6 "Wɛ osie, faawɛ sɛkambi, diekye afɔ nimaleko batii ba mmle katũ manaale kasɔ nwu atesaa ya laka ntam lata ni bawa lɛma nlɛ kamata ma ni nɛ. 7 Wɛ osie, faatɛ fawɛ sɛkambi kafɔɔ. Lolaa fanyu falɛ feele kufiofa ko kumuu di kpɛmblatɛ nii Mose lata fɔ ni; tankyi ninkũ suoto faafe koletanɛɛ ee kɔmɛntu, alɛ asaa kalɛ fɔ ɔkyɛ di kakɔ lele feekyɛ. 8 Tanta Kufiofa Kukũ ko mmle sɛlaa layɛ di kanya lɛfɔ; bu kũ disi kakũ ku kakyɛ, di mmle fabalolaa fannyu, fambla ni lɛsaa biala bɛɛkpana ni ninkũ kamɛ. Ni dibalɛ fɔ, asaa kafɔɔ nlɛ fɔ ɔkyɛ. 9 Ntatɔkɔ fɔ kanya nlɛ, wɛ osie? faawɛ sɛkambi. Tanta difu lapɛ fɔ; tanta nnɛɛ lafee fɔ, diekye SAATE, Yaa lɛfɔ kamasiɛko fɔ kakɔ lele fɛɛkyɛ."

10 Nioso Yosua latɔkɔ batii nwu banɔɔfotii alɛ: 11 "Bifenfe di kasiɛkɔ nwu kamɛ biɛtɔkɔ batii nwu bilɛ, ‘Bisiisa alesaa lee bitɛ. Diebu ayi atiɛ bibawaalɛ Yordan Okle ninfũ minsifi minaayɔ kasɔ ka di SAATE, Yaa lee kɔyɔ anta ye kambla ye ni kale.’"

12 Kafɔɔ Yosua latɔkɔ Ruben batii ku Gad batii ku Manase kɔna-kakyɛ nwu alɛ, 13 "Binyuma ɔlaa wɔ di SAATE nwu kpɛmblatɛ Mose latɔkɔ ye ni alɛ: ‘SAATE, Yaa lee nwu kɔta ye ɔnyɛɛ ɔtɛ, ni atɔɔta ye kasɔ ka mmle nɛ.’  14 Basɔfɔ lee ku babi lee ku babɔkɛɛ sele lee kasiɛ di kasɔ ka di Mose lata ye ni di Yordan kufĩ katunkɔ, kafɔɔ bakpɛtɛ-suɔtɔ lee bamuu ninkle ni akpɛsaa amuu bawaalɛ bale babilee-suɔtɔ katũ. Dikpeni biɛkyakaako babilee-suɔtɔ 15 diɛlaase di obe wɔ di SAATE nwu mata ma ni ɔnyɛɛ ɔtɛ, fɛ mmle atɔɔbla ɛɛta ye nii, dilaase di obe wɔ di mma kafɔɔ batoofũ ni kasɔ ka di SAATE, Yaa lee kɔta ma ni. Nni sɛmaa, biakple minsifi minaasiɛ di kasɔ lee kamu, nka di SAATE nwu kpɛmblatɛ Mose lata ye ni di Yordan kufĩ katunkɔ diofe ni nfũ di kufĩ ntũ nii."

16 Ninfɛ baatɔkɔ Yosua alɛ, "Kanya lele feediki wo bubabla, kakɔ lele kafɔɔ feekpee wo bubakyɛ. 17 Fɛ mmle buakyɔɔ ni Mose atoko nwaa, nkpo bubakyɔɔ fɔ atoko nɛ. SAATE, Yaa lɛfɔ lete ninsiɛko fɔ, fɛ mmle aasiɛko ni Mose. 18 Otii lele niɛtaka eeyila di sɛlaa lɛfɔ suoto, anankyɔɔ ɔlaa lɛfɔ atoko, di ɔlaa lele fɛɛtɔkɔ ma yi, babalo nwɔ. Osie ko faawɛ, faawɛ sɛkambi kafɔɔ!"